Hakim-Hakim 9 - Eipomek

Abimelek birye, ‘Ninye deiyoknye unamne,’ tenelamukce, Sikem mutuku talibuk yupu

¹ Atalak ara, ninye si Yerubaal, tonda el si Gideon bira, el mi Abimelek, el lin tam, yala ninye nirya ulamik mutuku biyuk. Amutuku si ara, Sikem mutuku biyukopura, el lin tam yala ninye ati ayupu nyabuk.

² “Anggunce, Sikem mutuku unyak ninye nirya ati, nyapnamlulume. ‘Anggun nirya teneipdenamlulume. Weik teleb ning ara, Yerubaal el mapu nirya, yupa weik tujuhpuluh (70) nang arye, ninye deiyok nang kibikirye, Sikem mutuku ululum ninye ati talinamsiyak do? Akumopura, tonoknye biryuk talipsiliba, anggun ninye deiyoknye tonok uk unamsil do?’ Tonda, anggun luba kina kume. Nara, anggun yala kil arye deipnuka ati, na ining ap, na tup ara, anggun ning uka,” nyabuk.

³ Nyabukopura, Abimelek el lin, akil el du weit kekebukce, laka nyalbiyikba, sik Sikem mutuku ulamik ninye kekebikopura, aninye nirya arye utenebik. ‘Diba, nun yala kil arye, Abimelek deibuka anya arye, elda nun mi ulula ati, teleb ning ara, elcuk talipsiliba, el tibuk melibuka dobolbanamabe. Elda nun ninye deiyoknye unamsile,’ tenebik.

⁴ Utenebikce, amutuku ninye arye sik isa Bahal-Berit el si eren aik pum tam arye, dekna weik ning el si ara uang perak, yupa weik tujuhpuluh dobuka, Abimelek el tam nang ati arebik. Uang perak yupa tujuhpuluh dobuka arebikopura, Abimelek birye, ‘Na melipnamaniyak’ tenen, yin talin nang ati dekuk. Ara, ‘Anang ara na yin talin nang kipniba, sik melipnamaniyak’ tenen, dekukba, anang arye elti, melilamik. Ayin talin nang ara, ‘Aminyan talak, yata wiripnamsil do?’ tenena, pia kum nang. Tonda, ‘Yo bok arepsiceba, ninye mal olan nanguk unamabe,’ tenelamikce, ilil kum asa arye malye kibuka, malye nanguk winilamik.

⁵ Tonda, Abimelek birye, el li Gideon el mutuku koproba, Ofra mutuku tamubukce binuka, el li koproba aik biyukopura, el weit capu silip yupa tujuhpuluh (70) nang nirya tonok sukumak weik pala keilak arye obuka kum daneipmanto kibuk. Ara, el li koproba Yerubaal birye deiamuk nang ati oplobuk. Winibuk bukni, tonoknye el si ara Yotam, bira el li koproba arye sirya koprop deiamuk mi, el kele sirya mi ara, ‘Abimelek birye opnilyak’ tenen, duknupmok. Duknupmokba, Abimelek birye kum eibuka anya arye, kum obukba, Yotam bira kam tuba ulamuk.

⁶ Abimelek el yin talin nang arye, el weit capu silip nirya akunum obikopura, sik Sikem mutuku ulamik ninye ap, mutuku si Bet-Milo mutuku ulamik ninye ap, nirya bulubikce, Sikem mutuku weik Ba yo tikamuka deiyok dam, cang weik keil ikiyamikak biyikce, ‘Abimelek wibikce, nun ninye deiyoknye unamsil’ tenen, wipdeibik.

⁷ Awinibik ning ara, yuk nang arye, Abimelek el weit koproba Yotam dam laka nyabikba, Yotam birye aning akunum kekebukce, mutuku si Gerisim mutuku deice binuka welebuka tikukce, Sikem mutuku ulamik ninye ati, sik tam dinmokce, yupu weik arye nyanmok. “Se, Sikem mutuku umunye ninye kekepnululume. Na yupu kekepnumunyopura, Allah arye anggun yupu babye kekepnamsile,” Yotam birye nyabuk.

