Hagai 2 - Eipomek

Allah Yahweh el si erena ati, winiryuk weik aik, tuba tamubuka punubuka dobik yupu

¹ Atalak ara, Allah Yahweh elce, nabi Hagai dam yanuka nyabuk. Ayupu yanuka nyabuk sum ara, tanggal dua puluh satu, wala ara, tek wala deice arye yanuka nyapdeibuk. Allah Yahweh arye, nabi Hagai biti, nyapdeibuk yupu ara, ani.

² Allah arye, nabi Hagai biti, nyabuk. “Ance ninye si Sealtiel birye deibuknye, el si ara, Zerubabel biti, yupu nyalbinulyame. Anye bira, Gubenur kibuka, Yehuda mutuku unyak ninye taleamuknye Zerubabel ap, tonda Yosadak deibuknye, el si Yosua ap, nyalbinulyame. Yosua bira, na Allah si eren aik pum tam talibuka, pil donyak nang, sik weik deiyoknye, imam Yosua biti nyapkine. Tonda, Babel mutuku arye batakuka, Yerusalem mutuku dam yangalamikce, tuba kam unyak Israel yala ninye nirya ap, wekuka kekenamakcak, ayupu ara, binuka nyapnulyame.” Allah arye, nabi Hagai biti nyapdeibuk.

³ Ayupu nyabukce, ayupu tonap dukdongobuka nyabuk. Anggun wini talak ulalum ninye nirya ara, minop talak, na si eren aik, pia urasin teleb aik domik ning, anggun damnye asing arye elilamlum ninye ton ululum do, kum do? Anyaik minop talak elilamlum ninye arye, minop talak ara, ‘Se, anyaik ara, urasin pia teleb ubuka domik ning asukum’ tenen, elilamlum bukni, wini talak ara, dan do? Anyaik ara, uluplobikce, atu atonun kiplobika ati, ‘Se, anyaik ara, urasin pia telebe’ tenen, kanye deibuka, ayupu tuba nyalulum do? Kume, wini talak ara, anyaik pia malyeuk ulule. Ati, wini talak ara, anggunce, ‘Se, Allah el si eren aik ara, teleb ubuka domik bukni, wini talak ara, anyaik uluplobik ning ara, talye dauamlye keil atonun ulule,’ tenebuka, nyalulum do?

⁴ Ati, na Allah Yahweh arye nyapsine. “An Zerubabel ap, Yosadak birye deibuknye, imam Yosua ap, amutuku noutam tuba kam ululum Israel yala ninye nirya ap ara, ‘Se, yatato wiripnamap do?’ tenen, imun kanye bona kume. Na mapu koprop, Israel ninye nirya ara, sik kanye nirya tenen ning ap, kanye talima ap, mikip kilinamlyame. Anggun nirya arye, ‘Nun ni koprop Allah, el si eren aik punubuka dopnamap’ tenen, pia pi deibuka, donamlume. Ara, talye ati kum nyapsine. Deiyok ara, apil donamlum talak nirya ara, narye anggunti, pia kalikuka melinamsile. Talinye birye, kum nyapsine. Nara Yahweh, aning-aning nirya deice tam talibuka, im deice yin talin malaikat, sik weik deiyoknye birye nyapsine. Ati, anyapsin yupu ara, dipkoprob aminyan talak ara, nong upnamle.

⁵ Ayupu ara, talye ati kum nyapsine. Anggun Mesir mutuku noutam ulalum bukni, amutuku batakuka, bisik noutam yangalalum talak ara, na nyalin yupu deice arye nyapdeipse. Ara, ‘Narye anggunti, pia kalikuka melinamsine. Melinamsina deice arye, na si eren aik punubuka donamnulume,’ nyabuka, nyalin yupu deice arye, anggun dam akunum nyapdeiamsise. Ati, wini talak ara, ‘Se yata wiripnusiyak do?’ tenen, anggun kanye talimauk, dina kume. Na aryuk melinamsine.” Allah arye nyabuk.

