Hakim-Hakim 3 - Eipomek

Minopce Kanaan mutuku tuba aulamik nang ati, nyabuk yupu

¹ Allah arye, ‘Anang nirya ara, Kanaan mutuku noutam ulamikirye, sikce Israel nang ati, benenamakʼ tenen, sik minop arye Kanaan mutuku ulamik nang ara, tuba asukumuk tamubuka, sikda amutuku ulamik. Ara, Israel nang Kanaan mutuku ulamik nang ap oldanamik nang, kel bikina kum nang ara, sik amutuku tuba batakuk nang arye olyakiba, ‘Mal ara, winibuka-winibuka olalamik,’ tenebuka, ‘Ninye olan ning nirya kel kipnamakʼ tenen, tuba batakuk.

² Tuba abatakuka deiyok ara, Israel nang arye deipdanin banamak nang nirya ara, “Kanaan mutuku nang arye ninye olalbana ati wininamlume,” nyabuka, ‘Wenenamakʼ tenen, batakamuk. Ara, ‘Ninye olalbana ati, wininyake, tenena kum bikamik nang ati, wenebikiba, biknamakʼ tenen, batakamuk.

³ Tamubuka, amutuku tuba ulamik nang, yala pamubarye ninye deiyok nang, sik si ara ani. Pilistin nang mutuku noutam aulamik. Ara, Kanaan mutuku nang ap, Sidon mutuku nang ap, tonda Hewi mutuku nang ara, Libanon mutuku tam ulamik nang ara, sikda Bahal-Hermon tam arye, dipdongobuka binamuka ani, Hamat mutuku bisik bana ati, lu tam ulamik.

⁴ Allah arye nyabukba anang tamubuka, sik amutuku tuba ulamika deiyok ara, sik anang arye, Israel nang kiklildena ato ning, sik deice delinamika ati, Allah elce tamupdeiamukba ulamik. Winipniba, Israel nang ara, ‘Allah arye sik apu koproba Musa dam nyapdeiamuk yupu ati, aninguk talibuka wininamak do?’ tenen, bikilin ning, Kanaan mutuku nang arye, sik Israel nang deice delinamik. Ara, ‘Sikce aning ara, eibuka kel biktibyeʼ tenen, winilelamik.

⁵ Ati ara, minop talak Kanaan mutuku ulamik nang ap, Amori mutuku nang ap, tonda Feris yala nang ap, Hewi yala nang ap, Yebus mutuku ulamik nang ara, Israel nang ap tuba kanaan mutuku noutam, sik neika ulamik.

⁶ Ulamikce, sik Israel yala nang ara, Kanaan mutuku nang ap, talye dopdanuka ulamik. Israel nang arye Kanaan mutuku kilapu dolamik. Aning atouk, sik Israel yala nang arye delilamik kilapu ara, ‘Sik Kanaan mutuku nang dopnamakʼ tenen, arelamik. Israel nang ap, Israel kilapu ap ara, Kanaan mutuku nanguk dolalamik. Amutuku nang arye, sik si erelamik isa dem, sik babye aisa siuk, erebuka kilamikce, malye weik ulamik.

Otniel biti sekik yupu

⁷ Israel nang arye, Allah dam malye ninguk winilamik. Ara, Allah Yahweh arye, ‘Aning ara pia malye ati, na like,’ tenelamuk ning buk winilamik. Ton ning ara, Allah el si kum erelamik bukni, Allah arye nyalamuk yupu kum kekelamikce, yanibukapnarye, talye isa si Bahal ap, Asyera si ap, aninguk Israel yala nang ara, pia si erepnin balamik.

⁸ Winilamika ati, Allah Yahweh arye, ‘Sik Israel nang ara, Weik tonun wenepnune,’ tenebukce, Allah arye sikti, melilamuk ning ara, tamubuka, Mesopotamia mutuku ninye deiyok talibuka ulamuknye, el si ara, Kusyan-Risyataim birye yanuka, Israel nang weik arye obukabukce, sik ulamik mutuku nirya ara, alubuka doprobukce, anye biryuk ninye deiyok kibuka talibuk. El anye birye taleamuk keting tamun ara, pinbarye (8) keting tamun Israel nang taleamuk.

⁹ Talyamuka ani, sik Israel yala nang arye, “Se, nun ni Allah, ance nunti melibuka lyepsilyame,” nyabuka, engebikce morobikopura, Allah Yahweh arye, ‘Anye birye Israel nang melibuka lyepnamleʼ tenen, tonoknye el si Otniel wipdeibukba, Israel nang sik deiyoknye kibukce, lyebuka dopkipdeibuk. Otniel bira Kalep el weit koproba, sik ni bira Kenas ulamuk.

