Hosea 4 - Eipomek

Allah arye imam-iman nang ap, yuk talye Israel ninye ap ati, “Anggunda, pia malye winilulume,” nyabuk yupu

¹ Allah el si Yahweh arye, nabi Hosea biti laka nyabukba, Hosea birye sekuk. Se, anggun Israel ninye ara, Allah Yahweh arye nyalisilye ninguk, moubuka kekepnululume. Nun amutuku ninye malye wininyap ning ara, Allah elcuk kel bikisilirye, nyasulule. Allah arye nyapdeibuk yupu ara, nun ton moubuka kum kekenyaba ati ara, kum dobolbanyaba ati, Allah el winilye ning kum bikinyabe. Tuba walwal ninyeuk unyabe. Tonda, nunce yuk nang ap, teleb kibuka neika kum unyabe. Bico kum tenelamyap deice arye, amutuku unyap ninye ara, nun min arye domupu kilapu ara, deiyok kum uamuk bukni, nun talye kanye bobuka, akilapu batakibirye, yuk kilapu dolonyabe. Tonda, Allah ap, el winilul ning ap ati, moubuka kum bikinyabe.

² Tonda, nun wininyap ning ara, ani. ‘Na kwit ikin ninguk doprotu’ tenen, sulongolanauk unayabe. Tonda, tilila yupu nyana ap, ninye olana ap, ubula dona ap, nun mince domupu kilapu batakuka, yuk talye kilapu yolana ap uk, wininyabe. Tonda, nun malye kibuka, ninye oldanauk unyaba deice arye, ninye malye winin ning ara, pia weik uplirye, yuk nang sik mining ininguk dilamak touk wininyake. Olana weik unyake.

³ Ati ara, malye-malye ning pia weik wininyaba deice arye, malye-malye winin ning weik tapaknin balule. Adeice arye, nun mutuku noutamak, aning-aning nirya kounamap ning nirya babye, pia kum papsilirye, kum danin banamsile. Nunce wa wibuka, yala ning kounyaplulum bukni, teleb ubuka kum palule. Tonda, nun mutuku talye kam ulul ning ap, maka im deice lakuka balamak ning ap, tonda amutuku mekwen pum noutam ulul ning mek pum bal ikan ap nirya ara, dibuka kum danin banamake. Winibicopura, nun amutuku unyap ninye nirya ara, awininyak ning nirya eibibirye, malye kanye bobuka unamabe. Allah arye, nun Israel ninye ati nyapsile. Hosea birye nyabuk.

Allah Yahweh arye, sik imam nang ati, wenebuk yupu

⁴ Allah Yahweh arye nyabuk. “Se, anggun imam-imam nang arye, ‘Naʼ tenen, ninye ati malye kilina ap, derelana ap unyak ning nirya ara, narye anggun imam nang ati, tamubuka derepsine. Anggunce winilulume. Yuk nang arye nunti, ‘Anggun imam-imam nang ara, teleb nang unyake, tenenamsiyak’ tenen, anggunce yuk nang ati “Malye winilulume,” nyabuka, wenepmunce sikti, dipdongobuka taruk tapne arye bokolulume. Tonda, anggunce ayupu nyalulume. ‘Kume, Israel ninye arye malye wininyaka ara, nun deiyok kume. Ara, sik yuk nang arye malye wininyake,’ nyabuka, yuk nang ati, kum wenenamlulume. Dipkoprop deiyok nang ara, anggun imam-imam nang uka. Ati, nara anggunti, yu unulule.” Allah arye nyabuk.

⁵ Nyabukce, ayupu ton dukdongobuka nyabuk. Anggunda, malye weik winilulum ning dekna ati ara, luba kanye bon ning arepnamsine. Winipniba, anggun imam-imam nang arye, keting noutam babye, lukunyan babye bisik teleb ubuka kum banamlume. Anggunda, talye kwepdanin bamunyeba, anggun keil yan dum duksiliba, saknamlume. Lukunyan noutam bisik banmamunce, kuna ati dengkepdanin bamunce, anggun keil yan dum duknamsile. Aning atonun, keting noutam babye, anggun imam-iman nang babye, mangkau arye kwepdanin bamunba, anggun keil yan dum dukunamsile. Tonda, narye, ‘Nyanamlulume,’ kum nyapsise bukni, anggun kanye aryuk, ‘Allah el yupu laka nyabuka peterenusiyabe,’ nyabuka tilila yupu nyanyak nabi nang babye, atonun keil yan dum dukliba, saklamak touk unamake. Ara, ‘Dipkoprop teleb bisik banamap ning ara, ani,’ tenen, kum biknamaka ati nyapsine. Anggun malye winimunye ning dekna ati, Israel yala ninye wenebuka opsinirye, sirya daknamsine.