⁸ Yotam birye domon yupu deice arye nyabuk ning ara ani. Tonok sum ton, buru tam tikamuk yo nirya bulubuka yupu talibik, “Nun weik deiyoknye wipdeipnamabe,” tenebikce nyabik. Yupu talibikce, zaitun yo ati nyabik, “Anda nun weik deiyoknye unamsilame,” nyabik.

⁹ Nyabik bukni, zaitun yo arye tamubuka nyabuk. “Winipnumunyopura, na nongak unulul minyak mek, talye bataknamne do? Ninye arye, weik nang wipdeibice talak ara, na minyak mek kwebuka kisok deice dikinyake. Aning atonun, sik isa si erenyak talak ara, na minyak telel ning ara dobuka nong deice binuka likilinyake. Aning ara, mambul weik anya arye, anggun talye yo ati, anggun deiyoknye kum kipsitinye. Talye yo ati weiknye kipnyopura, ara teleb do, kum do? Na kanye ara, kum ati, nara anggun weik deiyoknye kum kipnamsine,” nyabuk.

¹⁰ Nyabuka ati, sik talye yo nirya arye, kwarang yo ati nyabik. “Nun patapmasil ning ara, anda nun weik deiyoknye adiparyuk unamsilame,” nyabik.

¹¹ Nyabik bukni, kwarang yo arye tamubuka nyabuk. “Ninye arye na yo duk ati, ‘Ayo duk ara pia toe, anya arye, kanye deibuka dibikirye teleb,’ tenenyake. Ati, anggun weik deiyoknye kipnyopura, na duk moupniba, dinyak ning ara, talye bataktinye do? Aning ara, pia mambul weik anya arye, aning bataknirye, talye yo ati weiknye kipnyopura, ara teleb do, kum do? Na kanye ara, kum ati, nara anggun weik deiyoknye kum unamne,” nyabuk.

¹² Nyabukopura, sik talye yo nirya arye anggur tapu ati nyabik. “Anda nun weik deiyoknye unamsilame,” nyabik.

¹³ Nyabik bukni, anggur tapu arye tamubuka nyabuk. “Kume, winipnyopura, na duk moupniliba, ninye arye anggur mek memenyak ning ara, talye bataknamne do? Na duk purupnikirye, anggur mek memenyak ning ara, ninye ap, isa ap, si erenyak ning ati kanye delinyake. Aning ara mambul weik anya arye, na mek bataknirye, talye yo ati weiknye kipnyopura, ara teleb do, kum do? Na kanye ara, dib kum ati, nara anggun weik deiyoknye kum unamne,” nyabuk.

¹⁴ Nyabuka sirya ara, atalye yo nirya arye, tace ning tukwak palamle ning ati nyabik. “Anda nun weik deiyoknye unamsilame,” nyabik.

¹⁵ Nyabik bukni, tace ning arye tamubuka ayo nirya ati nyabuk, “Yo anggunce dipkoprop, ‘Eluk nun deiyoknye Raja tiknamsile,’ tenepnumunyopura, adiparyuk anggun nirya bulubuka na amu tam tikilyanganamlulume. Bukni, anggunce, ‘El kum,’ tenepmunyopura, na tace noutamak arye, uku yalirye dipliba, weik cang yo, si ara aras yo, Libanon mutuku tikilye yo nirya uku dipnamle.” Adomon yupu nirya ara, Yotam birye Sikem mutuku ninye ati nyabuk.

¹⁶ Nyabukce, Yotam birye tonap dukdongopbuka nyabuk. “Ura, anggun nirya ara, Abimelek el wipdeipmalumce, ‘Ninye deiyoknye unamsil’ tenen, tikeipmalum talak ara, anggun kanye talima nirya, yata wiribuka teneplumce, anye tikeipmalum do? Anggun talima ara teleb kibuka, diksukumuk ulul ati, tikeipmalum do, malye do? Kume, kanye talima malye tenepmalumce, anye tikeipmalume. Tonda, Yerubaal ap, el mapu silip ap ati, diksukumuk teleb ubuka melilamlum do, kum do? Elce pia teleb winilamuk touk, anggun babye elti, teleb kibuka winipmalum do, kum do? Kume, awinipmalum ning ara, malyeuka. Teleb winiptumopura, Abimelek biti, anggun kanye deibuka unamtume. Aning atonun Abimelek birye anggunti kanye deibuka unamle. Bukni, na kanye ara, anggunce teleb kum winipmalume.

