Ester 1 - Eipomek

Persia mutuku ninye deiyoknye Raja Ahasyweros, el kil Ratu Wasti kil arye, el akanye Raja Ahasyweros ati, bisibuk yupu

^1-2 Persia mutuku noutamak, pemerintah deiyok mutuku, el si ara, weik kota Susan uamuk. Persia mutuku nirya talilamuk deiyoknye, el si Ahasyweros ulamuk. Raja Ahasyweros birye taleamuk mutuku nirya ara, pala pia weik mutuku noutam ara, 127 provinsi uamuk. ARaja Ahasyweros birye taleamuk mutuku ara, India mutuku noutamak arye dipdongobuka, Sudan mutuku noutamak nirya taleamuk.

³ Ahasyweros birye, Persia mutuku nirya talilamuk talak noutamak, keting tamun winilye deice arye, Raja Ahasyweros birye nyabuk. “Na talenun mutuku, Persia mutuku noutamak, ninye deiyok talibuka umunye nang nirya ara, bulupmunyeba weik kwalya kwalipnamabe,” nyabuk. “Ara, Persia mutuku ap, Media mutuku ap noutamak umunce, pemerintah pil talibuka domunye weik deiyok nang nirya ap, Gubenur nang nirya ap, yin talen nang, sik weik deiyok nang, yin talena deiyok nang panglima ap, amutuku ninye deice tam erena nang ap, sik nirya ara, bulubuka yamunyeba, weik kwalya kwalipnamabe,” nyabuk.

⁴ Akwalya kwalibuka ulamik bukni, wala nakub barye noutam nirya ara, kwalya kwalibuka ulamik. Atalak noutam nirya ara, ninye deiyoknye Raja Ahasyweros birye, el talilamuk ning nirya, dekna weik ning ap, urasin pia teleb ning ap, bona utotoa talin ning ap, dobuka lakak deibukba, aninye deiyok nang nirya arye, elilamikce, ‘Se, Raja Ahasyweros birye talilul bona weik talin ning ap, elce pil dolul ning ap nirya ara, mambul weik ulule. Aning nirya ara, pia telebe,’ tenelamikce, pia kanye delilamik. Winibuka aning nirya elilamik talak nirya ara, 180 sum deice arye elilamikce, kanye delilamik.

⁵ Winilamikba, wala nakub barye akunum ubukba, aninye deiyoknye Raja Ahasyweros birye, weik kwalya ton kwalibuka kintinip deibuk. Aning akunum winibukopura, elcuk el amu tam ulamik ninye nirya ati nyabuk. “Anggun nirya, weik nang babye, talye amu tam ululum ninye nirya babye, akwalina kwalibuka deipmasena ara, dilyalulume,” nyabuk. Ara, Susan mutuku noutam bukni, ninye deiyoknye, el pia teleb aik dam, kita ning koulamuka noutamak, urasin pia telebak bulubuka yayik. Like, tekbarye sum noutam nirya arye, kwalya kwalibuka neikauk dilamik.

⁶ Akwalya kwalibik sukum ara, ninye deiyoknye, Raja el aik dam kup-kupak, el bulyak dam nirya ara, kain urasin pia teleb ning aniryuk lapdeiamuk. Ara, dekna weik baju mirin ning ap, kurun ning ap nirya ara, tapu koubuka deiamuk. Tonda, taruk dongolamak ning atonun ning, perak ning arye, dekna weik cang keil, el si ara pualam keil ikukabikce, abaju kirikuka deibikba, pia moupdeibikba, urasin pia teleb kibuk. Winibikce, dekna weik kat ning, el si ara emas ap, perak ap arye, ninye dikdik sena ati, bun ning, puturubuka deibikba, urasin pia teleb ubuk. Tonda, aning deiamuka amu tam ara, amsuna pia teleb ning kintinip deibuk. Ara, dekna weik keil, el si ara, pualam kurun ning ap, hablur ining bi ap, laut mek kwen pum tam kat ning, el si ara mutiara, bol deice mile paralamle ning ap, yuk dekna weik keil tabakuka deibikba, anyaik amsuna, urasin pia telebuk ubuk.

⁷ Ninye deiyoknye Raja arye, ‘Na kayapu nang ati, teleb ning weika arye arepnamne’ tenen, anggur tapu duk mek, ninye kanye wangalamak mek weika arye, kintinibuka deiamukba, weika arye bulubuka dilamik. Anggur mek kwebuka dina ati, kintinip deibuk makau ara, emas arye memepdeiamuk. Adin makau nirya weika arye aubuk bukni, urasin ara yuk-yuk ubuk.

⁸ Aning winibuka kintinip deibukopura, el aik pum tam noutamak pil melin nang ati nyabuk. “Ninye asik nang ati, anggur mek arepnumunyopura, ‘Akunum dipmalume,’ nyana meme. Sik yuk-yuk patanmaliba, ‘Diptibye,’ tenenmace touk, talye lukparabuka arepmunyeba, weika arye dinamake,” nyapdeibuk.

