Galatia 4 - Eipomek

¹ Ura, yuk yupu ton nyapnusine. Arup nyapmasin yupu, ‘Deiyok ara ani, tenepnamak’ tenen, winipmanto yupu ton nyapnusine. Ara, tonoknye birye, el mi kopropa ati, “Na dipnyopura, na talyamse ning nirya dopropnalame,” nyaptubuk, el mi arye el li kopropa talilamuk ning ap, talilamle ning ap nirya dopropnamle. Bukni, anye el mi mitik mi tuba ulul talak nirya ara, talye talinye atonun ulamlirye, talye pil melinanye atonun unamle. Mitik mi tuba ulul talak noutamak ara, el li kopropa diptua babye, el li birye talilamlye ning nirya min kum doproptue.

² Anye el mi min kum nemlye talak noutamak ara, el li kopropa diptua babye, ami ara tuba mitik mi ulula anya arye, ami el du yapu do, el tam nang do, sikcuk ami el li kopropa talilamuk ning, ami melina ati kalikuka talamikca ani, ami akunum neplyopura, tonda el li birye tenyamuk talak akunum uplyopura, ami el bidamnye el li kopropa talyamuk ning dobuka talinamle.

³ Ayupu winipmanto ning nyapmasin touk, nun tukwak mutuku unyap ninye nirya ara, mitik mapu atonun ulamubu talak ara, tukwak mutuku mem ning deiyok ninguk talibuka, aning amu tam ulamubu. Tonda, Isa Mutuku Dongonye sik amutamuk ulamubu. Allah arye, “Na ti diba tenepnamak ninye ara, aning arenamne,” nyapdeiyamuk ning ara, min kum doprobupe.

^4-5 Isa Mutuku Dongonye ap, mer nirya ap, sik amu tam ulamuburye, tukwak mem ninguk talibuka ulamubu bukni, Allah arye, ‘Atalak ani,’ tenyamuk touk akunum winibukopura, Allah arye el Mi Kopropa dopdeipsuke. Allah el mi Yesus dopdeipsukba, Allah El Dib Kanye mikip deice arye tonok kil arye ami deibuk. Akil arye Allah el mi deibuk talak ara, nun Yahudi yala ninye nirya, Allah arye, “Aning ara wininamlulume, aning ara kum wininamlulume,” nyapdeibukba, Musa sekamuk yupu talibuka ulamuburye, amem yupu amu tam atonun ulamupe. Aning atonun, ami Yesus babye, Musa sekamuk yupu amu tam ulamuk. Musa sekamuk mem yupu amu tam bukuka ulamubu bukni, Allah arye el mi dopdeibukba, atalak yayuka deiyok ara ani. Ara, Allah arye nunti, ‘Musa sekamuk yupu, mem yupu amu tam unyak ninye ara, deknamne.’ Na Mi Kopropa arye aninye deklirye, mem ning amu tam unyakak arye lobuka lyepnirye, ‘Na mapu kopropa unamak’ tenen, diba tenenyak ninye ara, teleb kipdeipnamne. ‘Winipnyopura, narye sikti, kintinyamse ning nirya arepniba, sikce dopropnamak,’ tenyamsukce, el mi Yesus dobuka areamsuk.

⁶ Allah arye aning akunum winipsuka anya arye, Yesus ati diba tenyamlumba, wini talak ara, Allah el mapu kopropauk akunum ululume. El mapu umunya ati, el Mi Kopropa Yesus, el Dib Kanye dopdeipsukba, anggun talima pum weksukce tuba aulule. El Dib Kanye arye, Allah ati, nun talima noutamak arye, “Na Ni kopropa Allah,” nyalule.

⁷ Aning ati ara, arup winipmanto yupu deice arye nyapmasin touk, wini talak ara, anggunda talye pil melin nang atonun kum ululume. Aning ara kum bukni, Allah el mapu kopropauk ululume. Allah el mapu kopropauk umunya anya arye, Allah arye anggunti, ‘Na mapu ati arenamne ning ara, anang babye dolonamake,’ tenesulule.

‘Tilila yupu peterena nang arye, Galatia mutuku ninye dobuka, yuk malye bisik bobicak’ tenen, nyabuk yupu

⁸ Ura, na kayapu, minop talak Allah min kum kel kiyamlum talak ara, Isa Mutuku Dongonye weik tapu kouamsuka deice arye, sik yupu uk kekebuka ulamlume.

