Ester 9 - Eipomek

Yahudi yala ninye arye, sik mal olan mutuku nang ati, obuka sirya dakik ati, nyabik yupu

¹ Wala dua belas ning (12), wala si Adar, tanggal 13 akunum ubukba, Persia mutuku ninye deiyoknye Raja Ahasyweros birye, sik Yahudi yala ninye nirya ati, nyapdeiamuk sum ‘Akunum upmala,’ nyabik. Asum ara, Persia mutuku noutamak ulamik ninye, yala yuk-yuk nirya ara, Haman birye malye yupu nyabuka deice arye, ‘Yahudi yala ninye nirya obuka, sirya daknamabe,’ tenelamik bukni, kum winipmanto ubuk. Sik Yahudi yala ulamik ninye nirya arye, sik mal olan ninye ayala-ayala nirya ap, dana-dana tam arye yayik ninye nirya ap, adiparyuk obuka dakik.

² Sik Yahudi yala ninye ara, mutuku yuk-yuk noutamak bukni, weik asik kota yuk-yuk daulamik ning nirya bulubuka wekikce, yuk ninye nirya, sik Yahudi yala ninye ati yu kanye tenebuka ulamik nang ati, ‘Nun mal olan ninye olbinamabe’ tenen, bulubik. Persia mutuku nirya talibuka, ninye deiyoknye Raja Ahasyweros taleamuk mutuku nirya ap, provinsi nirya noutamak ap, sik Yahudi yala ninye kintinibik. Winilamika ati, mutuku-mutuku nirya, daulamik ninye, yuk yala ninye nirya arye, sik Yahudi yala ninye ati, ilil pia weik ulamuka ati ara, sik aninye kum opmanto ubik.

³ Aning atonun, aweik pala mutuku ap, provinsi nirya ap, talibuka ulamik ninye deiyok nang ap, Gubenur ap, Bupati ap, sik amu tam unyakce, pil talibuka donyak nang nirya ap arye, sik Yahudi yala ninye ati, melilamik. Deiyok ara, sik dana-dana tam ninye nirya arye, talye ninye deiyoknye Mordekai elti, ara, ilil pia weik ulamuk.

⁴ Persia pia weik mutuku-mutuku nirya ulamik ninye arye, Mordekai biti biklamik. Tonda, ninye deiyoknye Mordekai birye, pil dolamuk ning ap, winilamuk ning ap nirya ara, yuk nang arye laka nyalamikba, Persia pia weik mutuku noutamak ulamik ninye nirya kekenmmikce, ‘Se, anye dipkoprob weik mambulnye ulule,’ tenelamik. Mordekai bira tuba-tuba pia tabakuka, mikip weika arye upra balamuk.

⁵ Atalak noutamak ara, sik Yahudi yala ninye nirya arye, sik mal olan dam yayik ninye nirya ara, akunum obuka dakik. Yahudi yala nang arye bobuka, ya yu ning ap, si tace ning ap deice arye, sik yuk mutuku ninye ayala-ayala nirya, ‘Yahudi yala ninye nun like,’ tenelamik ninye nirya ati, obuka sirya dakik. Winibik ning ara, sik mal olan nang ati, sik Yahudi yala ninye arye, ‘Nun mal olan ninye ati, wininamabe,’ tenelamik touk winibik. Winibikce, aninye nirya obuka, sirya dakik.

⁶ Aning atonun, weik mutuku kota Susan noutamak ara, Yahudi yala ninye arye, sik mal olan ninye yupa pia weika arye, 500 nang obuka sirya dakikce, kum kipdeibuk.

^7-9 Tonda, Haman elce deiamuk mapu, 10 nang ton obik. Yahudi yala ninye nirya arye, obuka sirya dakeibik nang, Hamedata el mi Haman birye deiamuk mapu sik si ara ani. Parsandata ap, Dalfon ap, Aspata ap, Porata ap, Adalya ap, Aridata ap, Parmasta ap, Arisai ap, Aridai ap, Waisata ap nirya ara obik.

