Hakim-Hakim 2 - Eipomek

Bokim mutuku Allah el malaikat yayukce, nyabuk yupu

¹ Israel ninye Bokim mutuku unmek talak ara, Allah el si ara Yahweh, el Allah pil donanye malaikat ara, Gilgal mutuku arye Bokim mutuku welebuka biyuk. Tia talak ati, Israel ninye bulubuka Bokim mutuku unmek sukum, Allah el pil donanye biyuk. Allah el pil donanye bira weik mambul yupu laka nyalbananye birye biyuk. Biyukce, sik Israel ninye ati ayupu nyabuk. Allah arye nyapsile. “Anggun Mesir mutuku ulalumbuk, narye lyepropsisirye, bobuka Kanaan mutuku noutamak boyanamsise. Tonda anggun apu yapu ati, ‘Winiryuk pia teleb mutuku arepnamsine. Aning ara, kum bataknamne,’ nyabuka nyalilamse yupu ara, kum batakse. Dipkoprop amutuku akunum arepsisiba, doproplumce, pia amutuku talibuka unamlume. Tonda narye anggun apu yapu ati, ‘Na tenena ninye unamlum’ tenen, ‘Pia melisiniba, teleb kipdeipnamsine,’ nyapdeiamse yupu ara, nyapdeiamse. Na ap, anggun Israel ninye ap, teleb ubuka neika una ati, ‘Teleb kipdeipnamsine,’ nyamse yupu ara, pia kum bataknamne. Ara, anggun wini talak ululum ninye ap, anggunce deipmalumba, dadeipdanin binamak ninye babye nirya ati, ayupu nyapsine.”

² “Aning atonun, anggunce na yupu batakmunce, Kanaan mutuku talibuka unyak ninye ati, ‘Nun ap, sik ap olana kum diparyuk, teleb kanye bobuka neika unamabe,’ nyabuka, nyalin yupu kum nyapnamlulume. Anggun Israel nang ap, amalye nang ap, neika kum unamlulume. Sik amutuku talibikce, si erenyak isa ati, keil pala yangabuka delilamak ap, sik isa aik ap nirya ara, anggunce uluplopnamlulume. ‘Aning nirya ara, nunce neika wininmabe,’ nyabuka nyapdanamupu bukni, na yupu moubuka kekebuka kum dobolbalulume. Aning yaniptaplumce amutuku ninye malye wininyak ning ara tuba aupmale. Yata deiyok ati, na yupu kum kekebuka dobolbalulum do?”

³ Winilulum ati, narye anggunti nyapsine. “Narye anggun mal olan nang, amutuku unyaka ara, narye malye kibuka kum yakwetepnamne. Amutuku noutamak balamunyebuk, sik minop talak arye amutuku ulamik ninye ara, asukumuk unamake, batakuka kum bindopnamake. Ati, amutuku malye ninye, Kanaan mutuku noutam aunmakceura, anggunda ikin weik unamlume. Tonda, sik si erenyak isa ara, anggun Israel ninye ati, malye winipdeipsiliba, ikin kanye bobuka unamlume. Winipmunyopura, dipkoprob wena youlamle atonun winipnamsile.” Allah el pil donanye malaikat arye, Israel ninye nirya ati nyabuk.

⁴ Allah el si Yahweh, el pil donanye malaikat arye ayupu akunum nyabukopura, sik Israel ninye nirya malye kanye bobuka weik engenmek.

⁵ Engenmika ati, amutuku el si ara, Bokim mutuku nyabuka si dobik. Israel ninye arye nyanyak yupu deice ara, Bokim deiyok ara, ‘Engena ninye,’ nyanyake. Ati, amutuku si ara, Bokim mutuku nyabik. Tonda, Israel ninye arye amutuku noutamak ara, Allah el si erebuka arena ati, sik wein ning, domba ap, kambing ap obuka, uku dongobik.

Yosua akunum dibukba, aminyan talak, sik Israel ninye arye, isa si erelamik ning ati, nyabuk yupu

⁶ Yosua birye el yupu akunum sirya nyabukopura, elce, ‘Dabilulume,’ nyabukopura, Israel ninye amutuku batakuka biyikce, Kanaan mutuku noutam bukni, sik mutuku yuk-yuk tamubuka biyikce, yuk-yuk binuka talibikce ulamik. Minop talak arye, Allah el si Yahweh arye, ‘Anggun ap anggunce deipmunyeba, dadeipdanin banamak ninye ap, aminyan talak amutuku unamak’ tenen, amutuku nirya bokukabukce, sik Israel ninye yala yuk-yuk nukamuk touk, sik yuk-yuk binuka talibuka ulamik.

