Esra 8 - Eipomek

Babel mutuku noutam binuka daulamika ani, aminyan talak Esra ap tamubuka, Yehuda tam yayik nang ati, nyabuk yupu

¹ Esra birye nyabuk. “Anang nirya ara, sik Babel mutuku binuka daulamika ani, bataksikba, nun mutuku tamubuka, Yerusalem tamubuka yanamupu nang ara, sik ninye deiyok kibuka, tonok kibuka taleamik nang ap, tonda amutuku binuka ulamikce, deiamikba, dadeipdanin balamik yala nang ap, na Esra ap, neika tamubuka yapu. Babel mutuku batakuka, Yerusalem mutuku tamubuka yapu talak ara, Babel mutuku nirya taleamuk ninye deiyoknye, el si Artasasta ulamuk. Elce Babel mutuku taleamukce, ulamuk talakuk yapu. Yerusalem mutuku noutam yapu nang bukni, ton nang sik si ara, ani.

² Pineas birye deiamukba, dadeipdanin yangalamik nang arye deibiknye, Gersom ton ulamuk. Itamar birye deiamukba, dadeipdanin yangalamik nang arye deibiknye, Daniel ton ulamuk. Daud birye deiamukba, dadeipdanin yangalamik nang arye deibiknye, Sekanya bukni, elce deiamukba, dadeipdanin yangalamik nang arye deibiknye, Hatus ton yayuk. Elda Daud yala nang ulamuk.

³ Tonda, Paros birye deiamukba, dadeipdanin yangalamik nang arye deibiknye, Zakaria ulamuk. Tonda el ap, el yala nang, sik dorapce dadeipdanin, yangalamik nang ara, anang nirya ap, el ap neika yayikba, sik si sekamik. Sik yupa ara, 150 nang ap neika yanuka ulamik.

⁴ Atonun, Pahat-Moab birye deiamukba, dadeipdanin yangalamik nang arye deibiknye, Serahya elce deiamuk mi Elyoenai bira, yanuka ulamuk. Anye ap, el yala ap sal uk, 200 nang neika yanuka ulamik.

⁵ Atonun, Zatu birye deiamukba, dadeipdanin yangalamik nang arye deibiknye, Yahasiel, elce deiamuk mi, Sekahnya ap, tonda, el yala nang ap, 300 nang neika yanuka ulamik.

⁶ Atonun, Adin birye deiamukba, dadeipdanin yangalamik nang arye deibiknye, Yonatan elce deiamuk mi, Ebed ap, tonda, el yala nang ap, 50 nang neika yanuka ulamik.

⁷ Tonda, Elam birye deiamukba, dadeipdanin yangalamik nang arye deibiknye, Atalye elce deiamuk mi, Yesaya ap, tonda, el yala nang ap, 70 nang neika yanuka ulamik.

⁸ Tonda, Sefaca birye deiamukba, dadeipdanin yangalamik nang arye deibiknye, Mikhael elce deiamuk mi, Zebaja ap, tonda, el yala nang 80 nang ap, neika yanuka ulamik.

⁹ Atonun, Yoab birye deiamukba, dadeipdanin yangalamik nang arye deibiknye, Yehiel elce deiamuk mi, Obaja ap, tonda, el yala nang 218 nang ap, neika yanuka ulamik.

¹⁰ Tonda, Bani birye deiamukba, dadeipdanin yangalamik nang arye deibiknye, Yosifya elce deiamuk mi, Selomit ap, tonda, el yala nang ap, 160 nang ap neika yanuka ulamik.

¹¹ Tonda, Bebai birye deiamukba, dadeipdanin yangalamik nang arye deibiknye, Zakaria ap, tonda, el yala nang ap, 28 nang neika yanuka ulamik.

¹² Tonda, Asgad birye deiamukba, dadeipdanin yangalamik nang arye deibiknye, Hakatan, elce deiamuk mi, Yohanan ap, tonda, el yala nang ap, 110 nang neika yanuka ulamik.

