Hosea 9 - Eipomek

Allah arye Israel tam ulamik nang wenepnamuk ning ati, nyabuk yupu

¹ Se, anggun Israel mutuku noutam ululum nango, yuk mutuku noutam nirya unyak nang arye, kanye deibuka ulamak touk, anggunce aning kum wininamlume. Deiyok ara, ani. Na Allah arye anggunti, pia kalekuka melisunun bukni, anggunce nati, ‘Elda nun like,’ tenemunce, batakanululume. Winipmanto ara, ninye arye, sik akunum domice kilapu batakuka, yuk talye yolan kilapu neika ulamak touk, anggunce anggun ni Allah ati, akunum bataknulumce, talye isa ati si erelulume. Tonda, anggun mutuku noutam, ninye arye gandum duk teiklamakak arye, isa el si Bahal dewa uk erelulume. Winiluluma deice arye, sik talye yolan kilapu arye, sik nonguk dekelalamak touk ululume.

² Ati ara, mitik tonun ton, aminyan talak anggun mutuku upnamle gandum duk ap, anggur duk ap ara, mitik danin balamlya ani, kum daplyopura, anggun din patanauk unamsile. Tonda, keting tamun noutam winiryuk memepnamak anggur mek babye, kum danamla ati, aning deice arye ikin upnamsile.

³ Se, anggunda, Israel mutuku noutam ululum nango. Anggun ni Allah Yahweh arye, ‘Pia teleb mutuku arepsiniba, asukumuk unamlume,’ nyabuka, kintinipsukce areamsuk mutuku noutam ara, pia asukumuk kum unamlume. Efraim yala nang arye deiamikba, dadeipdanin yangalamikce, delinyak nang ara, amutuku kum unamlum bukni, anggunda adiparyuk tamubuka, Mesir mutuku uk binuka unamlume. Tonda, anggun yala nang bukni, yuk nang bokuka, Asyur mutuku bobisikiba, amutuku noutam arye, malye kwaning dinamlume. Ara, na Allah arye, ‘Na mapu ara, adin ning pia kum dinamake,’ nyapdeiamsisirye, ‘Aning dina ara, meme. Aning dipmunyopura, na dam ton kum yanamlume,’ nyapdeiamsise ninguk, talye mangkau asa dobuka dilulume.

⁴ Amutuku noutam unamlum talak nirya ara, anggunce anggur mek ton dobuka boyamunce, ‘Allah ati kam ning obuka boyanarye, arenamap ning ara, pia teleb kipdeibibiba, Allah arye kanye deipnamsilʼ tenen, na Allah Yahweh ati arelyanganamlum deice arye, anggur mek kum diklopnamlume. Atalak ara, anggunce kam ning obuka arepnumunya babye, na Allah Yahweh eipnirye, kanye kum deipnamsine. Aning boyanuka, na dam yanuka arena pia meme. Anggunce, kam ning obuka, na dam arelyamunya babye, ninye dipneura, wein sum arye dilamak roti kwaning ara, na si erenyak nang arye, aning pia kum dilamak touk upnamle. Ara, aning boyanuka dibikcopura, adeice arye sik bidamnye aryuk, malye kipdeipdakiba, na dam ton kum yatinge. Deiyok ara, ani. Ara, anang nirya arye, aning dobuka dinamaka ara, na si erebuka kina ati, kum dilulum bukni, talye din patana ati dilulume. Anggun patan ninguk tenepmunyopura, ato ning dobuka, na si eren aik dam bobinuka arelbana ara, pia kum boyanganamnulume. Winina ara, meme nyapsine.

⁵ Ura, nara Allah Yahweh, na si erena ati, mambul weik sum ap, weik kwalya kwalin sum ap, yuk weik sum nirya ara, yata wiripnamalum do? Na Allah arye, ‘Asum noutam, mambul weik sum tenepmunce, weik kwalya kwalibuka dimunce, na siuk erepnamnulume. Asum ara, na Allah Yahweh ati si erenamnulame,’ nyapdeipsise sum nirya ara, anggunce pia kum arelyanganamnulume.

⁶ Tonda, ninye mal olan talak akunum yalyopura, ninye weik tonun obikcopura, atalak batakikiba, amutuku tuba unamak nang ara, bai tam sakuka, bikbik abuka bindoptinga babye, aminyan talak yuk mutuku nang arye yanuka, tapu koupsikirye, yuk mutuku bobinamsiake. Ara, sik Mesir mutuku nang yanamak talak ara, anggun adiparyuk bulubuka deipsikirye, bobuka sik mutuku tamubuka bobinamsiake. Atonun, yuk talak ara, sik Memfis mutuku nang arye yanuka, anggun Israel nang weik tonun opsikcopura, tuku uk luknamake! Winipsikcopura, anggun ulamlum mutuku ap, asik ap, oldemuk akunum uplyopura, maning ap, dola ap, talye tiklamle tace ning nirya ara papnamle. Winiplirye, anggun asik oldemuk bataknamlum aik pum tam ara, anggun nirya arye talelamlum bona ap, dekna weik ning perak ap, anggun asik koproba dolamlumak nirya ara, dola paplirye tiknamlarya.

