Galatia 1 - Eipomek

Paulus birye deiyok koubuka, Galatia tam ninye ati, nyabuk yupu

^1-2 Telebe, na kayapu. Na Paulus ap, sik yuk nang diba tenyamikce, na ap neika ubirye, nun du weit atonun unyap ninye arye, anggunti asurat sekeipsiyabe. Anggunda, nun du weit atonun ululum ninye, anggun Galatia mutuku tam diba tenelulum ninye ati, asurat sekeipsiyabe. Nun nirya arye anggunti, “Telebe,” nyapsiyabe. Na Paulus ara, Allah el yupu dobuka peterelbana ati, deiyok kouna deiyoknye, Rasulnye unune. Talye nang arye sik kanye aryuk, ‘Peterepre banamle’ tenen, kum wipdeibnike. Tonda, talye nang aryuk, ‘Elda pil donamle’ tenen, kum dopdeipnike. Aning kum bukni, nun Deiyoknye Yesus Kristus ap, Yesus dibukba, elti, kam bukeibuknye, nun Ni kopropa Allah ap, sik bitinye aryuk wibuka dopdeipnirik ati, apiluk donune.

³ Nun Deiyoknye Yesus Kristus ap, nun Ni kopropa Allah ap, sik bitinye arye, anggun Galatia mutuku tam diba tenelulum ninye ati, bico tenesirikirye, sik kanye aryuk melisirice ning ara, ‘Walana kumce, kanye deibuka telebuk unamak’ tenen, arisirikce ning deiyok ning ap, arisururak ning, ‘Aning nirya ara, tuba-tuba weika arye tabakuka arenamsirak’ tenen, Allah morosunune.

⁴ Nun Deiyoknye Yesus Kristus arye, ‘Atalak malye-malye wininyak ninye ara, sik malye wininyak ning ap, malye tenenyak ning ap deice arye, na mapu malye kipdeibicak’ tenen, ‘Sik malye wininyak ning noutamak arye lobuka lyepnamle,’ tenyamukce, nun malye wininyap ning kilina ati, el babye el bidamang nong arepsuke. Yesus arye nun dekna ati, el nong arepsukba, malye nang arye obikba, nun pununa ati dibuk. Ara, nun malye wininyap ning wenena ati, Allah arye talye luba kibuka oplopsutu bukni, ‘Aninye wenebuka kum oplopnamne,’ tenyamukce, Yesus arepsukba, nun pununa ati dipsuke. Aning nirya ara, nun Ni kopropa Allah arye Yesus ati, ‘Wininamle’ tenen, wipdeiyamuk touk, Yesus winibuka deice arye deksuke.

⁵ Ati, ‘Ninye mutuku-mutuku nirya arye, nun Ni kopropa Allah ati, el siuk erebuka, “Elda pia telebe,” nyanamak’ tenen, Allah moronune. Tonda, ‘Dor unamle talak nirya babye, Allah el siuk pia erenamak’ tenen, se tenenirye, Allah moronune. ‘Wininamle’ tenen, amin nyapne.

“Dipkoprop Allah el laka teleb yupu, Ninye Lyen Yupu ara, tonokuk ulule,” nyabuk yupu

⁶ Se, na kayapu, anggun Galatia mutuku noutam ululum ninye arye winilulum ning ati, na malye kanye bobuka lukdanmance, ‘Sik Galatia mutuku ninye malye ubicak’ tenen, na ilil tuba unmanile. Ara talye ati kume. Yesus el kanye aryuk melyamsuk ning deice arye, ‘Aninye lyepnamne’ tenen, yukupsuknye ara, diba tenebuka el yupu kekelamlum bukni, wini talak ara, anye minyuma bataklumce, yuk yupu diba tenepre banmaluma ati ara, na lukdanmance, ‘Sik Galatia mutuku ninye malye winibicak’ tenen, na ilil tuba unmanile. Sik yuk tilila yupu peteren nang arye, sik yupu peteresikceba, anggun Galatia mutuku ninye arye ayupu kekemunce, sik tam kipropmaluma ati nyapsine.

⁷ Allah el kai teleb yupu, ninye lyena yupu ara, dipkoprop tenebuk ninguk ulul bukni, anggunce aning batakuka, yuk yupu kekebuka, yuk bisik banmaluma ati, ayupu nyapmasine. Ura, na walwal bukni, yuk nang arye anggun dam yakirye, sik tenenyak ning peteresice deice arye, kanye walwal upsiliba, teniltonauk ululum do, kum do? Ara, sik yuk yupu peteren nang ara, Kristus arye ninye lyena ati, el kai teleb yupu dobuka, yuk yupu ap ansinibuka peteresikceba, ‘Kanye bokoltonmasil,’ tenepsine.

