Ester 8 - Eipomek

Ninye deiyoknye, Raja Ahasyweros birye, ‘Yahudi yala ninye ati, melipnamne’ tenen, surat sekuk yupu

¹ Asum aniryuk, Raja Ahasyweros birye ninye deiyok kil, Ratu Ester biti, Haman el taleamuk ning ap, el taleamuk mutuku nirya ap, dobuka arebuk. Persia mutuku noutamak ulamukce, Yahudi yala ninye nirya ati, ‘Obuka sirya daktinye’ tenen, yu pia tenelamuknye bira, Haman ulamuk. Tonda, Ratu Ester birye, Persia mutuku ninye deiyoknye Raja ati, “Mordekai bira na mam koproba ulule,” nyabuka laka nyabuk. Ati Raja birye, “Mordekai ap, el aik ninye nirya ap, na aik yanuka neika unamabe,” nyabuk. Atalak arye dipdongobuka, dotam nirya ara, Mordekai ap, Raja Ahasyweros ap, Ester ap neika ulamik. Mordekai bira, amutuku ninye deiyoknye ton ulamuk.

² Raja Ahasyweros el taruk deice dongamuk ning, el si cincin ara, Haman areamuk bukni, Haman opnuyik talak ara, el taruk deice tamubuka kwiribukabukce, Mordekai biti arebuk. Awinibuka ati ara, Mordekai birye, amutuku ninye deiyoknye Raja si deice arye pil dolamukce, ninye deiyok talibuka ulamuk. Aning atonun, Ratu Ester birye Mordekai biti, el uk ninye deiyoknye kiplirye, Haman elce taleamuk mutuku ap, taleamuk ning nirya ap dobuka, Mordekai biti arebuk.

³ Ester utenebukce, ila tuba tonap el adiparyuk, ‘Raja Ahasyweros dam epdanimirye, weik mambul ning moropnamne’ tenen, biyuk. Biyukopura, ninye deiyoknye Raja el si erena ati, el yan dam tuku deice kanupdongobukce, malye kanye bona deice arye engenmok. Tonda, Raja el kekena ati, Haman bira pia malye ulamuknye birye, Yahudi yala ninye nirya ati, yu tenelamukce, ‘Sik Yahudi yala ninye nirya obuka sirya daknamabe’ tenen, surat sekuka dopdeibukba, amutuku ninye nirya arye Yahudi yala ninye nirya opnamake ning ara, ‘Raja kel kiplirye, yupu seknamle’ tenen, laka nyabuk.

⁴ Ratu Ester engena deice arye, Raja dam nyabuka binuka morobukba, Raja arye el pia urasin teleb kama dekna weik ning el si emas arye, memamik kama ara, el taruk arye Ester tikmok tam pukukba, Ester tikukabukce nyabuk.

⁵ “Telebe, na deiyoknye Rajao, ance, ‘Telebe’ tenepnimince, kanye deipminyopura, ‘Ester birye nyapnil yupu ara, teleb anya arye, winipnamne,’ tenepniminyopura, pia malinye Haman birye nyabuk yupu sekdongopnulyame. Ara, Hamedata el mi Haman birye, ‘Persia mutuku noutamak bukni, provinsi noutamak nirya unyak Yahudi yala ninye nirya, obuka sirya daknirye, kum kipdeipnamabe’ tenen, sekdeibuk surat ara, ance yupu sekdongopnulyame. Winina ati ara, ance surat ton sekmince, dopkwetepminyopura, aning nirya kum danamle. Yahudi yala ninye nirya kum opnamsiake.

⁶ Ara, yata deiyok ati do, kume. Nara pia ikin kanye bopne. Persia mutuku ninye arye, na yala ninye, Yahudi ninye nirya obicopura, pia na ikin kanye bobuka unamne. Winibicopura, ikin kanye delina ap, engena ap, kanye talima sukununa ap deice arye, na babye dipnamnarya. Ati ara, na nio, ‘Anda yupu mikip arye nyapminba, Haman birye nyabuk yupu deice arye, Yahudi yala ninye nirya, opnamak ning ara, kum danamle’ tenen, moropkine,” nyabuka, Ester birye, Raja Ahasyweros biti morobuk.