¹⁷ Na kanye ara, anggunce na ni Yeru-Bahal biti, teleb kibuka kum winipmalume. Anggun teneipdelulume. Elce anggunti winilamuk touk, anggunce elti, kum winipmalume. Ara, talye ati kume. Na ni Yerubaal birye, ‘Sik Midian ninye arye opnicak’ tenena kum diparyuk, anggun Sikem mutuku ninye lyena ati, yanamukce, Midian ninye obuka sirya dakukce, lobuka melipsukce lyepdopsuke.

¹⁸ Na ni koproba arye pia pi dobuka melilamsuk bukni, minop talak anggunce na ni biti, ‘Nun like’ tenen, bataklamlum touk, wini talak babye, el yala nang ap, el mapu silip ap ati, ‘Nun like’ tenen, minina yupu arye, pia malye kipmalumce batakmalume. Ara, na ni el mapu yupa bitinye keba nakub dikin (70), nang ara, tonok weik pala keil deice akunum oplopmalume. Aninguk kum bukni, anggun Sikem mutuku ninye arye, na ni birye deiamuk nang koproba batakuka, el talye pil melin kil arye deibuk mi Abimelek wibuka, ‘Nun bidamang yalanye birye Abimelek, nun mutuku ninye deiyoknye Raja unamsil’ tenen, tikeipmalume. Anye Abimelek bira, na ni el talye melin kil arye deibuknye ulule. Winipmalum ning nirya ara, na kanye ara, pia malye upmalume.

¹⁹ Ati, arup ara na ni Yerubaal batakuka, Abimelek wibuka tikeipmaluma deice arye, Yerubaal ap, el yala nang ap ati diksukum kibuka teleb kipdeipmunyopura, aminyan talak anggunce Abimelek biti, kanye deibuka unamlume. Aning atonun Abimelek babye, elce anggunti weik kanye deibuka unamsile.

²⁰ Bukni, arup winipmalum ning ara, malyeuk kipdeipmunyopura, na kanye ara, Abimelek ap, anggun Sikem mutuku nang ap arye, ‘Nun like,’ tenepdamunce, olanamlume, tenepmane. Winipmanto ning ara, Abimelek elda kel-kela malye maning noutamuk udinibiceba paplirye, aning-aning nirya dam uplyopura, uku dibuka sirya daklamle touk, Abimelek birye anggun Sikem mutuku umunye ninye nirya ap, Bet-Milo mutuku ninye nirya ap ati, ‘Lik’ tenepsiliba, opdamunce, sirya dakdanamlume. Aning atonun, anggun Sikem mutuku ninye ap, Bet-Milo ninye ap arye, el Abimelek biti, ‘Nun like’ tenepdamunce, opdanamlume. Winipmanto ara, anggun dam arye, uku paplirye, kel-kel alamle maning uku dibuka sirya daklamle touk, anggunce el Abimelek biti, ‘Like’ tenen, opdanamlum ati nyapsine.” Yotam birye sik Sikem mutuku ninye ati nyabuk.

²¹ Nyabukopura, adiparyuk Yotam bira el du koproba Abimelek biti, ilil ubukba, bikbik abuka biyukce, yuk mutuku si Beer mutuku dabinuka ulamuk.

²² Abimelek bira, winilye keting tamun deice arye, Israel ninye talibuka, sik ninye deiyoknye ulamuk.

²³ Keting tamun winilye akunum ubukopura, Allah arye pia malye isa dopdeibukba, Abimelek el kanye talima ap, Sikem mutuku ninye, sik kanye talima ap, wekukabukce talibukba, sik nirya pia malye kanye bobuka ulamikce, sik nirya malyeuk winilalamik. Winilamikce, sik Sikem mutuku ninye arye, Abimelek biti, malye ning weik winilamik.

