Ester 3 - Eipomek

Haman birye, ‘Yahudi yala ninye ati, obuka sirya daknamap’ tenen, nyabuk yupu

¹ Awinilamik ning nirya, akunum kibukopura, Persia mutuku ninye deiyoknye, Raja Ahasyweros birye, yuknye ton, el si ara, Haman wipdeibuk. ‘Haman bira, weiknye unamle’ tenen, erebuka deibukba, Mentri Pemerintah kibuk. Raja Ahasyweros, el amu tam pil dolamik nang weik aulamik bukni, Haman bira, sik deice tam ulamukce, weik mambulnye ulamuk. Haman, el li koproba ara, Hamedata, el yala deipdanin yangalamiknye, el apu koproba Agag ulamuk.

² Raja Ahasyweros birye, Haman wipdeibukce, “Haman biti si erenamlulume. Haman dam ara, si erenamlulume,” nyapdeibuk. Ati, yata ninye deiyok nang do nirya, Haman el dam ben arye, gutam tuku dipdongobuka, pia si erelamik. Bukni, Mordekai birye, ‘Kume, anye el dam gutam tuku dipdongobuka, elti ara, si kum erenamne,’ tenelamuk.

³ Winibuka daulamuka ani, ninye deiyoknye, Raja el pil dolamik nang, el deiyok nang arye, Raja Ahasyweros el aik bisik bublan dam bulubuka, yupu sisiklamik nang arye, Mordekai biti asipdeyik, “Amio, anda yata deiyok ati, nun ni koproba, ninye deiyoknye Raja Ahasyweros birye nyapdeipsuk yupu bisipmalamce, Haman biti, si kum erenmalam do?” nyabik.

⁴ Ura, atalak-atalak nirya ara, el winibuk ning nirya ati, sik yuk deiyok nang arye Mordekai biti, “Yata deiyok ning ati, nun ni Raja Ahasyweros yupu yaniltaleam do?” nyabuka asipdeyik bukni, elda pia kum kekelamuk. Tonda elce, “Kume, nara Yahudi yalanye ununa ati ara, talye tukwak nang ati, gutam tuku dipdongobuka, kisok kanupdongobuka, si kum ereptinye,” nyabuk. Nyabukura, sikce ayupu bobuka, Mentri Haman dam nyalbiyik. Ayupu laka nyabika deiyok ara, ani. Ara, Mordekai birye, “Nara Yahudi yalanye ununa ati ara, talye tukwak ninye ati, gutam tuku dipdongobuka, kisok kanupdongobuka, si kum ereptinye,” nyabuk. Ati ara, sikce, ‘Binuka nyabikba, Haman birye ayupu bikuka kekebukce, yata yupu nyapnamle do?’ tenen, nyalbiyik.

⁵ Haman binuka dinmokba, Mordekai birye, gutam tuku dipdongobuka, si kum erebukopura, Haman bikukce, yu weik ubuk. Yu ubukba, Mordekai biti, weik arye derebuk.

⁶ Bukni, aning nirya winibukba, Haman akunum bikukce, el Mordekai biti, ‘Diba, elda Yahudi yalanye ati ara, elda pia malinye biti, na like,’ tenebuk. Tonda, ‘Mordekai diamuk kum bukni, Yahudi yala ninye nirya, Persia mutuku Ahasyweros birye taleamukba, ulamika, kan-kan noutamak talibukba, unyak ninye nirya ara, ona uk unamabe,’ tenebuk. Haman birye, utenebuka ulamuk.

⁷ Keting tamun obarye (12) akunum kibukopura, wala tonok ning ati, Nisan nyalamik wala, awala akunum kibukopura, ninye deiyoknye Haman birye, ‘Yata wiripnamle do?’ tenen, “Win ning el si ara, undi dolyanamlulume,” nyabuk. Persia mutuku ninye arye, aning el si ara, purim nyalamik. Amutuku nang arye, “Aning dipdebirye, ‘Asum ara ani, awala ara ani,’ nyapliba bikibirye, ‘Atalak winipnamabe,’ nyapnamabe,” nyabik. Yahudi yala ninye nirya ati, yu kanye tenebibye ning ara, “Undi elce nyapsilye ning uka,” nyabikba, undi donmoka ani, wala obarye (12) si Adar kibuk.

⁸ Aning akunum winibukopura, Haman birye, ninye deiyoknye Raja Ahasyweros biti nyabuk. “Na ni koproba, anti nyapnukine. Ance talisiminyeba, nun amutuku unyaba noutamak nirya ara, yuk mutuku ninye asik ninye atonun unyake. Aninye ara, nunce ulamap ning ap, tenenyap ning ap, atonun pia kum wininyake. Ance ninye ayala-ayala weik talilyam bukni, ayala ninye ara, pia yuk kanye bobuka unyake. Tonda, sik ning pia yuk-yuk unyaka ati ara, ance, ‘Aning ara, winipnamlulume. Aning ara, pia kum winipnamlulume,’ nyapdeipsulum yupu ara, aninye kekebuka kum unyake. Ati ara, ance aninye ati, ‘Dauplye, sik daunamake,’ tenepmince, batakminyopura, aminyan talak, ikin ning nun dam yanamsile. Aning ara, kum winipnamlyame. Teleb ning ara, aninye wenepnamlyame.