¹³ Tonda, Adonikam birye deiamukba, dadeipdanin yangalamik nang arye deiamik nang ton, sik si, Elifelet ap, Yehiel ap, Semaya ap, sik winilye nang ara, aminyan talak yayik bukni, sik yala nang ap, tabakuka yayik nang ara, 60 nang ton neika yanuka ulamik.

¹⁴ Tonda, Bigwai birye deiamukba, dadeipdanin yangalamik nang arye deibik nang bitinye ara, Utai ap, Zebud ap, yarik bukni, sik ap neika yayik nang ton, sik yala nang, 70 nang ap, neika yanuka ulamik.

‘Allah si eren aik melibuka pil donamak’ tenen, Esra birye, bulupdeibuk nang ati, nyabuk yupu

¹⁵ Sik aninye yupa nirya, Ahawa mutuku noutam binamuk mek kup-kup ak, bulubuka deipseura, asukumuk tia doltakne tenda aik dobuka, like winilye deice wininmapu. Awininmapu talak aryuk, narye Israel yala nang nirya wibuka dipdesebuk, sik aunmek nang ara, talye nang ap, tonda imam nang ap nukuka, ton aunmeka eipse bukni, sik Lewi yala nang, talye nang ara, pia tonok babye ton kum eipse.

¹⁶ Allah si eren aik dam pil melipmanto nang talye Lewi yala nang ton kum eipsa ati, atalak aryuk, sik anang talibuka ulamik deiyok-deiyok nang ara, sembilan nang ati yukupse. Anang sik si ara, ani. Ara, Elieser ap, Ariel ap, Zemaya ap, Elnatan ap, Yarib ap, Elnatan ap, Natan ap, Zakaria ap, Mesulam ap, tonda ‘Winina telebe, aning malye ati, kum wininamap’ tenen, kel weik nang ton, bitinye nang ara, Yoyarib ap, Elnatan ap, yukupse.

¹⁷ Yukupsirye, ‘Nun kwit Ido, Lewi yala nang arye deiamikba, dadeipdanin yangalamik nang, atalak kam unyak nang, sik deiyoknye ulula ati, el dam binuka moropnamlume,’ nyabuka, sik anang ati, wibuka dopkwetepsiba, Ido dam elana ati biyik. Ara, Ido ap, tonda el kwitcapu ap ara, Kasifya mutuku ulamik bukni, mince Allah si eren aik dana-dana tam pil dolamika ati, sik dam biyik. Deiyok ara, ani. Ara, Ido ap, el tam nang ap, sik kwitcapu arye, minop talak Allah si eren aik pil melibuka dolamika ati, sik anang arye, apiluk akunum bikamikce, pil dolamik nang ton, wipdeibikirye, dopdeibikiba, ‘Nun dam yakirye, nun donmap Allah, si eren aik noutam, pil melibuka dopnamsiak’ tenen, ‘Nyabuka morolbinamlume,’ nyapdeipsiba, biyik.

¹⁸ Winibuka akunum moropsiba, kekebikopura, aning ati, Allah el kanye talima noutam arye, ‘Anang ara, kanye deibuka melipnamne,’ tenebuka deice arye, sik amutuku nang dam, pil dobukba, sikce ninye tonok wibuka dopkwetepsik. Awibuka dopdeipsiknye bira, ani. El si ara, Serebya, elda Lewi yala nang bukni, pia moubuka tenepnarye, ‘Winipnamabe, nimalyap aryuk wininamap,’ nyabuka, pia kel weik bikamuknye ulamuk. Tonda, anye bira, Israel birye, Lewi deiamukba, Lewi yala nang arye, Mahli yala nang ton deiamikba, dadeipdanin yangalamik yala nang arye deiamiknye ulamukba, sikce el wibuka dopkwetepsik. Tonda, el ap yayik nang ara, elce deiamuk mapu ap, el kwitcapu ap, sik nirya neika yayik nang nirya ara, 18 nang yayik.

