Hosea 11 - Eipomek

Allah Yahweh arye, Israel ninye ati, “Bico tenesilye, diparyuk malye tenebuka winilulume,” nyabuk yupu

¹ Allah Yahweh arye nyabuk. Israel ninye mitik malye mapu atouk ulamik talak ara, bico tenyamsirye, sikti kanye deiamse. Ati ara, Mesir mutuku noutam ikin weik ulamik bukni ‘Se sikda na mapu koprop atonun unyake’ tenen, narye winipseba, Mesir mutuku arye batakuka boyangalamse.

² ‘Yukupniba, na dam yanamake,’ tenyamse bukni, tuba tamubuka tonap, ‘Na dam tamubuka yalulume,’ nyamsiba, sik amul deiceuk kekelamik bukni, nati batakalamnikce, mitik yukakuk binuka ulamik. Na dam tamubuka kum yangalamik. Na mapu koprop Israel ninye ara, ‘Isa Mutuku Dongonye si erenamap’ tenen, isa si ara Bahal dobuka, Bahal isa el si eren aik pum tam, el urasin atonun ning puturubuka memelamikce, Bahal el si ati erelamik. Winilamikce, isa el si Bahal ap, yuk-yuk talye ning ati, ‘Nun ni koproba ani,’ nyabuka, patung atonun kintinibuka delilamikce, aning si erena ati, siltong teleb ning uku dongobuka, aisa si erelamik.

³ Se, sik Israel ninye ayala-yala nirya ara, aning moubuka kum tenenyak bukni, na Allah arye, Efraim yala ninye nirya ati lyepdomsirye, ‘Diksukum bisikuk binamlumak ara ani,’ nyabuka peterelamsise. Mapu sik nin yapu arye, ‘Nun moum din mapu sik biyuk bisik bana kel biknamak’ tenen, sik nin yapu arye, taruk dana-dana talipmakiba, balamak atonun, narye Efraim yala ninye ati meilyamsise. Tonda, sik ikin uamuk ning ap, uk talilamuk ning ap, narye kwetelamse bukni, sik nirya arye, ‘E, nun ni koprop Allah arye, melisilya deice arye, teleb unyabe’ tenen, moubuka kum kel biklamik. Nati, luba kibuka, batakaninyake.

⁴ Winipmanto ning ara, ninye arye sik weilamak sapi basam bobana ati, tapu kiridongobikirye, menekuka atapu talibuka minopce bakibuk, sik sapi basam nirya ara, talye kanye bobuka, sik aminyan tam teleb ubuka balamak touk, narye Israel yala ninye nirya ati, ‘Telebuk unamak’ tenen, narye bico tenyamsirye, sik ikin ulamuk noutam nirya ara, narye melilamse. ‘Se, sikda na mapu koprop’ tenen, sik Israel ninye nirya ati, kanye deiamsirye, teleb ubuka melilamse. Ninye arye, ‘Nun sapi basam wa tuku palibuka pil donamsiak’ tenen, ikin ning sik ngang deice delilamak touk, sik Mesir mutuku ninye arye, Israel ninye sik nong deice, ikin weik ning delilamikce, pia ikin pil dilamikba, narye aikin ning dopromse. Winipsopura, sik patan ning ati, na kanupdongopsirye, sikti teleb din ning areamse.

⁵ Bukni, sik Israel ninye arye, ‘Nun malye wininyap ning kum bataknamap’ tenen, malye ninguk talibuka, tuba winibicopura, narye sikti, kum wenepnamne do? Talye namin kiplopnamne do? Kume, malye-malyeuk tuba ucopura, sik wenena ati, lo arepneba, yuk pera mutuku nang arye, Israel ninye malye kibuka obikiba, tamubuka Mesir mutuku uk, tuba tamubuka bobinamake. Aning atouk, sik Asyur mutuku nang arye, Israel yala ninye ton tam nang obikirye, ton tam nang batakice nang ara bobuka, sik mutuku tamubuka bobikirye, ninye deiyok nang, Raja kibuka talinamake. Israel ninye nirya ara, sik Asyur mutuku ninye amu tamukirye, sik yupu uk kekenamake. Asyur mutuku nang arye, ikin pil dibikirye, ikin ning weik, sik nong deice delinamake. Ara, talye ati kume. Israel ninye arye, sik malye ning tuba wininyaka ati nyapsine.

⁶ Israel ninye tuba malyeuk ucopura, pera mutuku ninye arye yakirye, Israel ninye aik dobikce, unyak mutuku noutam nirya, yanuka wariknamsiyake. Wariksikirye, parang ya arye opnamsiyake. Wariksikirye, anyasik-anyasik nirya antanabuka, domik keil poka noutam bublan botopdeiamik ning nirya, kat yo ap, besi ning ap arye domik ning nirya, uluplopnamake. Winibikirye, sik Israel ninye ayala-ayala nirya arye, ‘Aminyan talak ara, wininamabe, wininamabe,’ tenelamak ning nirya, kum daneipnamake. Ara, pera mutuku yin talin nang arye, Israel ninye nirya malye kibikirye, sik amu tam deibikcopura, sik nong deice ikin ning deibikirye, sik tenenyak ninguk, pil donamake.