¹⁰ Otniel bira, Allah el Pia Teleb, Lek Dip Kanye, arye mikip weik arebukopura, adeice arye Otniel melibukba, Israel nang sik deiyoknye kibuk. Kibuk talak ara, yuk mutuku nang mal olalbana ati, elce deiyok kibukba, Mesopotamia mutuku ulamik nang olbiyik. Amal olalbiyik talak ara, Allah Yahweh arye, el deice mikip arebukba, sik Israel nang arye Mesopotamia nang, sik deiyoknye, el si Kusyan-Risyataim, obuka sirya dakikce, anye amutuku min arye taleamuk ara, Otniel biryuk talibuk.

¹¹ Otniel biryuk amutuku taleamuk noutam nirya ara, telebuk ulamikce, yuk mutuku nang ap mal ton olalbalamikce, dakeiyamasa telebuk ulamik. Atelebuk ulamik keting tamun ara, weik empat puluh (40) tahun mamik. Winibuka ulamik bukni, 40 keting tamun akunum ubukopura, Kenas birye deiamuknye Otniel dibuk.

Ehud biti sekik yupu

¹² Otniel akunum dibukopura, daulamika ani, sik Israel yala nang arye, Allah Yahweh el dam pia malye ulamik. Ara, Allah Yahweh arye, ‘Aning ara pia malye unyaka ati, na like,’ tenelamuk ning winilamik. Winilamikopura, Eglon bira Moab mutuku ninye deiyoknye Raja, el deice Allah el mikip arebukba, Israel nang nirya ara, sik mikip mitik ubukura, Moab mutuku deiyok kibuka ulamuknye, elcuk amutuku nirya mikip asa talibuk. Deiyok ara, Allah Yahweh arye, ‘Aning ara pia malye wininyaka ati, na like,’ tenelamuk ning ara, sik Israel nang arye talibuka ulamik.

¹³ Ninye deiyoknye Eglon bira, Kanaan mutuku ulamik nang kan-kan arye, Amon yala nang ap, Amalek yala nang ap, ‘Neika mal olalbinamapʼ tenen, neika ansinibuka yayikce, Israel yala nang yanuka obuka sirya dakik. Winibikce, Yeriko mutuku kurma yo duk weik ulamuk mutuku nirya ara, sik anang arye yanuka alubuka doprobik.

¹⁴ Winibikce, Moab ninye deiyoknye Raja Eglon birye, Israel mutuku nang taleamuk keting tamun ara, delapan belas (18) tahun deice arye talibuka ulamuk.

¹⁵ Winilamuk ati, sik Israel yala nang arye, “Se, nun ni Allah, ance nunti melibuka lyepsilyame,” nyabuka, engebikce morobikopura, Allah Yahweh arye, ‘Anye birye Israel nang melibuka lyepnamleʼ tenen, tonoknye, el si Ehud wipdeibukba, Israel nang sik deiyoknye kibukce, lyebuka teleb kipdeibuk. Ehud bira, el li koproba ara, Gera ulamuk. Gera bira, Benyamin yalanye birye, Ehud deiamuk. Tonda, Ehud bira, el mikip uamuk taruk ara, kwanim tam bukni, sirik tam taruk ara kume. El anye Ehud birye, Israel nang sik ulamik mutuku weik deiyoknye, Raja Moab biti arena ara, yo bok ap, yuk dekna teleb ning ap, bulupdeibikiba, Raja Eglon biti arelbananye ulamuk bukni, tonda Ehud bira, sik mitik amu tam ninye deiyoknye kibuk.

¹⁶ Ehud bira, winilamuk talak ara, tonok sum ton, Ehud birye, el ya si ara, tace bitinye uamuk parang ya memebuk. Aparang ya ara, el cang ara, satu setengah meter (1.5 meter) ning uamuk. Aning doprobukce, el nong balye tam deiyatinga pum tam kikipdongobuka, baju arye, siknipdongomokce, unmok.

¹⁷ Winipmok diparyuk, Israel nang sik ulamik mutuku weik deiyoknye, Raja Eglon arena ati, yo bok ap, yuk dekna teleb ning ap, bulubuka deipmek ning bobuka, ninye deiyoknye Raja Eglon dam bobiyuk. Eglon el nong ara, pia weik konobanye nemuk.

¹⁸ Ayo bok ap, yuk dekna teleb ning ap, akunum binuka arebukopura, Ehud bira, “Ayo bok ap, yuk dekna teleb ning ap ati, melipmalumce, takubuka boyanmalum nang ara, anggun tamubuka bilulume,” nyabukba, bindobik.

^19-20 Bukni, Ehud eluk ara, Gilgal mutuku dam ara, keil deice arye urasin yuk-yuk ning puturubuka delilamik mutuku dam arye, tamubuka Raja Eglon dam biyuk. Winipmoka ani, tamubuka Raja Eglon el aik damuk biyuk. Atalak ara, Eglon bira el weik aik bukni, alip aik buppu uplye talak dikdik sena ati, eitam domik aik unmoke. Alip aik pum tam dikdik senmokba, Ehud bira Eglon dam yanmokce nyabuk. “Na nio, narye weik mambul yupu Allah arye anti nyapdeipmakil yupu ara, boyakine,” nyabuk. Nyabukura, ayupu kekebukce, Eglon adiparyuk tikukabukce, el aik pum tam melin nang nirya ati, “Tunim apmunce, buklulume,” nyabukba, sik nirya anyaik pum tam arye batakuka bindobik.