⁸ “Sik anang arye, yuk yupu peteresikceba, kanye walwal unmasile,” nyapmasine. Bukni, yata nang do nirya, nun Allah yupu peterena deiyok nang babye, Allah el im deice melin nang malaikat babye, sikce yuk yupu ap ansinibuka doproptingce, anggun dam yanuka peterepsicopura, aning ara pia malye wininyake, nyapsine. Ara, nunce peterelamsupu yupu, dipkoprop Allah arye ninye lyena ati, el kai teleb yupu kum bukni, yuk nang arye yuk yupu ton ansinibuka peterepsicopura, na kanye ara, Allah arye anang ati weik arye wenebuka, uku din mutuku dongoptuba, pia unamtinge, nyapne. Ara talye ati kum nyapsine. Sikce pia malye weik wininyaka ati nyapsine.

⁹ Nun minop talak arye akunum laka nyapdeiyamsubu touk, narye wini talak tonap nyapnusine. Nunce peterelamsupuba, akunum diba tenelamlum yupu ara, dipkoprop Allah el kai teleb yupu, Ninye Lyen Yupu uk peterelamsubu. Ara, Allah arye ninye lyena ati nyapdeiyamsuk kai teleb Ninye Lyen Yupu. Ati, yata nang do nirya, ayupu kum bukni, yuk yupu ton dobuka, tabakikirye peterepsicopura, na kanye ara, Allah arye anang ati weik arye wenebuka uku din mutuku dongoptuba, pia unamtinge nyapmasine.

¹⁰ Ura, anggun ton teneipdelulume. Ayupu nyapmasin deice arye, yuk nang arye, nati, “Elda telebnye,” nyabuka, ‘Kanye deipnikirye, na si erepnamniyake’ tenen, nyapmasin do? Aning kum bukni, ‘Allah elcuk kanye deipnamnil’ tenen, nyapmasin do? Kume, narye yuk nang ati, ‘Ura, sik kanye deipmanto yupu uk nyapnyeura, kekebikirye, nati kanye delinamniyak’ tenen, yupu kum nyanune. Ato yupu, talye yupu nyaptinyopura, Kristus el pil melinanye dipkoprop kum uptinye. Ati, talye nang arye kanye deipnitingce, ‘Elda pia telebnye tenepnitinge’ tenen, ayupu kum nyasunune. Na Paulus arye nyapsine.

Paulus bira, “Allah arye, ‘Paulus elda, na pil donamle’ tenen, yukupnuke,” nyabuk yupu

¹¹ Ura, na weit yapu atonun ninyeo. ‘Sik moubuka kel kipnuyak’ tenen, ayupu ton nyapnusine. Narye anggunti peterelamsise yupu ara, ninye lyen yupu, Allah el kai teleb yupu ara, talye nang sik kanye tenena deice aryuk nyalamik ati, kum kekelamupe.

¹² Talye nang arye ayupu kum arepnike. Tonda, ninye arye peterelamnikbuk, kum kel kiyamse. Aning ara kum bukni, Yesus Kristus elcuk nati, laka kibuka laka nyapnukba, ayupu kekamsirye kel kiyamse.

¹³ Ura, na kayapu, na talye ati kum nyapsine. Anggun kele. Yahudi yala ninye arye, diba tenebuka talinyakce wininyak ning ara, Yahudi nang dib tenenyak ning ara, na babye aninguk diba tenebuka talyamse. Aning ati dib tenebuka, ulamse ning nirya ara, yuk nang arye laka nyalamsikba, ayupu anggun akunum kekelamlumce, kel kiyamlume. Ara, ‘Yesus ati diba tenenyak ninye nirya, kum kipdeipnirye sirya daknamne’ tenen, yu weik ulamnukba, narye pi dobuka pia pirilelamsirye, sik nong deice ikin ning weika arye delilamse. Winilamse ning ara, ‘Aninye nirya obuka sirya daknamne’ tenen, winilamse.

¹⁴ Tonda, na kayapu yuk nang ara, mitik anun aryuk Yahudi nang dib tenelamik ning, kel kipra balamik bukni, na tonok ara, weik arye kel kipra balamse, nun apu yapu arye, “Aning ara wininamlum, aning ton wininamlulum,” nyabuka peterelamsikba, kekebuka talyamupa ning ara, ‘Aning ara, weik mambule’ tenen, weika arye kel bikamsirye, aninguk talibuka winilamse. Yuk nang nirya ara, mitik anun aryuk kel kibuka ulamik bukni, nara weika arye aning nirya kel kibuka talyamsirye dopra balamse.