⁹ Winilamlum bukni, wini talak ara, Allah el si akunum kel kiplume. Ura, elce anggunti akunum lyepdopsuke. Allah el ulul ning akunum kel kiplum bukni, el yupu batakuka minop talak talyamlum ning, mikip kum ning, pia malye ning ara, tuba tonap talipre baluluma ara, yata deiyok ati winilulum do? Winimunye ning ara, ‘Amalye ning nirya batakamubu bukni, min arye talyamsuk Isa Mutuku Dongonye, tuba tonap tapu koubuka talipsutu’ tenen, wininmalum do?

¹⁰ Allah el kai teleb yupu dipkoprop nyasilye touk kum bukni, yuk bisik binmalumak arye, ‘Weik mambul sum ani, weik mambul wala ani, weik mambul li talak ani, weik mambul keting tamun ani’ tenen, winimunya ara, pia malye weik winilulume.

¹¹ Se, narye anggunti ilil upmanil ning ara, ‘Yuk bisik kirikuka banmaka anya arye, na Galatia mutuku ninye ati peterebuka pil dolamse ning nirya ara, urdem ati pil dolamse do? Apil dolamsa ara, nong kum upnamle do?’ tenen, ilil upmanil ati, nyapsine.

¹² Se, na kayapu, anggun dam yanuka peterelamse talak ara, ‘Na yupu kekenamak’ tenen, anggun winilamlum ning atonun na ton talibuka winilamse. Winibuka ulamse anya arye, wini talak ara narye moropsine. ‘Nara, mem yupu amu tam winina kum diparyuk, aning nirya batakuka wini talak diksukumuk unye touk, anggun babye atonun mem yupu amu tam kina kum arye, aning nirya batakuka diksukumuk unamlum’ tenen, moropsine. Anggunce nati malye ning dobuka, na nong deice kum deipmanulume.

¹³ Ura, anggun kele. Anggun dam minopce yanamse deiyok ara, weik uk dilamnukba, bisik binmanto kum ulamse ati, anggun dam yanuka, Allah el kai teleb yupu, ninye lyen yupu peterelamsise.

¹⁴ Na uk dilamnukba, adeice arye ikin ulamsuk bukni, ikin upsuka babye, anggunce nati, ‘Anye bira talinye, elda nun like’ tenen, kum batakamnulume. Aning kum bukni, narye anggun dam yasopura, anggunce nati weika arye melilamnulume. Ara, winipmanto, Allah el im deice pil donanye malaikat arye, anggun dam yatuopura, tonda, Yesus Kristus el babye anggun dam yatuba, elti, “Telebe,” nyabuka, taruk talibuka melilamtum atonun, anggunce nati pia teleb kibuka melilamnulume.

¹⁵ Winilamnulum bukni, wini talak ara, anggun min arye kanye deibuka pin-pin asa arye teleb winilamluma ara, yata deiyok arye kum winipsuk do? Na peterelamsisiba, kanye deibukap pin-pin asa arye, teleb kibuka melyamnulume. Winilamnuluma deice arye, na kele, na melina ati, anggun babye asing lukuka arepnutumopura, dipkoprop arepmanutum bukni, aning ara kum winipmanto ninge.

¹⁶ Peterelamsise talak ara, winibuka weik arye kanye deiyamnulum bukni, wini talak ara, anggun malye winipmalum ning ati, wenebuka dipkoprop yupu nyapmasina ati ara, anggunce, ‘Anye bira, nun like,’ tenenamnulum do, kum do?

¹⁷ Ura, “Musa sekamuk mem yupu talibuka dobolbanyaba deice aryuk, Allah arye lyepnamsile,” nyabuka, wini talak peteresikce ninye ara, winibuka tenenyake. ‘Galatia mutuku ninye ara, nun yupu kekepsikirye, nun tam kipropnamsiyak’ tenen, kanye deibuka peteresinyak bukni, wininyaka deiyok ara, teleb un ning ati kume. Kume, sik tenenyaka ara, ani. ‘Galatia mutuku ninye arye Paulus ap, el neika unyakce, peterenyak nang ap ati bataktingce, talima wilibikcopura, nun tam kibikirye, nun dobolyanamsiyake. Nun tibuk kanye deibuka, nun piluk pia pi dobuka dobonamsiyake’ tenen, anang arye kanye deibuka peterelamsiyake.