⁷ Yosua tuba kam ulamuk talak ara, sik Israel ninye nirya ara, Allah el si Yahweh, el amu tam ulamikce, el yupu kekebuka dobolbalamikce, el si erelamik. Tonda, Israel ninye sik yupu lipsisikuka bokolina deiyok nang, wisi nang ara, Yosua ap neika ulamik bukni, Yosua minopce dibuk. Akunum dibukba, sik awisi nang tuba kam ulamik talak ara, Israel ninye tuba teleb ulamikce, Allah el siuk erelamik. Yosua ap, awisi nang nirya ara, Allah el si Yahweh arye, Israel ninye melina ati, mambul weik pil dolamuk ning nirya, sik asing arye elilamik ati, anang tuba kam ulamik talak ara, sik Israel ninye nirya, Allah el siuk tuba erelamik. Sik kam tuba ulamik talak ara, sik yuk talye Israel ninye nirya ara, Allah el yupu kekebuka, el siuk erelamik.

⁸ Winibuka daulamika ani, aminyan talak ara Yosua dibuk. Ara, talinye kum bukni, Yosua bira, Allah el yupu kekebuka, el amu tam ulamukce, Allah el pil dona ati wipdeiamuknye, Yosua dibuk. Yosua el li bira, kam ulamuk talak ara, el si Nun ulamuk. Nun el mi Yosua bira, el ulamuk talak yupa ara, 110 keting tamun ulamuka ani, dibuk.

⁹ Dibukopura, el nong bobuka, el minop talak ulamuk mutuku bobiyikce, tuku palibuka weibik. Amutuku ara, minop talak Allah arye elti, areamukba, el Yosua babye binuka aik dobukabukce, ulamuk mutuku si, Timnat-Serah nyalamik mutuku bobiyikce, tuku palibuka, Yosua el nong weibik. Amutuku ara, Efraim yala nang talibuka ulamik mutuku ulule. Yosua bira, Efraim yalanye ulamuka ati ara, amutuku noutam el nong weibik. Tonda, amutuku deice, outam uamuk mutuku ara, Gaas mutuku nyalamik.

¹⁰ Yosua ap, neika ulamik nang, atalak Israel nang kam tuba ulamik ninye keting tamun yupa weik daulamik bukni, aminyan talak sik nirya dipnin balamika ani, nirya kum dayik. Atalak ulamik ninye nirya dibikce, sirya dakik bukni, sikce delilamik mapu ara, tuba kam ulamikce, nebra balamik. Ati aminyan talak erepdeibik nang nirya ara, Allah ati moubuka kum tenelamik. Sikce, dipkoprob Allah el si Yahweh ara, kum kel bikamik. Tonda, Allah arye minop talak Israel ninye ati melilamukce, ninye kum winipmanto ning winilamuka ara, sik asing koprop arye kum elilamika ati, sik kum biklamik.

¹¹ Ati, atalak ulamik Israel ninye arye, pia malye-malye ning winilamikba, Allah el kanye ara, ‘Na like,’ tenelamukce yu ubuk. Tonda, atalak ulamik ninye arye, ‘Allah el si erena nun like,’ tenebuka batakikce, Kanaan mutuku noutam ulamik ninye isa si eren ning, el si ara Bahal si talibuka si erelamikce, mem aik dobuka, Bahal si erebuka malye winilamike.

¹² Winilamika deice arye, sik Israel ninye arye, Allah el si Yahweh ati yaniptabik. Ara, sik apu yapu arye si erelamikba, melilamuk Allah batakike. Tonda, Yahweh arye sik apu yapu Mesir mutuku noutam arye, lyebuka melipnin yangalamukce, winiryuk teleb mutuku bobuka delilyayuknye, Allah ati yanibik. Winilamikce, Kanaan mutuku noutam bukni, amutuku-amutuku binuka ulamika noutamak, amutuku-amutuku ulamik ninye arye, si erelamik ninguk, sik Israel ninye babye, aisa si eren ninguk talibuka si erelamikce, isa piluk dolamikce, amalye pil dobolbalamik. Winilamika ati, Allah el kanye talima yu weik ubukba, Allah eibukce, yu pia weik ubuk.