⁹ Aning atonun, atalak babye, Raja Ahasyweros, el kil Rastu Wasti, deiyok kibuka weik kwalya ton kintinip deibuk. Ara, weik deiyoknye Raja Ahasyweros, el aik pil don kilapu nirya ati, akwalina kwalibuk.

¹⁰ Winibuka, akwalina kwalibuka deipmek ning dibuka, anggur tapu duk mek weika arye dibuka daulamikba, tekbarye sum akunum kibukopura, ninye deiyoknye Raja Ahasyweros, anggur mek weika arye dinmokbuk, el kanye mitik ton, pin-pin ubuka ati, kanye pia teleb kibuk. Winibukopura, el amu tam pil don nang, tekbarye nang ati yukubuk. Atekbarye nang ara, sik si ara, ani. Mehuman ap, Bizta ap, Harbona ap, Bigta ap, Abagta ap, Setar ap, Karkas ap ati, yukubukba, el dam yayik.

¹¹ Elce sik anang nirya ati nyabuk. “Anggunce na kil Ratu Wasti bobuka boyalulume,” nyapdeibuk. Nyabuka deiyok ara, ani. Ara, Ratu Wasti bira, el urasin pia teleb kil ulamuk. Ati, ‘Na ati yanmek ninye asik nang nirya arye, na kil Wasti urasin pia teleb kil eibikirye, kanye deipnamak,’ tenebuk. ‘Ninye asik nang arye, na kil eibikirye, kanye deipnamak,’ tenebukce, el amu tam pil don nang ati nyabuk. “Na kil Wasti, ninye deiyok kil ulula ati, el kisok deice delilamak ning el si ara, mahkota, el kisok deice deibuka, na dam boyanamlulume,” nyabuk.

¹² Ninye deiyoknye Ahasyweros birye, el amu tam pil don nang ati nyapdeibukba, ayupu bobuka, Ratu Wasti kil ati, binuka nyabik. Bukni, Ratu Wasti bira, el yupu kekebuka malye kanye bobukce, “Kume, na kum yanune,” nyabuk. Ayupu nyabukba, Raja ninye deiyoknye, el amu tam pil don nang arye, laka nyalbiyikba, Raja Ahasyweros kekebukce, yu pia weik ubukba derebuk.

¹³ Yu ubukba, ‘Se, na kil Wasti winiptuba, yata wiribuka wenepnamne do?’ tenen, el amu tam pil don nang ton yukubuk. Ara, ninye deiyoknye Raja arye, el amu tam ninye nirya ati, “Nun mutuku noutamak ara, teleb kibuka una ara ani, malye ning ara, ani. Winipnamlyame,” nyabuka, lak lena deiyok nang, sik weik kel kilamik nang ati, yukubukba, yayikopura, nyabuk. “Ratu Wasti ato ning winiptuopura, yata wiribuka weneptinye do?” nyabuka morobuk.

¹⁴ Raja Ahasyweros birye nyabukopura, sik yuk mutuku ninye deiyok nang, yupu moubuka nyalin ati, mining dam ulamik nang yukubukba, el dam yayik. Ayayik nang, sik si ara, ani. Karsena ap, Setar ap, Admata ap, Tarsis ap, Meres ap, Marsena ap, yayik. Sik anang ara, Persia mutuku ap, Media mutuku ap, pia erebuka deice tam talibuka ulamik nang nirya yayik.

¹⁵ Ninye deiyoknye Raja Ahasyweros birye, atekbarye weik deiyok nang ati, nyabuk. “Narye na pil don nang wipdeipsiba, na kil Ratu Wasti dam nyabik bukni, Wasti bira nati, ‘Kume, nara an dam kum yanune,’ nyabuka, na nyapse yupu yanipmanilce, na dam kum yayuk. Winibuka, na nyapse yupu ati, ‘Na like’ tenen, batakukce, na dam kum yayuk. Ati ara, akil el wenena ati, yata winiptinye do?” nyabuka asipdeyuk.

¹⁶ Ninye deiyoknye Raja Ahasyweros birye, ayupu akunum nyabukopura, kele weik koprobanye tonok, el si ara, Memukan birye, amambul weik nang nirya, kekenmeka noutam arye, nyabuk. “Akil Rastu Wasti ara, el malye winipmok ning ara, weik mambul ulule. Ara, talye kum nyapkine. An dam atibuk malye nyabuka kum deipnamkile. Ahasyweros ance taliplumba, ninye deiyok talibuka unyak mutuku nang, weik ninye deiyok nang nirya ati, malye kipdeipmasile,” nyabuk.

