Ester 7 - Eipomek

Ester birye, ninye deiyoknye Raja Ahasyweros biti, Haman birye malye tenebuk ning ati, laka nyabukba, el nong deice, ikin ning deibuka ati, nyabuk yupu

¹ Ninye deiyoknye Raja Ahasyweros ap, Haman ap, ‘Sik neika din dinamak’ tenen, Ester birye kintinip deibuk kwalya din aik, yana wekdikce, din ning ap, mek ap memepmok ning yanuka dinmarik.

² Sik neika din ning ap, anggur duk mek ap, Ester birye memepmok ning yanuka dinmarik talak ara, Raja Ahasyweros birye, ninye deiyok kil Ester biti asipdeyuk. “Anda yata ning patanmakilba, nati moropnamnilam do? Yata ning, ‘Moropnamane,’ tenepmalamak arye, moropnunilam do? Se, Ratu Ester, yata ning do nirya, an tenepmalamce, moropnunilama ara, kum bataknukine. Dipkoprop arepnamkine. Ara, ance moropnememnyopda, na taleamse mutuku, ‘Noutam ton bokuka arepnilyame,’ nyabuka, moropniminya babye, na talenun mutuku noutamak ton boknirye, amutuku noutamak bokuka, dipkoprob anti arepnamakine,” Raja Ahasyweros birye Ester biti nyabuk.

³ Nyabukura, Ratu Ester birye tamubuka nyabuk. “Se, anda na weik deiyoknye, ance nati, ‘Telebe,’ teneptumopura, na kum opnamnilyame. Tonda, na yala ninye nirya babye, an mutuku noutamak unyak ninye ara, oltakana meme, ‘Pia kam uk unamak’ tenen, moropkine,” nyabuka morobuk.

⁴ Nyabukce, ayupu tonap dukdongobuka nyabuk. “Na ni Rajao, an ap neika yupu nyalalulum nang arye, an talilyam mutuku noutamak unyak, na yala ninye nirya ati ara, tonok weik deiyoknye birye, ‘Aninye nirya ara opnuyap,’ tenebukce, moropkukba, opnamsiake. Anye birye, ‘Aninye deknirye, obuka sirya daknamne,’ nyabuka moropkukba, ‘Telebe,’ ur nyaplum ati, winira amutuku ninye arye nun yala ninye ati, obuka sirya danamsiake. Winipmanto ara, yuk nang arye, na yala ninye nirya ati, ‘Aninye nirya dekibirye, nun ikin pil talye diamuk pil donamsiake. Winibuka nun amu tamuk unamake,’ tenebuka deksitinga babye, teleb uka. Winipsitingopura, na yala kilapu ap, na yala ninye ap arye, sik ikin pil talyeuk doptibye. Tonda, narye na ni Raja ati, talye mangkau asa ulamtibye. Winibuka uptibyeopura, nun deiyoknye Raja, narye an unalamak ton yanuka kum dulyakitinye. Bukni, tonok weik deiyoknye birye, na yala ninye nirya ati utenelule. ‘Nunce tenebibye sum ara, aninye nirya obibirye, sirya dakuka kum kipdeipnamabe,’ tenesulule na nio.” Ratu Ester birye, Raja Ahasyweros biti laka nyabuk.

⁵ Atalak ara, ninye deiyoknye Raja Ahasyweros birye, ninye deiyok kil Ratu Ester ati asipdeyuk. “Yatanye birye, mandipna kanye bobuka, anyanmanilam atonun uptu do? Aning atonun, yatanye malye weik uptuba, ‘Ester yala ninye nirya, obuka sirya daknamabe’ tenen, malye weik ulul do? Anye bira, dan mutuku noutamak ulul do?” nyabuk.

