Hosea 12 - Eipomek

Israel yala nang ap, Yehuda yala nang ap ati, wenen ning deipnamle ati, nyabuk yupu

¹ Allah Yahweh arye, na nabi Hosea biti, yanuka nyapnuk. ‘Sik Israel yala nang nirya arye, malye yupu nyana ap, talye yupu nyaltakna ap, ninye walana ap, olana ap, pia weik tonun winipdanin banyake. Winibika ati, na Allah ara, Pia Teleb Lek Deiyoknye unune. Tonda narye, ‘Winipnamneʼ nyabuka, nyalin yupu deice arye nyanye touk, aninguk dipkoprob unune. Ati, sik Yehuda yala nang ara, na lik ati, na dam ton, tuba kum yanganamake.

² Winipmanto ara, ninye arye, ‘Keting panalyangan tam yangalamle kumanya balamlak ara, nun ton bikibirye, aning tomobuka talipnamabe. ‘Beren tam talak arye, dipdongobuka sintam ara, kumanya talipnamabeʼ tenen, nang atonun unyake. Ara, sik Israel nang arye, ‘Asyur mutuku nang arye, yanuka opsicak ati, yata mutuku nang arye, melibuka lyepsiting do?’ tenen, Mesir mutuku nang morona ati, minyak kwebikirye, dekelbanyake. Tonda, sik Asyur mutuku nang dam bikirye, ‘Se anggun ap, nun ap, mal olana kumce, teleb ubuka neika uptibye do? Nun ap neika, nun kwitcapu, kipdanamabeʼ tenen ati, morolbanyake.

³ Sik Israel yala nang bukni, Yehuda tam unyak nang ap, Yakub yala nang ap ati, Allah arye, “Anggunda, malye winin ning talibuka winilulume,” nyabuka wenepnamle. Sik abitinye yala nang ara, sik malye winin ning talibuka winilamak touk, Allah arye, anang nirya ati wenepnamle. Sik malye winin ning ati, dengna arepnamlarya.

⁴ Yakub bira, el lin mun pum tam tuba bomuka noutam anerye, el kwa bitinye mapu ara, Yakub birye, el du koproba Esau biti, ‘Kume, nara minop nun nin mun pum tam arye yatinyeʼ tenen, Esau el yan talibuk. Winyamuk nang akunum deibukba, daulamdika ani, Yakub akunum nebukopura, Yakub ap, Allah arye dopdeibuk malaikat ap, yupu deice arye walanmarikce, mitik tonun neika olanmarik.

⁵ Yakub ap, Allah el pil donanye malaikat ap, walanmarika ani, Yakub birye amalaikat obukabukce, malye kibuk. Winibuk bukni, Yakub bira engenmokce, amalaikat ati, ‘Se, ance nati, pia melipnutumce, pia teleb ning ton dobuka, na deice deipnamnilame,’ nyabuka moronmok. Moronmokba, aminyan talak ara, Allah Yahweh arye, Betel mutuku noutam arye, Yakub el dam yayukce, el ap neika yupu talipmarik.

⁶ Allah arye, Yakub biti nyabuk yupu ara, ani. “Nara Allah, na si koproba ara, Yahweh unune. Nara, aning nirya talibuka, deice tam erebuka, Pia Mikip Weiknye unune. Nara, im deice unyak yin talin malaikat nirya ara, sik deiyoknye unune. Na si koproba ara, Allah Yahweh unune.

⁷ Ati ara, anggun Yakub birye deiamukba, dadeipdanin yangalulum nango, anggunda anggun ni Allah ati, diba tenepmunce, na damuk tamubuka yanamlume. Tonda, anggun kam pia unamlum talak ara, batakna kumce, pia bico tenelanauk umunce, diksukum winin ninguk talibuka, teleb ninguk wininamlume. Tonda, namin asa aryuk, tunim abuka ulamunya ani, ‘Nun ni Allah aryuk, yata nyapnamsil do? Yata winipnamsil do?’ tenen, elti, diba tenebuka, dinauk unamlume.

Aminyan talak, telebe nyan ning ara, ‘Israel nang wenepnamne,’ nyabuk yupu

⁸ Allah Yahweh arye, sik Yakub yala nang ati, nyabuk. “Sik Kanaan mutuku nang arye, talye dungnubuka, bona diripnarye, ubula dololamik touk, anggun babye winilulume. Ara, ‘Abona ara, yata barye kilo ulul do?’ tenen, anggun ikin kiklilen ning, el si timbangan talibuka dipdemunce, tilila yupu uk nyalulume. Ara, ninye arye, ‘Nun bona deknamapʼ tenen, anggun dam yakcopura, anggunce sik bona deiamikirye, yanuka dekelulnye birye, talye yupu deice arye, ‘El ikin ara, ani. Ati, yo bok ara, winibuka arepnamnulume,’ nyabuka, tilila yupu uk nyaplobuka, dipkoprob yupu, el dam kum nyalulume. Winimunya deice arye, yuk nang ati, ikin ning sik nong deice delilulume.

