Ester 4 - Eipomek

Mordekai birye Ester biti, “Melipsetume,” nyabuka morobuk yupu

¹ Haman birye asurat akunum dopkwetebukba, aminyan talak Mordekai birye, ‘Awinipnamabe, ati, sik Yahudi yala ninye nirya ara, obuka nirya daknamabe,’ nyanmek yupu nirya kekebukopura, adiparyuk, el deice ongopmok baju kwilikukabukce, karung bol baju ongopdobuk. Winibukce, el nong deice nirya atu butbuta pakdayuk. Winibuk deiyok ara, yuk ninye nirya eibikirye, ‘Se, elda malye kanye bopmalce, bicoto unmale, tenepnamniyak’ tenen, winibuk. Ati, atu butbuta dobuka, el kisok deice deibukce, weik arye engebukabukce, amutuku bisik noutamak banmoke.

² Winibuka amutuku noutamak banmok talak ara, Persia mutuku ninye deiyoknye, Raja Ahasyweros bun aik bisik bublan dam anyuk abaju binuka batakuk. Ara, talye ati kume. ‘Ato malye baju ongopmace nang ara, anyaik noutamak kum wekelbinamake,’ nyabuka, peraturan nyalamika ati, anyaik pum tam pia kum wekuk.

³ Tonda, Persia mutuku noutamak nirya, apropinsi nirya noutamak ara, sik Yahudi yala ninye amutuku noutamak dana-dana yuk-yuk daulamik ninye nirya ara, ninye deiyoknye birye sekuk surat dopreibikba, asurat sik dam boyayik talak ara, malye kanye bopmekce, engena weik unmeka ati, sik nong deice tam ongamik baju kwiribuka, malye baju karung bol atonun ongobuka, atu ap, tuku butbuta ap, sik kisok deice likdanuka malamik. Tonda winilamik talak nirya, weik arye engena uk ulamikce, ‘Se, yata uptibye do?’ tenen, din pia kum dilamik.

⁴ Mordekai el malye kanye bobuka, engena uk unmok ning ara, Ratu Ester el melin kilapu ap, el pil melin nang ap eibikce, Ester dam laka nyalbiyik. Lak nyabikba, Ester kekebukce, ‘Se, na ni koproba Mordekai amalye baju kwiriploplirye, yuk teleb baju ongopnul’ tenen, teleb baju kintinibukce, el li Mordekai dam dopreibuk bukni, Mordekai elce, ‘Kume, abaju ara, na kum ongopnamne’ tenen, kum doprobuk.

⁵ Winibukopura, Ester birye el melinanye ton, el si ara Hata biti, yukubukba yayuk. Anye elda, ninye deiyoknye Raja Ahasyweros el pil donanye ulamuk. Tonda, anye birye Ratu Ester ton melilamuk. Ester birye anye dopdeibukce, “Mordekai biti asilbilyame. Elda, ‘Yata ning winipmala ati, malye baju ongopmalce, engena uk unamalam do?’ nyabuka, Mordekai dam binuka, elti, asipdenulyame,” nyabuk.

⁶ Ester birye Hata biti, nyapdeibukopura, Hata birye Mordekai biti elbiyuk. Mordekai bira, kota Susan noutamak bukni, weik lapangan bisik ara, ninye deiyoknye Raja Ahasyweros el aik dam bisik banak bublan dam, unmokba eibuk.

⁷ Atalak ara, Mordekai birye ayupu nirya nukuka nyanmok. “Haman birye, ‘Yahudi yala ninye nirya opnamaba ati, dekna weik ning uang perak kilo weika arye, 340.000 kilo dobuka, ninye deiyoknye el yo bok dokola delina aik dongopnamne. Akunum winipnyopura, amutuku noutamak unyak Yahudi yala ninye nirya opnamabe,’ nyabuka ati, na ap, nun Yahudi yala ninye nirya ap, malye kanye bobuka engenmabe,” nyabuk. Tonda ayupu ap dukdongobuka nyabuk.

⁸ “Haman birye, ‘Yahudi yala ninye nirya opnamabe,’ nyabukba, kota Susan mutuku arye sekeibik surat ara atia,” nyabuka, Mordekai birye Hata ati laka nyabuk. Lak nyabukce, ayupu tonap dukdongobuka nyabuk. “Asurat dobuka, Ratu Ester dam bobuka biminyeba, eiplyopura, elce ninye deiyoknye Raja Ahasyweros dam bilirye, ‘Se nun Rajao, Yahudi yala ninye nirya ati, bico teneptumce, kum oplopnamlyame,’ nyabuka morolbinulule.” Mordekai birye, Ester el melinanye Hata biti, nyapdeibukce, asurat ton arebuk.

⁹ Arebukopura, Hata birye ayupu bobuka, Ester dam binuka, Mordekai elce nyapmok yupu ara, Ratu Ester kekenak binuka, laka nyanmok.

¹⁰ Ayupu nirya akunum binuka laka nyabukba, Ester birye Hata ati nyabuk. “Anda Mordekai el dam bimince, aning nirya el bikna ati, laka nyalbinamlyame,” nyabuk.