⁶ Raja arye nyabukura, Ratu Ester birye tamubuka nyabuk. “Kume, anyapmakinye bira, yuk mutuku ululnye kume. Ara, abukmalnye, Haman el uk ara, ninye ona ati, pia yu weiknye ulule. Ati ara, Haman elcuk na yala ninye nirya ati, ‘Lik,’ tenena ap, ‘Kum kibuka deiptinye,’ tenena apnye ulule,” Ester birye nyabuk. Akil arye nyabukura, Haman birye, Persia mutuku ninye deiyoknye Raja Ahasyweros ap, el kil Ratu Ester ap ati, ‘Se, yata wiripnunirak do?’ tenen, sik asok deice erebuka dilina ara, ilil pia weik ubuk.

⁷ Winibukba, ninye deiyoknye Raja ara, yu weik ubuk. Yu pia weik kibukopura, adiparyuk el bukmok ning deice arye tikuka, el dinmok anggur duk mek batakukabukce, tikuka ninye deiyoknye, el aik tam kutuksakuka biyuk. Winibuk talak ara, Haman birye, ‘Se, nun ni koproba Raja arye nati opnamanil ning ara, akunuma,’ tenebuk. Utenebukce, akunum bikdayuk. Ati ara, Haman bira ninye deiyoknye, el kil Ester ap anyaik pum tuba unmarik talak ara, nyabuka morobuk. “Se, akilo melipnilyame. Nara ikin ning dobuka na deice delina ara, bataknilyame. Raja birye opnamanila ara, ance elti, moroptumba bataknutue. Nara, ona pia meme, kam uk uptinye,” nyabuka morobuk.

⁸ Atalak Haman bira, “Se, akil Ratu Ester melipnilyame,” nyabuka, Ester el bukmokak, el nong dobukabukce maibukce morobuk. Ara, ‘Elce bico tenepnutue’ tenen, morobuk. Morobuk bukni, atalak aniryuk, ninye deiyoknye Raja Ahasyweros, aik tam binmoka ani, tamubuka Haman birye Ester bukmoka dam, maipmok ning yanuka eibuk. Eibukopura, ninye deiyoknye Raja weik yupu arye nyabuk, ‘Se, anda yata wininmalam do? Haman bira yata ati bisibuka, na aik pum uk, na kil Ester talinmalam do? Na aunman babye, amalinye birye, na kil Ester biti, moum talinmal do?’ tenebukce, yu pia weik ubuk. Weik ninye deiyoknye Raja Ahasyweros birye, ayupu akunum nyabuka, sirya dakayuk talak ara, adiparyuk, el pil melin nang arye Haman talibukabikce, baju bol dobuka, abaju arye el kisok nirya lelipdongobik. Ara, ‘Pia malye unmala anya arye, nun ni Raja el urasin tonap kum eptue’ tenen, winibik.

⁹ Winibuka lelipdongobikopura, Raja el amu tam pil dolamuknye el si Harbona birye, Raja Ahasyweros biti nyabuk. “Na deiyoknye kekepnilyame. Haman el aik dam ara, weik cang yo ikuka deibika ara, aupmale. Acang yo ara, dua puluh dua (22) meter aubuk. Ayo ara, Haman birye, ‘Mordekai biti tapu koubukapnirye diripnamne. Ayo deice anye el ngang dam tapu kirikdongobuka yo deice arye dopkwetepnirye, opnamne’ tenen, ikdeibukce, kintinibuka deiamuk. Winyamuk bukni, Haman birye, ‘Opnamne,’ tenyamuknye Mordekai bira, anti minop talak melipkuke,” nyabuk. Nyabukura, amutuku ninye deiyoknye Raja arye el mapu ati nyabuk. “Ati ara, wini talak anggunce, Haman dobukapmumce, acang yo ikuka kintinibukak uk, tapu koubuka yo deice diripkwetepmunce, anye oploplulume,” nyabuk.

¹⁰ Nyabukura, sik deiyoknye Raja arye nyabuk touk, Haman el nong dobukabikce, ‘Mordekai kirikuka deipnamne’ tenen, Haman elce yo ikuka kintinip deiamukak uk, el mining nong bobuka binuka diripkwetebikba, el ngang yok cebuka dibuk. Winibik talak ara, Raja Ahasyweros el yu tenelamuk ning nirya ara, namin kibuk.