^15-16 Winibuka daulamse bukni, atalak noutamak ara aning kum tenelamsibuk, Allah ara na nin deipnuk talak arye, ‘Anye bira na ning,’ tenyamnukce, wipdeipnuke. Winipnuka anya arye, elce bico tenyamnukce, el kanye aniryuk yukupnukce, lyepnuke. Tonda, Allah arye nati, ‘Anye bira, na yupu dobuka, Yahudi yala kum ninye ati peterelbinamle’ tenen, el mi kopropa Yesus pil dopnuka deice arye, winiryuk kanye talima arepnuke. Winipnuk ati, el mi kopropa Yesus arye winilul ning ara, laka nyalamnukce, na talima noutamak arye pil dolamnukba, na winilamse ning deice arye laka kipdeipnuk. Winipnukopura, narye, ‘Se, yatato pil donamne do? Tonda, yatato yupu peterenamne do?’ tenen, yuk nang dam binuka kum asilamse.

¹⁷ Tonda, atalak ara aning ton kum tenyamse. Se, Allah arye, ‘Na yupu peterena deiyok nang, deiyok koun nang, Rasul nang unamak’ tenen, ‘Akunum wipdeiyamuk ninye sik dam binirye sikti, asipdenamne’ tenen, kum asilbinamsi. Ara, Allah arye nati, min kum wipnuk talak ara, sik anang akunum wipdeiyamuk bukni, ‘Anang aryuk laka nyapnitingba, apil dopnirye, sikce nyanamniyak yupu uk peterenamne,’ kum tenepse. Aning ati ara, narye, ‘Se, yata yupu peterenamne do?’ tenen, sik dam Yerusalem mutuku binuka kum asipdese. Sik dam kum bisi bukni, adiparyuk Arab mutuku noutamak bisirye, daulamsa ani, aminyan talak ara, ila tamubuka Damsyik mutuku yase.

¹⁸ Ura, Damsyik mutuku tamubuka yasirye, amutuku noutam akuk daulamsa ani, keting tamun winilye akunum ubukura, Yerusalem mutuku welebise. Ara, ‘Peterus ap ansiniptinimirye, kel kipdanamnam’ tenen, bisirye, el ap like 15 sum deice arye neika ulamnumu. El aik malamse.

¹⁹ Atalak ara, nun Deiyoknye Yesus el weit kopropa Yakobus ap eibdanumu bukni, Allah el yupu peterena ati deiyok kouna deiyok nang, Yesus arye wipdeiyamuk Rasul nang, sik sebelas nang ara, anang kan-kan tonoknye babye, ton kum epdapu.

²⁰ Na, talye kum nyapmasine. Allah dinmanila ati, anyapmasin yupu ara, dipkoprop yupu uk nyapsine. Narye nyabuka sekelinye yupu ara, pia dipkoprop ulule. Tilila yupu kume.

²¹ Ura, Yerusalem mutuku binuka ulamsa ani, aminyan talak ara, Provinsi Siria mutuku tam ap, Provinsi Kilikia mutuku tam ap peterepra balamse.

²² Atalak noutamak nirya ara, sik diba tenebuka Kristus ap talima dukdongobuka unyak ninye, ara Yudea mutuku noutam unyakce, diba tenenyak ninye nirya ara, na ap min kum epdapu anya arye, sikce kum kel bikamnike.

²³ Sik atam ninye nirya ara, yuk nang arye na winilamse ning ati laka nyalamikba, kekenauk ulamik. Sik kekelamik yupu ara ani. “Kume, nun nong deice ikin ning weik delilamsuknye bira, minop talak arye, ‘Sik Yesus ati diba tenenyak ning ara, kum uptue,’ tenyamukce, ‘Aninye ap, sik diba tenenyak ning ap nirya ara, obuka atu kibuka bataknamne’ tenen, pirilelamuk bukni, wini talak ara adiba tenenyap ninguk el dem aryuk diba tenebukce, peterelule,” nyabuka, yuk nang arye ayupu laka nyalbalamikba, Yudea mutuku ninye kekelamik.

²⁴ Ayupu kekelamikce, nati kanye deibuka Allah el si erelamikce, “Allah ance, ikin ning weik nun nong deice delilamsuknye Paulus bira, ance akunum lyeplumba winira telebuk ulule. Anda, pia telebe,” nyabuka, Allah el si erelamik.