¹⁷ Nyabukce, ayupu tonap dukdongobuka nyabuk. “Ara, talye ati kum nyapkine. Deiyok ara, ani. Ratu Wasti elce ulul ning ara, amutuku noutamak unyak kilapu nirya arye akunum bikinyake. Bikinyakce, sik akanye yapu nirya ati, utenenamake. ‘Kume, ninye deiyok kil Wasti bira, el akanye Raja Ahasyweros birye nyabuk yupu ati, ‘Na like’ tenen, yaniptabukce, el dam kum biyuk. Ati ara, nun babye, nun akanye yapu arye nyasinyak yupu babye, yaniltanauk unamabe,’ tenenamsiake. Na nio, ance tenepluma ara, ‘Ratu Wasti, na dam yalirye, na nyanamne yupu ara, moubuka kekepnamnile’ tenen, nyaplum bukni, Wasti elda kum yayuke.

¹⁸ Asum babye, Persia mutuku ap, Media mutuku ap, talibuka unyak weik nang, sik kilapu nirya, Ratu Wasti kil arye winibuk ning ati, laka nyabikba kekebik. Ati ara, wini talak arye, deiyok kibuka dorunamle talak noutamak ara, nun kilapu nirya arye, sik akanye yapu yupu bisibikirye, yaniltanauk wininamsiyake. Winibuka winipsicopura, aminyan talak ikin weik unamsil ning ara, pia kum kum danamle. Ikin ning nun dam pia weika arye yanganamsile.”

¹⁹ “Aning ati ara, nun ni koproba ance, ‘Teleb,’ tenepsutumba, nunce nyapnukiyab ninguk, wininamlyame. Ara, ance akil ati ‘Winipnamlulume,’ nyapminba, nun Persia mutuku ap, Media mutuku ap, noutamak unyap ninye nirya ati, ‘Wininamlulume,’ nyabuka delilyam peraturan buku noutamakuk sekenamabe. Ara, an ninye deiyoknye, Raja si deice arye nyapminba, sekipyopura, aperaturan pia aupnamle. Yata ninye do nirya, asekipye yupu kum yaniptinge. Tonda, aning batakuka ayupu pununa ati, pia kum sekenamake. Ance, ‘Teleb ning,’ tenepniminyopura, anyapnukiyap ning ara, sekenamlyame. ‘Ratu Wasti bira, ila tuba tonap, na Raja Ahasyweros dam yangana pia meme. Elda, pia yuk unamle,’ nyabuka sekenamlyame. Winibuka sekminyopura, Wasti taleamuk ning nirya ap, an ap, amutuku nirya talilamuk deiyok ning ap dobuka, el pununa ati, yuk kil wipmince, akil ati arepnamlyame. Ance, ‘Winipnamabe,’ nyabuka sekelina deice arye sekeipsiminyopura, ila tuba tamubuka kum dopnamlyame.

²⁰ Ura nun ni koproba, ance, ‘Winipnamle,’ nyapmalam yupu ara, amutuku nirya nyabuka deipminba, bobukabikirye weik upliba, apala mutuku noutamak unyak kilapu nirya arye, ilil unamle. Ilil uplyopura, sik akanye yapu ati, si erenamkiake. Ara, weik bona utoto talin kilapu babye, talye bona utotoa talina kum unyak kilapu babye nirya ati, ilil tenebikirye, telebuk unamake.” Kel pia weiknye, el si Memukan birye, Raja Ahasyweros biti nyabuk.

²¹ Memukan birye, Raja Ahasyweros ati, nyabukura, ninye deiyoknye Raja Ahasyweros ap, el amu tam pil talibuka don nang bukni, Persia mutuku ap, Media mutuku ap, nirya talibuka ulamik mambul weik nang nirya kekebikce, ‘E, elce nyapmasil yupu ara, teleb anya arye winipnamabe,’ tenebik. ‘Telebe,’ tenebik ati ara, Memukan birye, Raja Ahasyweros biti nyabuk touk, Raja Ahasyweros birye winibuk.

²² Persia mutuku nirya talibuka, ninye deiyoknye Raja Ahasyweros birye, el taleamukba talibuka ulamik nang ap, el taleamuk mutuku noutamak ulamik ninye nirya ati, sekna sekuka dolilamuk. Ara, sik ulamik mutuku neika ansinibuka ulamik touk, ‘Sik yuk-yuk eibikirye, ayupu kel bikikirye, nyalanamak’ tenen, sekuk. Tonda, ‘Moubuka kel kipnamak’ tenen, amutuku noutamak ulamuk provinsi auamuk touk, tonda sik nyalamik yupu yuk-yuk auamuk touk, ‘Ninye ara, sik kilapu ap, sik mapu ap nirya ara, sik ni yapu nyanyak yupu moubuka kekenamlulume,’ nyabuka, surat sekuka dolilamukba, amutuku noutamak ulamik ninye elilamik.