⁶ Nyabukopura, ayupu tonap dukdongobuka nyabuk. “Nara Yahweh, aning-aning nirya deice tam talibuka, im deice yin talin malaikat sik weik deiyoknye birye nyapsine. Na Allah arye tenepse sum akunum dam kina ati, lo mitik anunuk upliba, atalak kiplye talak ara, narye im noutamak ulul ning ap, tukwak mutuku noutamak ulul ning nirya ap, tonda mutuku-mutuku nirya ap, weik laut mekwen deibuk mutuku nirya ara, weik tonun luluknamle. Ara, narye, ‘Wini talak luluktue,’ tenepniba, adiparyuk luluknamle.

⁷ Aning-aning nirya luluklye talak ara, atalak arye dipdongobuka, doupnin banamle talak ara, mutuku-mutuku nirya unyak ninye, sik nirya aning eibuka, kel bikikirye, sik talibuka unyak dekna weik ning, ayala-yala nirya ap, ‘Aning ara, weik mambule’ tenen, delinyak ning nirya ap dobuka, anyaik dam boyanamake. Ara, na si erena ati, sik talinyak ning, pia teleb ning nirya bobuka, anyaik delilyanganamake. Aning dobuka, sikce arepsicopura, anggunce aning nirya dopropmunce, na si eren aik noutamak delilamunba, abona nirya, pia weik tonun anyaik langdipnamle. Winipliba, narye anyaik deice, weik dirina deipnamne.”

⁸ “Ara, talye ati kum nyapne. Mutuku-mutuku nirya uamukba, ninye arye talinyak ning, pia dekna weik ning, el si emas ap, perak ap, nirya ara, kwelina deiyoknye bira, na Allah uka nyapsine. Nara Yahweh, aning-aning nirya deice tam talibuka, im deice yin talin malaikat, sik weik deiyoknye ununa anya arye, ateleb ning nirya ara, na ninguk ulule.

⁹ Pia teleb ning, ayala-yala nirya dobuka, na si eren aik punubuka donamnulumak boyacopura, atalak ara, na si eren aik winiryuk dopnamlum ning ara, urasin pia teleb unamle. Minop talak, na si erena ati, domik aik ara, mitik teleb aik domik bukni, aminyan talak dopnamlum aik ara, pia teleb unamle. Tonda, na si eren aik dopnamlumak ara, narye anggunti, pia teleb kipdeipnamsine. Ara, anggun olan ninye nirya ara, kum kipdeipniba, anggun nirya ara, talye kanye bobuka, telebuk unamlume. Yuk ninye ap, olana ap, yupu deice walana ap, pia kum unamlume. Ara, narye na mapu koprop, anggun Israel ninye nirya ati, telebuk kipdeipsiniba, kanye deibuka unamlume. Ayupu ara, na Allah Yahweh, aning-aning nirya talibuka, im deice yin talin malaikat nirya, sik weik deiyoknye birye, nyapsine. Narye anggunti, ayupu akunum nyapdeipsine anya arye, dipkoprob nong upnamle nyapne.” Allah arye nyabuk.

Nabi Hagai ap, sik imam-imam nang ap, bulubuka wekikce, yupu talibik ati, sekuk yupu

¹⁰ Ayupu talibik talak ara, Persia mutuku ninye deiyok kibuka taleamuknye, Raja Darius bira, keting tamun bitinye deice arye taleamuk talak, wala ara, toupne wala sum ara, tanggal dua puluh empat (24) deice arye nyabuk. Atalak ara, Allah Yahweh tuba tamubuka, tonap nabi Hagai dam yanuka, ayupu nyapdeibuk.

¹¹ “Na Allah arye, aning-aning nirya talibuka deice tam erebuka unirye, im deice yin talin malaikat nirya, sik weik deiyoknye birye nyapkine. Hagai ance, sik imam-imam nang ati, asipdenalame. Allah arye nyapdeiambukba, Musa birye sekeiamsuk yupu noutamak ara, yata nyasulul do?