^21-22 Eglon tuba asukumuk tikmok talak ara, Ehud adiparyuk, ninye ona ati kintinip deipmok parang ara, el sirik tam keil dam ketebuka kikipmok ning ara, el taruk kwanim tamnye ulamuka anya arye, kwanim tam taruk arye doprobukce, Eglon el mun noutam ara, mikip weik arye bikdongopmokba, talima noutam nirya babye wekuka, otam kulubuka belebuk. Eglon bira nong weiknye nemuka anya arye, el nong ara, meta siknipdongobukba, lake ton kum ubuk. Ehud bira, winibukopura, acang parang ara, anye el nong deice bikdongopmoka kipman bobiyuk.

²³ Ehud bira, Raja Eglon alip aik unmokbuk, obukba, akunum dibukopura, anyaik pum tamuk bublan tirikdongobukabukce, yolamik bisik arye, sakuka bendobuk.

²⁴ Akunum bublan tirikdongobuka biyukopura, aminyan talak Eglon el melibuka pil don nang ara, anyaik yayik. Yayikce dinmikba, ninye deiyoknye Raja el alip aik ara, bublan pia tiriklopmok touk upmok. Winipmokba, el pil don nang sikce tenepmeka ara, ‘Raja, elda alip aik pum tam deibar aik tia ati, binmalce unmale,’ tenepmek.

²⁵ Utenebuka daunmek bukni, sik deiyoknye unmok ati, bublan kum kukmanto ubukopura, sikce, ‘Se, yata wiripnuyap do?’ tenebikce, dinmekbuk, ouku weik ubukba, walwal ubukce, malye kanye bobik bukni, bublan kukun ning, el si kunci arye, dobuka bublan kukuka dilamikak, sik deiyoknye bira amsunak anyuk obuka batakmukak eibik.

²⁶ Winipmokba eibikopura, sik nirya arye, ‘Se, yata winiptibye do?’ tenen, teninmek talak arye, Ehud el adiparyuk bikbik abuka, Seira mutuku puturubuka delilamik keil dam mutuku arye, dungnubuka biyukce lyepdayuk.

²⁷ Ehud banmoka ani, Seira mutuku tam biyukopura, ‘Israel nang kekebikirye yanganamak,’ tenena ati, Ehud bira terompet pong-pong ana lelim binuka, Efraim mutuku kon deice nyabukba kekebikce, ‘E, ninye olbinuyapʼ tenen, yayik. Israel nang akunum kekebikce yayikopura, elce deiyok kibukba, sik nirya ara, amutuku deice arye kouluka biyik. El menekuka bayukba, sikda, ‘Nun deiyoknye unamleʼ tenen, el aminyan melibuka yanganmek.

²⁸ Yanganmeka ati, Ehud bira sikti, nyabuk. “Anggunce na melipnamnulume. Allah Yahweh arye, anggunti melipsilirye, anggun mal olan nang, Moab mutuku nang nirya, malye kibuka opnamalume. Melipsilyopura, anggunce sik Moab nang ati dipkoprob obuka sirya daknamlume,” nyabuk. Nyabukura, Ehud el deiyok kibukce, Israel nang nirya ara, amutuku deice arye koulukik. Koulukikce, Yordan mek koubuka, otam balamik bisik ara, yanuka sekdongobik. Winibik talak ara, sik mal olan nang, sik Moab nang babye, yuk nang tonoknye babye ton, mek koubuka otam kum binmanto ubik.

²⁹ Atalak ara, sik Israel nang arye, Moab nang ap olanmek talak ara, Moab mutuku yin talen nang, yupa pia weik sepuluh ribu (10.000) nang ton obikba, dibik. Sik obik nang ara, talye nang kum bukni, sikda mikip weik nang, nong teleb nanguk obik. Teleb ulamuknye tonok babye ton, batakikba kum biyik. Aolanmeka ani, ninye yupa weik nirya obuka sirya dakik.

³⁰ Winipmeka ati ara, asum ara Israel nang arye, sik Moab yala nang nirya obuka sirya dakik. Winibik ati, amutuku noutam nirya ara, mangkau asa, teleb aryuk ulamik. Winilamika ani, keting tamun ara, delapan puluh (80) tahun noutam ara, mal olana kum diparyuk, teleb kanye bobuka talye ulamik.

Samgar biti nyabuk yupu

³¹ Ura, aminyan talak Ehud dibukba, el punubuk ninye deiyoknye bira, Anat el mi Samgar birye deiyok kibuk. El anye babye, ‘Yata wiriptibya deice arye, sik Israel nang ara, teleb upting do?’ tenelamuknye ulamuk. Ara, el anye biryuk, sapi basam weinun talak ara, yakna ati, tace lubuka bomuk kama arye, Pilistin nang yupa ara, enam ratus (600) nang obuk.