¹³ Ara, talye ati kume. Sik Israel ninye arye Allah batakikce, amutuku noutamak ulamik ninye arye, si erelamik isa si, sik babye si erelamik. Amutuku isa si ara, Bahal ap, tonda isa kil el si ara, Asytoret, sik Israel ninye arye, talibuka si eren aik dobikce, aisa si bitinye erelamika ati, Allah yu pia weik ubuk.

¹⁴ Winilamikopura, Allah el si Yahweh arye, el yu sik Israel ninye deice deibuk. Winibuka ati, elce sik wenena ati, arebukba, sik buru tam malye nang, mal olan nang arye, Israel ninye yanuka obukabikce, sik bona nirya dalubuka dololamik. Allah arye Israel ninye, ‘Sik malye tenen ati, dauplye, daunamake,’ tenebukce, sik mal olan nang ati mikip arebukba, anang arye dana-dana tam arye, Israel ninye dam yanuka, malye kibuka opra balamik. Allah arye sik Israel ninye ati tonap kum melilamukba, sik mikip kum ubuka anya arye, sik mal olan nang ati, kum opmanto ulamikopura, sik mal olan nang arye malye kilamik. Allah el mikip ara, sik mal olan nang deice deibuka atia.

¹⁵ Ati, atalak-atalak nirya, Israel ninye arye, sik mal olan nang ati ‘Olbinamabe,’ tenelamikce, binuka olalbalamik bukni, kum opmanto ulamikba, sik yu nang arye Israel ninye ati obuka sirya daklamik. Aning winilamik ning ara, minop talak Allah arye Israel ninye ati, ‘Anggun malye winipmunce, na bataknumunyopura, anggun wenena ati, anggun mal olan nang mikip arepneba, anggun Israel nang dam yanuka oplopnamsiyake,’ nyabuka nyalilamuk touk winibuk. Yu nang arye sikti, ona uk ulamika ati, sik Israel ninye ara, malye kanye weik bobuka ulamikce, ‘Se,’ tenebuka ikin kanye bolamik.

¹⁶ Winibuka daulamika ani, aminyan talak ara, Allah el si Yahweh arye tamubuka yayukce, sikti, melibukabukce, sik lyena ati, yupu lipsisikuka bokolina deiyok nang, mikip nang ton wipdeibukopura, anang arye Israel ninye melibikce, sik mal olan nang ap, sik bona dalubuka dololamik nang ap ati, sik babye tamubuka obikba, amalye nang ara batakuka bai sakuka bindobik.

¹⁷ Allah arye winibuka meliamukba, elce areamuk deiyok nang arye, Israel ninye lyebuka miliamik bukni, sik Israel ninye arye anang ati, sik yupu kum kekelamikce, tuba tamubuka tonap anang ati bataklamik. Sik deiyok nang bataklamika atouk, sik ni koproba Allah ati bataklamikce, yuk isa si erena ati, gutam tuku dipdongobukapna arye, isa si talibuka si erelamik. Minop talak ara, sik apu yapu, Allah el si Yahweh arye, ‘Aning ara wininamlulume, aning ara kum wininamlulume,’ nyapdeiamuk yupu kekebuka, diksukum bisikuk upra balamik bukni, atalak ulamik ninye ara, sik atonun kum winilamik. Sik aninye ara, sik apu yapu diksukum bisik balamik atonun kum winilamikce, malye-malyeuk winipra balamik. Winipna arye, Allah el yupu batakikce kum kekebuka dobolbalamik. Malye-malye diamuk winipra balamik.