²⁴ Allah arye aisa dopdeibuka ara, talye ati kume. Deiyok ara, Abimelek birye nyalamukba, el mapu silip ap, el li Yerubaal delilamuk mapu, sik witcapu bukni, nirya tonok keil pala deice oplobika atia. Winibika ati, Allah arye anang sik wenena ap, kanye imun ning una ap, sik nong deice deibuk. Aning ara sik yok ap, sik ining biyuk ap, aning pununa ati, anang wenebuk. Aning atonun, sik Sikem mutuku ninye arye, Abimelek melibika deice arye, sik du weit, babye nirya oplobik. Ati ara, aninye babye, Allah arye subuk deice arye wenebuk.

²⁵ Ati ara, Sikhem mutuku weik deiyok nang arye, Abimelek biti yu ubukba, ‘Anye kalikuka tomopnamapʼ tenen ati, ninye ton wipdeiamikba, amutuku dana-dana tam nirya ara, mutuku deice dabinuka kaliklamik. Akaliklamika ara, yata nang do nirya, abisik ton talye banopura, sik warikuka duknupmanarye olbalamikce, sik bona nirya alubuka dolamik. Winilamik ning ap, ‘Abimelek tomona ati, kalikinamabe,’ tenebik ning ap ara, yuk nang arye Abimelek biti, yanuka nyabik ati, elda amutuku tam kum biyuk.

²⁶ Atalak ara, Ebed el mi Gaal, el kayapu nang ap, el mapu silip ap, ‘Sikhem mutuku unamapʼ tenen, Sikhem mutuku yanuka unmek. Asukumuk unmeka ani, sik Sikhem mutuku ulamik nang arye, ‘Yo telebe, dipkoprob nun dam pia akunum yanuka unamake. Gaal biti ara, diba tenenyabe,’ tenelamikce, elti, kanye delilamik.

²⁷ Winibuka tenilamikce, el ap, sik ap, neika anggur wa windam biyikce, anggur duk dakuka deibikce, sik neika dina ati, anggur duk teikuka, ‘Anggur kanye wangalamak mek kintinipnamapʼ tenen, anggur duk mek purubuka kintininmek. Winibuka kintinipmek ning ara, sik nirya arye, weik kwalina kwalibukabikce, isa si eren aik noutam binukabikce, wekuka dinmekce, Abimelek biti malye yupu nyabuka, nalinmek. Sikce, “Nunda yata deiyok ati, ‘Abimelek bira nun deiyoknye ulule,’ nyabuka, elti, si erenyap do? Kume, el anye bira, bataknamabe,” nyabuka, malye kelamik.

²⁸ Ebed elce deiamuknye, Gaal birye nyabuk, “Nunda, yata nang ubirye, Abimelek el yupu dem kekebuka, el amu tamuk unamap do? Elda yata tonye ulya ati do? Abimelek bira, el li koprop ara, Yerubaal ulamuk. Ati, elda Gideon tamnye ulula anya arye, nun tamnye kum ulule. Tonda, Abimelek birye Zebul wipdeibukba, elce deiyok kibukabukce, nun mutuku deiyoknye Gubenur atouk usulule. Dipkoprob teleb ning ara, nunda, nun apu koproba, Hemor birye deiamukba, dadeipdanin yangalamik nang, sik el tam nanguk, sik amu tam uptibye. Sik atam nang aryuk, nun deiyok nang talipsitingba, sik amu tam uptibye. Hemor bira, Sikhem mutuku unyap nang ara, nun apu ulamuka ati, el tam nang aryuk nun talipsitinge,” nyabik.

²⁹ “Winipmanto, narye Sikhem mutuku nang ati, deiyoknye kibuka taliptinye toura, dipkoprob narye Abimelek biti, malye kiptinirye, kum kipdeiptinye. Tonda, Abimelek birye, ‘Winiptinye,’ tenelul ning nirya ara, adiparyuk kum kipdeiptinye. Tonda, narye Abimelek biti kum kilina ara, narye Abimelek biti, ‘Winida an yin talen nang ap, nun dam boyanulyame. Nun ap, nun yin talen nang ap, anggun tam nang nirya ati, mal opdanamabe,’ nyaptinye. Teleb ning ara anyuka,’ tenenune,” Gaal birye nyabuk.

³⁰ Gaal birye nyabukba, yuk nang arye, Gaal nyabuk yupu laka nyabikba, Sikhem mutuku weik asik dolamikak talibuka ulamuk deiyoknye Zebul, elce ayupu kekebukopura, atalak aryuk tamubuka weik tonun wenebuk.