⁷ Nyabukopura, ninye deiyoknye Raja Ahasyweros birye, ninye deiyok kil Ratu Ester ap, el li koproba Mordekai ap ati, nyabuk. “Dipkoprop narye Haman dobukapsirye cang yo deice, ikuka deipsirye, tapu arye el ngang kitibuka akunum opse. Deiyok ara, Haman elce, ‘Anggun Yahudi yala ninye nirya ati, obuka sirya daknirye kum kipdeipnamne,’ nyalamuka deice, pia malye winibuka ati, anye opse. Tonda, elce talibuka ulamuk ning nirya, narye dobuka, Ester an uk akunum arepkise.

⁸ Winipse bukni, nara ninye deiyoknye Raja ununa ati ara, na si deice arye surat ton sekuka kintinipnamlulume. ‘Na talenye mutuku unyak ninye nirya, dipkoprob kekepnamak’ tenen, na taruk deice dongolamse bukni, Mordekai biti arepse cincin arye, asurat deice arye, lak kina ning dobuka deipnamlulume. Ara, talye ati kume. Yata surat do nirya, na Raja si deice deipne surat nirya ara, yuk nang arye yupu kum sektinge. Na laka kina ning, asurat deice akunum deipnyopura, dipkoprob tamubuka kum doproptinye. Na nyapnye touk dipkoprob upnamle. Ati ara, yata yupu do, anggun patasiliba, teleb tenelulum touk, na si ap, na taruk dongon ning, el si cincin lak kina ning ap deice, sekukapmunce, amutuku noutamak nirya dopdeiplulume.” Raja Ahasyweros birye, Ester ap, Mordekai ap ati nyabuk.

⁹ Nyabuka ati, asum aniryuk, tanggal 23, wala winilye ning, wala si Siwan nyalamik ning deice arye, Mordekai birye Raja el amu tam mambul ning sekna deiyok nang, sekretaris ati yukubukba, yayik. Yayikopura, Mordekai birye, “Aning ara wininamlulume, aning ara pia kum wininamlulume, winibuka seknamlulume,” nyapdeibuk touk, ayupu nirya moubuka kekebikce sekik. Sekikopura, Persia ninye deiyoknye Raja taleamuk mutuku noutamak ulamik deiyok nang dam dopkwetebik. Ara, pia weik mutuku taleamika deiyok nang ap, sik Gubenur nang ap, Bupati ap ara, seratus dua puluh tujuh (127) provinsi talibuka ulamik touk, asurat ton dopkwetebikba doprobik. Ara, Raja Ahasyweros birye taleamuk mutuku nirya, India mutuku arye dipdongobuka, Sudan mutuku nirya ulamik touk dopkwetebik. Tonda, ‘Amutuku-amutuku unyak ninye nirya moubuka kekepnamak’ tenen, asurat sekna ning noutamak ara, sik babye amutuku-amutuku yuk-yuk ulamikce, nyalamik yupu koproba ap, sikce huruf seklamik atonun ap deice aniryuk, sekuka dopkwetebik. Aning atonun, ‘Yahudi yala ninye babye, moubuka kekepnamak’ tenen, sik Yahudi yala nang babye, sik nyalamik yupu koproba ap, sikce huruf seklamik ning ap deice, aniryuk sekamikce dolilamik.

¹⁰ Mordekai birye asurat sekuk ning ara, Raja Ahasyweros el si deice arye sekuka deibukce, Raja el taruk dongolamuk ning, el si ara cincin arye, lak kina ning asurat nong deice deibukce dolkwetelamuk. Tonda, ‘Apala mutuku noutamak nirya minopce arelbinamak’ tenen, deiyoknye Mordekai birye, ninye wipdeipnirye, Raja el bukuka bana ati, pia teleb kuda basam arebukba, asurat bobana ati, wipdeibuk nang arye, akuda basam balye deice bukukabikce, aweik pala mutuku ulamikak, danirya bobuka minopce arelbalamik.

¹¹ Asurat sekamuk yupu noutamak ara nyabuka sekamuk. Ninye deiyoknye Raja Ahasyweros birye nyabuk yupu ara ani. “Yahudi yala ninye unyak mutuku nirya ap, weik kota unyak mutuku ap nirya ara, winibuka unamake. Yata mutuku ninye do nirya, sikce, ‘Yahudi yala ninye, sik sal ap, kilapu ap, mapu ap nirya ara, obuka sirya daknuyabe’ tenen, sik Yahudi yala ninye dam yacopura, anggun Yahudi yala ninye nirya bulupmunce, anggun mal olan ninye ati, malye kibuka, obuka nirya dakanamlulume. Anggun mal olan ninye akunum opmunce, nirya dakmunyopura, aninye talibuka unyak ning nirya ara, dalubuka dopropnamlulume. Winibuka, anggun Yahudi yala ninye anggunti olyanamsiyak ninye nirya ati, obuka sirya daknamlulume. Anggun mal olan nang obuka, sik nong nirya ara, sekuka kaliplopnamlulume,” nyabuk.