⁷ Ati ara, anggun moubuka kekeplulume! Na nabi Hosea birye nyapsine. Weik wenen sum akunum dam uple. Ara, Allah arye yu uplyopura, anggun Israel nang nirya ati, wenepsilirye, ikin deipnamsile. Ninye arye yuk-yuk ning nirya, malye ulamikce ning, dengna dolon sum upnamla ati nyapne! Winiplyopura, sik Israel nang nirya ara, ikin ning dopropnamake. Bukni, sik Israel yala nang arye, wini talak ara, winibuka nyanyake. “Kume, nabinye birye nyasulul yupu ara, nunce diba kum tenenyabe. Allah el Pia Teleb, Lek Dip Kanye areamuknye, nabinye bira, motonanye atonun ulul ati, pia walwal aryuk nyalule,” nyabuka, nalibuka nyanamake. Bukni, na kele. Anggun Israel nang arye, anggun malye winin ning, yuk-yuk ning nirya akunum winiluluma ati, Allah arye nyasulul yupu ap, na nabi Hosea birye nyasunun yupu ati, anggun aululum nang arye, ‘Ayupu ara, dabataknuyabe! Nun like, ayupu kum kekepnamabe,’ nyabuka batakalulume.

⁸ Bukni, dipkoprob nyapsine. Allah arye wipdeipnukba, el yupu lak nyana deiyoknye, nabinye unune. Ati, anggunda el mapu koproba, anggun Israel yala nang ara, ‘Kanye mouplulume! Allah arye wenepnamsile,’ nyapsine. Ara, ‘Mangkau kanye bobuka, talye lukparabuka, tuba malye-malyeuk ubiceba, Allah arye kanye imun weik ning, anggun wenena ati arepsilyak,’ tenen ati, ‘Anggunda kanye mouplulume,’ nyapsine. Bukni, na banun mutuku nirya ara, sik Israel nang arye nati, ‘Anye nun likʼ tenen, ‘Opnuyabe,’ tenepnikirye, maka webuka youlamaka atouk, ubuka kirikininyake. Tonda, Allah el si eren aik pum tam babye, Israel nang arye, nati, ‘Nun like,’ tenepnikirye, ikin ning dobuka, na nong deice delininyake.

⁹ Anggunce malye winilulum ning nirya ara, pia malye weik winilulume. Ara, sik Gibea mutuku nang arye, malye winin ning weik talibuka winilamikce, malye kipdeipdayik touk, anggun amutuku ululum Israel nang babye, atonun winilulume. Winiluluma ati ara, Allah arye anggun malye winilulum ning nirya ara, tuba tenipsilirye, wenepnamsile. Ara anggun malye winimunye ning atonun, dengna arepsilirye, wenepnamsile. Nabi Hosea birye, sik Israel yala nang ati nyabuk.

Allah arye, sik Israel nang minop talak teleb ulamik ning ap, atalak malye ulamik ning ap ati, nyabuk yupu

¹⁰ Allah Yahweh arye nyabuk. Se, Minop talak ara, narye anggun Israel nang ati ‘Melibuka lyepnamne,’ tenepsirye, deiya koubuka melilamsise talak ara, anggunti kanye deiamse. Winipmanto ara, ninye arye, mek pia kum sukum, pia kata mutuku padan gurun noutam balamikca ani, anuotam arye, pia teleb anggur tapu duk moulamlya eibikirye, pia kanye delilamak touk, narye anggunti, kanye deipsise. Tonda, winipmanto ara, arah yo duk minop moulamleba, ninye arye eibikirye, aning dakuka dibikirye, to nyaliba, kanye pia delilamak touk, narye anggun apu yapu ati eipsirye, pia kanye deipse. Bukni, sik adiparyuk, Peor mutuku dup biyik talak ara, isa si Bahal, si erelamik. Winilamikce, isa el si Bahal ati, kanye deiamikce, ‘Elda, nun ni unamsila ati, el siuk erenamabe,’ nyabuka, el siuk erelamik. Bahal isa si erena ati, pia alye daktingce, malye kanye bobuka engepting bukni, aning kum winilamik. Anggun apu yapu nirya ara, isa si erelamika deice arye, sikce sik bidamnye ati, malye kipdeipdayike. Na Allah arye, isa Bahal ap, sik amalye un ning winilamik nang ap ati, ‘Pia na lik,’ tenenune. Ato ning ap, ato nang ap ara, na dam pia kum yatinge.

