Hosea 10 - Eipomek

Allah arye Israel nang, sik malye-malye winilamikba, wenepnamuk ning ati, nyabuk yupu

¹ Allah arye nyapdeibukba, nabi Hosea birye sekuk yupu ara, ani. Anggun Israel nang nirya ara, minop talak anggur tapu pia weik moulamle atonun ulamlume. Bukni, winibuka telebuk upnin balamik talak ara, sikce, ‘Talye ning si erenamapʼ tenen, isa si erena ap, isa arena ap ati, sikce pala keil dobuka, yangapdeiamikce, mesba-mesba weik tonun kintinip deiamik. Atonun, sik Israel nang telebuk upnin balamik touk, ‘Isa Asyera si erenamapʼ tenen, lak kin ning, el si ‘tugu berhalahʼ, cang weik yo weik tonun tonap ikukabikce, isa si erena ati moulamikce, aisa mer si erelamikce, malye weik ulamik.

² Sik Israel nang arye, sitang deice arye, teleb yupu nyanyak bukni, sik kanye pum tam teninyak ning ap, ‘Wininamabe,’ tenenyak ning ap ara, malyeuk ulula ati, sikda tilila nyan nanguk unyake. Ati ara, sik nirya arye, malye un ninguk upra banyaka dengna ati, Allah arye ikin ning arepnamle. Allah Yahweh arye, anang wenepnamle talak ara, sikce domik mesba-mesba nirya ara, ulubuka sice buklopnamle. Winiplyopura, sikce, ‘Asyerah isa si erenamapʼ tenen, moubuka iklamik cang yo, el si ‘tugu berhalahʼ babye, aning nirya ara, ulubuka daklopnamle.

³ Ati ara, Allah arye aning nirya akunum winipnamle talak ara, sikce nyanamake. “Se, nunce Allah Yahweh ati, ilil kum wamsukba, el siuk kum erelamuburye, el tonok kum talibuka ulamupa ati, wini talak ara, nun ninye deiyoknye Raja ton dopropmasilba, tuba kum usulule. Bukni, ninye deiyoknye Raja, tuba aupmasutua babye, elce yata wiripturye melipsutu do? Kume, aning ara, kum winipsutue. Ati, nunda ninye deiyok kibuka una ara, yata ati do? Daupmalye,” nyanyake.

⁴ Sik anang arye winibuka talye yupu nyabuka nyaltakanyake. Tonda, sikce talye yupu nyanyaka deice arye, yuk mutuku nang ap, ‘Kume, neika melibuka kalikilanauk unamabe. Tonda yuk nang ati, ‘Sik ap, nun ap, teleb kibuka, neika ubipyopura, aning ton, aning ton, teleb kibuka neika unamtibye,’ nyabuka, nyalin yupu deice arye nyanyake. Bukni, aning nirya ara, tilila yupu aryuk nyanyake. Talye yupu uk nyanyaka ati, ton nang arye, ton tam nang ati, yupu deice arye walana ap, olana ap, kilanauk pia weik tonun unyake. Wininyaka ati, ninye yupu bokolina deiyok nang dam tuba-tuba banyake. Winipmanto ara, yala ninguk tuku palibuka, koubikiba paplirye, talye tiklamle ning ap, tace ning ap weik ulamle touk ulule. Deiyok ara, sikce talye yupu deice aryuk nyanyaka atia.

⁵ Tonda, sik Israel yala nang bukni, Samaria mutuku noutam unyak nang ara, isa si erena ati, mutuku si Bet-Awen mutuku noutam arye, isa si erena ati, sapi basam urasin atonun ning memepdeiamikce, asukumuk aning si erenyake. Aisa mer si erebikirye, ‘Se, nun ni koproba aniʼ tenen, yok sirim talinauk unyake. Aisa nirya ati, sikce ilil upliba, yok sirim taliplirye, yupu weik tonun ngaluka engenyake. Ara, minop talak ara, ‘Nun isa si eren ning, sapi basam urasin atonun memebuka deiamupu ning ara, pia teleb ulamuk bukni, wini talak ara, malye upmasile. Se, yata ati do?’ tenen, weik tonun engenamake. Ara, sik amutuku noutam unyak nang ap, sik malye winin ning talibuka, imam pil donyak nang ap, weik tonun engenamake. Imam nang ara, Allah ati batakuka, isa si eren piluk donyaka ati, sikda sal arye, sik domice kilapu batakuka, talye yolan kilapu dolonyak nang atonun unyake. Engenamaka deiyok ara, ani. Sikce, ‘Se, minop talak ara, nun isa si erena ati memebuka deibupu ning ara, ‘Urasin pia telebe, aning ara mambule,’ tenelamupu bukni, wini talak ara, asapi basam atonun memebuka deibupu ning ara, urasin malyeuk ulule. Aning nirya kum kipdeipnamle ati, bico upliba, engenauk unamake.