¹⁸ ‘Nong ara winibuka unamle’ tenen, deiyok ning teleb ninguk winiptopura, “Yuk nang arye peteresikceba, sikti, kanye deibuka, sikti, pil pi dobuka dona ara telebuka,” nyapsitinye. Ara, na ap, anggun ap neika unyap talakuk kum bukni, “Atalak-atalak nirya winina ara telebuka,” nyapsitinye. Bukni, yuk nang arye anggun Galatia mutuku ululum ninye peteresikce deiyok ning ara, malye winiptopura, “Anirya ara malyeuka,” nyapsitinye. Na kanye ara, anang arye peteresinyaka deiyok ara, malye ulule.

¹⁹ Se, na kayapu, anggunda bico tenesununa anya arye, ‘Na mapu atonun ninye unyake,’ tenesunune. Kilapu arye, sik mi deipnuce talak, mi deiyok uk dilamle touk, narye anggunti, ‘Se, Galatia mutuku ululum ninye ara, Yesus Kristus el winilye ning nirya, kel biktingce, sik kanye talima wisiptue’ tenen, pia se tenenunce, ikin kanye bonune.

²⁰ Tonda, ‘Wini talak ara, na ap anggun ap neika buktibirye, wenen yupu atonun nyana kum bukni, namin asa aryuk, teleb yupu uk na nyapsitinye’ tenen, pia se tenenune. Ara, anggun yuk bisik deiyok koubuka dobolbaluluma ati ara, ‘Deiyok yata ning arye wininyak do?’ tenen, kanye walwal unulule.

Hagar ap, Sarah ap ati, nyabuk yupu

²¹ Ura, yuk yupu ton dukdongobuka nyapnusine. Anggunda, ‘Kume, Allah arye, “Aning ara wininamlulume, aning ara kum wininamlulume,” nyabukba, Musa arye sekamuk yupu, mem yupu amu tam bikibirye, aninguk talibuka unamabe,’ tenenmalum ninye ara, teneipdelulume. Musa sekamuk yupu noutamak aubuk yupu nyasilya ara, moubuka kum teninmalum do?

²² Ati moubuka kekeplulume. Ayupu noutamak sekamik ning ton laka nyapnusine. Abraham birye el mapu bitinye deibuk. Ton mi ara elce yo bok deice dekukce talyamuk kil, el pil dona ati talye melin kil, el si ara Hagar. Abraham birye Hagar domukba, mi tonok deibuk. Ton mi bitinye ning ara, Abraham min arye domuk kil, el si ara Sara. Sara birye, aminyan talak mi tonok deibuk. Akil Sara ara, yuk nang arye, “Nun pil urdem arye dopsilyame,” nyabuka pil dilamik kil kum ulamuk. Sara ara el kanye aryuk ulamuk kile. Yuk nang arye akil kum deklamik.

²³ Abraham birye yo bok deice dekuka dobuk kil, el pil melina kil, Hagar birye deibuk mi ara, ninye nirya arye sik domikce kilapu neika ulamikba, mi delilamak touk deibuk. Akil Hagar bira wisi kum danamuk kil anya arye, mi deibuk bukni, Abraham el minop talak arye domuk kil, Sara ara, pia wisi kil anya arye, Sara birye deibuk mi ara, talye yonarye kum deibuke. Ami ara, Allah arye Abraham biti, ‘Mi arepnamkine,’ nyalilamuka deice arye, Allah el mikip melibuka deice aryuk, Sara birye ami deibuk.

²⁴ Ura, aning minop talak ulamuk ning ara, Allah arye, ‘Adeice arye aminyan talak wininamak ninye aning kekebikirye, kel biknamake,’ tenyamuk. Ati, aning nirya ara, winipmanto yupu atonun ulula anya arye, deiyok ton aupmale. Akilapu bitinye ara, diksukum ulamrik bukni, Allah arye akilapu bitinye winilamrik deice arye, ‘Aminyan unamak ninye ara, mambul ning kel kipnamak’ tenen, winipsuke. Aning nong koprop ning ara nyapnusine. Akilapu bitinye ara, Allah arye, ninye lyena ati, “Wininamne,” nyabuka, nyalin yupu bitinye yuk-yuk nyalilamuk ning atonun winilamrik. Allah arye, “Wininamne,” nyalilamuk yupu tonok ning ara, Sinai Mutuku deice Allah arye sik Israel ninye ati, “Aning ara winipnamlume, aning ara kum winipnamlume,” nyabuka, Musa biti nyapdeibukba, Musa kekebukce mem yupu sekeiyamsuk. Ayupu talibuka dobolbalamikce ninye ara, yuk nang arye yo bok deice dekikirye, pil weik aruklamak ninye atonun unyake. Musa sekamuk yupu, mem yupu amu tam bukuka unyak ninye ara, sik nin atonun kil ara, Hagar ulamuk.

