Hosea 13 - Eipomek

Allah el yu, Israel ninye deice deipnamuka ati, nyabuk yupu

¹ Minop talak, sik Efraim yala ninye, teleb ubuka ulamikce, mikip weik ninye ulamika ati, yupu nyalamikba, sik yuk mutuku ninye arye, ilil ulamuk. Bukni, sik Efraim yala ninye nirya ara, isa si Bahal si erelamika deice arye, malye weik winilamik. Ati, wini talak ara, akunum diplamak ninye atonun unyake.

² Sik Efraim yala ninye arye, aning tuba wininyake. Wini talak babye, tuba malye-malyeuk wininyake. Ara, sik Efraim yala ninye arye, sik taruk deice arye, dekna weik ning, el si ara perak dobuka, sik tenebice ning kintinibuka deibikirye, “Nun ni bira ani,” nyabuka, si erebikirye, kam ulul ning obuka, uku dongonyake. Winibuka unyakba, yuk mutuku ninye arye, sik Efraim yala ninye wininyak ning eibikirye, ‘Se, aninye ara, talye ning ati, “Nun ni koprop ani,” nyabuka, si erebikirye, sapi basam urasin atonun ning, puturubuka deibikirye, aning si erena ati, mutunyake. Tonda, sik isa si erenyak ning arena ati, sikce yuk ning obukabikirye, aisa si erena ati, arelbanyake,’ tenenamake.

³ Ati ara, sik malye wininyak nang ara, beren tam talak tuku pito ulamle atonun wininamake. Winipmanto ara, beren tam talak, mok purye palipmalya ani, minopce kum danalamle touk, aninye babye, minop kum danin banamake. Tonda, weik kumanya mikip yalirye, koulyamlye yo bok ap, sung-sunga ap, tonda gandum bama laltaklamak ning ap, kumanya mikip arye bobaliba, duk dem bataklamla atonun, Allah arye anggun wenena ati, kum daneipnamsile. Tonda, uku sekikiba, uku buk dinmalya ani, tulum weleplirye, jendela bisik panabuka biliba, kum danin balamle atonun, Allah arye aninye ati, kum daneipnamle. Ton tam nang ara, bataknamle.

⁴ Allah arye nyabuk. Nara anggun ni bira, Allah Yahweh unune. Anggunda, Mesir mutuku noutam, ikin pia weik ulalum bukni, narye lyebuka, boyanamsisirye, pia telebak yanuka deipsise. Ati ara, anggunce, ‘Allah ton yuk ulule,’ tenebuka kum unamlulume. Yuk talye ning ayala-ayala nirya ati, si kum erenamlulume. Nara, anggun ni Allah ara, na tonok unirye lyesunune. Anggunce yuk talye ning ati, ‘Nun Lyena Deiyoknye aulule,’ nyabuka, pia kum nyanamlulume. Lyena Deiyoknye bira, na uka. Allah arye nyabuk.

⁵ Tonda, anggunda mek kumak ati, ninye kum unyak mutuku, pata mutuku, malye tukwak mutuku ulamlum talak ara, naryuk anggunti, akunum kel bikamsisirye, melilamsise. Buppu pia weik ulamuk mutuku noutamak ara, naryuk anggunti, kalikuka melilamsise.

⁶ Pia malye mutuku noutam ulamlumce, ikin weik ulamlum bukni, naryuk anggun patalamsuk touk, anggun din ning dobuka arelamsise. Arelamsiseba, aning dobuka, weik arye dilamlumba, boulamsuke. Din ning dipna arye boupsinopura, atalak arye tuba tamubuka tonap, anggun bidamnye ati, kanye deipdana arye, dipdanuka kwalipdana arye ulamlume. Kwalipna arye ulamlum talak ara, na si yaniptapnin arye, nati luba kilamnulume.

⁷ Aning ati ara, anggun kum teneplum talak aryuk, minopce anggun dam yanuka wenebuka opnamsine. Winipmanto ara, bai kam atonun ning, el si singa kus ap, tonda aning atonun bukni, el potong mirin ning, el si ara macan tutul ap arye, talye daulamle ning, mangkau kanye bobaliba, ayu ning bitinye arye, aning minopce obuka dilamle touk, narye, aning atonun ubuka, anggun dam yanyopura, anggun banamlum bisik noutam arye, anggun kum teneplum talak wenebuka opnamsine.

⁸ Tonda winipmanto ara, bai tam ulul ning, weik bai kam atonun bukni, el nong pia weik ning, el si ara beruang. Aberuang kil, el deiamye mi wangapmaliba, pia yu arye enmalye talak arye, ninye eiplirye, adiparyuk si tobuka obuka diplirye, bulubuka tang-tang alamle touk, na Allah arye anggunti, yu arye wenebuka opnamsine. Tonda, winipmanto ning ton, bai tam ulamle yu kus atonun ning, el si ara singa kus arye, talye bai tam ulamle ning oplirye, kwilyakuka diplirye, sekuka bataklamle touk, na Allah arye, anggun Israel ninye ati, yu arye wenebuka opnamsine.

⁹ Winipnamsina ati ara, anggun Israel ninye nirya ara, moubuka tenenamlulume. Se, Israel ninye ara, narye anggun nirya yanuka opnamsin talak ara, yata nang arye ton, anggunti yanuka melipnamsiyak do? Kume, yuk ninye arye anggunti, kum melipsitinge. Wenebuka opnamsina ara, talye ati kume. Deiyok ara, narye anggunti, weik arye melilamsise bukni, anggunce nati yanipnulumce, batakanululuma ati, narye opnamsine.