⁶ Na Allah arye, wipdeiamse ninye, na mapu koprop Israel ninye ara, wenebuka opnamne deiyok ara, ani. Sikce na Allah wininye ning ap, na nyasinye yupu ap, na si ap kel bikna kum atia. Israel ninye arye nati, walwal tuba unyaka deiyok ara, sik iman-imam nang atia. Anggunda, na si erenyak aik pum tam, pil dona deiyok nang ululum bukni, anggunce, na wininye ning nirya kel bikna ati, ‘Aning ara, nun like’ tenen, ‘Like,’ tenebuka ululuma ati, sik Israel ninye elisinyakce, ‘Nabi nang arye, malye winilyak touk, nun babye malyeuk wininamabe’ tenen, sik babye malyeuk wininyake. Ati ara, narye anggun imam-iman nang nirya ati, ‘Sikda, na si eren aik pum tam, pil dona deiyok nang dipkoprob kum unyake,’ tenesinirye, anggunti akunum bataknamsine.

⁷ Na si eren aik pum tam, pil dona deiyok nang arye, weik tonap tabakuka malye wininyaka deice arye, Israel ninye weik arye, tonap na dam malye weik wininyake. Deiyok ara, anggun imam nang aryuka. Israel ninye nirya arye, malye weik wininyaka deice arye, talye ning Isa Mutuku Dongonye si erenyake. Ara, Isa Mutuku Dongonye si erenyaka deice arye, nati batakaninyake. Sikce mapu deibikirye, dadeipdanin balamica ani, weik upnin balamak touk, sikce malye winin ning pia weik tabakuka malye winipnin banyake. Ati nara teleb ubuka ununye mambulnye birye, weik dirina unun bukni, sikce nati batakaninyaka anya arye, sik wenena ati narye sikti, weik arye kanye delilamse ning ara, tamubuka yu upmanile. Allah arye nyabuk.

⁸ Nyabukce, ayupu ton nyabuk. “Anggun kele. Na mapu koprop Israel ninye arye, malye winibice talak ara, ‘Allah arye nun malye winin ning kum daneipnamsil’ tenen, kam ning boyakiba, anggun imam nang arye aning obuka, na arena ati, uku dalulume. Ati ara, anggun imam-iman nang arye, ‘Kume, Israel nang malye winipmace talak ara, sik malye winin ning dekna ati, teleb kipdeipnamsil’ tenen ning boyakiba, nunce aning nirya bokuka dopropbibirye, aning ara, nun ton dobuka dinamabe. Tonda, aning bokuka doprobibya deice arye, nunda bona weik talin nang unamaba anya arye, sik Israel ninye malye wininyak ning ara dauaplye,’ tenelulume.

⁹ Tonda, anggun na si eren aik pum tam, pil dona deiyok nang, imam nang ululum bukni, malye ning weik winiluluma atonun, sik Israel ninye nirya babye, malye weik wininyake. Ara, urdem ati kume. Anggun deiyok talibuka peterelulum nang malye ululumba, yuk Israel ninye eibuka kel biksikirye, anggun malye winilulum touk, anggun taliplum ninye babye malye wininyake. Anggun nirya ato touk, malye weik winiluluma ati ara, anggun imam nang babye, sik yuk daunyak Israel ninye nirya babye, weik arye wenebuka opnamsine.

¹⁰ Tonda, Israel ninye sik din ning nirya ara, dinamak bukni, kum boupnamle. Winipmanto ara, sik talye-talye uk yolalamak kilapu ara, sik talye nang ap, yolanyak deice arye, bona weik talinyake. Bukni, sik akilapu ara, mapu kum deiplilamak touk, Israel yala kilapu nirya, sik mapu ton pia deipmanto kum unamake. Aning nirya ara, urdem ati kum winipnamle. Deiyok ara, na Allah Yahweh, sik ni koproba unun bukni, nati bataknikirye, talye ning ati, ‘Nun ni koproba,’ nyabuka si erenyake. Wininyaka deice arye, yu weik unulula ati ara, anggunti wenebuka bataknamsine.” Allah arye nyabuk.