³¹ Derebukopura, Zebul birye ninye ton dopdeibukba, Abimelek Aruma mutuku ulamukak nyalbiyik. Anyalbiyik yupu ara ani. “Ebed elce deiamuknye Gaal ap, el mapsilip ap, el tam nang ap, Sikhem mutuku ayanuka unyak nang arye, nun Sikhem mutuku unyap nang nirya ati, ‘Anango, aning-aning nirya winipmunce, nun talipsuknye el Abimelek biti, obuka sirya daklulume,’ nyanmasile.

³² Ati ara, an ap, an tam yin talen nang ap, anggun nirya ara, lukunyan aryuk omutuku binuka, ‘Amutuku nang opnamapʼ tenen, bai wa win tam kalekuka warekmunce, duknulbinamlulume.

³³ Winipmamunya ani, winipmanto ara, ambusum beren tam keting purulyangalye talak ara, an ap, an tam yin talen nang ap arye, minopce Sikhem asik dobuka unyakak binuka opmunce, sirya daknamlulume. Winipmunyopura, Gaal birye eipkilyopura, el ap, el tam nang ap, anggunce, ‘E, Abimelek ap, el tam nang ap, binuka opnuyapʼ tenen, mangkau arye an unmamemyak yace talak ara, anti lo akunum arepmakulula anya arye, adiparyuk anye obuka sirya daknamlulume,” nyabuka, laka nyabik. Tonda, “Anggunce, wininamlume,” nyalin yupu ton nyabikba, Abimelek kekebuk.

³⁴ Nyabikopura, Abimelek ap, el yin talen nang ap, sik nirya alukunyan aryuk minopce bokuka, ton dumbarye kibuka, Sikhem mutuku antanapdongobikce binuka duknubik.

³⁵ Abimelek ap, el yin nang ap, Sikem mutuku bukni, bai tamuk dukunubuka daunmekce, wekuka dinmeka ani, berekukopura, beren tam talak ara, Gaal birye, anyasik dolamikak wekelban bisik bublan dam binuka, tikuka dinmokbuk, Abimelek el tam nang arye eibikopura, sik duknupmeka arye, kutukuka bikbik abuka olyayik.

³⁶ Kutukuka yangayikbuk, Gaal birye sik anang eibukce, el kwit Zebul biti nyabuk. “Mutuku kon, tam arye, ninye weik tonun yanganmaka ara, an ton eipmalam do?” nyabuka asibuk. Asipdeyukura, Zebul birye tamubuka nyabuk. “Kume na nio. Ara ninye yanganmaka kuma. Ance eipmalama ara, mutuku kon arye, mutuku kanya koulukuka yanganmalba, eipmalam kum danya. Mutuku kanya diamuk eipmalam bukni, ‘Aning ara ninye do?’ tenepmalamce nyapmalame,” nyabuk.

³⁷ Nyabukura, Gaal birye tamubuka nyabuk, “Kume, na dipkoprob nyapmakin. Ninye ara, mutuku lilun tam arye, koulukuka yanganmangu arano. Tonda yupa tonok ton, otam weik mem yo el si ara Ba yok tekuka, asing len nang, sik yo dam, amutuku si ati, ‘Terpentin yo tikuka dam,’ nyalamupak ara, atam arye kibuka, ayupa ton yanganmake. Tonda, otam arye ton kup-kup ara, mutuku si Tabur-Erez mutuku arye yanganmake,” nyabuk.

³⁸ Nyabuk ati, Zebul birye Gaal biti tamubuka nyabuk. “Anang ara, ‘Yata deiyok ati yanganmak do?’ tenena kume. Amio, sikda talye kum yayake. Ance Abimelek biti, ‘Elda, yata ati nun deiyoknye kibuburye, el nyapsilye yupu dem kekenamap do?’ tenen, yu upmakukba, ance malye yupu nyapmaluma ati, dekna ning ati ayanganmaka atia. Ati, an mikip upmakilyopura, adiparyuk minpola bimince, ayangayak yin talen nang ati binukapmince, obuka sirya daknulyame,” nyabuk.