¹⁸ Winipra balamik talak nirya ara, Allah arye sikti, tuba tamubuka tonap bico tenelamukce, sik melina ati yupu lipsisikuka bokolina deiyok nang, mikip nang ton wipdeibukce, anang ati el mikip arebukba, anang arye sik Israel ninye mal olan nang ati, opra balamik. Allah arye wipdeiamuk nang kam tuba ulamik talak ara, Allah arye melilamukba, sikce Israel mal olan nang ati obuka malye kibuka sirya daklamik. Deiyok ara, yuk mutuku nang arye, Israel ninye opbisibikce, sik nong deice ikin ning weik delilamikba, malye kanye bobuka ulamikopura, Allah eibukce, tuba ton bico tenebukce, sik Israel ninye ati, yupu lipsisikuka bokolinanye ton arebukba, melibuka lyebukba, tuba tamubuka tonap telebuk ulamik.

¹⁹ Tia karin ara, teleb ulamik bukni, aminyan talak ara, ayupu lipsisikuka bokolina deiyok nang, erelilamuk nang ton akunum dibikopura, Israel ninye tuba tonap malyeuk winipra balamik. Ara, sik deiyok nang teleb ulamik nang dipnin balamikba, anang ton kum wiamne talak ara, Israel ninye tuba, malye ning tonap, weik tabakuka, malyeuk winipre balamik. Mince sik apu yapu arye malye winilamik ning ara, mitik malye winilamik bukni, aminyan talak Israel nang arye tabakuka malye winilamik ning ara, malye pia weik winina atia. Tonda, sik ni koproba Allah batakuka, yuk talye isa si erebuka, isa si erelamikce, dobolbalamike. Atalak nirya ara, ‘Aning ara malye,’ tenena pia kum diparyuk, kanam asa ulamikce, malye winilamik ning ap, isa si erelamik ning nirya ara, kum bataklamik. ‘Asum-asum nirya malyeuk wininpra balamik.

²⁰ Winilamika ati, Allah el yu weik ubukba, sik Israel ninye ati nyabuk. “Anggun malye winimunya ati wenepnamsine. Ara, minop talak narye, anggun apu yapu ati, ‘Na ap neika teleb dem unamap’ tenen, ‘Winipnamlulume, aning ara kum winipnamlulume,’ nyapdeiamse yupu, kekebuka kum dobolbalulume. Tonda, anggun akunum bataknulumce, na yupu ton kum kekepnuluma ati, wenepnamsine.

²¹ Ara, Yosua dibuk talak ara, Kanaan mutuku noutam yuk yala ninye weik tuba ulamik. Ara, Yosua birye sik yuk yala ninye min kum olamuka anya arye, Kanaan mutuku noutamak tuba unyake. Minopa ara, ato ninye ati yakuka dopkwetepsiba, anggun Israel ninye arye, sik mutuku binuka ulamlum bukni, wini talak arye dipdongobuka, doyanamle talak noutamak nirya ara, aning atonun kum melipnamsine. Sik yuk yala ninye ara, yakuka kum dopkwetepnamne, amutuku noutamakuk tuba daunamake. Amutuku-amutuku nirya unyak ninye ara, narye yakuka kum dopkwetepnamne.

²² Ati, narye sik yuk yala ninye kum yakuka dopkwetepnamne, anang arye Israel ninye ati, ikin ning anggun nong deice deipsikcopura, adeice arye winipresinirye, moubuka dinamsine. Ara, ‘Israel ninye arye nati dib tenenyak do, kum do? Teleb unamak do, malye unamak do?’ tenen, dinamne. Narye anggunti winipdesinirye dinamsine. Ara, ‘Anggun apu yapu ati, na Yahweh arye nyalilamse yupu kekebuka pia talibuka ulamik touk, wini talak ululum ninye, anggun nirya babye atonun unamlum do, kum do?’ tenen atia. Ati narye anggun nirya ati winilinamsine, nyapne.” Allah arye Israel ninye ati nyabuk.

²³ Ura, Kanaan mutuku noutam bukni, amutuku-amutuku talibuka tuba ulamik ninye ati, Allah arye utenelamuk. ‘Dauplye, sik yuk yala ninye ara, Kanaan mutuku noutamak daunamake,’ tenelamuk. Ati, minop talak Allah arye Yosua deice kum areamukba, Yosua birye yupu kum nyapdeibukba, sik Israel yin nang arye, sik yuk yala ninye ati, minopce malye kibuka kum yakwecamikba, tuba daulamik. Allah arye winilamuka deiyok ara, ‘Aminyan talak amutuku noutamak unamak ninye, sik yuk yala ninye deice arye, Israel ninye ati winilenamne,’ tenelamuka atia.