²⁵ Ati Hagar bira, Arab mutuku noutam bukni, Sinai Mutuku deice Allah arye mem yupu aribuk ning ati, ‘Aning ara Hagar atonun ulule,’ tenenamlume. Tonda, Hagar bira, weik asik domik ning Yerusalem atonun ulule. Deiyok ara, Yerusalem unyak ninye ara, Hagar ulamuk atonun wininyake. Ara, yuk nang arye yo bok deice dekikirye, pil weik aruklamak ninye atonun unyake. Aning atonun, Hagar babye, minop talak Abraham birye yo bok deice dekukba, el amu tam ubuka talye piluk dolamuk. Hagar atonun unyak ninye ara, ikin ning amu tam unyake.

²⁶ Bukni, nunce Yesus ati diba tenenyap ninye ara, aning atonun kum unyabe. Ara talye ati kum nyapsine. Deiyok ara, Allah arye im deice Yerusalem kintinipdeibuk ning ara, nun nin bitonun usulule. Ara domon yupu atonun ati nyapsine. Im deice unyak Yerusalem mutuku ninye ara, yuk talye nang amu tam bukuka kum unyake. Sik kanye aryuk unyake. Ikin ning amu tam kum unyake. Nun babye, aning atonun unyaba anya arye, im deice Yerusalem ara, nun nin bitonun usulule.

²⁷ Anyapmasin yupu deiyok ton aupmale. Ara, anyapnusin yupu deice arye kel bikinyabe. Ayupu ara, ani. ‘Anda, mi delina kum kil, you kil ara, weik arye kanye deibuka yupu weik arye nyanamlyame. Anda mi deiyok uk kum dikilye kil ara, pin-pin asa arye yupu weik arye nyanamlyame. Talye ati kume. Deiyok ara, ninye domikce kil ara, el mapu mitik tonun deipliba unamak bukni, you kil ara, el mi pia weika arye deipliba, gong weika arye ubribanamake. Allah arye nyabuk.’ (Yesaya 54:1)

²⁸ Ura na kayapu, Allah arye Abraham biti, “Winipnamkine,” nyabuka nyalilamuk yupu deice arye, el kil Sara birye, Isak deibukura, daulamuk touk, anggunda, Allah arye nyalilul yupu deice tam ululume.

²⁹ Minop talak ara, Abraham birye Hagar domukce, talye deibuk mi el si ara, Ismael deibuk. Ton mi ara, Allah arye Abraham biti, “An mi arepnamkine,” nyalilamuka deice arye, Allah El Dib Kanye el mikip melibukba, Sara birye Isak deibuk. Talye pil melina kil Hagar domukce deibuk mi, Ismael bira, nepnin balamuka ani, akunum nebukopura, Sara birye deibuk mi Isak biti, el nong deice ikin ning weika arye delilamuk. Aning minop talak winilamuk touk, wini talak babye, atonun wininyabe.

³⁰ Sik diba tenena kum, talye nang arye nun diba tenenyap ninye ati, nun nong deice ikin ning weik delisiceba, ikin unyap bukni, Allah yupu noutamak sekamik ning nyasulula ara, tuba teninmalum do? Ayupu ara ani. ‘Kume. Yo bok deice dekukce, el pil ati, talye melin kil ap, elce deibuk mi ap, batakuka bai dopkweteplyame. An min arye doplum kil, el kanye aryuk tenelye touk ulul kil, Sara birye deibuk mi, aminyan dopropnamle ning ara, talye melina kil, Hagar arye deibuk mi ton kum doproptue. Ara kum winipmanto. Allah arye nyabuk.’ (Kejadian 21:10)

³¹ Anyapmasin yupu nirya aupmala ati ara, na kayapu ayupu ton nyapsine. Nunda, yo bok deice dekikceba, pil weik dilamikce, talye urdem aryuk pil dolamuk kil, Hagar el mi atonun kum unyabe. Kume, nunda yo bok deice dekna kum bukni, el kanye aryuk ulamuk kil, Sara birye deibuk mi atonun unyabe. Ara, nunda mem yupu talibuka ulamupa deice arye, ikin ning amu tam ulamubu bukni, Yesus arye nunti lopdeibuka lyepsuka ati, wini talak ara, mem yupu ap, ikin ning ap, amu tam kum unyaba ati, ayupu nyapmasine.