Allah Yahweh arye talye ning ati, ‘Nun ni koproba,’ nyabuka si erelamak ninye ati, wenepnamle yupu

¹¹ Allah Yahweh arye nyabukce, ayupu tonap dukdongobuka nyabuk. Se, sik Israel ninye na mapu tenenun nang nirya ara, anggur mek, kanye wangalamak mek dibikirye, sik kanye wangabikiba, adeice arye, sik kanye moubuka kum teninyake. Sik teleb kibuka, un ning batakikirye, talye kanye bobuka unyake. Tonda sik nirya arye, na Allah Yahweh ati, akunum bataknikirye, yuk talye ning ati, ‘Nun ni koproba ani,’ nyabuka, isa si erenyake. Israel ninye arye, na Allah ati batakaninyaka anya arye, ‘Talya yoltalamak kilapu ati yonamabe,’ tenebuka, malye weik wininyake.

¹² Tonda na mapu koprop, sikce talye yo ati asinyake. ‘Se, nun ni yata wiripnamap do?’ nyabuka asilenyake. Tonda, sik taruk arye, puturubuka delinyak ning, talye yo uk ulul bukni, ayo ati, “Se, nun ni, aminyan talak ara, yatato ning nun dam yanuka winipnamsil do? Nunce yata wiripnamap do?” nyabuka asilenyake. Israel ninye nirya arye, talye Isa Mutuku Dongonye si erena ati, ‘Se, nun ni ani’ tenen, pia pataliba teninyaka deice arye, pia walwal ninye winilamak touk, winipnin banyake. Winipmanto ning ara, ‘Yo bok dopropnamap’ tenen, talye-talye yolanyak kilapu arye, sik akanye yapu ati, bataklamaka touk, Israel ninye arye, na Allah ara, sik ni koproba unun bukni, sikce nati, akunum batakaninyake.

¹³ Winibuka Isa Mutuku Dongonye si erebikirye, el si arena ati, kam ning ap, teleb arin ning ap, bai tam mutuku deice ap, mutuku dup deice ap, bobinuka arebikirye, Isa Mutuku Dongonye siuk erenyake. Tonda, weik yo tikamlirye, yo bok wamlyak amu tam bok kunuklamlyak bikirye, ‘Asukum ara, weik yo tikamlirye, teleb loak anya arye, nun Isa Mutuku Dongonye si erena ati, arenamap ak ara, amutuku ara, pia telebe,’ tenebikirye, Isa Mutuku Dongonye si erelbanyake. Wininyaka ati, winipmanto ning nyapnusine. Israel ninye, sik kilmapu nirya ara, talye-talyeuk yolanyak kilapu atonun unyake. Tonda, sik yamal kilapu babye, sik min arye domice nang, sik akanye yapu batakuka, talye yuk nang ap, yolanyake. Ara, sikce na Allah ati, batakaninyaka ati nyapsine.

¹⁴ Sik yamal kilapu talye yolamak nang ap, sik kilmapu talye yolamak nang nirya ati, na Allah arye, anggun nirya ati, wini talak aryuk kum wenebuka opnamsin bukni, aminyan talak ara dipkoprob wenepnamsine. Tonda, sik yamal kilapu babye, sik min arye domice nang, sik akanye yapu nirya batakuka, talye yuk nang ap yolanyake. Winibuka malye ubicopura, na Allah arye anggun nirya ati, kum wenepnamsin. Sik malye winin ning ati, weik arye wenepsitinye bukni, akilapu nirya, sik akanye yapu babye, amalye winin ning atonun wininyake. Ara, sik babye yuk mutuku ara, talye yolamak kilapu ap elanyake. Sik akanye yapu babye, isa si erenyak aik dam unyakce, yolalamak kilapu ap, neika manyake. Narye anggunti, wini talak aryuk kum wenebuka opnamsin bukni, anggun nirya ara, moubuka teninamlulume. Se, anggun Israel ninye nirya ara, ‘Anggunce nun like, Allah arye winilul ning ap, el ap el yupu ap ara, moubuka kum biknamabe’ tenen, nati batakanululumce, pia walwal ninye dem ululume. Winiluluma ati ara, anggun bidamnye arye, anggun bidamang ati, malye kililalulume. Aminyan talak ara, narye anggun wenebuka opnamsine. Ati anggunda bicoe nyapsine. Allah arye, Israel ninye ati nyabuk.