⁹ Ati na ni koproba, ance ikin kum upnamkulule. Ance, ‘Telebe,’ tenepnutumopura, ance nyapsutupba, aninye nirya opnamabe. Ance, ‘Aninye oplopnamlulume,’ nyabuka, surat sekukapmince, an taliplumba unyak mutuku nirya, dopdeipnulyame. Winipminyopura, na Haman birye, keil uang el si ara perak, pia weik 340.000 kilo kintinibuka deipniba, Yahudi ninye olbinamak nang ati, sik menenga ning arenamne. Agat ning perak uang ara, an uang yo bok moubuka delinakuk dongopnamkine,” Haman birye, Raja Ahasyweros biti nyabuk.

¹⁰ Nyabuka morobukba, Persia mutuku ninye deiyoknye Raja Ahasyweros kekebukce, el taruk duk dongolamuk ning, el si cincin ara, kwiribukabukce, Haman biti arebuk. Ara, ‘Haman birye tenelye touk, na si deice arye wininamle’ tenen, Raja birye el cincin kwiribuka, Haman biti arebuk. Haman el li koproba ara, Hamedata, elda Agag yalanye ulamuk. Haman bira, Yahudi yala ninye nirya ati, pia yu tenebuka ulamuk.

¹¹ Raja Ahasyweros birye, el cincin kwiribuka, Haman biti arebukce, nyabuk. “Amio, ‘Yahudi yala ninye onamak nang arepnamne,’ teneminye ning, perak keil uang ara, na uang yo bok delinak delina meme. Dauplye. Na si deice arye, ance sik Yahudi yala ninye ati, ‘Wininamne,’ tenelyam touk, talye lukparabuka winipnamlyame. ‘Telebe,’ akunum nyapkine,” nyabuk.

¹² Ura, wala tonok ning tanggal 13 ubukba, adeice Haman birye, Raja Ahasyweros taleamukba, talibuka ulamikce, sekna ning seklamik nang nirya yukubukba yayikopura, elce, “Winibuka seknamlulume,” nyapdeibuk touk sekik. Ayupu sekik ning ara, amutuku noutamak provinsi nirya, yupu yuk-yuk nyalamik touk, tonda, huruf yuk-yuk seklamik touk, ayupu deice arye sekik. Akunum sekikopura, Haman birye nyabuk. “Surat sekmunce, ayupu ton dopropmunyopura, anggun mutuku yuk-yuk unyak ninye deiyok nang dam dopdeipmunyeba, sik atalibuka unyak nang nirya dopropnamake. Asurat ara, Persia mutuku ninye deiyoknye Raja Ahasyweros, el si deice arye sekmunyeba, el cincin deice arye, laka kibuka keteneipmapa anya arye, asurat dopdeibabe. Amutuku nirya talibuka unyak ninye deiyok nang ap, Gubenur nang ap, nirya dopropnamake,” nyabuk.

¹³ Tonda, Haman birye, yuk surat ton sekukabukce, dopreibuk. Asekuka dopreibuk surat yupu ara, ani. “Raja Ahasyweros talilul mutuku noutamak nirya ara, wininamabe. Wala 12 ning tanggal 13 kunum kiplyopura, Yahudi yala ninye nirya ara, tonok ton kum bataknamlulume. Wisi ninye ap, kam nang ap, tonda kilapu nirya ap, mapu nirya ap ara, tonok talak aniryuk, obuka sirya daknamlume. Winibibirye, sik aninye arye talinyak ning nirya ara, dalubuka dopropnamabe,” nyabuka sekeibuk. Ara, Haman birye, asurat sekuka amutuku noutamak nirya dopkwetebukba, sik mambul weik nang nirya doprobik.

¹⁴ Haman nyabuka, sik sekretaris nang ati arebukba, anang arye, amutuku ulamik provinsi noutamak nirya, ‘Wininamlulume,’ nyabuka, peraturan dobukabikce, asurat elililamik. Deiyok ara, ani. ‘Wininamlulume,’ nyabuka sekuk surat ara, ‘Amutuku-amutuku nirya talibuka unyak ninye, deiyok nang nirya ap, amutuku noutamak ulamik ninye ayala-ayala nirya ap, kekebikirye, adiparyuk kintinibicopura, awala 12, tanggal 13 akunum yalyopura, dipkoprob Yahudi yala ninye nirya, obuka sirya daknamake’ tenen, asurat dopreibuk.

¹⁵ Raja Ahasyweros birye nyapdeibukba, Haman birye, asurat sekuka arebukba, sik surat arelbana ati, wipdeibik nang arye, asurat bobuka, sik minopce biyikce, amutuku noutamak nirya arelbalamik. Tonda, Persia mutuku weik deiyok mutuku, kota Susan noutamak ton, asurat lakak deibik. Akunum deibikopura, amutuku ninye deiyoknye, Raja Ahasyweros ap, el amu tam ninye deiyoknye, Haman ap ara, bukukapdikce, anggur mek weika arye dinmarik. Bukni, kota Susan mutuku noutamak ulamik ninye nirya ara, ayupu kekebika deice arye, amutuku noutamak nirya ara, ‘Se’ tenen, kanye bokoltonauk ubuk.