Hosea 3 - Eipomek

Hosea ap, el kil ap, neika dukdongobuka una kum ati, nyabuk yupu

¹ Allah Yahweh arye, na Hosea biti nyapnuke. “An adiparyuk tamubuka bilyame. Bimince talye yolana ati pataliba, teninauk ulul kil, el dam bimince, elti kanye deipmince, akil ara, an kil unamle ati, dopnulyame. Dopnalama deiyok ara, ani. Ara, na Allah Yahweh arye, sik Israel ninye ati, kanye delinun bukni, Israel ninye arye, na yupu moubuka kekena kumce, lik tenebuka bataknikirye, talye ning atibuk, ‘Nun ni usulule,’ nyabuka, Isa Mutuku Dongonye si erenyake. Ati, lak lena ati ara, ance talye-talye yolamak kil dopnulyame,” Allah arye, na Hosea biti nyapnuke.

² Nyamnuk ati, narye akil ak, dekna weik kat ning, el si ara perak, koglom deikin (15) ap, tonda gandum ikin pia weik ning, seratus lima puluh kilo (150) ap, anggur tapu duk mek purubuka deiamik ning mitik anun ap, aning deice arye, akil ati binuka dekse.

³ Winipsirye, narye akil ati nyapse. “Anda pia kanye lamapdongobuka, na damuk unalame. Atalak nirya ara, mince talye-talye yolamkik touk, ton yuk nang arye tonoknye babye anti, ton kum dopkitinge. Tonda neika unanam bukni, nara an ap neika kum maptinimnye. Yuk-yuk uk mananame,” nyapse.

⁴ Aning nirya, winipse ning ara, bikilina ati winipse. Winipse ning deiyok nong ara, ani. Ara, sik Israel ninye, sik deiyok nang unyakce, ‘Winiplulume,’ nyan nang ap, ninye deiyok nang, Raja nang ap, Israel ninye kum talinamake. Ara, keting tamun yupa weik noutam arye, urdemuk unamake. Tonda, atalak noutam, sik malye ning kum danana ati, kam ning dobuka, Allah dam arelyanganyak ning ap, Allah el si eren aik bana ap, Allah ap, ninye ap, ansinilina pil dona deiyok nang ap, aning nirya kum danamle. Israel ninye ara, urdemuk unamake. Tonda, talye ning ati, “Nun ni usulule,” nyabuka, Isa Mutuku Dongonye si eren ning babye, kum talinamake. Keting tamun yupa weik noutam arye, talibuka ukirye, mambul kanye bobuka unamake. Allah arye nyabukba, Hosea birye sekuk.

⁵ Winibuka daulamica ani, doyanamle talak ara, Israel ninye tuba tamubuka, sik ni koprop Allah Yahweh atibuk enamake. Winibuka elamikirye, Allah Yahweh el dam yanuka unamake. Tonda, sik deiyoknye bira, Daud birye deibukba, dadeipdanin yangalamik ani, Allah arye tonok deiyoknye, wibuka deipliba, ‘Anye, nun ninye deiyoknye, Raja unamsil’ tenen, el dam tamubuka yanganamake. Winibikcopura, sirya talak, sikce nati ilil upliba, ‘Se, nun ni Allah, elda weik mambulnye’ tenen, el amu tam unamake. Winibikirye, el siuk erebikcopura, Allah Yahweh arye, aning-aning nirya, weik arye yamubuka, sikti arenamle. Ara, sirya talak wininamak ning ati, laka nyapkine. Allah arye nabi Hosea biti, laka nyapdeibukba, sekuk.