¹⁵ Nyabukce ayupu ton nyabuk. Se, Israel ninye arye, malye-malye weik wininyaka ara, anggun Yehuda tam ululum ninye arye, aning eibuka, kum kel biknamlume. Winipmanto ara, sal arye sik min arye domice kilapu batakikirye, talye yoltalamak kilapu dekikirye, neika malamak touk, sik Israel ninye arye, sik ni na Allah ati, batakaninyake. Bukni, anggun Yudea tam ululum ninye arye, ‘Nun babye atonun, malye winin ninguk talibuka unamap’ tenen, Israel ninye winilamak touk, kum wininamlulume. Sik Israel nang kan-kan arye, ton nang arye, “Allah el si erena ati, teleb ubuka arin ning arenamabe,” nyabuka, talye yupu nyaplobikirye, Gilgal mutuku ap, Betel-Awen mutuku ap banyak bukni, dipkoprob ara, nati si kum ereninyake. Dipkoprop malye wininyaka ara, anang arye, ‘Isa si erenamap’ tenen, amutuku duknulbanyaka anya arye, anggun Yehuda tam ululum ninye ap, amalye winin nang ap, amutuku ara bitinye, Gilgal mutuku ap, Betel-Awen mutuku ap, mutuku deice neika welebana meme nyapsine. Tonda, anggun malye weik winilulum ninye arye, ‘Yuk nang arye, dib tenepnamsiyak’ tenen, “Allah Yahweh dipkoprob kam pia aunamle touk, nunce dib yupu nyapsiyabe,” nyalamak ning ara, anggun nirya arye tonap, ayupu kum nyanamnululume. Israel ninye tilila yupu nyabuka, malye wininyaka atonun, ‘Anggun Yehuda tam ululum ninye babye, malye winipmunyak’ tenen, nyapsine. Ati, sik aninye wininyak touk, anggun Yehuda tam ninye atonunuk, kum wininamlulume. Allah arye Yehuda tam ninye ati, nyabuk.

¹⁶ Nyabukce, ayupu ton dukdongobuka nyabuk. Se, sik Israel ninye ara, sapi kil basam arye, weilamak nang yupu kekena kumce, bisilamle atonun ninye unyake. Sikda, na yupu pia kum kekeninyake. Wininyaka anya arye, na Allah Yahweh arye, Israel ninye sik wenena ati winipnamne. Winipmanto ara, domba basam weina deiyok nang arye, domba mapu, lyu weik mutuku maning teleb ubuka palamlak, talye deiplopliba, bai kam do, singa kuse do, adomba opmanto ulamle touk, na Allah arye Israel ninye wenena ati, bataknamne. Deiyok ara, sik Israel ninye ara, kekena kumce, malyeuk wininyaka ati, nyapsine.

¹⁷ Sal arye min arye domice kilapu batakikirye, yuk talye yoltalamak kilapu neika malamak, sik Efraim yala ninye nirya arye batakaninyake. Sikda malye ninguk wininyakce, ‘Isa Mutuku Dongonye siuk erenamap’ tenen, pia pataliba malye wininyaka ati, batakdongopniba, sikda isa siuk, pia erenamake. Ati sik Israel ninye ara, melina kume. ‘Sikda dauplye’ tenen, unamlulume.

¹⁸ Tonda, Israel nang ap, sik kayapu ap, tonok kanye bobuka, anggur mek yu arye, kanye wangalamak mek weik arye dibicopura, sik kanya walwal ulamle. Yu mek weik akunum dibicopura, ‘Talye-talye yolamak kilapu danak unmak do?’ tenen, epra banmaca ani, eibicopura, akilapu ap, neika manyake. Amalye winin ning ara, pia pataliba, ‘Awininyab ning ara, nun alye asa weik unamabe,’ pia kum tenenyake. Tonda, ‘Telebuk uptibiba, yuk mutuku ninye eipsikirye, Israel ninye ara, pia teleb ubuka wininyak ninye ara ani, tenepnamsiyake,’ tenebuka, pia kum tenenyake. ‘Teleb una ara dauplye, malye ubibirye, alye dakdapya babye, ara mambul kume,’ tenenyake. Teleb winin ning ton, pia kum wininyake.

¹⁹ Sik Israel ninye arye, pia malyeuk wininyakce, Isa Mutuku Dongonye si erenyaka ati ara, na Allah arye, weik wenen ning, sik nong deice deipnamne. Winipmanto ara, weik kumanya mikip asa puplirye balamle talak ara, mikuka sesal selamle yo bok, lakuka balamle touk, na Allah arye sik Israel ninye ati, weik arye wenebuka oplopnirye, sirya daknyopura, dipnamake. Sik ap, sik talinyak ning ap nirya ara, kum daneipnamne. Sik dipnamak talak ara, sikce, ‘Se, talye ning, Isa Mutuku Dongonye siuk erenyaba ati, wini talak ara, Allah arye wenebuka opmasile’ tenen, kel bikikirye, sik aninye nirya, alye weik daknamake. Bukni, na Allah arye, aninye dipkoprob opneba, ninye weik arye dipnamake. Allah arye nyabuk. Ara, Allah Yahweh arye, nabi Hosea biti, ayupu nirya laka nyapdeibukba, nabi Hosea birye ayupu sekuk.