¹¹ Israel nang nirya, sik mambul weik tenenyak ning nirya ara, kum danamle. Winipmanto ara, im noutam lakuka balamle maka, lakuka pia bileba, kum elilamak touk upnamle. Winipnamle talak ara, anggun yala kilapu nirya ara, mi pia kum bopnamake. Winibikirye, mi ton kum delinamake.

¹² Tonda, mapu tonok-tonok ton deibikcopura, nena mitik tonunuk unamake. Unamak mapu nirya ara, narye dolonamne. Winipnirye, tonoknye ton batakniba, kam pia kum unamake. Wenena ati, anggun mapu nirya ara, narye bataknirye, sik malye winin ning ati, namin kibuka kum melinamne. Winipnyopura, anggun yala nang kum kipdeipnirye sirya daknamsine. Ati, se anggun Israel nango, narye anggunti, akunum bataksinirye, bindopnyopura, anggun weik ikin asa unamlume!

¹³ Minop talak ara, nara Allah Yahweh, sik Efraim yala nang ara, Israel yala nang nirya ati, pia kanye deiamse. Winipmanto ara, teleb weik asik Tirus mutuku, urasin pia teleb mutuku uamukba, ninye nirya arye, kanye deiamik talak ara, anggun Efaim nang ton atonun tenilamsise. Bukni, wini talak arye, dipdongobuka oyanamle talak ara, weik tonun wenepnamsina ati, anggun Efraim yala nang arye, anggun mapu dobuka, ninye on nang dam bobinuka deipmunyopura, amapu weik tonun, obuka sirya daknamake. Allah arye nyabuk.

¹⁴ Nyabukopura, nabi Hosea birye, tamubuka nyabuk. “Se, na ni Allaho. Ati ara, sik Efraim yala nang nirya ati, ikin yata ning arenamlam do? Na Hosea birye, yata ning moroptiniba, ance aninguk areptum do? Winipmanto ara, sik wenena ati, sik kilapu nirya ati, akilapu ara, mi bona kumce, you un ninguk kipdeiptum do? Tonda, mapu deiptinga babye, sik nin yapu arye winiryuk mapu ati, moum yung cen ning areptum do? Ato ninguk areptumce weneptum do, kum do?’ tenen, nyabuka moropkine na nie,” nyabuka, nabi Hosea birye nyabuk.

Allah Yahweh arye, Israel ninye wenepnamle ning ati, nyabuk yupu

¹⁵ Hosea birye nyabukba, Allah Yahweh arye tamubuka nyabuk. “Kume, Israel nang arye, malye winin ning talibuka, malye weik winilamikce, tuba wininyak ning nirya ara, Gilgal mutuku arye, deiya koubike. Aning winibika deice arye, atalak ara, narye sik anang ati, ‘Na lik, upnile,’ tenenlamse ninye nirya ara, deiyok kouamse. Deiyok ara, sik malye winin ning nirya winipnin yangalamika atia. Ati, sik anang nirya ara, na mutuku arye, yakuka dopkwetepniba, yuk mutuku uk binamake. Narye sik anang ati, ton bico kum tenenamne. Tonda, sik ninye deiyok nang nirya arye, mandipna kanye bobuka, narye nyapdeipse yupu nirya ap, na ap ara, yaninauk unyake. Ati anang nirya ara, kanye kum delinamsine. Tonda, anggunti bicoe tenepsinirye, anggun ton pia kum talinamsine.

¹⁶ Ati ara, sik Efraim yala nang arye deiamikba, dadeipdanin yangalamika ani, deiamik nang nirya, ara, sik Israel tam unyak nang nirya, narye deiyok kibuka akunum wenepsirye, tuba wenenamsine. Winipmanto ara, ninye arye kouamikce ning koulupliba, duk pia kum moulamle touk unamake. Tonda, yating koululamle touk, unamake. Aning nong ara, ani. Ara, sik anang nirya ara, mapu ton pia kum delinamake. Mapu mitik tonun ton deiptinga babye, sik pia bico tenen, kanye delinamak mapu nirya ara, narye obuka sirya daknamne. Allah arye, Hosea biti nyabuk.

Nabi Hosea birye, sik Israel nang winilamik ning ati, nyabuk yupu

¹⁷ Allah arye el mapu ati, kanye deiplirye, tuba bicoe kum tenepnamle. Deiyok ara, Allah elce nyalul yupu nirya ara, pia moubuka kum kekelamika atia. Aning winilamika ati, na si erenun Allah, elce sikti, bataknamle. Elce Israel nang akunum bataklyopura, sik anang nirya arye, tonok sukum una kumce, mutuku sirya, im sirya nirya ati, epra banauk unamake. Nabi Hosea birye nyabuk.