Hosea 2 - Eipomek

¹ “Allah arye Israel ninye ap, Yehuda ninye ap, neika tonok mutuku uk dobuka deipliba, sik nirya ara, neikauk unamake. Ara, sik kwit capu ap, sik du yapu ap ati, Ibrani yupu deice arye, asi ‘Ammi’ nyanamlulume. Asi nyanamluma deiyok ara, ‘Allah el mapu koproba’ tenen ati, nyanamlulume. Aning atonun, anggun nirya arye, anggun weit capu kilapu ap, anggun dukulyapu ap ati, Ibrani yupu deice arye, ‘Ruhamah,’ nyanamlulume. Asi nyanamluma deiyok ara, ‘Allah arye, bico tenelul ninye anye,’ tenena ati, asi nyanamlulume.” Nabi Hosea birye nyabuk.

Israel ninye arye, malye-malye weik winilamik ning ati, Allah arye wenebuk yupu

² Na mapu Israel ninyeo, anggunce na batakanululuma ati, winipmanto yupu nyapnusine. Wini talak ara, anggunda na kil atonun kum ululume. Tonda, na ara anggun akanye kume. Ati ara, talye-talye yolamak kilapu arye, ‘Urasin teleb kilapu tenepsikirye, se, akilapu ara yoptibye, tenenamsiyak’ tenen, sik asok deice mil ning ap, bi ning ap likdakirye, teleb baju ongolamak touk, anggun Israel ninye arye, malye weik winilulume. Talye-talye yolamak kilapu arye, ninye yuk nang ap, talye yoldakirye, sik akanye yapu bataklamaka touk, anggunce malye winin ninguk tenibuka umunce, na batakuka, talye ning, Isa Mutuku Dongonye siuk, ‘Nun ni koproba’ tenebuka, isa si erelulume. Awinimunye ning nirya ara, batakanamlulume.

³ Anggun malye weik winimunye ning nirya, kum batakmunyopura, na Allah arye, anggun baju ongomunye ning nirya kwiripsiniba, winiryuk deiamsik talak, urdem nong banang ulamlum touk unamlume. Tonda, ninye bin tonoknye ton, mek pia kum arye, tuku nirya kel-kel alulul mutuku noutam uliba, mek patalye deice arye, imun kanye bobuka diplamle atonun, narye anggunti, bataksinirye, anggun nong deice ikin ning weik deipsinyopura, dipkoprob imun kanye bobuka, unamlume.

⁴ Tonda, anggunce delilulum mapu nirya ara, narye, ‘Amapu ara, ‘Naʼ tenen nanguk unyake,’ tenebuka, pia bico kum tenenamne. Anggunce, yuk talye ning ati, ‘Nun ni koproba,’ nyabuka, si ereluluma anya arye, anggunce dolulum mapu ara, na mapu koprop kum unyake. Sikda talye-talye yolamak kilapu arye delinyak mapu atonun unyak ninye ati nyapsine.

⁵ Winipmanto ara, “Amapu nirya ara, talye yolamak kilapu arye delinyak mapu atonun unyake,” nyapmasina deiyok ara, ani. Ara, sik talye-talye yolamak kilapu arye, ‘Malye wininmabe,’ tenena kumce, talye-talye unyak ninye ap yoldakirye, delilamak mapu atonun winilulume. Tonda akilapu ara, sik domikce nang batakikirye, ‘Talye yuk nang ap yoldakirye, anang arye, yo bok weik arepsicopura, ayo bok deice arye, nun patasilye ning dekenamabe,’ tenenyake. Ara, ‘Pia dekna weik teleb baju ap, domba basam potong arye winyak buppu baju, el si jeket ap, din ning ap, anggur mek ap, zaitun yo duk minyak mek ap, aning nirya deknamabe,’ tenebikirye, alye tenena kumce, malye weik wininyake. Winilamak touk, anggun Israel ninye arye, na Allah ati, batakanumunce, malye winilulume.

⁶ Ati ara, winipmanto ara, narye akil el ban bisik nirya ara, weik cang poka, alip tam tace ning deibuka, antanapdongopniba, elce abisik ton pia kum wekuka banamle. Na arye akil ati, kanye walwal un ning arepneba, ‘Abisik binamne,’ tenelul ning ara, kum eipmanto uplirye, yuk talye bisik kirikuka banamle.

