Galatia 2 - Eipomek

Allah yupu peterena ati deiyok kouna deiyok nang, Yerusalem nang arye, Paulus ati, “Telebe,” nyabuka, Paulus yukubuka, doprobik yupu

¹ Ura, Na Paulus birye, Siria mutuku ap, Kilikia mutuku ap noutamak ulamsa ani, keting tamun yupa weik 14 tahun akunum ubukba, Yerusalem mutuku ila tamubuka bise. Atalak ara, Barnabas ap, Titus ap dobukapsirye, neika welebupu.

² Yerusalem mutuku bise ning deiyok ara, Allah arye na talima noutamak, “Winipnamlam, winipnamlam,” nyabuka pil dopnuka deice arye, bise. Tonda, ‘Ninye lyen yupu, Yesus el kai teleb yupu, Yahudi yala kum ninye unyakak nirya peterenun yupu laka nyapniba, sik Yerusalem deiyok nang ton kekepnamak’ tenen, bise. Bukni, Yerusalem mutuku deiyok nang dam binuka, na peterenun yupu laka nyalamse ning ara, ‘Amutuku talye daunyak ninye nirya eibikirye, na yupu kekepnamak’ tenen, laka kum bise. Sik deiyok nang, sik damuk binuka laka nyalamse. Tonda, min arye na pil dolamse ning ap, wini talak pil donun ning ap ara, ‘Nong kum danamle do?’ tenen, laka nyalbise.

³ Anang dam Yerusalem mutuku bisi talak ara, na ap binumunye, el si ara Titus. Titus bira, Yahudi yala kumnye binya anya arye, den bola mouse kum sekenyak ninye, Yunani yala nang ulul bukni, elti, sik Yahudi yala diba tenyamik nang arye, “Nun Yahudi yala nang winilamap touk, anye bira Allah diba akunum tenebuka anya arye, ‘Laka uptu’ tenen, el den bola mouse adiparyuk seklyame,” nyabuka yupu kum deipsike.

⁴ Ura, aning ara, Allah el mapu laka una ati, den bola mouse seklamak yupu laka kipsuka ara, deiyok nyapnusine. Deiyok ara, yuk nang, sik dipkoprop Yesus ati diba tenena kum nang arye, nun Yesus Kristus ati diba tenenyap nang ati, winibuka tenyamsik. ‘E, sik Yesus ati diba tenenyak nang ara, Musa sekamuk yupu, mem yupu ap, mem pil ap talibuka kum wininyaka ara, yata ati do? Aning ara, yata wiribuka unyak do?’ tenen, nun kan-kan duknubuka dilyasik. Nun Kristus ati diba tenebupa deice arye, akunum lyepsukce, teleb kipdeipsuka anya arye, ‘Mem pil dona ap, mem yupu ap kekebuka dobolbanyaba deice arye, Allah arye lyepnamsil’ tenen, diba kum tenenyabe. Ati sik duknubuka dilyasik nang arye, ‘Kume mem pil ap, mem yupu ap, sik nong deice deibibyopura, anang ati tapu kouna atonun kiptibyeba, nun tam kipropsitinge,’ tenepsik.

⁵ Winibuka tenepsikce, nun kan-kan duknubuka yayik bukni, sikce, “Ura, ‘Allah el kanye deipsutu’ tenen, den bola mouse sekna ap, yuk mem pil dona ara weik mambule,” nyalamsik ning ara, tonok ning babye kum kekebupe. Sik nyalamik yupu seklamupa ara, ‘Ninye lyena ati, Allah el kai teleb yupu, dipkoprop ning uk, sik Galatia mutuku tam ninye arye, yuk talye yupu tabakna kum arye, dipkoprop ninguk tuba talinamak’ tenen, sik duknubuka dilyasik nang nyalamik yupu seklamubu.

⁶ Ura, na peterelamse yupu, Allah el kai teleb yupu, akunum langdibuka anya arye, kum suktalipnuke. Ati, sik mambul nang, Yerusalem mutuku peterena deiyok nang ara, yuk yupu ap tabakuka kum peterepnike. Tonda, ‘Anang ara, weik nang do, kum do?’ kum tenenyake. Na kanye ara, atenena atonun ning ara mambul kume. Allah arye ninye winilamice ning nong bol deiceuk elcuk, ‘Anang ara weik mambul nang, anang ara mambul kum nang’ tenen, yupu kum bogolisulule. Allah arye ninye nirya ati talima kum wililule.