¹⁹ Tonda, Merari yala nang arye deiamikba, dadeipdanin yangalamik nang arye deibik nang, sik si ara, Hasabya ap, Yesaya ap, yarik. Sik kwitcapu ap, sikce deiamdik mapu ap nirya ara, dua puluh (20) nang wibuka, nun dam dopkwetebikba yayik.

²⁰ Ido birye adopkwetebuk talak aryuk, yuk pil melin nang ton, sik yupa ara, 220 nang ton wibuka dopkwetepsik. Ara, ‘Sik anang ara, Yerusalem mutuku noutam, Allah si eren aik, pil melibuka don nang unamak’ tenen, anang sik si sekuka dopkwetepsik. Minop talak, ninye deiyoknye, Raja Daud birye, sik apu yapu nang, dorapce deiamik nang ara, anang sik si kintinibuka deiamuk. Winibuka deiyok ara, ‘Anang ara, sik kwitcapu, Lewi yala nang arye, Allah si eren aik pum tam pil donamak nang ati, sik amu tam ukirye, sik pil ati melibuka donamak’ tenen, apil talibuka melin nanguk wipdeibuk. Ido birye, apil melin nang ton dopdeipsukba, na Esra birye, aninye nirya, sik si yuk-yuk sekse.

Esra ap, Allah si eren aik pil donamik nang arye, ‘Allah arye nunti, kalikuka melinamsil’ tenen, bisik noutam arye, Allah ati, morobik yupu

²¹ Na Esra birye, Ahawa mek kup-kup tam unmapu talak aryuk, narye nyapse. “Ara, na ap, anggun amutuku yanmalum nang arye, din dina kumce, si tebuka Allah dam ati, talima lamapdongobuka ubibirye, Allah ati, ‘Nun kalikuka melipsilyame,’ nyabuka, moronamabe. Morobibiba, Allah arye, bisik banmapyak ara, melibuka basilirye melinamsile. Ara, nun ap, nun mapu ap, nun nirya arye talinyap ning nirya ara, elda kalikuka melinamsile.

²² Tonda, nunda Raja Artasastane dam tuba ulamse talak ara, alye weik upnuka ati, ‘Narye Raja Artasastane ati, ‘Naio, ance an yin talin nang ap, tonda kuda basam bokuka, ninye olbana ati, yin talin nang ap, wipdeipsutumba, sikce nun bisik banamap talak ara, melibuka kaliksitinge,’ nyabuk,a kum moroptinye, tenepse. Deiyok ara, nunce Raja ati, mince akunum nyabupu. Nunce, ‘Kume, nun ni Allah arye, el yupu moubuka kekenyak nang ara, el kanye aryuk, pia teleb kibuka melisulule. Bukni, el yupu moubuka kum kekekirye, el ap batakakikirye, elti, yaninyak ninye ati, anang ara, yu weik upliba, ‘Sikda na like,’ teneplirye, el mikip weik deice arye, sikti, wenebuka oltakalule,” nyapse. Ati aning ara, yata wiribuka deice arye, Raja ati moroptinye do? Kume aning ara, kum winipmatinye.

²³ Ati aning ara, nun adiparyuk din si tebuka, nun ni Allah ati, pia morobuburye, “Naio ancuk, nunti kalikuka melisilyame,” nyabuka morobupu. Nyabuka morobupopura, nun ni Allah, elce kekepsukce, nun moropmapu ning atonun melipsuke.

Allah Yahweh si eren aik dam boyanuka, arelyangan ning ati, nyabuk yupu

²⁴ Sik imam nang nirya kan-kan arye, pia teleb kibuka pil don nang, sik deiyok talibuka ulamik nang arye, minop deiyok kibukapsirye, 12 imam nang wipdeipdipse. Anang ani. Ara, Serebya ap, Hasabya ap, tonda sik aduweit nang noutam arye, yuk 10 nang tonap wipdeipse.