⁷ Winipnyopura, el tenelamlye nang ati, ‘Epdatibye’ tenen, dobolbinamle bukni, pia kum epdanamake. Tonda akil arye, pia pi dobuka enamle bukni, el tenelamlye nang ati, pia kum eipnamle. Winiplye talak ara, ‘Na min arye domnuknye, el damuk tamubuka binune. Minop talak ara, na akanye ap, neika telebuk ulamnume bukni, wini talak ara, ikinuk ununa anya arye, namince domnuknye dam, tamubuka binamne,’ tenenamle.

⁸ Israel ninye ara, talye-talye yolamak kilapu atonun unyake. Ara, sik ‘Din ning, el si ara gandum ap, anggur mek ap, zaitun yo duk mek ap, tonda dekna pia weik ning emas ap, perak ap, pia weik arye aresululnye bira, Allah biryuk aresulule,’ pia kum teninyake. Aning moubuka kum tenenyaka deice arye, ateleb ning nirya dobuka, talye Isa Mutuku Dongonye, el si Bahal, el si erebuka kina ati, arelamik. Aisa ara, kam una kum ning bukni, ninye taruk deice arye puturubuka memepdeibikirye, talye ning Bahal ati, ‘Nun ni koproba,’ nyabuka, el siuk erebikirye, na Allah ati bataknikirye, na si pia ton kum ereninyake.

⁹ Minop talak ara, aning-aning nirya dobuka, Israel ninye ati, akunum arelamse bukni, sikce batakaninyaka anya arye, wini talak ara, aning-aning nirya, gandum ap, anggur duk ap, anggur mek ap, aning li talak noutam arelamse ning nirya ara, dopropnamne. Tonda, ‘Sik nong urdem ubicak’ tenen, narye domba basam potong arye deibuka, wilamak cang baju ap, dekna weik teleb kurun kain, el si ara kain lenan ap nirya ara, tamubuka dopropniba, sik min diamik talak, nong banang ulamik touk, unamake.

¹⁰ Winipmanto ara, atalye yolamak kil, el tenelamlye nang wekmakca dam arye, el ongonlamle baju kwiriplobikiba, el nong bananguk uplirye, alye weik daklamle touk, narye Israel ninye, sik teleb ning nirya kum kipdeipnamne. Winipnamne talak ara, tonoknye babye ton, malye tenebuka na dam yalirye, yanuka kum dopropnamle. Israel ninye ati, kum lyeptinye.

¹¹ Aning atonun, na Allah arye, sik Israel ninye malye wininyak ning dekna ati, ‘Weik sum tenebuka, kanye deibuka unamak’ tenen, kwalina ati kintinip deipsiba, weik pil aning-aning nirya donyak ning ara, kum kipdeipnamne. Sik weik sum ara, ani. Keting tamun winiryuk ning ap, wala tikin talak ap nirya, na Allah ati si erebikirye, talye pil dona kumce, dikdik senyak sum ap, tonda minop talak arye, ‘Anggun weik sum ani,’ nyabuka arelamsiba, weik sum tenebuka, weik kwalina yunyak sum nirya ara, kum kipdeipnamne.

¹² Tonda anggur tapu duk, teleb ubuka moulamle wa tuku ap, ura yo koulamak tuku ap, yuk yala yo duk dina teleb ning palamle mutuku nirya ap, kum kipdeipnamne. Sik Israel ninye arye, “Kume, ‘Nun dopnamsiak’ tenen, mun dinyap nang arye, arelamsik ning anye,” nyanyak ning aning-aning nirya, na Allah arye kum kipdeipnamne. Dipkoprop, naryuk anggunti, ateleb ning nirya arelamsise bukni, anggunce, “Kume, nun tenenyap nang arye, aning arelamsik,” nyanyake. Ati ayo noutamak nirya, na Allah arye malye kipdeipnirye, talye yo noutamak mutuku atonun kipdeipniba, siring sarang papnamle. Winipniba, sik Israel ninye ton, pia kum dinamake. Talye bai tam kam ulul ning arye, aning-aning nirya ara, ayo duk nirya, dibuka sirya daknamake.