⁷ Arup nyapmasin touk, Yerusalem mutuku peterena deiyok nang arye, nati, “Nun tenebibye yupu tonap tabakuka peterenamlyame,” kum nyapdeipnike. Aning kum bukni, na peterena yupu laka nyalamsibuk, sik ton kel kipnik. Ara, ‘Kume, Allah el kai teleb yupu, ninye lyena yupu dobuka, Yahudi yala ninye kekenamak’ tenen, Allah arye Peterus biti wipdeiyamuk touk, Allah arye Paulus babye wipdeiyamuk. Tonda, sik Yerusalem deiyok nang ara, ‘Allah arye Paulus ati, deiyok kouna ati peterena deiyoknye kibuke’ tenen, kel kipnik. Tonda, Allah arye Paulus biti ara, ‘Yahudi yala kum ninye ara, ninye lyena yupu kekenamak’ tenen ati, ‘Peterena deiyoknye akunum kipdeibuke,’ tenepnikce kel kipnik.

⁸ Aning kel biknika deiyok ara aupmale. Ara, Peterus birye, ‘Yahudi yala ninye dib tenepnamak’ tenen, Allah yupu peterebuka pil dolamuk ning noutamak arye, Allah weika arye melilamuk touk, na Paulus bira yuk yala ninye, Yahudi yala kum ninye ati, peterena deiyok kounanye kipdeipnukce, weika arye melilamnuke. Awinilamse ning nirya, sik Yerusalem mutuku unyakce, Yesus ati dib tenebuka, deiyok kinyak nang kekelamikce, kel biknike.

⁹ Kel kipnik ning ara, yuk nang arye, “Anang ara, weik deiyok nang,” nyalamikbuk, aulamik nang, sik si ara Yakobus ap, Peterus ap, Yohanes ap, sik nirya arye, na ap, Barnabas ap ati, sirik taruk arye telebe nyabuka arepsikce kipsik. Ara, sikce nunti, ‘Anang ara nun pil donyap touk, sik babye atonun pil donyake’ tenen, sirik taruk arye talipsikce, kipsike. Taruk talibuka kipsika ara, na laka nyalamse yupu kekebikce, ‘E, Allah arye Paulus biti bico tenyamukce, el kanye aniryuk Paulus biti weika arye melyamukba, Paulus birye Allah el pil teleb ubuka dolule’ tenen, kel biknikce, taruk talipsik talak ara, sik Yerusalem mutuku unyaka deiyok nang nirya eibike. Winipsikce, yupu talibupu talak ara, nyapnik. “Ura, nunda, ‘Yahudi yala ninye diba tenenamak’ tenen, peterelbinamap bukni, Paulus ap, el neika unyak nang ap arye, yuk yala ninye nirya, Yahudi yala kum ninye nirya ati, peterelbinamak,” nyabuka, yupu nyapdapu. ‘Aning ara telebe,’ tenen, neika atonun tenebupe. Na Paulus birye laka nyapsine.

¹⁰ Sik anang arye, nunti, “Anggun peterelbinamlum talak nirya noutamak arye, aning-aning nirya kum talinyak ninye, talye bona utotoa talina kum ninye luba kina kum arye, melinauk unamlulume,” nyapsik. Nyapsik bukni, na babye atonun, ‘Bona utotoa talina kum ninye ati, kanye deibuka melinamabe,’ min arye akunum tenyamse.

Paulus birye Peterus biti, wenebuk yupu

¹¹ Ura, yuk yupu ton nyapnusine. Yerusalem mutuku batakuka yuk tam akunum binuka ulamsa ani, Antiokia mutuku ulamse talak ara, Peterus ton nun dam yayuke. Nun dam yayuk talak ara, malye winibuka anya arye, narye el dam dipkoprop arye, duknuna kum laka arye wenepse.