³⁹ Nyabukopura, Gaal birye deiyok kibukabukce, menekuka banmokbuk, sik Sikhem mutuku ulamik weik deiyok-deiyok nang ap ara, ‘Abimelek ap, el tam yin talen nang ap ati, anang dobuka, sirya opnuyapʼ tenen, mal olalbiyik.

⁴⁰ Biyikba, Abimelek birye, ‘Anye Gaal opnunʼ tenen, bikbik abuka dobolbiyukba, Gaal bai sakuka biyukba, aminyan dopbolbanmokce, ninye weik onmekba, dipnin banmeka ani, sik weik asik dobuka ulamik asik bublan dam babye, binuka obikba, ninye weik dibik.

⁴¹ Aning nirya akunum winibikopura, aminyan talak Abimelek bira tamubuka, mutuku si Aruma mutuku uk yanuka ulamuk. Aruma mutuku ara, atam uamukba, Sikhem mutuku ara, mitik yukak uamuk. Winilamuk ani, Zebul birye Gaal ap, el kayapu nang ap ati, “Anggunda Sikhem mutuku una kume,” nyabuka, yakdonokukba, sik anang ara, Sikhem mutuku batakuka, yukak binuka ulamika anya arye, Sikhem mutuku tamubuka kum yayik.

⁴² Ura, Sikhem mutuku dam ara, sik nirya mapmeka berekukopura, Sikhem mutuku nang ara, ‘Nun wa winamapʼ tenen, asum arye deiyok koubuka, sik ulamik asik batakuka, bai tam wa win damuk biyik. Wa win dam biyikopura, yuk nang eibikce, Abimelek dam laka nyabiyik. “Na nio, sik Sikhem mutuku nang ara, sik wa win dam yanganmake,” nyabuka, Abimelek dam binuka laka nyabikura, kekebuk.

⁴³ Ayupu kekebukce, Abimelek el tam nang, sik yin talin nang nirya bulupdeibuk. Abulupdeibuk nang nirya ara, yupa winilye kintinibuka, anang bokdeibuk. Winibukba, sik anang nirya ara, Sikhem mutuku nang talilamik wa win damuk binuka dungnubik. Winibik talak ara, Abimelek birye dinmoka ani, sik Sikhem mutuku nang ara, ‘Nun wa win dam binuyabʼ tenen, yangayikba, Abimelek eibukce, sik duknupmeka ani, kutukuka yayikce, sik aSikhem mutuku nang nirya ara obik.

⁴⁴ Obikce, Abimelek el yin talen nang, ton yupa bitinye nang ara, sik wa win dam unmek nang ati, ebuka biyikce, mal olbinmek bukni, tonok yupa ara, Abimelek birye deiyok kibukba, sik adiparyuk, minopce Sikhem mutuku dam, asik dobuka ulamik asik bisik bublan, wekelban dam biyikce warikik.

⁴⁵ Binuka wariklamikce, Abimelek birye asum-asum nirya olbanauk ulamuka ani, anyasik domika nirya obuka, sirya dakukce, sik bona nirya alubuka doprobukce, amutuku dobuka ulamik asik nirya ara, elcuk doprobukce, talibuk bukni, anyasik domika nirya ara, uluplobuk. Ura, amutuku ulamik nang nirya ara, elcuk obuka, kum kipdeibuk. Tonda, ‘Sik mutuku nirya ara, pia malye upleba, koulamak ning ton pia kum papnamleʼ tenen, sik tuku deice nirya ara, garam dakdongobuka deice arye, amutuku pia malye kipdeibuk.

⁴⁶ Aning winibuk talak ara, yuk nang eibikce, laka nyalbiyikba, sik Sikhem mutuku noutam kum bukni, mitik otam mutuku, weik keil dekdanuka cang poka domikba, anyasik domik noutam ulamik nang nirya, ayupu kekebik. Kekebikce, sik adiparyuk, sik si erelamik isa, El-Berit isa, el si erena ati, kintinip deiamik keil aik, atam wekelbiyikce, dungnubik.

⁴⁷ Amutuku wekelbiyikba, yuk nang eibikce, Abimelek el dam, yanuka nyabik. “Na nio, weik kat keil poka dobuka ulamik aik pum, Sikhem mutuku min arye ulamik deiyok nang ton, bulubukabikce, sik si erelamik isa, el si El-Berit, el si erena ati, cang asik dolamikak binuka unmake,” nyabuka, laka nyabik.

