Habakuk 1 - Eipomek

Allah arye, el yupu lak nyana deiyoknye, el si Habakuk biti, lengdar deice arye nyalilamukba, kekebukce, sekeilyamsuk yupu

¹ Nara, Habakuk unune. Allah el si Yahweh arye, el yupu lak lena deiyoknye, nabi ulamse talak ara, Allah arye lengdar deice ap nyalilamnuk yupu lak nyabuka sekne.

Allah el yupu lak lena deiyoknye, nabi Habakuk imun kanye bobukce, Allah ati, malye nyabuk yupu

² Nabi Habakuk birye nyabuk. “Na ni Allah, yata wiribukap talak tonap, anti pia tuba moronamkin bukni, yata ati kum kekenamnilam do? Tonda, narye anti, ‘Malye nang arye, nun Yehuda tam nang ati, weik ikin ning, nun nong deice delisenyakba, imun kanye bobuka unyaba ati, na nio ance nunti lyepsilyame,’ nyabuka morokunun bukni, yata deiyok ati, aning kekebuka, kum lyelisilyam do?”

³ “Yata deiyok ati, nun unyap mutuku noutam ara, pia malye nang wininyak ning, tuba elinun bukni, ance aning kum danaibuka, kum delilyam do? Amalye nang arye, malye-malye weik wininyak bukni, ance aning namin kibuka kum wenelyama ara, deiyok yata ati do? Atalak-atalak nirya ara, malye nang arye, sik asik nirya uluplobuka, yuk nang ati onyakce, ikin ning weik, sik nong deice delinyake. Tonda, dana-dana tam nirya ara, ton tam nang arye, ton tam nang ati, yupu deice arye waldana ap, yu arye yupu nyaldana ap, dipkoprob oldana ap, unyake. Aning nirya tuba daunyak bukni, yata deiyok ati, aning kum kibuka, kum delilyam do?”

⁴ “Amalye unyak ning weik aulula anya arye ance, ‘Aning wininamlulume, aning ara, kum wininamlume,’ nyamsulum yupu ara, yaniltanyake. Ayupu ara, dipkoprop kum tenenyake. Ati, ninye yupu bokolin aik noutam nirya ara, teleb kibuka yupu diksukum arye, kum bokolisinyake. Tilila yupu uk nyanyake. Adeice arye, tilila yupu dib tenen nang yakirye, diksukum unyak nang ati, warekil yanganyake. Wininyaka deice arye ance, ‘Aning ara, wininamlulume. Aning ara, pia kum wininamlume,’ nyapdeiamsulum yupu ara, talibuka kum dobolbanyake. An yupu batakuka, sik kanye aniryuk, malye-malye weik wininyake.” Nabi Habakuk birye, Allah ati nyabuk.

Kasdim yala ninye arye, Yehuda yala ninye ak, obuka malye kipnamik ati, nyabuk yupu

⁵ Allah, el si Yahweh arye, el nabi Habakuk biti, nyabuk. “Ninye ayala-yala nirya, yuk pera mutuku nang unyak ning eipmince, biknamlyame. ‘Aning ara, yata deice arye wininyak do?’ tenen, kanye teniltonauk unalame. Ance, ‘Se, yata deice arye winipting do?’ tenen, mambul kanye bonamlame. Aning ara, urdem ati kum nyapkine. Ara, na Allah arye, atalak nirya pil dopnin yanganamne ning nirya ara, dib kum teneptume. Winipmanto ara, yuk nang arye anti, ‘Allah arye winipnamsile,’ nyabuka, laka nyapkitinga babye, awininamne ning ara, diba tenebuka, moubuka kum biktume.”

⁶ “Narye, wininamne ning ara, ani. Ara, pia dipkoprop, narye sik Kasdim yala ninye lo arepnyopura, sikcuk mutuku-mutuku nirya obuka, malye kibikirye, yanuka alaprobikirye, amutuku nirya talipnamake. Winibikirye, yuk ninye sik mutuku ap, sik asik ap, sik ning ayala-yala nirya ap, aKasdim yala nang arye, ubula dopropnamake. Sik yala ara, pia yu weik nang unyakce, ‘Aminyan talak ara, yata ikin ning upnamsil do?’ tenena pia kumce, talye mangkau kibuka, mandipna kanye dobuka, yuk mutuku nang ati, olyakanyake.”

