Hosea 7 - Eipomek

Israel ninye malye winilamik ning ara, Allah arye tuba tenelamuk ati, nyabuk yupu

¹ Allah Yahweh arye, sik Israel nang ati nyabuk. Ara, na mapu sik Israel nang ati, ‘Ikin ulamikbuk, wini talak ara, tuba pia teleb kipdeipnamne,’ tenepse bukni, akunum ‘Winipnamne,’ tenepse talak ara, sik iknapye tam (arah selatan) unyak Israel nang, Efraim yala nang ap, tonda sik dabu tam (arah utara) unyak Israel nang ap, weik asik si ara, Samaria mutuku unyak nang ap ara, pia malyeuk winilamik bukni, duknulamik ning ara, akunum lak kibukba bikse. Ati ara, na pia elinun ning ara, sik malye winin ning ara ani. Ara, sikda talye yupu nyanyake. Wininyak touk ton, yuk nang, sik bisik noutam bakibuk, anang arye, sik bona ubula dolonyake.

² Wininyak bukni, sikce moubuka kum teninyaka ara, ani. Ara, na Allah arye, sik Israel nang nirya ara, sik kanye talima noutam malye un ning nirya uamlya ara, pia lak elinirye, bikinune. Akunum biknyopura, tuba teninauk unune. Ati ara, winipmanto, sik dana-dana tam nirya ara, sik malye weik wininyak ning ara, antanap dongobuka ulyeba, atuba el linauk unune. Malye wininyak ning ara, na urasin dam tuba ulula ati, aning tuba elinune, nyapsine. Allah arye nyabuk.

Israel nang, sik malye winilamik ning ati, nyabuk yupu

³ Allah arye ayupu akunum nyabukopura, ayupu ton dukgobuka nyabuk. Sik Israel nang nirya arye, malye weik wininyak ning arye, sik mutuku ninye deiyoknye Raja bira, eiplirye kanye delilule. Tonda amutuku noutam nirya, Raja amu tam deiyok-deiyok nang arye, amalye ulamikce ning eibikirye, sik babye, ‘Moubuka wininyakʼ tenen, kanye deibuka, teleb unyake.

⁴ Sik Israel nang nirya ara, talyeuk unyakce, yolanauk unyake. Sik anang nirya ara, batakna kumce, tuba-tuba malyeuk unyake. Winipmanto ara, sik wininyakce teninyak ning ara, ninye uku sekikirye, ‘Uku buppu weik tonun diliba, roti kwaning dapnamanʼ tenen, roti bun ning kintiniplirye, uku sekliba, uku weik tonun dilamle touk, sik anang ara, atonun wililule. Auku ara, tuba weik arye dilamle. Mitikto kum kipnin balule.

⁵ Tonda, sik mutuku ninye deiyoknye Raja bira, ‘Mambul weik sum upmala ati, weik kwalya kwalipnuyabe,’ nyabuka, sik anang nirya arye, sik deiyoknye Raja ap, tonda sik amutuku talibuka yupu nyana ati, deiyok-deiyok nang ap nirya arye, kanye wangalamak anggur mek dinmana ani, sik kanye pia wanganyake. Winipliba, sik anang nirya arye, pia malye winin ninguk wininyake. Ara, malye yupu nyakce nang arye, yuk nang ati, alye nyabuka, nalibikirye, akutulamak touk, sik adeiyok nang babye, ansinibikirye, ayupu atonun nyanyake.

⁶ Ara, talye ati kum nyapne. Deiyok ara ani. Sik Israel nang talibuka, deiyok kilamik nang ara, sik kanye pum tam arye, ‘Nun ni Raja opnamapʼ tenen, yu weik tenenyak ning ara, uku weik dilamle touk ulule. Winipmanto ara, sik talima noutam malye kanye teninyak ning ara, lukunyan uku buk, pia dilamle touk ulule. Alukunyan nirya arye, uku pia dinmalya ani, beren tam talak ara, uku buk weik tonun dilamle. Atonun, sik pia yu weik upnaba, malye tenenyak ning ara, weik tonun tabaknin balule.

⁷ Sik nirya ara, weik uku dilamle touk unyake. Ara, sik kanye pum tam arye, sik mining nang, sik deiyok kiamikce, talibuka unyak ninye deiyok nang tonok, ‘Adeiyok nang opnamap,’ tenenyake. Ati, sik ninye deiyok nang, Raja-Raja nirya ara, pia tuba-tuba dukdongobuka, olanauk ulamik touk, tuba olanauk wininyake. Atonun winilamikca ani, urasin pia malyeuk unyaka ati, sik kan-kan arye, ninye tonoknye babye nati, ‘Naio, melipsilyame,’ nyabuka, pia kum moroninyake. Allah arye nyabuk.

Israel nang bukni, dabu tam ulamik nang, Efraim tam nang ati, nyabuk yupu

⁸ Allah Yahweh arye, ayupu ton nyabuk. Israel noutam unyak nang bukni, Efraim birye deiamukba, dadeipdanin yangalamik nang, sik dabu tam (arah utara) unyak Israel yala nang nirya ara, sik dana-dana tam unyak yuk mutuku nang ap, ansinibuka unyake. Tonda, sik ap neika, yuk mutuku kilapu ara, boyanuka, dobikirye unyake. Wininyaka deice arye, sikda malyeuk kililanyake. Winipmanto ara, roti kwaning dapmakiba, ton tam ara, opmalye bukni, ton tam ara, imbik tuba ulamliba, dipmanto kum ulamak touk, sikda malyeuk wininyake.