¹³ Aning nirya winipnamna deiyok ara, urdem ati kum winipnamne. Ara, asum-asum nirya, kam kum ulul ning, Isa Mutuku Dongonye el si Bahal atibuk, “Nun ni koprop,” nyabuka, el si erebikirye, siltong teleb ning boyakirye, uku dongobuka, el siuk eremunya ati, wenepnamsine. Tonda, amul potokuka dongolamak ning, el si ara, anting-anting ap, tonda karaklamak ning kalung ap nirya dobuka, ‘Nun tenenyap nang arye, urasin teleb kilapu tenenamsiyak’ tenen, ‘Nun tenenyap nang dan tam do?’ tenen, pia elbanyaka ati, Israel ninye wenepnamsine. Isa Mutuku Dongonye, el si Bahal, el siuk erebikirye, na Allah ati, batakaninyak dekna ati, na Allah Yahweh arye wenebuka opnamsine. Allah arye nyabukba, nabi Hosea kekebukce sekuk.

Allah arye, Israel ninye ati, “Malye wininyak bukni, tuba bico tenesunune,” nyabuk yupu

¹⁴ Allah arye nyabuk. Israel ninye ara, anggun malye winimunya ati, wenebuka opnamsin bukni, aning akunum winipnirye, dipkoprob aminyan talak ara, narye Israel ninye bobuka, ninye kum unyakak, pata mutuku bobisinirye, anggunti kanye talima, teleb kilin yupu nyapnamsine.

¹⁵ Sik malye wininyak ning dekna ati, akunum wenepnirye, aminyan talak ara, narye sik Israel ninye ati, anggur duk wa winak ap, yo duk moulamle yo noutamak ap ara, tuba tamubuka arepnamsine. Winipnamna deice arye, Akhor mutuku dam ara, winiryuk bublan atonun kipnibuk, amutuku ati tenebikirye, ‘Se, aminyan talak ara, telebuk unamabe,’ tenebikirye, kanye deibuka unamake. Ara, minop talak ara, malye winilamikba, Akhor mutuku noutam, weik wenebuka opse bukni, aminyan talak ara, tuba tamubuka, Akhor mutuku teleb kipdeipnamne. Minop talak ara, Israel ninye wel nang atonun ulamik talak ara, Mesir mutuku noutam pia ikin ulamikba, narye lyebuka lopdeipsiba, Mesir mutuku arye, batakuka bindobik talak ara, Israel ninye arye, ‘Nun ni Allah, el siuk erenamabe,’ tenebikce, sik kanye talima, na deiceuk deipnik. Winibuka, na siuk erelamnik touk, aminyan talak babye, tuba tamubuka, na dam yangakirye, teleb kanye bobuka, na siuk erepnamniake.

¹⁶ Atalak ara, anggunce nati, “Na ninge,” nyanamnulume. Anggunce nati, “Nunti, ikin pil arisilye ning ara, weik pil arukusululnye,” kum nyanamnulume. Na Allah Yahweh arye nyapsine.

¹⁷ Se, na mapu Israel ninyeo. Na arye melipsinyopura, anggunce Isa Mutuku Dongonye el si Bahal, el si erena ati, anggun taruk arye, puturubuka delilulum ning ara, adiparyuk luba kipnamlulume. Bahal ap, yuk Isa Mutuku Dongonye si ap eremunye ning ara, narye, ‘Sik si bam bol deice arye, aning si tonap kum erenamak’ tenen, asi kum daneipsine. Winipnamna deice arye, anggunce aisa si tonap kum nyanamlulume. Allah arye Israel ninye ati nyabuk.

¹⁸ “Atalak ara, ‘Bai mutuku yo kan-kan unyak ning ap, maka im deice laklamle ning ap, tonda tukwak ulul ning aning-aning nirya ara, ton kum olyanganamsiyak’ tenen, narye akunum yupu seknamne. Aning ayala-yala nirya ara, talye kanye bobuka unamake. Tonda, sikti, yu kanye bobuka, opdanmanto ninye nirya ara, kum kipdeipnamne. Ati, anggun mal ap, yin ap, parang ya ap, yo taice ap nirya ara, kum daneipnamne. Ati ara, anggun Israel ninye ara, ‘Dan mutuku ninye arye olyanamsiyak do?’ pia ton kum teninamlulume. Teleb kanye bobuka, unamlulume.