¹⁰ Hamedata el mi Haman birye deibuk mapu ara, sepuluh (10) deiamuk nang nirya ara, sik Yahudi yala ninye nirya ati, ‘Nun like. Yahudi yala ninye nirya ara, obuka sirya daknamabe,’ tenelamik. Haman elce deiamuk mapu, sik 10 nang tomobikce, tapu kouamik bukni, sik Yahudi yala nang ara, ‘Haman el mapu 10 nang arye talilamik ning nirya ara, nun kum dopropnuyabe. Sik ning nun like,’ tenelamika ati, aning tonok ning babye, pia ton kum doprobik.

¹¹ Asum wala 12, tanggal 13 deice aniryuk, sik Yahudi ninye arye oplobik nang yupa weik ati ara, ‘Ninye deiyoknye Raja Ahasyweros kekepnamal’ tenen, el dam laka nyalbiyik. Ara, “Kota Susan mutuku noutamak arye ninye opmik ning nirya ara, winibuka opmake,” nyabuka laka nyabik.

¹² Akunum laka nyabikopura, ninye deiyoknye Raja Ahasyweros birye, el kil Ratu Ester biti nyabuk. “Kota Susan mutuku noutam ara, Yahudi yala ninye arye yupa pia weik lima ratus (500) ninye akunum obik. Tonda, Haman elce deiamuk mapu sepuluh (10) nang nirya ton, tabakuka tomobikce, tapu koubuka deibik. Winibikopura, na talenun pia weik mutuku provinsi nirya noutamak daunyak ninye noutamak ara, yata wiribuka ninye akunum obik do? Tonda, atalak ara, an patapkiliba, moropnunilam ning ton aupmal do, kum do? Ance tenepminye touk moropnememnyopda, dipkoprob aning na arepnamkine. Kum bataknamkine,” Raja Ahasyweros birye, Ester biti nyabuk.

¹³ Nyabukura, Ratu Ester birye tamubuka nyabuk. “Ninye deiyoknye Raja ance, ‘Telebe,’ tenepnutumce, Yahudi yala nang arye, kota Susan mutuku unamak ninye ati nyapnutumba, ambusum beren tam ara, ila tuba tamubuka arup unmak touk unamake. Tonda aning atonun, Haman el mapu 10 nang ara, ninye kirikna delina ati, ikuka deibupu cang yo deice tapu arye, sik ngang dam kirikdongobuka, diripnamabe,” Ester birye nyabuk.

¹⁴ Nyabuka morobukba, ninye deiyoknye Raja arye, “Telebe dawiniplulume,” nyapdeibukba, Ester birye moropmuk touk winibik. Weik kota Susan mutuku noutamak, Raja birye, ‘Winipnamlulume,’ nyabuka, sekna ning deice arye, surat sekuka deipmoka ati ara, anyapmok touk winibik. Ara, Haman el mapu nirya ara, 10 nang dobuka, namin yo arye ikuka, deiamikak uk, yanuka diripkwetebikba, dibik.

¹⁵ Mapmeka berekukopura, tanggal empat belas (14), wala si Adar deice arye, kota Susan mutuku noutamak ulamik Yahudi yala ninye nirya ara, bulubuka Susan mutuku noutamakuk ulamik nang yupa pia weik, 300 nang oplobik. Ara, ‘Haman nyapsuk touk, Yahudi yala ninye obuka sirya daknamabe,’ tenelamik nang ati, oplobik. Winibuka ninye yupa weika arye 300 nang tabakuka obik bukni, anang arye talilamik ning nirya ara, kum dalubuka doprobik.