⁶ Yuk mutuku nang arye, isa si erena ati, sapi basam atonun ning ara, alubuka bobikirye, pera mutuku, Asyur mutuku noutam bobinamake. Ara, Asyur mutuku, sik weik deiyoknye Raja, el dengna arena ati bobinamake. Aning winibikcopura, sik Israel tam unyak nang nirya ara, ‘Se, yata ati do?’ tenen, ilil upliba alye dakdanamake. Ara, sik si erelamik isa, el urasin atonun ning patung berhalah ati, tenibuka ilil upliba, alye dakdanamake.

⁷ Winipnamak talak ara, Samaria mutuku ap, sik ninye deiyoknye Raja babye, Allah arye obuka sice buklopnamle. Winipliba, sik ninye deiyoknye Raja birye, yo sekuka batakikiba, weik mek arye bobanmalya ani, tunim alamle touk, Raja babye bobinamaka deice arye, el babye tunim apnamle!

⁸ Tonda, Awen mutuku noutam bukni, mutuku kon deice arye, ‘Nun isa si erenamapʼ tenen, isa si eren aik dolamik ning nirya ara, Allah arye lo arepliba, mal olan nang arye, aning nirya dakuka, sice buklopnamake. Israel nang arye, isa el si berhalah, erelamik mutuku kon deice nirya ara, sice bukuka batanirye, kum kipdeipnamne. Israel nang arye, aning deice arye, malye weik winilamik. Winiplyopura, sik isa si erena ati domik ning, mesba-mesba nirya ara, tace ning ap, dola ap, maning ap, paplirye tiknamle. Winipyopura, sik anang nirya arye, weik yupu deice arye, ngalukuka mutuku kon ati yukunamake, “Se, nun kanye imun bopmaba ati, sik weik mutuku-mutuku dana-dana uamuk ning nirya ara, nun yanuka singinipsilyame,” nyabuka moronamake! Tonda, mutuku kon deice nirya ara, tobuka yamince, nun siknibuka opsilyame!” nyabuka moronamake.

Allah arye, “Israel nang ati, ikin deipnamne,” nyabuk yupu

⁹ Allah Yahweh arye nyabuk, “Se, anggun Israel nango. Gibea mutuku noutam ulamlum talak arye, deiyok koubuka, malye winin ning talibuka ulamlumce, tuba winilulume. Amalye winilamlum ning ara, sik amutuku tuba unyak Israel nang nirya arye, aning bikna kumce, tuba pia malyeuk wininyakce, na yupu yanininyake. Ati ara, Gibea mutuku ara, anggun mal olan nang dopdeipniba, olyanamsiake.

¹⁰ Ati ara, na Allah arye lo arepniba, yu nang arye, sik malye-malye wininyak nang nirya ati, olyanganamake. Winipnirye ikin ara, sik anang deiceuk deipnamne. Tonok mutuku nang kum bukni, mutuku-mutuku weik, yuk-yuk bukni, sik nirya arye ansinibuka, sik Israel nang ati olbinamake. Tonda, sikti, wenepnamne deiyok ara, sikce malye winin ning weik wininyaka ati, pia weik tonun wenebuka opnamne.

¹¹ Minop talak ara, sik Israel nang ara, winiryuk sapi basam neplopmalye atonun, moubuka biklirye, pia teleb kibuka, gandum duk yanibuka, el bol koulamlume. Ati, winipmanto ara, ‘Aning ara kum optume,’ nyapdeipsiba, yuk mutuku nang arye, Efraim yala nang obuka, sirya kum daklamik. Bukni, wini talak ara, sik deice ikin weik ning deipnamne. Winipmanto ara, sapi basam tapu kirikdongobikirye, ikin yo el kum deice deipnaba, asapi basam arye, aning libuka balirye, tuku palin pil, weik ikin pil dolamle touk, sik Efraim yala nang ati, atonun winipnamne. Ara, Efraim yala nang arye deiamikba, dadeipdanin yangalamika ani, sikce deiamik nang ati, pia ikin pil dipnamne. Aning atonun, Yakub yala nang arye deiamikba, dadeipdanin yangalammika ani, deiamik nang ati, ikin ning ton arepnyopura, sik babye, asapi basam tuku palin pil dolamle touk upnamake. Ara, Efraim yala nang ap, Yakub yala nang ap, yuk mutuku nang arye, tapu koupdongobuka, bobikiba, pia ikin piluk dibikiba donamake. Ara, anggun wenena ati, dengna arena ning ati nyapsine.