¹⁹ Na arye anggun dopropsinirye, pia ati, na kil atonun kipdeipnamsine. Ara, narye anggunti, dipkoprob kil dolamak atonun, kipnamsina deice arye, diksukum winin ninguk kipdeipsinyopura, telebuk unamlume. Tonda, narye teleb kipdeipsiniba, ninye nirya arye, yuk nang nirya ati, diksukum yupu uk nyabikirye, dipkoprob yupu uk, bokolilanamake. Tilila yupu ap, minina yupu ap ara, kum danamle. Tonda, na Allah arye, anggun Israel ninye ati, pia bico tenepsinirye, tuba-tuba melinamsine. Aning nirya ara, pia kum kum danamle. Pia ati, telebuk unamlulume.

²⁰ Na Allah arye anggunti, na kil atonun dopsinirye, tuba melinamsine. Winisiniba, anggunce na Allah Yahweh ati, dipkoprob teleb kibuka, na ap, na wininye ning ap, moubuka kel bikinamlume.” Allah arye, Israel ninye ati nyabuk.

²¹ Nyabukce, ayupu ton dukdongobuka nyabuk. “Na Allah arye, anggun na mapu Israel ninye ati, lyebuka tuba tamubuka dopdopsenirye, teleb updeipnamsin talak ara, anggun tukwak mutuku umunce, nati moropnumonyopura, na im deice unirye kekenamsine. Kekepsinirye, im deice dua noutamak arye, mok weik arepsiniba, mok ceplirye, tukwak mutuku saknamle. Tukwak mutuku-mutuku nirya ara, tuku kel-kel abuka ati, mok arenamsine. Na Allah Yahweh arye nyapsine,” nyabuk.

²² “Na Allah arye, mok arepnyopura, tukwak mutuku ulul ning nirya ara, gandum wa ap, yakong wa ap, diklanye wa ap, anggur tapu duk wa ap, zaitun yo duk wa ap, win mana ati, mek patalamle touk, weik tonun arenamne. Mok arepneba, tukwak mutuku nirya ap, tukwak mutuku ulul ning nirya ara, ‘Se, dipkoprop, nun ni Allah arye, kam una deiyok ning aresulule,’ tenenamake. Tonda, Allah arye tenelul touk, tukwak palamle ning ayala-yala nirya ulule. Atonun, Allah arye yal ning ayala-ayala nirya doknin balule. Ati, ‘Yisreel, telebe,’ nyanamake.” Allah arye nyabuk.

²³ Winipmanto ara, ninye arye yala teleb ning, tuku telebak dokikiba, teleb ubuka palamle touk, na Allah arye, Israel ninye bobuka, teleb mutuku noutam deipnirye, pia teleb ubuka kalikuka melinamne deice arye, pia telebuk unamake. Minop talak ara, Israel ninye ati, bico tenena kumce bataklamsirye, kum melilamsa ati, ninye yuk nang nirya arye, Israel ninye ati, “Se, Allah arye aninye bico kum tenelula anya arye, sikti, ‘Lo-Ruhama,’ nyanamabe,” nyalamik. Bukni, narye Israel ninye, tonap tuba dobuka, teleb kipdeipnirye, anggunti bico tenenamsine. Aning atonun, minop talak Israel ninye bataklamsiba, yuk ninye nirya arye, sikti, “Se, aninye ara, Allah el mapu dipkoprob kum unyaka anya arye, ‘Lo-Ami,’ ” nyalamik. Minop talak nyalamik bukni, aminyan talak ara, na Allah arye Israel ninye ati, “Dipkoprop wini talak ara, anggunda na mapu koprop ululume,” nyanamsine. Nyapsiniba, anggun Israel ninye arye, nati tamubuka, “Dipkoprop, Allah, anda nun ni Allah ulyame. An tonok usilyama ati, an si uk pia erenamabe,” nyanamake. Allah arye nyabuk.