¹⁶ Asum aniryuk, sik Yahudi yala ninye bukni, Persia pia weik mutuku provinsi-provinsi yuk pera mutuku dana-dana tam ulamik ninye nirya babye, bulubukabikce, sik mal olan nang ati, malye kibuka obik. Sikce oplobik nang ara, yupa weik, tujuhpuluh lima ribu (75.000) ninye ton obik. Ara, talye ati kum bukni, sik obik nang ara, ‘Yahudi yala ninye nun like ati ara, obuka sirya daknamabe,’ tenelamik nang ati oplobik. Bukni, sik obik nang arye talilamik bona ton, tonok ning babye, dalubuka kum doprobik.

¹⁷ Aning winibuk talak ara, wala si Adar bukni, tanggal tiga belas (13) ap, tanggal empat belas (14) ap winibik. Aning akunum winibik ning ara, dukdongobuka winiryukuk tanggal empat belas (14) deice arye, sik yuk ning ton, pia kum ubik. Asum sintam arye dipdongobuka sintam ap, lukunyan ap, dikdik sebuka, ‘Asum ara, weik sum upmasile’ tenen, kanye pia deibuka, kwalya kwalibukabikce, din dibuka si erelamik.

Yahudi yala ninye arye, ‘Asum ara, weik sum pia unamsil’ tenen, weik sum si, ‘Purim,’ nyabuka, kwalya kwalibuka dilamik yupu

¹⁸ Sik Yahudi yala ninye, buru tam noutamak ulamik ninye arye, tanggal 14 deice arye dikdik selamik. Bukni, weik kota Susan mutuku noutamak ulamik Yahudi yala ninye arye, sik mal olan ninye ati obik ning ara, awala dua belas ning bukni, tanggal lima belasda (15), ‘Nun weik mambul sum,’ tenebuka kanye pia deibikce, dikdik sebuka si erelamik. Aning ara sikce, ‘Nun mal olan nang ati obupu sum, tanggal tiga belas (13) ap, tanggal empat belas (14) ap, upmaba ati ara, atanggal lima belas (15) deice arye, weik sum kibibirye, dikdik sepnamabe,’ tenebikce winibik. Ati, asum pil dona kumce, dikdik sebuka ulamik. Tonda, asum deice aryuk, kwalya kwalibuka dinmek.

¹⁹ Ati ara, sik Yahudi yala ninye mitik kota mutuku ap, provinsi noutamak, pera mutuku daulamik ninye nirya arye, tanggal empat belas (14) wala Adar kipnopura, ‘Weik sum akunum upmala’ tenen, kanye deibuka weik kwalya kwalibuka dilamik ning ara, ‘Nun kwit’ tenen, dengna ning ton dobuka, yuk nang ati teleb ning arelalamik.

‘Atalak ara, nun weik sum’ tenen, kwalya kwalibuka dilamik ati, nyabik yupu

²⁰ Aning akunum winibikopura, ninye deiyoknye, el si Mordekai birye sekna ning surat deice arye, awinilamik ning nirya sekuka, sik Yahudi yala ninye Persia mutuku noutamak ulamik ninye nirya ap, tonda mining dam mutuku noutamak aulamik ninye ap, tonda weik pera mutuku ulamik ninye ap, sekna ning sekuka sik dam dopreibuk.

²¹ Asurat noutamak sekdeibuk yupu ara ani. “Adar wala noutamak bukni, tanggal empat belas (14) ap, tanggal lima belas (15) ap ara, aketing tamun, aketing tamun nirya, atanggal wala balyopura, ‘Nun weik sum ani’ tenen, si erenmabe. Dikdik sebuka, kwalya kwalibuka, si erenamabe,” nyabuka, sekna ning sekdeibuk.