¹² Peterus ara, Yahudi yalanye ulul bukni, nun dam yayukce, nun ap, yuk yala ninye, Yahudi yala kum ninye ap, neika ulamubu talak ara, Peterus bira, ‘Anang ap neika dina ara malye kume’ tenebukce, talye mangkau asa Yahudi yala kum ninye ap, neika ansinibuka din dilamik. Anang ap din neika dilamik bukni, aminyan ara yuk Yahudi yala nang, Yerusalem mutuku ululnye, el si Yakobus dam arye yayik talak ara, Peterus birye, ‘Se, anang arye nati, “Elda Yahudi yala kum ninye ap neika dinmaka ara, pia malye ulule,” nyabuka, malye tenepnicak’ tenen, Peterus birye Yahudi yala kum ninye dam batakuka yukak leibuka bindobuk. Peterus birye anang batakuka, yukak leibuka biyuka deiyok ara, sik Yahudi yala ninye arye den bola mouse sekenyak ninye anya arye, ‘Sik den bola mouse sekna kum ninye ara, malye nang,’ tenekirye, neika kum unyake. Tonda, neika kum dinyake. Ati Peterus birye utenebuk. Se, na ap, Yahudi kum ninye ap neika ansinibuka dibibyopura, sik Yahudi yala ninye, nun dam winiryuk yanmasiak nang arye nati, ‘Elda malye wininanye, tenepnicak’ tenen, ilil ubukba, Yahudi yala nang ara batakuka yukak leibuka bindobuk.

¹³ Atalak ara, Peterus birye deiyok koubuka winibukopura, nun ap neika unmapu ninye, Yahudi yala nang nirya eibikce, sik babye atonun, Yunani ninye batakuka yukak leibuka banmek. Sik anang nirya ara, ‘Allah arye, Yahudi yala kum ninye ap neika una ara, malye kum tenelule’ tenen, akunum kel bikmek bukni, ‘Nun dam winiryuk yayik nang arye, malye nang tenepsicak’ tenen, ilil ubukba, nong bol deice ninguk tenebikce, malye unmek. Wininmek deice arye, na kwit Barnabas babye, ‘Se,’ tenebukba, anang arye Barnabas dobuka, sik mutuku tamuk bobiyik.

¹⁴ Sik nirya arye winibuka unmeka deice arye, Allah el kai teleb yupu nyasilye touk, winina kum bukni, ayupu yaniltanmekbuk, narye eibuka kel bikcopura, sik nirya kekenmek akuk, Peterus biti nyabuka wenepse. “Peterus amio, anda Yahudi yala nang arye deipkikba, Yahudi yalanye ulyam bukni, an uminye ning ara, Musa sekamuk yupu ap, yuk mem yupu ap, sik Yahudi yala ninye arye diba tenebuka winilamak touk kum ulyame. Anda, yuk yala ninye, Yahudi yala kum ninye arye, aning nirya tenena kum arye, talye luparabuka winilamak touk ulyame. Winibuka uminya anya arye, anda yata ati Yahudi yala nang arye diba tenebuka wininyak ning dobuka, yuk yala ninye, Yahudi yala kum ninye sik nong deice delilyam do? ‘Yahudi yala kum ninye ap neika ansinibuka kum dipnune’ tenen, leibuka binmalama deice arye, malye winipmalame. Wininmalama ati wenepkine.” Na Paulus birye Peterus biti nyabuka wenepse.

¹⁵ Ura, na kayapu. Ton nang arye, Yahudi yala kum nang ati, “Anggunda, pia malye winin nang nyanyake.” Ura nunda, Yahudi yala nang arye deipsikbuk, Yahudi yala ninye unyaba anya arye, Yahudi yala ninye arye wininyap ning ara, nun kele.

¹⁶ Bukni, nunda Yesus ati diba tenenyap nang unyaba anya arye, nun kele. Musa sekamuk yupu kekebibirye, aninguk moubuka talibibirye, diksukum ubuka dobolbanyaba deice, Allah arye nunti, “Anang ara teleb ninye,” nyabuka, pia diksukum ninye kum winilisulule. Musa sekamuk yupu dobolbanyaba deice arye kum bukni, Yesus Kristus diba tenebibya deice aryuk, Allah arye nunti, ‘Anang ara diksukum ninye,’ tenesilirye, teleb ulisulule. Yesus ati diba tenenyaba deice aryuk lyesulula ara, akunum kel bikuba anya arye, nun babye Yesus Kristus ati diba tenebuburye, nun kanye el deiceuk deibupu. Yata ninye do nirya, Allah arye, ‘Aning ara wininamlulume, aning ara kum wininamlulume,’ nyapdeibuk ati, Musa arye sekeiyamsuk yupu kekebikirye, moubuka talinyakce, teleb ubuka dobolbanyaka deice arye, Allah arye aninye ati, “Sikda diksukum ninye unyake,” nyabuka, teleb kum ulinamle. Ayupu nirya moubuka taliptibya babye, diksukumuk kum uptibye. Aning ara kum winipmanto anya arye, Allah arye nunti, “Sikda Yesus diba tenebika deice arye, diksukum ninye tenenamsine,” nyabuka, diksukum ninye ubuka winilisulule. Nun nirya ara, ‘Allah arye teleb ulinamsile’ tenen, nun bidamang Yesus Kristus ati diba tenebupe.