¹¹ Ester birye tamubuka laka nyabuk yupu ara ani. “Ara amutuku ninye deiyoknye, Raja Ahasyweros birye, ninye nirya ap, kilapu ap ati, ‘Yanululume,’ nyabuka yukuna kumce, talye lukparabuka, nun ninye deiyoknye el dam kum binmanto. Yata ninye do nirya, ‘Raja dam binuyap’ tenen, el aik dam yana wekikiba, adiparyuk el yin talen nang arye, aninye wibuka oltakanauk unamake. Aning ara, ‘Wininamabe,’ nyabuka, surat sekikce, peraturan akunum min arye winibik. Nyabuka peraturan akunum deibik ati, nara talye lukparabuka, Raja Ahasyweros dam kum bitinye. Bukni, ninye deiyoknye Raja Ahasyweros birye, el emas kama deice arye deiplinye binyuk, el dam yatue. Raja arye, el emas kama arye, el dam yalyenye deiptopura, anye adiparyuk kum oplopnamake. Bukni, Raja Ahasyweros birye nati, ‘Na dam yalyame,’ nyabuka, min kum yukupmanile. El dam binmasi talak arye dipdongobuka, like 30 deice arye asukumuk tuba talye unmana. Raja arye kum yukupnilyopura, el dam talye lukparabuka kum bitinye,” nyabuk. Ara, Ratu Ester birye, ‘Hata, ayupu dobuka, Mordekai dam laka nyalbinule’ tenen, nyabuk.

¹² Ester birye nyabukba, Hata birye Mordekai biti laka nyalbiyuk.

¹³ Ayupu laka nyalbiyukba, Mordekai birye Ester biti, tamubuka nyabuk. “Na kilmu Estero, anda moubuka tenipdelyame. Ance amutuku noutamak nirya talibuka ninye deiyoknye Raja Ahasyweros aik uk ululum bukni, anda Yahudi yala kil ulyame. Ati, ance, ‘Kume, yuk talye Yahudi ninye opnamak bukni, na tonok ara, kum opnamniake,’ tenena meme. Yuk Yahudi yala ninye opnamak talak ara, an babye oplopnamkiake. ‘El tonok ati, dauplye, daulule,’ nyabuka kum bataknamkiake.” Morkai birye Ester biti nyabuk.

¹⁴ Nyabukce, ayupu tonap dukdongobuka nyabuk. “Ance yupu nyana kum, talye dingbu abuka uminyopura, nun ni Allah arye, Yahudi yala ninye lyena ati, yuk nang deice arye lyena ning arepnamsile. Bukni, Persia mutuku ninye arye an ap, an ni koproba ap, el mapsilip nirya ap ara, oplobikirye, sirya daknamake. Bukni, moubuka teneipdelyame. Nun walwal bukni, anda ninye deiyoknye, el Ratu kil akunum ulyame. Aunmalama deiyok ara, Yahudi yala ninye ikin bobuka weika arye unmak talak, sik lyena ati aunmalam do, kum do? Ati, ‘Ance yata wiribuka uptuma deice arye, Yahudi yala ninye nirya lyeptum do?’ tenen, nyapkine. Bukni, na nyapmakin touk kum umince, batakminyopura, an ap, nun Yahudi yala ninye nirya ap, oplopnamsiake.” Mordekai birye Ester biti nyabuk.

¹⁵ Nyabukba, Ester kekebukopura, ayupu ton tamubuka nyabuk. “Naio, ance na melina ati winipnamlyame.

¹⁶ Ance adiparyuk, ayupu bobuka nyalbiminyeba, Yahudi yala ninye nirya kota Susan mutuku noutamak unyak ninye nirya bulubuka wekikirye, nati Allah moronamniyake. Wininamniaka ati, like winilye sum noutamak nirya ara, din ning ap, mek ap ton pia kum dinamlulume. Aning nirya si tebuka natibuk, Allah moronamnulume. Ara, lukunyan noutamak ap, keting duk-duk noutamak ap nirya din pia kum dibikirye, Allah moronauk unamake. Tonda na ap, na melin ati, neika pil dobuka unyak wel kilapu ap, nun nirya babye din si tebuka, Allah uk pia moronauk unamabe. Morolamibye ani, like winilye akunum ubibyopura, nara ninye deiyoknye Raja Ahasyweros dam binamne. Binamna babye, ‘Raja arye kum yukupkilyopura, talye lukparabuka, el dam pia kum yanamlulume,’ nyabuka peraturan deibik yupu dipkoprob yanipnamne. Peraturan yupu yanipnyopura, adeiyok nang arye nati opnamniak do, kum do, nun walwale. Aning ati ara, na dipna babye, teleb uka. Dipkoprop, Raja Ahasyweros dam morolbinamne,” Ester birye nyabuk. Nyapdeibuk yupu ati, Ester birye tamubuka, “Mordekai biti ayupu nyalbinamlyame,” nyapdeibuk.

¹⁷ Ester birye nyabuk yupu, laka nyalbiyikba, Mordekai kekebukopura, Ester birye, ‘Wininamlulume,’ nyabuk touk, Mordekai birye ayupu kekebukce, adiparyuk winibuk.