¹² Ara, ayupu noutamak ara, yata nyalul do? Allah ati obuka arelyanganamak domba basam tup, tonoknye yaturye, yanuka dobuka, el anye birye, cang baju ongolamtu ning arye, kitibuka el aik bobanmatuba, abasam tup kitipmatu baju, yuk daupmatu ning ton, bol piptopura, ayuk ning babye, teleb upnamle do? Aning dobuka, na Allah si erena ati, arepniting do, kum do? Ura, winipmanto ara, ‘Allah ati, yanuka areptibye’ tenen, kum kintinipmace ning, roti kwaning do, makau pum bisik kakapmating din ning do, anggur tapu duk purubuka deiamikce mekwen do, yuk yala din ning do? Talye dauamlye ning bukni, anye bira, ‘Allah arepnun’ tenen, kitipmatu domba basam tup, aning el bol piptopura, atalye ning ton dobuka, na Allah si erena ati arepniting do? Ati, ance asipdeminba, sik imam nang arye, Musa sekamuk yupu noutamak dipdekirye, laka lepnamkiyakca,” nyabuka, Allah arye, nabi Hagai biti nyabuk. Nyabukura, nabi Hagai birye, Allah el si eren aik pum tam talibuka, pil dolamik deiyok nang, imam nang ati, asibukba, anang arye tamubuka, “Kume, aning kum winiptinge. Allah ati arepmanto ning ara, talye dauamlye ning nyaptu babye, atalye ning dobuka, Allah ati kum arelyatinge. Aning ara, nunce kum winiptibye,” nyabik.

¹³ Nyabikopura, nabi Hagai birye, aimam nang ak, tonap tamubuka asibuk. “Tonda winipmanto, kam ululnye akunum dipmatunye, el bol pipmatunye bira, Allah el dam yanmanto kum uplyopura, amalye upmatunye yaturye, arup nyapmasin ning, din ning ayala-yala nirya, anye birye, aning taliplyopura, aning dobuka Allah ati, areptibye do, kum do? Amalye upmatunye birye, aning taliplyopura, adeice arye, talye dauamlye ning nirya babye, malye upliba, Allah ati kum areptibye do? Areptibye do?” nyabuka asibuk. Nyabuka asipdeyukura, sik Allah aik pum tam pil talibuka dolamik imam-imam nang arye nyabik. “Anyapmalam ning ara, pia dipkoprob malye ati, malye upmatunye aning taleptopura, aning nirya babye, malyeuk upnamle. Ato ning ara, Allah ati kum areptibye,” nyabik.

¹⁴ Nabi Hagai birye, sik imam-imam nang ati, ayupu nirya akunum asibukba, nyabikopura, yuk yupu ton dukdongobuka nyabuk. “Ayupu nyapmanuluma ati, ayupu tonap nyapnusine. Allah Yahweh arye, akunum nyapmasile. Ara, Israel yala ninye nirya ara, pia malyeuk unyaka anya arye, sik amutuku noutamak unyak ninye, Israel yala ninye nirya ara, sik wa wibuka kounyak ning ap, pil donyak ning ap, sikce talinyak ning nirya ara, pia malyeuk wininyake. Amalye un ning talibuka unyak diparyuk, sikce, ‘Nun aupmasil ning dobuka, Allah el si erena ati, arelbinuyabe’ tenen, boyanganyake. Wininyak bukni, aning nirya ara, pia malye upmakibuk dobuka, Allah ati arelyanganyaka anya arye, aning nirya ara, Allah ati kum areptinge. Nun ni koprop Allah arye nyapsile.” Nabi Hagai birye, sik imam nang ati nyabuk.