²² Awinibuk ning ara, talye ati kume. Ara, awala, atanggal deice arye, sik Yahudi yala ninye, sik mal olan nang akunum malye kibuka obuka, sirya dakik. Winibikba, Persia mutuku nang arye ikin weik ning, sik nong deice delilamik ning, kum kipdeibuk. Winibikce, sik kanye tenen ning noutamak arye, ‘Ae,’ tenen, kanye deibuka winibik. Sik urasin yuk un ning ap, kanye teleb tenen ning ap, pia teleb ubuk. Ati ara, Mordekai birye, ayupu ton nyabuk. “Asum yalyopura, sik Yahudi yala ninye nirya arye, ‘Nun weik talak upsile,’ tenebuka, kwalya kwalibuka dina ap, ‘Na kwit bico’ tenen, din ning arelana ap, tonda aning-aning pia kum ninye ati, arelana uk unamlume,” nyabuk.

²³ Nyabuka ati ara, sik Yahudi yala ninye nirya ara, Mordekai birye nyabuk yupu nirya, sikce akunum kel kibikopura, utenebuka nyabik. “Aning ara, nun min arye talibuka ulamupu ning atonun, aketing tamun, aketing tamun nirya ara, awala, atanggal yalyopura, ‘Nun weik mambul sum,’ tenenamabe,” nyabik.

Weik sum ati, ‘Purim,’ nyabuka, weik sum si dobik yupu

²⁴ Hamedata el mi Haman bira, Agag yala ninye donirye deipdanin yangalamik ani, deiamiknye ulamuk. Haman birye sik Yahudi yala ninye nirya ati, yu kanye tenelamukce, ‘Yahudi yala ninye nirya obuka, sirya daknamabe,’ tenebuk. Utenelamukce, sik Persia mutuku ninye arye winilamik touk, sik winilen ati, winilen ning el si pur arye winilelamak. Winilamuk ning deiyok ara, ‘Sik Yahudi yala ninye kum danalina sum ara, ani. Atanggal awala ani, tenepnamne’ tenen, elce utenelamukce, ‘Yahudi ninye nirya ati kum danaiptinye,’ tenelamuk.

²⁵ Bukni, Haman tenelamuk ning kekebuk talak ara, Ester birye tamubuka, ninye deiyoknye Raja Ahasyweros dam binuka laka nyabuk. Nyabukura, ninye deiyoknye Raja, elce surat sekna deice, Haman birye nyabuk yupu sekdongobuk. Yupu sekuka deibukce nyabuk. “Haman elce yu kanye tenebuka, ‘Yahudi yala ninye nirya obuka sirya daknamabe,’ nyabuka sekamuk ning ara, elcuk ikin ning deipdanmale. Tonda, ‘El ap, el mapu koproba ap, ninye dobuka, tapu arye ngang kirikuka diripkwetepnamabe’ tenen, Haman birye ikuka, deiamuk cang yo dup diripkwetepnamabe,” Raja arye nyabuk.

²⁶ Haman birye, ‘Yahudi ninye on sum ani’ tenen, lak kina ning deibuk ning ara, el si ara, ‘Pur’ nyalamik. Aning ati ara, Yahudi yala ninye arye, ‘Dortalak unamle keting tamun nirya ara, nun weik talak tenebuka, mambul sum si nyanamap ning ara, ‘Purim,’ nyanamabe.

²⁷ Aning deice arye, sik Yahudi yala ninye ara, pia unamik ning ap, tonda sik bidamnye pil tuba donyak ning ap, sik bidamnye winin ninguk, kintinibuka deibuka ulamik. Winilamikce, sik babye deipdanin banamak ninye ap, yuk ninye bukni, Yahudi yala ninye ap, neika unamak ninye ap, kipdeipnirye upra ban ning ap uk, pia winipre balamik. Ati, aketing tamun nirya ara, batakna kumce, pia dukdongobuka, ‘Nun weik mambul sum’ tenen, si erenyak sum ara, like bitinye talak, wala si Adar bukni, tanggal 14 ap, tanggal 15 ap kintinipnamabe,’ tenelamikce, tuba tenenyake. Ara, ninye deiyoknye Mordekai birye, “Wininamlulume,” nyapdeibuk touk tuba wininyake.