⁷ Na kele. Na mapu koprop arye, sik bidamnye winin ning atibuk tenebuka wininyakce, na batakaninyake. Sikce, ‘Kume, nun ni koprop Allah arye nyasilye yupu kum kekenamabe. Nun bidamnye tenenyap ninguk, ubuka wininamabe,’ tenenyake. Ati ara, anggun dam ikin ning weik yalyopura, anggunce nati, ‘Se nun ni koprop Allah, anda aning-aning deice tam umince, Weik Erenanye ulyama anya arye, nunti melipsilyame,’ nyabuka moropnice babye, pia kum kekenamne. Sikda pia malye winin ninguk, talibuka unyaka anya arye, na Allah arye sikti, lyepnirye, tuba tonap kum erepdeipnamne. Sikda yuk ninye amu tamuk unamake. Allah arye Israel ninye, sik wenena ati nyabuk.

⁸ Nyabukopura, ayupu tonap dukdongobuka nyabuk. Allah arye, ‘Se, anggun malye winimunye ning ati, wenenamsine,’ tenesunun bukni, na kanye mitik anun teniltona tuba unulule. Ara, narye anggunti utenesunune. Se, Efraim yala ninye ara, yata wiribuka narye sikti, bataktinye do? Bataksineba, yuk pera mutuku unyak yu nang arye obuka, sirya daknamsiyak do? Aning atouk, anggun Israel yala ninye babye, yu arye bataksineba, yu nang arye obuka, sirya daknamsiyak do? Tuba bico tenesununa ati nyapsine. Tonda, sik wenena ati, Adma mutuku ulamik ninye ap, Zeboim mutuku ulamik ninye ap ati, weik arye wenebuka oplopse touk, anggun babye aning batakuka wenepnamsin do? Narye, ‘Diba malye weik wininyaka anya arye, weik arye wenepnamne,’ tenenye deice arye, na kanye bokoltonulule. ‘Aning winipnamne do, kum do?’ tenen, kanye bokoltonulule. Ara, urdem ati kume. Na Allah arye, anggun Israel ninye ayala-yala nirya ati, weik arye bico tenesununa ati, nyapsine. Bico tenesununa deice arye, na talima noutamak ara, tamunulule. ‘Malye weik winibikirye, anggun ati batakuka wenepnamsine,’ tenepse bukni, weik arye bico tenesununa anya arye, wini talak ara, na kanye tuba ton yuk tenepne.

⁹ Ati ara, narye anggun Efahim yala ninye ati, ‘Na yu ara, uku buk dilamle touk ubuka, wenepsinirye opnamsine’ tenen, kintinipse bukni, wini talak ara, aning kum winipnamne. Tonda, ‘Efraim ninye nirya opnirye, sirya daknamne,’ tenepsise bukni, wini talak ara, aning akunum batakne. ‘Winibuka wenepnamsine,’ tenepse bukni, bico tenesununa anya arye, na kanye tuba ton yuk tenepne. Anyapmasina ara, talye ati kum nyapsine. Deiyok ara, nara Allah, pia malye ning ton kum unilirye, pia telebnye anggun umunya noutamuk unune. Ati ara, anggun dam yanamne talak ara, weik yu arye kum yanamne. Weik arye wenebuka kum opnamsine, nyapsine. Allah arye, Israel ninye nirya ati nyabuk.

¹⁰ Allah arye, ayupu nyabukce, ayupu ton dukdongobuka nyabuk. ‘Na tenen ninye ara, tuba tamubuka, na damuk yanamak’ tenen, nara weik singa kuse arye, yupu weik nyalamle touk nyanamne. Yupu weik arye nyapnyopura, keting wekelban tam mutuku noutamak daukirye, na mapu malye kanye bobuka, ‘Se nun ni Allah Yahweh, el bira mambul weiknye ulule’ tenen, morobikirye, na damuk tuba tamubuka yanganamake. Sikce minop yakirye, yanuka nong kanupdongobuka, na damuk tamubuka yanganamake.

¹¹ Winipmanto ara, talye daulamle maka arye, ilil weik upliba, nong nirya lukulalamle touk, na mapu ara, Mesir mutuku noutam arye, na dam tamubuka yanganamake. Winibuka yangace talak ara, sik nong nirya sirim talinamle. Aning atouk, Merpati maka nyalamak atonun, tonda yalma maka mer weik arye, neika balamak touk, na mapu koprop Israel ninye arye, Asyur mutuku noutam arye batakuka, sik nong nirya sirim talinamleba, na dam tamubuka yanganamake. Winibuka yace talak ara, narye anggun aik ap, anggun mutuku ap, tamubuka yanuka deipnamsine. Na Allah Yahweh arye nyapsine ati, anyapmasin yupu ara, dipkoprob nong upnamle ati, nyapsine. Allah arye nyabuk.

¹² Allah Yahweh arye, na nabi Hosea biti, yanuka nyapnuk. ‘Sik Efraim yala nang nirya arye, malye yupu nyana ap, talye yupu nyaltakna ap, ninye walana ap, olana ap, pia weik tonun winipdanin banyake. Winibika wininyaka ati, ‘Sikda na like,’ tenenune. Ati, sik Efraim yala nang ara, na lik ati, na dam ton, tuba kum yanganamake. Bukni, sik Yehuda yala nang ara, na ap neika tuba unyake. Narye, ‘Aning ara, wininamlume. Aning ara, pia kum wininamlume,’ nyanun yupu ara, sikce tuba talibuka wininyake. Nara Allah, malye winin ning tonok babye, pia kum wininuna ati, nara Pia Teleb Lek Deiyoknye unune. Tonda narye, ‘Winipnamneʼ nyabuka, nyalin yupu deice arye nyanirye touk, aninguk dipkoprob unune. Sik Yehuda yala nang ara, nati kum batakniyake.