Ester 2 - Eipomek

Amutuku nang arye, ‘Ninye deiyok kil Ratu unamle’ tenen, Ester wipdeibik yupu

¹ Ninye deiyoknye Raja Ahasyweros yu ubukba, Ratu Wasti ati derebuk ning nirya, yata wiribuka talak do, akunum mabukopura, Ratu Wasti bira, winibuk ning ati, tuba tenebuka ulamuka ani, aminyan talak, ‘Winira, yata wiriptinye do?’ tenen, tuba teninauk ulamuk.

² Ati ara, Raja Ahasyweros, el aik noutamak pil melin nang arye, ninye deiyoknye Raja ati nyabik. “Naio, Ratu Wasti pununa ati, urasin pia teleb kam kilapu elbinamkiabe. Eibibyopura, urasin pia teleb wel kilapu dobuka, an aik pum tam delilyanamkiabe.

³ Tonda, ance nyapminba, akam kilapu ena deiyok nang ton, wibuka deipnamlyame. Ance talilyam provinsi noutamak nirya, deiyok nang ton, wibuka deipminba, sikce urasin teleb kilapu enamake. Epra balamica ani, akunum eibicopura, akilapu dobuka yakirye, akota mutuku Susan noutamak bukni, an aik pum tam delilyanamake. Winibicopura, an amu tam pil dona deiyoknye, el si Hegai birye, akam kilapu nirya ati, melibuka enamle. Awel kilapu, an aik pum tam unamak talak ara, sik urasin pia teleb una ati, mek kekna ap, nintong teleb mek likra delinamak ning ap, unamake.

⁴ Aning nirya akunum winibikcopura, na ni Raja Ahasyweroso, ance tenepmince, an urasin dina teleb upkiliba, an kanye upmanto wel kil ton aupmalyopura, wibuka deipminba, nun weik deiyok kil, Ratu Wasti el pununa ati unamle.” Raja Ahasyeweros el aik pum pil melin nang arye, Raja ati nyabikba, ayupu kekebuk.

⁵ Atalak ara, Persia mutuku weik deiyok asik kota Susan mutuku noutamak, ninye tonok ton, Yahudi yalanye, el si ara, Mordekai ulamuk. Mordekai el li bira, Yari. Yari el li bira, Simei. Simei el li bira, Kis ulamuk. Sik anang nirya ara, Benyamin yala nang ulamik.

⁶ Mordekai elda, Persia mutuku noutamak ulamuk. Bukni, minop talak ara, Yerusalem mutuku ulamuk. Yerusalem ulamuk bukni, aminyan talak Babel mutuku ninye deiyoknye, el si ara, Raja Nebukadnesar birye, Yerusalem mutuku obuka sirya dakukce, Yudea mutuku talibuka, ninye deiyoknye el si ara, Yoyakin ap, Yudea ninye weik tonap dobukabukce, ila tuba tamubuka, Persia mutuku bobinuka, wenen aik noutamak deiamik. Winibuka bobinamik talak, Mordekai babye, wenena aikuk deiamik.

⁷ Mordekai el weit birye deiamuk kilmu, el si ara, Hadasa ulamuk. Awel kil Hadasa, el li ap, el lin ap diamdikba, Mordekai birye, ‘Akil ara, na kilmu atonun unamle. Na aryuk, akilmu melibuka kalikinamne’ tenen, el ap neika ulamikba, Mordekai el mapu koproba, elce deiamne atonun uamuk. Hadasa bira, el urasin ap, el nong ap, pia teleb wel kil ulamuk. Akil tonok bukni, el si ton Ester nyalamik.

⁸ Ninye deiyoknye Raja Ahasyweros birye, ‘Na talenun mutuku noutamak nirya ulamunye ninye, anggun kilapu ap, anggun mapu ap nirya ara, sik ni yapu nyanyak yupu, pia moubuka kekenamake. Urasin teleb wel kilapu nirya ara, na dam anyuk bobuka boyanganamnululume,’ nyabuka, surat sekuka dolilamukba, ayupu nyabuk touk, urasin teleb wel kilapu weika arye boyangalamikce, weik kota mutuku noutamak, Susan mutuku yanuka bulubuka delilyangalamik. Abulubuka deipmeka noutamak ara, Ester ton sik kan-kan noutam aunmok. Ester babye, ninye deiyoknye, Hegai el amu tam ulamuk. Ara, wel kilapu nirya melibuka kaliklamuk.