²⁵ Na Esra birye, sik anang winibuka wipdeipsirye, Allah el arena ati, aning ara, dengna weik ning emas ap, perak ap, anyaik pum tam pil dona ati, yuk-yuk bona, alat-alat ap nirya dobuka, sik awipdeipse imam nang ati arepse. Tonda, ninye deiyoknye Raja Artasasta ap, sikce, ‘Winipnuyabe, winina ara telebe,’ nyabuka, yupu weik tonun bikamik nang, el yupu laka nyana deiyok nang ap, tonda el amu tam unmek deiyok nang ap, yuk talye Israel yala nang ap, sik anang nirya arye, ‘Nun kanye aryuk, Allah si erena ati arepnuyabe,’ tenepmekce, arepmek ning nirya dobukapsirye, diribuka dipdesirye, sik imam nang ati arepse. Aning nirya ara, bulupmekce dobuka, boyanganmek teleb aren ning nirya ara, dobuka deipse. Aning nirya ara, Allah si eren aik noutam delina ati, boyanmek ning nirya dobuka, narye wipdeipmase imam-imam nang 12 nang ati arepse.

^26-27 Aning nirya ara, sik imam-imam nang ati arepmase talak aryuk, ‘Aning ara, yata wiribuka kilo ulul do?’ tenen, tonok-tonok timbang kipsirye, aning ikin bikse. Ati, sikce aning dobuka arepnik ning, el ikin ara, ani. Perak el ikin ara, 650 talenta 22.000 kilogram kibuk. Tonda, anyaik pum tam pil dona ati, perak arye kintinip deiamik alat-alat ning ara, 100 arepnik ning, aperak el ikin ara, 70 kilo kibuk. Tonda, dekna weik ning el si emas, el ikin ara, 100 talenta (3.400 kg) kibuk. Tonda, emas arye kintinip deiamik kat mek makau, el si mangkok, 20 arepnik ning, emas el ikin ara, 8.4 kg kibuk. Tonda, kat ning el si perunggu arye memebik mangkok, pia teleb ning bitinye arepnik. Amangkok sik urasin ara, emas arye memelamak mangkok atonun ning kibuk.

²⁸ Adengna weik ning yuk-yuk ning nirya, sik imam nang ati, akunum arepsopura, awipdeipse imam nang ati nyapse. “Nun apu yapu ara, Allah el si Yahweh ati, si erelamik touk, nun babye tuba, el siuk erenyabe. Anggunda, ‘Allah si eren piluk donamlum’ tenen, akunum wibuka deipsisa ati, anggunda Allah ‘Na, tenen nang ululume. Aning atonun, adekna weik ning, sik Israel deiyok-deiyok nang arye, akunum arepsik ning ara, ‘Allah el ninguk upnamle’ tenen, arebika ati, aning yuk-yuk ning nirya babye, Allah el ninguk ulule. Aning atonun, sik Israel nang arye, ‘Aning ara, nun kanye aryuk Allah ati arepnuyabe’ tenen, kintinibuka deipsik ning nirya babye, Allah el ninguk ulule.

²⁹ Ati ara, aning nirya ara, pia moubuka kaliknamlume. Winipmunce, bisik balamunya ani, Allah Yahweh si eren aik pum tamuk bimunyopura, atalak aryuk, ‘Aning nirya el ikin yata barye kilogram ulul do?’ tenen, tuba tonap kiklipdemunce, biknamlume. Aning kiklipmunye talak ara, sik weik imam-imam deiyok nang ap, Lewi yala deiyok nang ap, tonda, Yerusalem mutuku noutam unyak Israel yala nang talibuka unyak ninye deiyok-deiyok nang ap, sik urasin dam binuka kiklipnamlume. Na Esra birye sik deiyok-deiyok nang wipdeipse nang nirya ati, nyapdeipsiba, kekebik.