¹⁰ Atalak ara, anggunce anggun mutuku weik ninye deiyok kibuka, Raja nang ap, tonda, “Winipnuyabe,” nyabuka, yupu nyana deiyok nang ap ati, ‘Se, nun ni yapu lyepsululume,’ nyapmunce, morolbimun bukni, kekepnamsiyak do? Kume, sik kekepsikca babye, anang arye anggunti, kum melinamsiyake. Minop talak ara, anggunce na batakamnulunce, “Nun weik ninye deiyok Raja unamlanye ap, nun kalikina deiyok nang ap, nunti, ‘Wininamlulume,’ nyabuka, yupu deiyok nang ap, sik anang nirya arye, ‘Nun weik ninye deiyok nang unamsiyak’ tenen, nati, ‘Se na nio, weik ninye deiyok nang unamsiyak’ tenen, ninye ton wipdeipsilyame,” nyabuka morolamnulume. Ara, anggunce, ‘Se na nio, weik ninye deiyok nang unamsiak’ tenen, “Weik nang ton wipdeipsilyame,” nyabuka, morolamnulume. Ati ara, anggun weik ninye deiyoknye talibuka, Raja ululnye bira, dan sukum ulul do? Elcuk lyepnamsil do?

¹¹ Sikce nati, “An dem aryuk kum talinamsilame. Yuk nang wipdeipsiminba, anang arye nun deiyok nang talinamsiyake,” nyabuka, moropmanuluma ati, na yu pia weik upnuka deice arye, ninye deiyoknye, Raja wipdeipsise. Anggun ap, el ap, daulamunye bukni, na tenepse talak akunum ubukba, aninye deiyoknye Raja tuba tamubuka dopropse. Allah arye, Israel ninye ati nyabuk.

¹² Ayupu nyabukopura, ayupu tonap nyabuk. Allah Yahweh arye nyabuk. Efraim yala ninye, sik malye wininyak ning ara, narye surat sekukapnirye, kintinilinune. Anggun malye winimunye ning nirya ara, kum luba kinune. Tuba teninauk unune.

¹³ Se, anggun Israel ninye ara, anggun kam tuba umunye talak ara, ‘Na dam tamubuka yanamak’ tenen, lo weik arisinibuk, anggunce na dam yangana kumce, talye kanye bobuka ululume. Tuba wal-waluk ululuma ati, ‘Atalak ara, lo aupmasila ati, nun malye wininyap ning batakuka, Allah el dam tamubuka binuyabe,’ kum tenelulume. Winipmanto ara, kilapu mi bomikca ani, mi akunum deipmanto uplye talak ara, el lin mun pum tam arye, min kum deibikce talak, kanye ikin ulamle touk unamlume. Anggunda, pia walwal ninye ululuma ati nyapsine.

¹⁴ Anggunda, pia malye-malyeuk winilulum ninye ati, ‘Aninye dibikiba, tuku pum tam weipnamak’ tenen, narye anggunti lyepnamsin do, kum do? Kume, narye amalye winimunye ninye ati, kum lyepnamsine. Anggunda, tukwak mutuku ninye dibinyak ninye unyakakuk, talibuka unamlume. Se, uk din ning, weik arye weleplirye, dilamle bukni, ninye weik tonun dibinamake. Tonda, narye amutuku nirya ara, obukapnirye nirya opneba, dipnamlume. Dipmunyeba, weipsikcopura, anggun nong lyupnamsile. Dipkoprop, anggun malye winilulum ninye ati ara, narye anggunti, bico pia kum tenenamsine. Wenen ninguk arenamsine.

¹⁵ Kanye imun ning, anggun nong deice deilinamsina ara, ani. Yuk Israel ninye ayala-yala nirya, mitik anun arye, teleb ulamik bukni, anggunda Efraim yala ninye, anggun nirya ara, pia telebuk ulamlume. Winibuka ulamunye ani, na Allah Yahweh, keting yangan tam arye, weik buppu kumanya mikip dopdeipnamne. Adopdeipnamne kumanya mikip arye, pata mutuku arye, yanuka dopliba, anggun taliplum mutuku ubuk mek pu ap, amutuku uamuk mekwen ap, ‘Mek kwen deipnamsil’ tenen, anggunce tuku palyamlum bisik nirya ara, mek kwen cepropliba, mek kum danin banamle. Tonda, anggun mutuku noutam arye, ‘Nun dekna weik ning ara, anyaik pum tam dongobuka deibibyeba, yu nang arye, kum yanuka dalubuka dopropsiting’ tenen, dolamlum asik nirya ap, anyaik noutam deililamlum ning nirya ara, narye lo arepneba, yu nang yakirye, aning nirya ubula doprobice deice arye, narye kum kipdeipnamne. Aning nirya kum kibuka delinamne talak ara, anggun pia teleb ning, dekna weik ning, tonok ning babye kum bataknamne. Aning nirya kum daneipnamne.

¹⁶ Allah Yahweh arye, sik Samaria tam noutam ulamik ninye nirya ati nyabuk. “Samaria tam unyak ninye wenepnamne deiyok ara, sikce na Allah ati, ‘Nun like’ tenen, mandipna kanye bobuka, malye-malye weik winilamikce, batakamnika ati, aminyan talak ara, weik arye wenepnamsine. Ara, lo arepneba, yu nang arye anggun dam mal olyakirye, ninye weik arye oplopnamake. Ara, amutuku unyak ninye nirya ap, sikce delinyak mapu nirya ap ara, opnamake. Winipnamne talak ara, lo areneba, yuk mutuku yu weik nang yakirye, mal olanmace talak ara, mi bomice kilapu nirya ara, sik mi mun pum tam opodongobikiba dipnamake. Kam tuba unamak mapu nirya ara, sik yan bulbul talibuka keil deice pouklobikiba, kisok yung lubuka dipnamake,” Allah arye nyabuk.