⁹ Winilamukba, Hegai eibukce, Ester biti pia kanye deiamukce, bico tenelamuk. Bico tenelamukce, Hegai birye Ester biti, ‘Urasin pia teleb kibuka moulanamle’ tenen, urasin teleb kina ati, mek kekna ap, nintong teleb mek likra delin ap, ulamuk. Winibukopura, din ning, teleb ning yuk arelamuk. Arelamukba, Ester dobuka telebuk upra balamuk. Tonda, Ester el melina ati, yuk tam kilapu tekbarye wipdeibukba, Ester biti melilamik. Tonda, Raja Ahasyweros el weik deiyok aik pum tam bukni, kilapu una ati, pia telebak binuka deibuk. Akilapu nirya ati, Hegai birye arebuk pil talibuka dolamikce, Ester biti melilamik.

¹⁰ Mordekai birye, akam kil Ester biti, nyabuk. “Raja Ahasyweros, ‘Derepkilyak’ tenen, an ni yapu ap, an nin yapu ap, an yala ninye ap, atia, nyabuka, pia kum laka nyanamlyame. ‘Na yala ara ani,’ nyabuka, lakak arye kum laka nyanamlyame. Aning ara, min laka nyana meme,” nyabuk. ‘Aning ara, kum laka nyanamlyame,’ nyabuk ning deiyok ara, Ester bira, Yahudi yala kil ulamuka atia.

¹¹ Tonda Mordekai birye, el kilmu Ester biti, ‘El urasin yata wiripnamle do? Anyaik nang ap, kilapu ap arye, Ester biti, teleb kibuka melinyak do?’ tenen, amutuku ninye deiyoknye, el aik dam tuba-tuba asilbalamukce, ‘Ester ap, sik wel kilapu nirya ara, yata ning wiripnamak do?’ tenen, asilelamuk.

¹² Ura, ‘Awel kilapu, sik urasin pia teleb unamak’ tenen, sik urasin teleb una ati, keting tamun tonok deice arye, nintong teleb minyak, el si ara kemenyan, sik nong deice liklamik. Winilamik. Tonda, wala ara tekbarye deice arye bokuka, yuk nintong teleb ning, el si ara, wangi-wangi ap, tabakuka sik nong deice liklamik. Winilamikce, obarye dua belas (12) wala deice arye tabakuka, sik nong deice nintong teleb nyalamle mek nirya culamikce, liklamik. Winibuka ulamika ani, akam kilapu nirya arye winipnopura, ninye deiyoknye, Raja Ahasyweros dam anyuk balamik.

¹³ Winibuka, sik deiyoknye Raja Ahasyweros, el dam balamik. Winilamikba, wel kil tonok ninye deiyoknye, Raja dam wekuka bin talak ara, akil el patapneba binuka moropne touk, arelamuk. Arelamukba, akilapu sik pil dona ati, weik deiyoknye Raja, el aik pum binuka, pil talibuka dolamik.

¹⁴ Ura, min kum inipman talak arye, ninye deiyoknye Raja, el un dam wekuka unmana ani, inipmana ani, beren tam talak, ila tuba tamubuka yuk aik pum tam binuka ulamik. Bukni, adiparyuk tamubuka, kilapu sik pil don aik bitinye aik noutamakuk, binuka ulamik. Awel kil ara, adiparyuk ninye deiyoknye dam, min kum balamuk. Yuk aik daunman buk, Raja birye, ‘Awel kil ati, na kanye deipmana ati ara, akil ara, tuba tamubuka tonap na dam yatue,’ tenepnopura, akam kil sisibuka moropnopura, asi nyapne wel kiluk, ila tuba tamubuka, Raja el dam binuka, neika ulamdik. Sik Persia mutuku ninye deiyok nang arye winilamik.

¹⁵ Ura, Ester elda, ninye deiyoknye Raja, el aik bana ati yukubik. Ester bira, el li koproba Abihail ulamuk. Abihail bira, Mordekai el mam koproba ulamuk. Abihail dibukba, el mi Mordekai elcuk, Ester kwaknyamukce, el li koproba kiamuk. El kilmu Ester bira, erepdeibikce, Raja Ahasyweros amu tam pil donanye, Hegai Raja el kilapu aik, deiyok talibuka ulamukce, akilapu ati melibuka kaliklamukba, Raja Ahasyweros dam bana ati, Ester si nyabikba, el kintinina ati, Hegai birye, “Winipnulyame, aning bobuka bobinamlyame,” nyabuk touk, Ester kekebuk. Yuk ning ton kum morobuk. Amutuku ulamik ninye ap, Raja el aik pum tam ulamik nang ap, sik nirya arye, Ester bitibuk moubuka dilamikce, elti pia bico tenelamik.

¹⁶ Winilamikba, Raja Ahasyweros birye, amutuku talibuka ulamuka ani, keting tamun tekbarye ubukba, taku wala (10) ubukba, Ester sisibuka, “Raja dam yalyame,” nyabik. Adeice arye, Ester bira ninye deiyoknye Raja Ahasyweros, el aik bunak wekelbiyuk.