⁷ “Kasdim ninye ara, yuk yala ninye nirya arye sikti, weik ilil ulule. Yuk yala nang nirya arye, ‘Se Kasdim yin nang arye, olyanamsiyak do?’ tenen, ilil upliba, sirim talilule. Tonda, sik Kasdim yala nang ara, sik bidamang kanye aryuk, ‘Nunda mambul weik ninye unyabe,’ tenekirye, sik kanye erebikirye, kwalibuka dildanyake. Wininyaka anya arye, sik yuk aryuk, ‘Aning wininamabe, aning kum winipnamabe,’ tenebikirye, aninguk wininyake. Yuk nang arye, sik Kasdim yala ninye ati, ‘Winiplulume,’ nyabuka, yupu kum sektinge.” Allah arye nyabuk.

⁸ Nyabukce, ayupu ton dukdongobuka nyabuk. “Sik Kasdim yala ninye ara, sik kuda basam ara, pia minopce balolule. Yuk nang arye, ‘Kume bai tam ulamle kus atonun ning, el si macan tutul nyanyap ning ara, weik bikbik abuka balule,’ tenenyake. Bukni, narye dipkoprob nyapsine. Sik Kasdim ninye talinyak kuda basam ara, pia pola banyake. Bura tam pus, el si macan tutul, elda moubuka balule. Tonda winipmanto ara, bai kam ara, lukunyan banmalyopura, pia yu weik arye, ayam obuka dilul bukni, sik Kasdim mutuku nang arye, sik kuda basam deice bukuka yanganyaka ara, yu pia weik. Bai kam ara, el yu mitik anunuk ulule. Winipmanto ning ton, Bip maka on maka arye, ayam eiplirye, ‘Amaka obuka dipnun’ tenen, yukak arye, pia pola lakuka yangalul atonun, sik Kasdim yin nang babye, atonun wininyake. Ara, sik kuda basam balye deice bukikirye, pera mutuku arye, yuk nang dam minopce yakirye, onyake.”

⁹ “Kasdim nang awininyaka nirya ara, mandipna kanye bobuka, ‘Yuk mutuku ninye nirya obuka, sirya daknamap’ tenen, olyanganamsiake. Sikce minop menekuka yakirye, olyanganyake. Winipmanto ara, weik buppu ulamle tam arye, kumanya yangalamle atonun yakirye, yuk yala ninye obikirye, anang nirya tomobuka, wenen aik delilbinamake. Winipmanto ara, mek wenenga yamulamla atonun, tomobice nang ara, nukmanto kum unyake.

¹⁰ Tonda, yuk mutuku nirya, sik ninye deiyok nang ap, deiyok-deiyok nang ap, wisi nang ap ati, Kasdim nang arye anang nirya ati, ilil una kumce, malye yupu nyakirye, nalibuka akutunyake. Wininyakce, yuk mutuku ninye nirya, ‘Yu nang arye, nun aik kum weksetinge’ tenen, weik cang keil poka donyaka babye, sik Kasdim nang arye, akutunyake. ‘Aning ara, ikin kume,’ tenebikirye, cang poka deice tam welebuka, anyaik nirya wekelbana ati, tuku palibikirye, tuku ap, keil ap tabakuka, apoka dam deipnin balamikiba, akunum ereplyopura, atuku deice welebikirye, apoka bisibuka anyaik weknamake. Winibuka wekikirye, anyaik nirya uluplopnamake. Amutuku ninye nirya, talye luparabuka, tomobuka tapu koubikirye, wenen aik delilbinamake. Winibikirye, amutuku ulamle ning nirya, alapropnamake.

¹¹ Winibiceura, kumanya balamle atonun ubuka, ton mutuku ninye, akunum obicopura, adiparyuk, ‘Yuk mutuku ninye ton binuka opnuyabe’ tenen, bikbik abuka binamake. Sik Kasdim ninye ara, dipkoprob pia malye-malye weik unyaka anya arye, na Allah arye sikti, wenepnamne. Deiyok ara, sik bidamang mikip weik ulula anya arye, sikce sik bidamang atibuk, ‘Nunda, weik mambul nang unyaba ati, nunda yuk Allah ati, ton kum patasulule. Nun yuk weik nang unamaba anya arye, Allah kum patasulule,’ tenenyake.” Allah arye, nabi Habakuk biti nyabuk.