⁹ Israel tam ululum nang arye nyalulum yupu ara, ani. “Wini talak ara, nunda bona talin nang akunum unyabe. Tonda, nun bidamnye aryuk, ayo bok weik bulubuka deiamupuba, wini talak akunum moupmabe! Tonda, ninye tonoknye babye ton yatingce, ‘Anggunda, talye yupu nyamunya deice arye, bona talin nang unamlume!’ nyabuka, wenepsitingce, kum nyapsitinge. Tonoknye babye, ‘Anggunda, malye winimunya deice arye, yo bok weik dololulume,’ kum nyapsitinge. Nunda, tonok malye winin ning babye, kum winibupu,” nyalulume.

¹⁰ Bukni, na Allah Yahweh ara, anggun ni koproba Allah unune. Anggunce, na siuk erenululume. Wininuna ati, luba kina kume. Naryuk anggunda, Mesir mutuku noutam ikin ulamlum talak ara, narye anggun lyebuka boyanamsise. Ara, narye anggun apu yapu ati, ‘Mambul weik sum ara, ani. Na si erena ati, awala noutam, atanggal deice arye, weik kaplina kwalya kwalibuka dinamlum sum ara, ani-ani,’ nyabuka lak nyamsise. Atalak ara, anggunda talye tiaya ati, tenda aik pum tamuk ulamlume. Moubuka teniplulume! Nara, mikip weiknye biti, wini talak teleb aik dobuka ululum bukni, anggunda minop talak ara, tia talye ati tenda aik, ulamluma atonun, tuba tonap, anyaikuk dongopsitinye.

¹¹ Tonda, minop talak ara, naryuk anggun nabi-nabi nang ati yanuka, ‘Winipnamlume. Tonda ayupu nyapnamlume,’ nyabuka laka nyamse. Tonda, lengdar deice arye, lak kilin ning babye, pia weik tonun, sik nabi nang ati areyamse. Winipsa ati, wini talak babye, nabi nang dam laka nyapnyopura, sikce aminyan talak, imun weik upnamle ning yanuka laka nyapniba, sik nabi-nabi nang kekebikirye, na mapu anggun Israel nang ati, laka nyanamsiake.

¹² Wininun bukni, tuba aning nirya, moubuka kekena kumce, Gilead mutuku noutam ara, pia malye un ning tuba talikirye, unyake. Tonda, weik asik si ara, Gilgal mutuku noutam unyak nang ara, isa si erena ati, tuba mesba deice, sapi basam obuka, boyanarye, uku dongobuka si erenyake. Winibuka tuba wininyak bukni, Gilgal mutuku noutam, pala keil dobuka, taplak deiamikce, kam ning opnarye, uku dongona ati, mesba-mesba dolamik ning nirya ara, uluplopminba, akeil ara, ninye arye wa wiamika kup-kup tam, akeil tuku deice talye deiplobikirye, tuku arye siknipdongobuka deibikiba, talye upnamle.

¹³ Yakub birye, ‘Na du koproba, Esau birye opnilyakʼ tenen, sik ulamdik mutuku batakukce, bikbik abuka Mesopotamia (Aram) mutuku binamuk. Tonda, Aram mutuku noutam ara, ‘Kil doptinyeʼ tenen, amutuku noutam Yakub birye domba basam kalikin pil talibuka dolamukce, domba basam weilamuka ani, sirya ara, akil dobuk.

¹⁴ Yakub birye deiamukba, dadeipdanin balamik nang ara, Mesir mutuku binuka ulamik. Daulamika ani, Allah Yahweh arye, nabi tonok, el si Musa dopdeiamukba, Israel nang melibuka bobana ati, sik Israel nang, Mesir mutuku noutam binuka, Mesir mutuku arye batakuka tamubikce, sik mutuku koproba yanamik. Tonda, atalak ara, sik Israel nang moubuka kalikina ati, nabi Musa kintinip deibukce, wipdeiamukba, Israel nang kalekuka melilamuk.

¹⁵ Allah arye winilamuk bukni, wini talak ara, sik Israel nang ara, malye pia weik wininyak ati, Allah Yahweh, yu weik ubukba, elce sikti, wenepnamlarya. Ara, sik Israel nang arye, malye pia weik winilamik ati, Allah Yahweh yu weik ubukba, elce sikti, wenepnamlarya. Ara, sik Israel nang arye, malye weik winilamik ning ap, ‘Elda nun like,’ nyalamik ning ap, ‘Yu nang arye yanuka opsikcakʼ tenen, ‘Allah aryuk kum kaliksutuʼ tenen, ‘Yuk mutuku nang morobipyopura, sikcuk kalikinamsiakʼ tenen, Allah ati malye yupu nyabuka, nalilamik ning ati, Allah Yahweh arye, sik Israel nang ati, dengna areplirye, weik tonun wenepnamlarya!