⁴⁸ Ati ara, Abimelek ap, el tam yin talen nang ap, sikda Salmon mutuku tam biyik. Biyikopura, Abimelek birye, kapak ya doprobukce, yo taruk-taruk weika arye werebuka, takunya deice deibuka boyayuk. Winibukce, el tam nang nirya ati nyabuk, “Anggunda, na winipman touk, minopce winipnamlume,” nyabuk.

⁴⁹ Nyabukura, sik yuk-yuk bukni, sik babye yo taruk ara, kapak ya arye binuka werebuka, tonok-tonok dobuka takubikce, Abimelek binyuk melibik. Melipmekura, sik nirya arye, ayo bobiyikopura, El-Berit isa, sik Sikem deiyok nang arye el si erena ati dobuka deiamik aik, anyaik deice tam binuka deibikce uku dongobik. Wininmek talak ara, Sikhem mutuku nang ara, aning amu tamuk unmeka ani, aning uku dipnin bayukce, aunmek nang ara, sal babye, kilapu babye nirya, uku dibuk nang yupa ara, weik seribu (1.000) nang uku dibukba dibik.

⁵⁰ Aning akunum winibukopura, Abimelek adiparyuk, Tebes mutuku biyuk. Biyukce, amutuku ulamik nang nirya ati, obuka sirya dakukce, amutuku ara, elcuk talibuk.

⁵¹ Winibuk bukni, anyasik domik noutam ara, weik cang keil asik ton, kat ning arye deibuka domikce, ulamika anya arye, amutuku ulamik nang nirya ap, anyasik deiyok-deiyok nang ap ara, anyaik damuk bikbik abuka wekelbiyik. Wekelbiyikopura, bublan trikdongobik. Winibikce, acang keil aik, alip tamuk welebikce unmek.

⁵² Wininmeka ani, Abimelek bira weik cang aik, kat keil arye deibuka domik aik damuk yayuk. El Akunum yayukopura, ‘Anyaik ara, uku dongopnun,’ tenebuk.

⁵³ Utenebukce, anyaik dam unmok talak ara, anyaik alip tam unmok kil tonok, roti din deiyok ning, gandum duk atonun ning, teikina ati kintinip deiamik keil, ikin weik ning dobuka dopkwetebukba, Abimelek el kisok deice pulyayukce, el kisok cobuka obukba, dipmanto ubuk.

⁵⁴ Winibuk ati, Abimelek birye, el yin talinanye kamnye tonok ati nyabuk. “Se amio, minopce yalyame,” nyabuka, yupu weik arye yukubuk. Tonda nyabuk, ‘An ninye on parang talipmalam ya aryuk, boyanuka luknimince opnilyame. Deiyok ara, yuk nang arye, na Abimelek biti, ‘El anye bira, talye kil arye obuke,’ nyabuka nalipnikcake. Aning ara, na pia like,” nyabuk. Nyabuka morobukba, ayin talinanye kamnye birye, lukuka obukba, dibuk.

⁵⁵ Atalak ara, sik Israel yala nang nirya arye dinmeka ani, Abimelek akunum dibukopura, sik nirya aolanmek mutuku batakuka, sik asik koproba tamubuka biyik.

⁵⁶ Ura, Abimelek bira talye kum dibuk bukni, min talak ara, Abimelek birye, el li koproba dam malye uamuk ning ati dibuk. Ara, el li koproba, el kayapu nang, sik weit capu ap, sik duyapu ap ara, tujuhpuluh (70) nang ton, Abimelek birye omuk ning ati, Allah arye tamubuka kwang dakuk.

⁵⁷ Ton deiyok ara, Sikhem mutuku nang, sik bidamnye malye ulamik ning dekena ati, Allah arye wenebuka obuk. Awinibuk ning ara, Yerubaal, ton el si ara Gideon, elce deiamuknye, el si Yotam birye, sik Sikhem mutuku nang ati, “Dipkoprob sik dam ara, ikin ning yanamlarya,” nyabuka subukce, “Winipnamsile,” nyapdeiamuk touk winibuk.