“Na Allah Yahweh arye, aning-aning nirya ara, talye yamubuka arenamsine,” nyabuka, nyalin yupu deice arye, nyabuk yupu

¹⁵ Nabi Hagai birye, sik imam nang ati, nyabuk. Allah Yahweh arye nunti nyapdeipsuk yupu ara, ani. Anggunda, ‘Allah arye aminyan talak wininamle noutam ara, teleb upnamsil do, malye ulinamsil do?’ tenen, na kiklildena ati, umunce, dinauk unamnulume. Minop talak ara, na Allah Yahweh, na si eren aik, ‘Dopnuyap’ tenen, tonok keil babye bobuka, anyaik min kum domik talak, ikin wamsuk ning ati, tuba tamubuka tonap tenipdenamlulume.

¹⁶ Anggun adiparyuk, yakong atonun, el si ara gandum, wa wibuka kouamunyak ara, ‘Nong weik upsil do?’ tenen, dilbalamlum talak ara, ‘Gandum sekibirye, aling 20 kibuka lipnamabe’ tenen, dilbalalum bukni, kum dayuka ati, aling nirya ara, 10 diamuk uamuk. Aning atonun, anggur mek dikilinak dilbalamlum talak ara, ‘Anggur mek ara, 50 liter kwebikirye, dikdeipnamsiyake’ tenen, dilbalamlum bukni, atalak ara, kum dayuka ati, anggur mek 20 liter diamuk uamuk.

¹⁷ Ara, talye kum nyapsine. Aning-aning nirya, suktalepsuk ning nirya ara, narye anggun wenena ati, malye kililamsiba, mitik tonunuk uamuk. Ara, narye anggun wa wibuka koulamlum ning, ayala-yala nirya ara, taiya ona ap, yale nang on ap, dekne duk-duka purye mok ap, bental ap, arepsiba, anggun koulamlum ning nirya malye ulamukba, sirya kum danamuk. Tonda, im deice arye, mok dumduma es dopkwetepsiba, anggun koulamlum ning nirya keirye delamuk. Winibuka, anggun wenena ati, ikin ning anggun nong deice areamsise bukni, anggunce, ‘El, awinipmasil ning ara, talye ati kum winipmasile. Deiyok ton aupmalba, upmasila anya arye, nun malye wininyap ning nirya batakuka, Allah damuk tamubuka binuyabe,’ kum tenyamlume. Aning kum bukni, tuba tamubuka, mandipna kanye pia bolamlume.

¹⁸ Ati asum ara, tanggal dua puluh empat (24), wala ara toupne wala, Raja Darius birye, keting tamun ara, bitinye talepmasil talak arye, diprongobuka, doupnin banamle noutam ara, moubuka tenenamlulume. Ara, na si erena ati dopnamik talak, ayukumna ara, akunum ikuka sirya dakdongoplum talak ara, tuba tamubuka tonap tenenamlulume. Minop talak arye diprongobuka, wini talak noutam ara, kanye imun ning weik ulamsuka ani, tuba usulula anya arye, kanye moubuka tenenamlulume. ‘Yata deiyok ning ati, ikin weik ulamsuk do?’ tenen, moubuka unamlume.

¹⁹ Atalak ara, anggun wa win dam ara, gandum duk do, anggur tapu duk do, ura, kwarang yo duk do, zaitun yo duk do, tonda delima yo duk do? Ayo duk aning-aning nirya babye, duk pia kum mouamsuke. Ati, ‘Nun yala deilinyab aik noutam ara, yala teleb ning tuba ulul do? Aning nirya akunum kum dayuk do?’ tenen, moubuka dinamlume. Bukni, na Allah arye nyapsine. Arup arye deiyok koubuka, doupnin banamlum talak nirya ara, na Allah arye aning-aning nirya weik tonun yamubuka, tuba-tuba arenamsine. Na melinamsina deice arye, telebuk ubuka unamlume.

Allah arye nabi Hagai biti, “Yehuda tam talilul ninye deiyoknye, el si ara Zerubabel biti, ‘Allah arye winipnamkile,’ nyabuka laka nyalbinulyame,” nyapdeibuk yupu

²⁰ Asum, tanggal dua puluh empat (24), wala ara, toupne wala, Raja Darius birye, amutuku taleamuk keting tamun ara, bitinye akunum ubuk talak ara, Allah Yahweh arye, nabi Hagai biti, yupu lik bitinye deice arye, tuba tamubuka yanuka nyapdeibuk.