⁹ Aning wininyaka deice arye, sik Israel yala nang arye, pia moubuka kum teninyake. Ara, sik ap, yuk mutuku nang ap, ansinibuka neika talye unyaka deice arye, sik mikip una deiyok ning nirya ara, wanganyake. Sikda pia wisi dakiba, mikip ara, mitikto diamuk unyakce, wisi nang ulamak touk akunum unyak bukni, sikce aning moubuka tenina kumce, kum bikinyake. Ati ara, sik ap, sik mutuku ap, malyeuk upnin balye bukni, aning ara moubuka kum teninyake.

¹⁰ Sik Israel nang arye, maknya kintinibuka kwalinyaka ara, akunum lak upliba, nong ulule. Sikda malyeuk wininyake. Winipmanto ara, ninye yupu bokolin talak ara, tonoknye tiklirye, yuknye biti, ‘El malye ulamlye ning ara ani, ani,’ nyabuka, laka nyalamle touk, sik kwalinauk unyak deice arye, malye kililanyake. Sik kwalina uk unyakce, malyeuk unyak ning nong upliba, lak ulul bukni, sikce na Allah ati ton, ‘Nun ni birye melibuka lyepsutu do?’ tenen, kum elyanganinyake. Tonda, ‘Allah arye yata nyapnamsil do?’ tenen, na dam tamubuka kum yanganyake.

¹¹ Israel mutuku noutam unyak nang bukni, Efraim birye deiamukba, dadeipdanin yangalamik nang, sik dabu tam (arah utara) unyak Israel yala nang nirya arye, ‘Yata mutuku nang arye melipsiting do?’ tenen, otam binapna, atam yanamana kinyak nang unyake. Ara, mitik maka el si merpati maka arye, ‘Dan binuyap do?’ tenen, kanye tenina kumce, talye lukparabuka lakuka, otam lakuka binapna, atam lakuka yanamana kilamle touk, sik Israel nang babye atonun kiltonyake. Wininyaka ara, walwal arye unyake. Dipkoprob aning atouk, ‘Yu nang arye yanuka opsicakʼ tenen, anggunce Mesir mutuku nang ati, ‘Se nun kayapu, anggunda yanuka melipsululume,’ nyabuka morolamike. Atonun ton, Asyur mutuku unyak nang ati, binuka ‘Se nun kayapu, anggunda yanuka melipsululume,’ nyabuka morolamik. Winibuka morolamik bukni, sik yuk mutuku nang arye, kum melilamike.

¹² Sikce yuk mutuku nang ati bitingce, ‘Melipsululume,’ nyabuka moroptinga babye, narye aning nirya kum kipdeipnamne. Sik Israel nang arye, yuk mutuku nang ati, tuba bakirye morobikcopura, narye sik Israel nang youna ati ara, el si jaring tapu wepnamne. Winipniba, ninye arye talye maka youlamle touk, anang youpnamle. Winipmanto ara, ninye arye, ‘Maka youpnamapʼ tenen, tapu welamak touk upnamne. Ara, narye sik Israel tam unyak nang arye, malye unyak ning nirya ara, akunum bikse ati, aning ara sik Israel nang wenena ati ara, akunum kintinipse.

¹³ Ati ara, sik Israel yala nang nirya ara, bicoe. Anang ara weik tonun wenebuka opnamna ati, sikda bicoe. Ara talye ati kum bukni, deiyok ara sikce nati, akunum bataknikce, luba kipnika ati nyapne. Tonda, sik anang nirya arye, na nyapdeipse yupu nirya kum kekepnikce, yaninyaka ati, adiparyuk anang obuka sice buklopnamne. Narye, ‘Sik nirya, ikin unyaka noutam ara, lyepnamne,’ tenyamse bukni, sikce nati talye yupu uk nyanyake.

¹⁴ Tonda, sik Israel nang nirya arye, sik kanye pum tam aryuk, dipkoprob na Allah ati pia kum moroninyake. Talye sitang deice aryuk, moron yupu nyaninyake. Dipkoprob nati, sik amsuna deice mapman talak arye morolamniting bukni, nati diba tenena pia kum nang arye, weik tonun engelamak touk unyake. Atonun sikce, sik nong dila sakalakirye, “Se, gandum duk ap, anggur duk ap, arepsilyame!” nyabuka moroninyake. Wininyak bukni, narye, ‘Winipnamlume, aning ara pia kum wininamlume,’ nyapdeiamse yupu ati, yanibikirye, na Allah ati batakaninyake.

¹⁵ Aning ara wininyak bukni, dipkoprob naryuk sik anang nirya ara, naryuk nepdeiamse. Winyamsirye, sik mikip kipdeiamse. Winyamse bukni, sik anang nirya arye nati, ‘Allah ati ara, wininamabe,’ nyabuka, malye yupu nyaninyake. Nyabikirye, na yupu ara, yaninauk unyake.

¹⁶ Sik anang nirya arye, na Allah ati batakaninyak bukni, tuba-tuba isa, el si ara dewa-dewa, tonda Bahal ati, dipkoprob mikip kum ning, talye ninguk ulul bukni, el si erenyake. Aisa ara, sikti, pia kum meliptue. Winipmanto ara, sik anang ara, ‘Mal dopnamapʼ tenen, yin talibuka pipnamak bukni, yin malye arye mal dopmanto kum ulamak touk unyake. Tonda, sik talibuka unyak ninye deiyok nang nirya ara, kwalina deice arye, maknya kintinin yupu nyanyake. Wininyaka ati ara, lo arepniba, yu nang yakirye, pia yu parang boyanuka, aya arye sik anang nirya ara, opnamake. Bukni aning nirya ara, narya, winipniba, sik Mesir mutuku unyak nang nirya arye, Israel yala nang ati, akutunamake. Aning nirya ara, Allah arye nyabuk.