Ester 5 - Eipomek

Ratu Ester birye, Persia mutuku ninye deiyoknye, Raja Ahasyweros dam, biyuk yupu

¹ Ester like winilye deice arye, din si tebuka, Allah moronauk ulamuka ani, akunum winibukopura, adiparyuk sik Persia mutuku weik deiyok kilapu, Ratu kilapu ongolamak baju ongopmokce, ninye deiyoknye Raja Ahasyweros aik pum bukni, Raja bulamuk aik, bisik bublan dam binuka tikmok. Ara, ‘Ninye deiyoknye Raja Ahasyweros, el weik bun ning deice buklirye dipdenunil’ tenen, binuka tikmok.

² Binuka tikmokba, ninye deiyoknye Raja Ahasyweros birye, Ratu Ester bisik bublan dam buru tam tikmokbuk eibukce, Ester biti kanye deibukce, bico ubuk. El adiparyuk bico ubukba, el emas kama el taruk arye talibuka bolamuk ning, mouse tam ara, Ester el tikmok tam deibuk. Winibukba, Ester adiparyuk akama mouse deipmok tam uk, tikilbiyukura, akama mouse talibuk.

³ Ninye deiyoknye Raja Ahasyweros birye, Ratu Ester biti asipdeyuk. “Anda yata ning patanmakilba, na dam morolyanmanilam do? Yata tenepmalamak arye do? Se, Ratu Ester, yata ning do nirya, an moropnunilam ning ara, kum bataknukine. Dipkoprop arepnamkine. Moropniminyopura, na taleamse mutuku, ‘Noutam karin arye bokuka amutuku nirya arepnilyame,’ nyabuka moropniminya babye, na talenun mutuku noutamak arye boknirye, amutuku noutamak dobuka, dipkoprob anti arepnamakine,” Raja Ahasyweros birye Ester biti nyabuk.

⁴ Nyabukura, Ester birye tamubuka nyabuk. “Se, na nio, ance nyapmanilama ati, ‘Telebe,’ tenepniminyopura, arup lukunyan ara, an ap, Haman ap, na ni yapu anggun bitinye, na aik yanururume. Ara, narye anti weik kwalya kwalibuka kintinibuka deipnamakine,” nyabuk.

⁵ Nyabukopura, Persia mutuku ninye deiyoknye Raja Ahasyweros birye, el melin nang ati nyabuk. “Adiparyuk na amu tam pil dolulnye, Haman yokuplulume. Elda minopce yaliba, nun bitinye ara, Ester birye kwalya kwalibuka kintinipmasila ati, el dam binamname,” nyabuk. Akunum yukubukba, akunum yayukopura, ninye deiyoknye Raja Ahasyweros ap, Haman ap, sik bitinye nang, Ester birye nyalyanmok kwalya kwalibuka deipmokak birik.

⁶ Birikopura, Ester birye anggur duk mek kintinibuka deipmok ning, dobuka dinmarik. Amek sikce dinmarik talak ara, ninye deiyoknye Raja Ahasyweros birye, Ester biti asipdeyuk. “Wini talak anda yata tenepmalamce, na dam moropmanilam do? An moropnunilam ning ara nyapnutumba, dipkoprob na arepnamkine. Moropniminyopura, na taleamse mutuku, ‘Noutam arye bobuka, aning ton arepnilyame,’ nyabuka moropniminya babye, na talenun mutuku noutamak arye boknirye, amutuku noutamak dobuka, dipkoprob anti ton arepnamakine,” Raja Ahasyweros birye, Ester ati nyabuk.

⁷ Nyabukura, Ester birye tamubuka nyabuk. “Na an kil arye tenebuka moropmakin ning ara nyapnukina ara ani.

⁸ Na deiyoknye el dam yanganuna ati, bico tenebuka na moropman ning, ‘Teleb tenepneturye, kintinipnamnil do?’ tenenune. Na nio, ance nati, kanye deipnutumce, na moropnamakin ning arepnutumopura, pia telebe nyapkine. Ati ara, na moropkin ning ara ani. Na deiyoknye an ap, Haman ap, anggun bitinye, ila tuba tonap ambusum na aik yanamarurume. Ambusum lukunyan noutamak ara, na ni an ap, Haman ap ati, weik kwalya ton kwalibuka deipnamasine. Winipniba, anggun bitinye yarumunyopura, narye na nio anti, na tenepman ning nirya ara, anti moropnamakine,” Ratu Ester birye Raja Ahasyweros biti nyabuk.