²⁸ Atalak ara, Mordekai birye, akunum kintinip deibuk ning ara, nyabuk. “Asum-asum nirya ara, akitineipmap wala akunum balyopura, ‘Purim sum ara, nun pia weik mambul sum,’ tenebuka, nun Yahudi yala ninye nirya dikdik sebuka, kwalya kwalibuka dibibirye, si erenmabe. Ara, dan mutuku do nirya, pia weik mutuku noutamak, unamak ninye ap, karin mutuku provinsi yuk datalibuka unamak ninye ap, mitik mutuku daunamak ninye ap, weik kota noutamak talibuka daunamak ninye nirya ap ara, ‘Asum ara, nun pia weik mambul sum,’ tenebuka si erenmabe. Anyapmasin ning ara, pia kum luba kinamlulume. Pia tenena uk unamlulume. Anggunce deipmunyeba, dadeipdanin, banamak Yahudi ninye babye, kum luba kinamake.” Mordekai birye nyabuk.

²⁹ Atalak ara, ninye deiyok kil Ratu Ester, el li koproba Abihail ulamuk kil, el si Ester ap, el li ninye deiyoknye Mordekai ap, adiparyuk sekna ning like bitinye ning, sekuka dopdeipdik. Winiprik ning ara asurat bitinye ning noutamak ara, mikip arye Yahudi yala ninye ati nyaprik. “Nun weik sum yalyopura, ‘Pia si erenmabe,’ nyabupu sum ara, el si Purim, atalak uk dikdik sebuka, kwalya kwalibuka si erenmabe,” nyaprik.

³⁰ Asurat nirya ara, Yahudi yala ninye daulamik mutuku nirya ara, Mordekai birye nyapdeibukba, surat bobana nang arye, asurat dobuka arelbalamik. Winilamikopura, sik kayapu nang ara, daulamik Yahudi yala ninye, dam ulamik ninye ap, yukak ulamik ninye ap, doprobik. Ara, Persia pia weik mutuku noutamak bukni, seratus dua puluh tujuh (127) provinsi daulamik ninye nirya ati, asurat sekuka dolilamikba, dololamik. Tonda, asurat noutamak ara, Mordekai birye, talima mikip kilina yupu ap, sekukce, “Nun ni Allah arye melisilyeba, telebuk unamabe,” nyabuka, kanye talima kwadina yupu ap, sekdeibuk. Ara, ‘Sik Yahudi yala ninye nirya ara, ilil kumce, teleb kibuka kanye dakeiyam asa unamake’ tenen, sekuk.

³¹ Tonda, aketing tamun, aketing tamun noutamak nirya ara, Yahudi yala ninye nirya arye, weik sum, ‘Purim’ nyalamik ning, tuba tenebikirye, dikdik sebuka, kwalya kwalibuka unamake. Ara, Mordekai ap, ninye deiyok kil Ratu Ester ap arye, “Wininamlulume,” nyabuka sekdeiamdik touk, ‘Winibuka unamake. Dikdik sebikirye, kwalya kwalibuka dinamake ap, Allah moronamake ap, kanye delilanamak ning ap, engenamak ning ap, si tebuka din kum dinamak ap, nirya ara, atalak, atanggal wininamlulume, nyapnumu touk pia wininamak’ tenen, asurat sekdeibuk.

³² Ninye deiyok kil Ratu Ester birye, nyabuk yupu ara, “Wini talak arye dipdongobuka dorunamle talak noutamak nirya ara, nun weik sum el si ara, ‘Purim’ nyanamap ning ara ani,” nyapdeibuk ning ara, weik mambul sum Purim sum kibuka unamak ning ara, sik buku noutamak ton sekdeibuk. Ati ara, nun nirya arye atalak balyopura, asum-asum nirya batakna kumce, weik kwalya kwalipna arye, si pia erebuka si erenamabe. Ratu Ester birye nyabuk.