¹⁷ Yesus Kristus diba tenenyaba deice ara, Allah arye nunti, “Sikda diksukum ninye unyake,” nyabuka, ‘Teleb ulinamsile’ tenen, wininyap talak ara, malye winin ning ila tuba tonap winibibyopura, awininyaba deice arye yuk nang eipsikirye, nunti, “Ara Kristus ara, malye winin ning ati kanye delilule,” nyapsiting do? Aning ara kume, ayupu ara dipkoprop kum nyapsiting. Yesus Kristus birye, malye winin ning nirya ara, kanye kum delilule.

¹⁸ Kume, narye ulubuka batakse ning ara, ila tuba tonap dobukaptinirye, aninguk talibuka winipnyopura, aning winiptinya arye, yuk nang arye nati, “Anye bira, Allah yupu yaniltalule,” nyapnitinge. “Musa arye sekeiyamsuk yupu moubuka talibibya deice aryuk diksukum ninye unmabe,” nyabuka ila tuba tonap peterepnyopura, malye uptinye. Minop talak ara, aning diba tenyamsirye talyamse bukni, Yesus el kai teleb yupu peterenuna deice arye, minop talak talyamse ning ara, akunum batakse. Aning ati ara, aning ila tuba tonap kum talinamne.

¹⁹ Winipsa deiyok ara, ‘Musa sekamuk yupu talibuka dobolbanamne,’ tenepsirye, pia pi dobuka piripdemse bukni, adeice ara, akunum diamne nang atonun ulamse. ‘Ayupu nirya ara kum winipmanto ulamse ati, adeice arye Allah arye nati kanye kum deipnuturye, diksukumnye ubuka kum kipdeipnutue’ tenen, kel bikamse. Musa sekeiyamsuk yupu bataksirye, wini talak ara, ‘Allah eltibuk diba tenebuka unamne’ tenen, unune.

²⁰ Dipkoprop ara, Yesus Kristus wanwanun yo deice obika deice arye, Yesus arye na malye ulamse ning ati punupnuk anya arye, winipmanto ara na ap, Yesus ap dukdongobuka opnikba, dipse. Ara, Yesus dibuka deice arye, na babye dipna atonun winipsa ati nyapsine. Winipmanto ara, Kristus ap dukdongobuka opnika ati, wini talak ara, na babye yuk kum unun bukni, Kristus ara na talima noutamak ulule. Na ap, Yesus ap talima dukdongobuka unyame. Ati, ninye nong atonun ubuka tuba ununye talak nirya ara, Allah el Mi Kopropa Yesus ati diba tenenuna deice aryuk kam unune. Allah el Mi Kopropa arye nati bico tenepnukce, na pununa ati, el bidamang el nonguk aribukba, yu nang arye obikba, nati dibuke.

²¹ Winipnuka ati ara, Allah arye nunti bico tenepsukce, el kanye aniryuk melyamsuk ning, Yesus arye nun pununa ati dipsuka ara, ‘Dawaplye’ tenen, kum bataktinye. Aning ara talye ati kum nyapsine. Musa sekamuk yupu kekebibirye, teleb ubuka dobolbalamtibya deice ara, Allah arye nunti, “Anggunda diksukum un ninye,” nyabuka teleb ulilamsutu toura, Kristus birye nun pununa ati dibuk ning ara, nong kum uptue. Talyauk diptue. Bukni, mem yupu dobolbanyaba deice arye, Allah kum lyepnamsile. Kristus birye pil dopsuka deice aryuk lyepnamsile. Na Paulus birye nyapsine.