Ester 6 - Eipomek

Weik ninye deiyoknye, Raja Ahasyweros birye, el kwit Mordekai biti, kanye deibuk yupu

¹ Asum lukunyan noutamak nirya ara, ninye deiyoknye Raja ara, manna pia kumce, bukna uk upmok. Bukna uk upmoka ati, elce tamubuka morobuk. “Minop talak dipdongobuka anoutam talak ninye arye ulamik ning nukna buku sekuka deiamik ning ara, dobuka na dam boyalulume. Boyamunyeba, ninye ton abuku yinipliba, nara ninye deiyoknye Raja kekenamane,” nyabuk. Nyabukura, abuku dobuka boyayikba, tonoknye birye yinipre banmokba, ninye deiyoknye Raja kekenmok.

² Asekna ning noutamak aubuk yupu ara, Mordekai birye Biktan ap, Teres ap, Raja Ahasyweros el aik bublan dam kalikna nang, min arye ulamdik talak, sikce, ‘Nun deiyoknye Raja opnaname,’ tenelamdik ning ap, Mordekai birye ateneprik ning laka nyabuka deice arye, Raja Ahasyweros lyebuk ning ap nirya ara, sekna ning noutamak uamuk ning nirya yinibukce laka nyapdeibukba, Raja Ahasyweros birye kekebuk.

³ Buku noutamak sekamik ning, tonoknye birye yinibukba, ninye deiyoknye Raja Ahasyweros kekebukopura, asipdeyuk. El aik melibuka ulamdik nang ati, sik ninye deiyoknye Raja birye asipdeyuk. “Anye Mordekai birye, sik malye nang tenyamdik yupu laka nyapnuka deice arye, lyepnuka ati, nunce el menenga ning ati, yatato teleb ning dobuka, Mordekai binyak arebupe do?” nyabuka asipdeyuk. Nyabukura, el pil melibuka amu tam ulamikce dolamik nang arye nyabik, “Kume, nun deiyoknye Raja, nunce anye Mordekai teleb kipdeipkuk ning ati, tonok ning babye, kum arebupe. Elda, yuk ning aning-aning nirya ton pia kum doprobuk,” nyabik.

⁴ Nyabikba, adiparyuk ninye deiyoknye Raja arye tamubuka asipdeyuk. “Yata nang do, na amu tam unyakce pil doninyak deiyok nang ara, wini talak na aik dam anyuk yatanye ton aunmal do?” nyabuka asipdeyuk. Raja Ahasyweros birye, ayupu nyabuk talak aryuk, el amu tam deiyoknye Haman birye, Raja aik dam yayuk. Ara, talye ati kume. Haman birye, ‘Mordekai optinye’ tenen, ‘Weik ninye deiyoknye Raja, el aik weknirye, moropnyopura, ‘Telebe,’ nyapnutopura, anye Mordekai tomobukapnirye, ninye on ning, tapu arye el ngang dam kerekibirye, yo deice kirikuka dopkwetebibyopura, opnamabe,’ tenebuka ati, Raja aik dam tikilyanmok. Yayukura, Raja birye, “Yatanye na dam yanmal do?” nyabuka asipdeyuk.

⁵ Nyabuka asipdeyukbuk, el melin nang arye, sik ni koproba Raja ati nyabik. “Ninye si Haman bira, nun ni koproba anti ton, ‘Raja ati yupu moroptinye’ tenen, yanmalye,” nyabik. Nyabikba, sik deiyoknye Raja arye nyabuk, “Ati, Haman bira, anggunce nyapmunyeba, adiparyuk na dam yalule,” nyabukba, Haman adiparyuk bikbik abuka, ninye deiyoknye el aik wekukce, el un dam biyuk.

⁶ Haman ninye deiyoknye Raja dam akunum biyukopura, aninye deiyoknye Raja arye Haman biti tamubuka nyabuk. “Yata ning do nirya, ninye deiyoknye birye tenepmalye touk ulirye, el amu tam pil teleb kibuka dolulnye biti ara, el anye si erena ati, yata teleb ning winiptibye do?” nyabuk. Nyabukura, Haman el kanye pum tam arye utenebuk. ‘E, yatanye biti nun ninye deiyoknye Raja arye kanye deiplirye, teleb ning arenamle do? Dipkoprop si erenamlenye bira, na uka,’ tenebuk.

⁷ Ayupu akunum tenebuka ati ara, Haman birye tamubuka Raja ati nyabuk. “Anda ninye deiyoknye Raja ulyamce, ance kanye deiplamnye teleb kilina ati, winipnalyame.

⁸ An min arye akunum ongolamlum urasin pia teleb baju ara, dopmince, an kanye deibuka tenepmalamnye uk, ongopdeiplyame. Tonda, an Raja ara, an bisik bana ati, bukuka balamlam kuda basam ton dobuka, anye arepnulyame. Akuda kisok deice ara urasin pia teleb ning deice arye, an si puturubuka deipmince, kirikdongopnulyame.