¹² Winipmanto ara, ninye arye, teleb yala koubikiba, daulamlya ani, aminyan talak, pia teleb ning paplirye, nong teleb yongobuka lilamak touk, na Allah arye, anggun Israel yala nang ati nyapsine. Se, anggun Israel nango! Anggun wa wibuka kouna atonun, winiryuk diksukum un ninguk, upnin banamlume. Tonda, yala delina atonun, anggunce na ap, yuk nang ap ati, batakna pia kumce, pia bico tenepmunce, melinauk wininamlume. Na deice anggun kanye talima deipnamnulume! Tonda, ninye arye, wa tuku wena kumce, talye batakikirye, dauamlya ani, oketing tamun arye, uku seknarye wa wibuka koulamak touk, anggunce teleb winin ning kum winilamlum ning ara, tuba teleb winin ning winipnin banamlume. Aning nirya ara, talye ati kum nyapsine. Deiyok ara, anggunce, ‘Nun ni Allah arye, teleb kipdeipnamsilʼ tenen, na dam tamubuka yanululume. Winipmunce, nati kanye deipnumunce, diksukum winin ninguk winimunyopura, na Allah arye anggunti, teleb kipdeipnamsine. Ara, weik mok ceplirye, tukwak sakliba, aning-aning teleb kibuka palamle touk, narye anggunti, teleb kipdeipsinyopura, anggunda telebuk unamlume. Ati, anggunce nati enamnulum talak ara, akunum dam uple.

¹³ Bukni, anggun Israel nang ara, aning atonun kum winilulume. Anggunda, malye un ninguk winimunce, talye ninguk nong kilalulume. Tonda, diksukum una kum ninguk, malye ninguk winilulume. Tonda, ninye yupu bokolin talak ara, anggunce tilila yupu uk nyalulumba, malye kum winipmace nang dobuka wenelulume. Tonda, talye yupu deice arye, ‘Winipnamabe,’ nyalulum bukni, aning kum winilulumba, aminyan talak ara, ikin ning ton, anggun dam yangalule. Winipmanto ara, ninye arye malye yala koubikiba, aminyan talak, duk moupliba dakuka, malye ninguk dilamak touk, anggun babye aning atonun winilulume. Na Allah arye, tonap nyapnusine. Se, anggun Israel mutuku ululum nango! Amalye weik winilulum ning deiyok ara, ani. Anggunce, ‘Kume, nunda mikip weik nang unyabe. Nun ninye on ning, el si kereta perang ara, pia weik tonun ulule. Nun kel weik bikamik yin talin nang ara, weik unyaka ati, yuk nang arye, kum yanuka opsitinge,’ nyabuka, kwalinauk ulamlume.

¹⁴ Anggun mikip tenebuka, maknya kintinipnarye ululuma ati, na Allah arye, lo arepniba, yuk mutuku nang arye, yanuka opnamsiake. Na arepniba, anggun mutuku dana-dana tam nirya unyak nang dam ara, mal olana ap, walana ap, yanamsile. Winipnyopura, anggunce doplum cang weik kat aik dolamluma nirya ara, ulubikirye, sice buklopnamake. Tonda, anggunce cang kel poka antanap dongoplum ning nirya babye, sice buklopnamake. Pia kanye imun upnamsile. Ara, deiyoknye Salman birye, Bet-Arbel mutuku noutam ninye weik tonun, obuka kum daneiamukce, amutuku kilapu arye, deiamik winiryuk mapu dobuka, keil deice donokuka, olamika atonun, ikin weik unamsile.

¹⁵ Aning ara, anggun dam babye, atonun winipnamsila ati, Se, anggun Betel mutuku noutam ululum nang ara, anggun pia malye weik winin ning dem winimumnya deice arye, aning atonun kanye imun ning ara, arepnamsine. Ara, talye ati kum bukni, deiyok ara ani. Ara, anggun pia malye-malye weik winiluluma atia. Atalak ara, keting minop panalyangalamle touk, beren tam koproba arye, Israel nang talibuka, ninye deiyoknye Raja ara, obikiba, adiparyuk dipnamlarya! Ati ara, na Allah Yahweh arye, anggun Israel nang ati, ayupu nyapdeipsine.