¹⁷ Persia mutuku ninye deiyoknye Raja Ahasyweros, el kilapu ara, weik ulamik bukni, Raja birye Ester pia elilamukce, elti kanye weika arye delilamuk. Tonda, yuk wel kilapu nirya ati ton, pia kanye kum delilamuk. Aning ati ara, Ester biti, kanye tenelamukce, pia kanye delilamuka deice arye, ninye deiyok nang kibikirye, kalubuka ongolamak ning, el si ara mahkota dobuka, Ester el kisok deice kalupdeibuk. Ara, ‘Ester amutuku ninye deiyok kil, Ratu Ester unamle’ tenen, ninye deiyok kibikirye, talibuka ulamak ning el si ara, mahkota, Ester kisok deice kalupdeibukce, minop talak amutuku deiyok kil, Ratu Wasti pununa ati erepdeibuk.

¹⁸ Aning nirya akunum winibukopura, Persia mutuku ninye deiyoknye, Raja Ahasyweros birye, “Ester el si erena ati, weik kwalya kwalipnamaba ati ara, na amu tam deiyok nang nirya ap, weik sisin pil don nang ap, pegawai pemerintah nang ap, weik nang nirya buluplulume,” nyabuk. Nyabukce, “Ester si erena ati, na talenun mutuku ap, provinsi nirya ap, noutam ululum ninye nirya ara, asum deice arye pil dona kumce, dikdik sepnulume,” nyabuk. Nyabukce, pia teleb ning weika arye, amutuku ninye ati, weika arye arelamuk.

Mordekai birye ninye deiyoknye, el nong lyepdeibuk yupu

¹⁹ Ura, anoutam talak nirya, Mordekai bira, ninye deiyoknye, el pil melibuka donanye pegawai kilamuk. Winilamuka ani, like bitinye talak, Raja el pegawai nang arye, “Wel kilapu ton, Raja dam yanunyake,” nyabuka yukubik.

²⁰ Atalak noutamak nirya ara, Ester birye, “Na ni ap, na nin ap ara, Yudea tam ninye ulamdik. Anya arye, na babye Yudea yala kil unune,” pia kum laka nyalamuk. Winilamuk ning deiyok ara, Mordekai birye, ‘Wininamlyame,’ nyamuka ati, anyapdeiamuk touk, pia ulamuk. Ester bira, el li koproba diamukba, el mitikop arye Mordekai birye, dobuka kwaknyamukba, el li koproba atonun kibuka, teleb kanye bobuka arye, el amu tam ulamuk. Mordekai birye Ester biti, ‘Wininamlyame,’ nyabuka nyalilamuk yupu nirya, kekebuka ulamuk.

²¹ Atalak ara, Mordekai birye, amutuku noutamak ninye deiyoknye bunak balamik bisik bublan dam unmok. Tonda, ninye deiyoknye Raja Ahasyweros, el pil don nang bitinye ap, neika unmek. Mordekai ap, pil dobuka unmek nang, sik si ara ani, Bigtan ap, Teres ap, sik bitinye babye, bublan dam kalikna nanguk ulamdik. Bukni, sik bitinye arye, Raja Ahasyeweros biti, yu weik ubukba, yuk nang dam binuka, ‘Anye Raja opdeipsululume,’ nyapdeiprik. Atalak ara, sik bitinye arye, malye kanye bobuka, Ahasyeweros ona ati, kaliklamdik.

²² Sik teneprik ning ara, Mordekai akunum bikukopura, el adiparyuk, minopce Ester dam binuka laka nyabuk. Winibuka daunmok ani, Ester birye, ninye deiyoknye Raja biti, ayupu nirya laka nyabuk. Ara, “Mordekai birye ayupu laka nyabukba, narye anti nyapkine,” nyabuka laka nyanmok.

²³ Lak nyanmokba, Raja el amu tam nang arye, ‘Abitinye nang Bigtan ap, Teres ap arye, anti malye kanye tenepmarik ning nirya ara, dib do, tilila do?’ tenen, amutuku deiyok nang arye dililamikak, ‘Se, dipkoprob abitinye nang arye, ‘Raja opnamabe,’ tenyamdik ning ara, dipkoprob laka tenyamdik. Aning nirya ara, ‘Dib do, kum do?’ tenen, enmeka ani, dipkoproba akunum eibikopura, abitinye nang ara, Bigtan ap, Teres ap, sik wenena ati, yo ikukabikce, ayo deice kirikuka diripkwetebikba, abitinye nang diprik. Awinibik ning nirya kel kina ati, nukna buku noutamak sekeibikce, ninye deiyoknye bun dam anyuk sekuka deibik.