⁹ Tonda, ance pia weik mutuku talilyama ati ara, amutuku noutamak arye, an amu tam ninye deiyoknye ton, pia telebnye wipmince, aning bitinye arepnulyame. Ara, el balye tam deice bukuka balamlam kuda ap, an pia teleb baju ongolamlum ning ap dobuka, adeiyoknye biti arepnulyame. Arepminba, adeiyoknye birye, ance, ‘Na kanye deipnela anya arye, si erenamabe,’ tenepminyopnye, arepnamle. Ance si erebuka teleb kipdeipnamalamnye biti, an urasin teleb baju ongobuka, deibikcopura, elti, deiyoknye ereipmince, amutuku ninye arye, ‘El si pia telebe,’ nyabuka, si donamaka ati, an balamlam kuda balye deice deibikceba, akuda birin tapu bobikirye, akuda dobuka, weik kota Susan mutuku noutamak arye banamake. Tonda winibikirye, akota noutamakuk balirye weik yupu nyapre banamake. ‘Nun ninye deiyoknye Raja arye, kanye delilulnye aunmala ara, winibuka pia telebuk unamle. Raja birye, akuda balye deice bukmalnye biti, bico tenebuka, kanye deipmala ati ara, pia teleb kipdeipnamle,’ nyabuka weik yupu deice arye, nyapre banamake. Winibikiba, amutuku noutamak unyak ninye nirya arye, ‘Se, anye bira ninye deiyoknye ulule,’ tenebuka dinamake.” Haman birye, Raja Ahasyweros biti nyabuk.

¹⁰ Nyabukura, ninye deiyoknye Raja Ahasyweros birye, Haman biti nyabuk. “Anda winipnalyame. Minopce na minop talak arye ongolamse Raja baju ap, na min arye balamse kuda basam ap ara, dopropmince, aning nirya ara dobuka, Yehuda yalanye, el si Mordekai dobuka arepnulyame. ‘Amutuku ninye nirya arye, Raja el kanye deipmalnye eibikirye, elti, si erenamak’ tenen, laka nyapmanilam ning nirya ara, Mordekai biti winipnamlyame. Arup talak ance, ‘Anye si erena ati, winiptibye, winiptibye,’ nyabuka, laka nyapmalam ning ara, tonok ning babye ton, luba kina pia meme. Amutuku noutamak na aik pia weik bisik bublan dam anyuk bululnye Mordekai biti, aning nirya winipnamlyame,” nyabuka, Raja Ahasyweros birye, Hamana ati nyapdeibuk.

¹¹ Ninye deiyoknye Raja arye nyabuk touk, Haman birye ateleb baju dobuka, Mordekai biti ongopdeibuk. Winibuka ongopdeibuk ning ara, kuda basam deice bukuka bana ning ap arebukba, Mordekai kuda basam deice welebuka bukukce, kota Susan mutuku noutamak banmok talak ara, Haman birye nyabuk. “Nun ninye deiyoknye Raja Ahasyweros birye, kanye deibuknye aunmala ara, winibuka pia telebuk unamle. Raja birye, akuda bukmalnye biti, bico tenebuka kanye deipmala ati ara, pia teleb kipdeipnamle,” nyabuka, weik yupu arye nyapra banmok.

¹² Nyabuka banmoka ani, akunum winibukopura, Mordekai weik kota Susan mutuku bisik bublan dam arye, tamubuka biyuk. Tamubuka biyuk bukni, Haman bira, ‘Se, amutuku ninye nirya eipmaniakce, elda talinye uka, tenepnamniyake’ tenen, malye kanye bobukce, el urasin nirya kanupdongobuka, el aik koproba tamubuka biyuk.

¹³ Tonda, aubuk ning nirya ati, Haman birye el kil Seres ap, el kwit capu ap, sik kekena ati yanuka nukuk. Winibuka nukukba, el kil ap, el kwit capu ap ati, ‘Wininamlulume,’ nyabuka, laka len nang ap, nirya arye tamubuka nyabik. “Se, anda wini talak arye deiyok kibuka, an mikip akunum mitang upkilirye, Mordekai uk ara, mikip pia weik upra banamle. Mordekai elda, Yahudi yalanye ati ara, ance elti, kum opbisiptume. Nun ninye deiyoknye Raja arye, Mordekai biti kanye deipmala anya arye, elda dipkoprob mikip pia weik upra banamle. Bukni, anda amu tam kipdeipnamkile. Mordekai biti, ‘Malye kipnamne,’ tenena meme. Winibuka tenepniminyopura, aminyan talak dipkoprob ikin ning an dam yanamkile,” nyabik.

¹⁴ Haman ap, el mapsilip ap, el kwit capu nirya ap, sik neika tuba yupu sisikinmek talak uk, Mordekai el pil melibuka don nang yayikce, Haman adiparyuk bobuka, Ester birye kwalya dina ati, kintinipmok aik bobuka delilbiyik.