²¹ Allah arye ayanuka nyapdeibuk yupu ara, ani. “Hagai ance, Yehuda mutuku noutam talibuka ulul ninye deiyoknye, Gubenur Zerubabel biti, el dam laka nyalbinulyame. Allah arye, im deice tam ulul ning ap, tukwak mutuku noutam ulul ning ap, mutuku-mutuku nirya ara, yupu nyapdeipliba luluknamle. Ati, ‘Sike upnamle’ tenena kume. Narye, ‘Aning nirya luluknamle,’ tenepse talak, akunum dam uplyopura, adiparyuk luluknamle, nyabuk.

²² Aning-aning nirya luluknamle talak ara, tukwak mutuku unyak ninye arye, ninye deiyok kibuka talinyak nang nirya ap, tonda tukwak nang mikip weik arye, yuk pera mutuku unyak ninye nirya talinyak deiyok nang ap nirya ara, bisibuka malye kipnirye, kum kipdeipnamne. Tonda, sikce ninye olbana ati, kuda basam arye lipdobikiba, tuku deice bana ati, memebuka deibik ning, el si kereta kuda ap, aning deice bukikirye, bikbik abuka balyebuk, ninye olbanyak nang ap, kum kipdeipnamne. Tonda, kuda basam balye deice bukikirye, olbalamak yin talin nang ap, sik kuda basam ap opnirye, aning nirya ara kum kipdeipnamne. Ara, sik aning deice arye bukuka banyak nang nirya ara, sikce, sik bidamang nanguk, parang ya doprobikirye, opdanamake. Winipnamaka deice arye, narye sik nirya kum kipdeipnamne.

²³ Winipnamne talak ara, ninye si Sealtiel birye deibuknye, Yehuda mutuku noutam talibuka ululnye, Gubenur Zerubabel an tonok ara, ‘Na mi koprop atonunye unalam’ tenen, ereipnamkine. Na mikip deice arye, an uk erepdeipkiniba, ninye deiyoknye kibuka unalame. Ara, talye ati kume. Narye, ‘Wininamne,’ tenelamse ning nirya ara, narye anti mikip arepkiniba, ‘Apil uk talibuka donalam’ tenen, nyapkine. ‘Wininamle’ tenen, wipdeiamkisirye, akunum akuamkisa ati, Allah ati, apiluk donamlame. Winipmanto ara, ninye deiyok nang arye, taruk duk deice dongonyak ning, el si cincin, aning deice sik si sekikirye, mambul surat sekna ning deice, ataruk dongon ning darapdongobikiba, sik si laka upliba, ninye nirya eibikirye, ‘E, ara dipkoprob nun ninye deiyoknye birye, asekne ning dopdeipsuke’ tenen, kel biklamak touk, winipnamkine. Ara, na Allah arye, mikip an deice arepneba, na tenyamse piluk, teleb ubuka dopminyopura, ninye nirya arye, ‘E, ara Allah arye tenyamuk touk pil dopmale,’ tenen, kel bikinamake. Allah arye ayupu nyapkile.” Allah arye nyapdeibukba, nabi Hagai birye, Gubenur Zerubabel ati, nyabuk. Ayupu ton nyabuk. “Allah arye ayupu nyapkile. ‘Aning nirya ara, na talye ati kum nyapsine. Ara, na Allah Yahweh, aning-aning nirya talibuka, deice tam Weik Erenanye unirye, im deice yin talin malaikat nirya, sik weik deiyoknye birye nyapmakina ati, ayupu nirya ara, dipkoprob nong upnamle.’ Allah arye, na nabi Hagai biti, ayupu laka nyapdeipnukce, ‘Yehuda tam talibuka ululnye, Gubenur Zerubabel biti, laka nyalbinulyame,’ nyapdeipnuka ati ara, ayupu nyapkine.” Nabi Hagai arye, Gubenur Zerubabel biti nyabuk.