Nabi Habakuk birye, Allah ati, “Se, na nio, yata deiyok ati, sik malye nang arye olyanamsiyak talak ara, ance kum lyepnamsilam do?” nyabuk yupu

¹² Na ni Allah Yahweh, anda mikip weiknye minop talak arye, aning-aning min kum kwepdeialum talak arye, an akunum aulalume. Tonda, anda kam pia unalame. An siuk erekunune. Anda, Pia Malye Ning Winina Kumnye, Pia Teleb Leknye ulyame. Ati, narye moropkine. ‘Nun Yehuda tam unyap Israel nang ara, lyepsutumba, nun kum dipnamabe’ tenen, moropkine. Na nio, ancuk nunti, yupu bokeipsutumce, nunti wenepsutum bukni, dipkoprob sik Kasdim nang ara, ance, ‘Wininamake’ tenen, wipdeipluma anya arye, sikce nunti, wenepnamsiyake. Anda, weik mutuku yangan keil atonun ulyama anya arye, an amu tam lelipdongopsutumce, kaliksutum bukni, ance tenealum touk, Kasdim mutuku nang wipdeipmunba, sikce nunti, wenebuka olyanganamsiake.

¹³ Wininalam bukni, na nio, anda malye winin ning ayala-yala nirya ap, malye unyak nang ap ara, kanye deibuka kum elilyame. Anda, pia Teleb koprop, uk ubuka, pung ulyamnye binya arye, an pia teleb asing arye, malye ning ati, kanye deibuka kum elilyame. Aning atonun, malye wininyak nang ara, ance aninye eibuka, ‘Dauplye’ tenen, kum batakalongolyame. Na nio, anyapman touk ulyamnye bukni, yata deiyok ati, wini talak ara, anda malye wininyak nang, sik Kasdim nang ati, kum wenepmalam do? Tuba dinmasemince, bico tenesilyam bukni, yata deiyok ati, sik malye wininyak nang, Kasdim yala nang arye, nun Israel ninye teleb ubuka unyap nang ati, olyanganamsiak do? Habakuk birye Allah ati, malye nyabuka morobuk.

¹⁴ Nyabukce, ayupu ton dukdongobuka nyabuk. “Na ni Allah, na kanye aryuk tenepmana ara, nyapnune. Ara, ance ninye ati ara, mek pum tam ulul ning, mekwen pum ikan atonun ulisilyame. Nun kele, laut mekwen pum bisik kam ulul ning, ayala-yala nirya ara, sik ninye deiyoknye atonun ning kum ulule. Sik talye balsusunauk unyake.

¹⁵ Wininyak bukni, pia malye wininyak nang bukni, sik tenebice talak aryuk, ikan on ning, mek pum bisik dongobuka yunyake. Tonda, weik aling atonun ning, el si jala, mekwen pum bal el si ikan, yangabuka dolona ati, el si jala dobuka, mekwen pum bisik dopkwetebikiba, dauamlya ani, mekwen pum ikan weklyopura, aminyan aning talibuka doprobikirye, ikan weik wekmaliba, dolonyake. Winibiceura, kanye delinyake. Winilamak touk, sik Kasdim nang arye, nun Israel ninye weik arye tomobuka osinyakce, kanye delinyake.

¹⁶ Sik laut mekwen pum tam ulul ning, ikan olamak nang ara, Allah ati pia kum tenenyaka anya arye, el mekwen pum ikan tomon ning, el si jala ati, ‘E aning ara, weik mambule’ tenen, aning ati, si erenyake. Aning atouk, sik mekwen pum ikan on ning si ara, ‘Se, aning ara, mambul ning anya arye, nun dina ati, mekwen pum ikan weik talepmalebuk, dobuka weik dinyabe. Kum dinyap ning ara, weik tuba aulula anya arye, aning dekibirye, yo bok weik dolonyabe. Wininyaba deice arye, aning-aning weik aupmasile. Tonda, ayo bok deice arye, yuk yala din ning nirya, pia teleb ning dekuka dinyabe. Ati, nunda kil-kil kanye bobuka, pia telebuk unyabe,’ tenenyake. An Allah ati, pia kum tenikinyake.” Habakuk birye, Allah ati nyabuk.

¹⁷ Nyabukce, ayupu ton nyabuk. “Naio, sik Kasdim ninye ara, pia malye-malye weik wininyak ninye anya arye, mekwen pum ikan ona deiyok nang arye, mekwen pum ikan weik tomobikirye, aling atonun ning pum tam arye dobuka obikirye, dibuka sirya daklamak atonun, sik Kasdim nang arye, yuk mutuku yala nang weik arye tonap, tuba olyanganamsiyake. Ara, bico tenena kumce, yu weik upliba, ninye nirya obuka, sirya dakanyake. Wininyaka atonun, sikce nun Yehuda tam ninye ati, atonun obuka pia, sirya dakdongopnamsiyaka ati, na nio, ance ‘Aning awaplye’ tenen, batakanamsilam do?” Nabi Habakuk birye, Allah ati nyabuk.