Hosea 14 - Eipomek

Allah arye Israel ninye ati, “Anggun malye winilamlum ning batakmunce, na dam tamubuka yamunyopura, narye teleb kipdeipnamsine,” nyabuk yupu

¹ Nabi Hosea arye, Israel ninye ati, nyabuk. Se Israel ninyo, anggun malye winimunye ning weik upsuk ning nirya ara, batakmunce, tamubuka Allah Yahweh el damuk, tamubuka yanamlulume. Ara, “Anggun malye winimunye ning dekna ati, wenebuk opnamsile,” nyapsine.

Nabi Hosea birye, Israel ninye ati, “Allah arye, ‘Nun malye winin ning namin kipnamsil’ tenen, moronamlulume,” nyabuk yupu

² Tonda tamubuka Allah el dam yamunce, anggun kanye imun usilye ning nirya boyamunce, Allah ati moronamlulume. Moronamlum ning ara ani. “Se, nun ni Allah, ‘Nunce anti moropnuyap yupu ara kekepsutume’ tenen, moropnukiyabe. Ara, nun malye wininyap ning ap, tenepye ning ap nirya ara, ‘Ance namin kipsimince, nun malye winin ning kum daneipsiminyopura, nunti teleb kipdeipnamsilam’ tenen, moropkiyabe. Winibuka teleb kipdeipsiminyopura, nun nirya arye tuba tonap, an siuk erenamkiabe. Aning ara, nyalina yupu deice arye nyapkipye touk, dipkoprob wininamabe.

³ Wini talak ara, nun akunum kel kipmabe. Asyur mutuku yin talin nang arye, nunti kum lyepdopnamsiyake. Tonda, nun kuda basam deice bukuka batipya babye, aning arye kum lyepdatibye. Tonda, minop talak ara, nun taruk arye puturubuka deiamupu ning ati, ‘Nun ni yapu ani,’ nyabuka, talye ning ati, si erelamupu bukni, aminyan dounamle talak ara, aning tuba tonap pia kum wininamabe. Aning ara, akunum batakabe. Ara, talye ati kum nyapmabe. Nun ni Allah ancuk, mutuku-mutuku daunyak ninye nirya ap, kwaknan mapu nirya ap, bico tenesimince, melipsilyame. Ati, nun melipmantonye ton kum ulule, an tonoka.” “Nyabuka moronamlume.” Hosea birye, Israel ninye ati nyabuk.

Allah arye Israel ninye ati, “Aminyan talak pia teleb ulinamsine,” nyabuk yupu

⁴ Allah arye Israel ninye ati nyabuk. Narye anggun Israel ninye nirya ati, tuba tenesenuna anya arye, tuba tamubuka dopdopsenirye, teleb ulinamsine. Anggun tuba-tuba malye winimun bukni, na kanye aryuk bico tenepsinirye, anggunti pia melinamsine. Anggun malye winin ning ara, kum kipdeipnirye, aninye ati bico tenenuna anya arye, tuba tonap, teleb kipdeipnamsine. Min talak ara, narye anggunti, yu weik uamnuk bukni, aminyan talak ara, anggunti tuba ton tamubuka, wanabuka kum opnamsine.

⁵ Ati ara, aminyan talak ara, narye anggun Israel yala ninye ati, tuba tamubuka teleb kipdeipnamsine. Winipmanto ara, kel-kel alamlye tuku dauamliba, mok cepliba, mok purye sakuka poupliba, tuba ton teleb ulamle touk, narye sikti, teleb kipdeipniba, telebuk unamake. Winipnyopura, pia telebuk unamake. Winipmanto ara, mok weik cepliba, bunga keta oplibuk, teleb ulamle touk unamake. Tonda Libanon mutuku noutam kepyal yo tiklirye, yating tuku pum tam bilirye, mikip arye tiklamle atonun unamake.

⁶ Sik aninye ara, kamuk ukirye, dadeipdanin balamikiba, weik upnin banamake. Winipmanto ara, ninye arye wa wibuka koulamak ning koubikiba, paplirye, bilikuka balirye palamle touk, aninye babye yupa weik upnin banamake. Tonda, zaitun yo nyanyak duk mouplirye, nintong teleb lelamle touk unamake. Tonda Libanon mutuku kepyal yo nintong teleb lelamle touk, telebuk unamake.

⁷ Aninye nirya tamubuka, na damuk wekelyakcopura, narye sikti, moubuka kaliknirye, melipniba, sikda mangkau kanye bobuka, lamapdongobuka telebuk unamake. Narye sikti, melinamna deice arye, minopce bona weik talin ninye upnin banamake. Winipmanto ara, tuku telebak gandum dokikiba, weik ulamle touk upnin banamake. Tonda anggur tapu tuku telebak dokikiba, pabuka duk weik arye moulamla atonun, Israel ninye babye, teleb upnin banamake. Winipmanto ton, Libanon mutuku anggur tapu duk purubikiba, anggur mek kwebuka delamak ning ara, pia teleb upliba, yuk mutuku ninye nirya dipdekirye, ‘Se, amutuku anggur mek ara, pia teleb ninge,’ nyalamak touk, aninye akunum teleb kipdeipniba, teleb unamak talak ara, yuk mutuku ninye nirya arye sikti, kel bikikirye, ‘Se, sikda pia teleb ninye unyake,’ nyabuka, sikti, kanye delinamake.

⁸ Ati ara, anggun Israel ninye ati nyapsine. Anggunce talye ning memebuka deiamlumce, aning si erelamlum ning ara, bataknamlume. Atalye ning arye, anggunti kum melipsitinge bukni, naryuk anggun patasilye ning melibuka aresunune. Winipmanto ara, kwarang yo tiklirye, bok teleb ubuka, sulum-sulum alamle atonye bira, na unune. Tonda lemon yo duk aketing tamun, aketing tamun duk mounauk ulamle touk, upnin banamsine. Ati, narye anggunti, pia melinamsine. Wininamna ati, anggunce nati, ‘Elcuk aning-aning nirya ara, Allah elcuk melinamsile’ tenen, na siuk erenamnululume. Na Allah Yahweh arye nyapsine.

⁹ Yatanye do nirya, sik weik kel bikinyak nang ara, aning nirya, weik kel bikna arye, nong noutam ning babye, tenebuka kel kinyak nang ap, anyapnusin yupu akunum moubuka tenenyake. Ara, na Allah Yahweh arye wininun ning nirya ara, pia diksukumuk unune. Ati, yata ninye do nirya, ‘Nunce teleb bisikuk binamabe’ tenen, pataliba, na Allah arye, “Aning wininamlulume, aning kum wininamlulume,” nyalisunun yupu ara, moubuka talinyakce, dobolbanyake. Bukni, sik yuk nang ara, mandipna kanye bobuka unyakce, na nyasinye yupu amul deice aryuk kekenyak bukni, moubuka kum talinyake. Aninye ara, pol-pol asa bakibuk, yan dum dukliba, sakuka tukwak punyak touk, ubuka sakanyake. Na Allah arye, dipkoprob nyapsine.