Haman el kanye talima erebukce, yu ubukba, “Mordekai opnune,” nyabuk yupu

⁹ Ratu Ester birye, anggur duk mek ap, yuk din ning ap, memepmok ning akunum diprikopura, adiparyuk sik asik tamubuka birik. Asum ara, Haman el kanye teleb diparyuk biyuk. Bukni, ninye deiyoknye el aik bisik bublan dam tuba dinmokba, Mordekai birye ila tuba Haman biti, tamubuka si erena ati, kum kanupdongobukba, Haman tuba Mordekai biti, yu weik ubukba, weik arye derebuk.

¹⁰ Weik arye derebuk bukni, ayu upmokbuk yupu nyana kumce, tamubuka Haman el aik koproba biyuk. Akunum aik biyukce nyabukba, el kwit capu nirya ap, el kil Seres ap yayikba, sik nirya neika bukmek.

¹¹ Bukmek talak ara, Haman birye erepdanuka kwalina yupu nyabukce, ayupu nyanmok. “Bona talina weik un ning ara, pia weik talenune. Tonda, na mapu deiamse nang ning ara, pia weik unyake. Tonda, Raja Ahasyweros birye nati weik arye ereipnukba, el amu tam yuk ninye deiyok nang weik daunyak bukni, nara sik deice tamnye unune. Weik sisin nang bulamak sukum nirya ara, talye bunyake, na uk ara, pia mikip weiknye unune. Sik nirya arye, nati ereipnikirye, kininyake.

¹² Tonda, aninguk kume. Ratu Ester birye, yuk deiyok nang ati, “Raja Ahasyweros ap, sik ap, na aik kwalina kwalya ati dilyalulume,” kum nyabuk. Natibuk nyapnuke. Aning atonun, na ap, ninye deiyoknye Raja Ahasyweros ap, nun tibuk, ‘Ambusum lukunyan noutamak arye mek kintinibuka deipmana, dilyanamarume,’ nyapmal touk, el ap na ap ati winipnamasile.

¹³ Ratu Ester birye, aning nirya winipmasu bukni, na kanye kum deiptinye. Deiyok ara ani. Na pia dinepa, aYahudi yalanye Mordekai birye nun ninye deiyoknye, Raja, el aik bisik bublan dam anyuk tuba-tuba bululba, na dina lik unulule.” Haman birye el aik ninye ati nyabuk.

¹⁴ Nyabukura, el kil Seres ap, el kwit capu nirya ap arye, ayupu sikce kekebuka nyabik. “Nun tenepmap ning ara, ance nyapminba, ninye arye cang yo toubukabikirye, boyanunyake. ‘Ayo el cang ara 22 meter takubuka boyalulume,’ nyapminba, bobuka yanunyake. Winibicopura, ambusum pia beren tam talak koproba aniryuk ninye deiyoknye Raja ati, ‘Mordekai bira yo ikuka kitipdongop nirya, im dup deipnamabe. El ngang dam tapu arye kerekibirye, el nong dopkwetebibyopura, ngang yok cepliba dipnamle,’ nyabuka, moronulyame. Raja birye, ‘Telebe,’ nyapliba, anye Mordekai akunum obicopura, akunuma, talye kanye bobuka unamlame. Tonda, Ratu Ester birye kintinipnamkil kwalya dilbinmaninye talak arye, an talima namin kipnamakile,” nyabik. Nyabikba, Haman kekebukce, ‘Ayupu nyapnulum ning ara, telebe. Na tenepman touk nyabaka’ tenen, kanye deibuk. ‘Mordekai adiparyuk opnuyap’ tenen, el pil melin nang ati, “Wini talak minopce weik cang yo toulbilulume. Ninye on ning babye bopnululume,” nyabuk.