¹² Raja Ahasyweros birye ayupu nyapdeibuk ning ara, ani. “Anggun Persia mutuku noutamak nirya winipnamlulume. Anggun Yahudi yala ninye arye, anggun mal olan ninye obisipnamlum sum ara, awala ara dua belas (12) ning el si Adar noutamak, tanggal tiga belas (13) deice arye winipnamlulume,” nyapdeibuk.

¹³ Raja arye asurat sekna ning ara, ‘Minopce arye winipnululume,’ nyana yupu sekdeibuk ning ara, apala mutuku noutamak nirya, ninye ayala-ayala nirya arye, huruf seklamik touk, tonda yupu koproba yuk-yuk nyalamik touk, kibuka sekuka dopkwetebik. Ara, aweik pala mutuku provinsi nirya noutamak, ‘Ayupu moubuka kekebikirye, sik mal olan nang olbisina ati, kintinipnamak’ tenen, sik Yahudi yala ninye ulamik mutuku nirya dopkwetebik.

¹⁴ Asurat nirya akunum sekikopura, Mordekai birye wipdeibuk nang, sik surat dobuka arelbana ati deiyok nang arye, kuda basam balye deice bukuka, minopce amutuku-amutuku noutamak nirya, minopce balamikce, asurat nirya arelbalamik. Raja birye, “Dipkoprop wininamlulume,” nyabuka, akunum nyapdeiamuka ati, sik anang adiparyuk, kuda basam balye deice bukuka, minopce biyikce, asurat nirya arelbalamik. Tonda, Raja ap, Mordekai ap, Ester ap ulamik mutuku noutamak, amutuku si ara, kota Susan noutamak ton, asekik surat lakak arye, yokuka deibikba, amutuku ninye nirya elilamikce yinilamik.

¹⁵ Mordekai birye, ‘Winibuka surat seknamlyame,’ nyabuka, akunum laka nyabukopura, Raja dam batakuka, elti, arebuk aik tamubuka biyuk. Atalak aniryuk ninye deiyoknye Mordekai amutuku noutamak, ninye deiyok nang sik ongolamik urasin pia teleb baju ongobuk. Abaju el yala ara, dekna weik mirin ning ap, kurun baju ap ongobuk. Tonda, urasin pia teleb un ning, ninye deiyok nang sik kisok deice kalubuka kilamik ning, el si ara mahkota, dekna weik kat ning el si emas, pia teleb ning arye, memebik ning ap, ongopmokce biyuk. Winibuka biyuk ning ara, kota Susan mutuku noutamak ulamik ninye, sik kanye pia teleb ubukba, elti, weik arye si erebuka unmekce, kwalya kwalibuka dibik.

¹⁶ Aning atonun, apala mutuku noutamak nirya, sik Yahudi yala ninye nirya ara, teleb ubukba kanye pia deibikce, ‘Pia telebe,’ tenebuka kanye deibik. Amutuku noutamak bukni, yuk yala ninye nirya arye, sik Yahudi yala ninye ati, si erelamik.

¹⁷ Tonda, dan mutuku do nirya ap, dan provinsi do nirya ap, weik mutuku kota ap, apala mutuku noutamak provinsi nirya ap, ninye deiyoknye Raja arye, “Winipnamlulume,” nyana yupu laka nyapdeibukba, asurat yinipmek Yahudi yala ninye nirya ara, kanye pia deibuka, weik arye si erenmik. Winibikce, kanye teleb ubukba, sik aninye kanye teleb deice arye, weik kwalya kwalibuka deiamikce, si erebik. Tonda, Allah ati, telebe nyana ati, ton talak ara din si tebuka, din ning kum dilamik. Ton talak ara, kwalya kwalibuka dilamik. Winilamik talak ara, yuk mutuku nang bukni, sik Yahudi yala ulamik nang nirya ati, sik ilil pia weik ulamuka anya arye, kanye deibikce sik talima teleb ubukba, ‘Yahudi yala ninye winilamak touk, nun babye wininamabe’ tenen, Yahudi yala ninye diba tenelamik ning talibuka ulamik. Aninye nirya, kwalya kwalibuka dinmikce, si erenmik.