³⁰ Na nyapse yupu kekepnika ati, imam-imam nang, sik deiyok nang ap, sik pil melin Lewi yala nang ap arye, nun mutuku weik ninye deiyok nang arye, arepnik dengna weik ning, emas ap, perak ap, Allah si eren aik pil dona ati, kintinip deiamik alat-alat ap, aning-aning nirya dobuka, nun ni koproba Allah, si eren aik domupu mutuku, Yerusalem mutuku uk bobinuka, Allah arye, ‘Naʼ tenen ning deibik.

Babel mutuku batakuka, Yerusalem mutuku biyik Israel nang ati, sekik yupu

³¹ Wala tonok ning deice, tanggal 12 sum kibukopura, nun nirya ara, Ahawa mekin dam tia unmapu ak arye batakuka, ‘Yerusalem mutuku binuka unamap’ tenen, beipu. Abisik balamupu talak ara, nun ni Allah arye melibuka kaliklamsukba, bisik noutam balamupu talak ara, nun mal olan nang ara, bisikak duknubuka kalikmance, nun ning ubula alubuka dopropmanto nang ara, ton kum eibupu. Bisik banmapu talak arye, anang tonok babye ton, kum unmeka ati, kum eibupu.

³² Bisik balamupu ani, akunum Yerusalem mutuku beipu talak ara, nun dikdik sena ati, like winilye sum asukumuk mabupu.

³³ Winibupu ura, like dumbarye sum deice ara, nun adiparyuk, Allah Yahweh si eren aik dam beipu. Beipopura, anyaik wekuburye, sik imam nang ap, Lewi yala nang ap arye, adengna kat weik ning si perak ap, emas ap, aning-aning nirya, ‘El ikin ara, yata barye ulul do?’ tenen, ikin dirin ning deice arye kiklibupu. Akunum kiklibupuopura, adiparyuk dobuka imamnye Uria, el mi koproba Meremot arebupu. Atalak aryuk, asing eibuka bikupu ura, Pineas, el mi Eleasar ap, tonda Lewi yala nang bitinye nang ara, Yesua el mi Yozabad ap, tonda Binui el mi Noaja ap, sik nirya dinmekak arye, aning nirya dobuka, anang ati arebupu.

³⁴ Abobinmapu ning yuk-yuk ning nirya ara, nukuburye ikin dirin ning timbangan deice debupuopura, adiparyuk, el ikin eibuburye, moubuka sekupopura, arebupu.

³⁵ Atalak aryuk, sik Israel yala nang, yuk nang nirya, Babel mutuku noutam daulamika ani, amutuku batakuka, Yerusalem mutuku akunum tamubuka yayik nang babye, ‘Nun ton, nun ni Allah ati, teleb ning arepnuyabe’ tenen, Allah si eren aik dam yayik. Ara, ‘Nun malye unyap ning ati, namin kipsilirye, nun malye ning kum kipdeipsilirye, lyepnamsil’ tenen ati, kam ning obuka imam nang arebikba, sik imam nang arye, aning uku dongobik. Ati, sik Israel yala nang yupa weik tonun, Allah arena ati, ining ning boyanuka arebik. Ara, sik Israel mutuku noutam unyak nang nirya ati, sapi basam yim ara, 12 ap, yim domba basam ara, yupa weik 96 ap, tonda domba basam sik mapu ara, 77 ap arebik. Tonda, yuk ning ara, kambing basam 12 ap arebik. Ara, ‘Nun malye unyap ning nirya ara, nun ni Allah arye, namin kipsilirye, lyepnamsil’ tenen, lak kina ati, ining ning nirya dobuka, boyanganmekce, akam ning obikba, imam nang arye aning dobuka uku dongobikce, Allah Yahweh ati arebik.

³⁶ Tonda, atalak ara ninye deiyoknye Artasasta birye nyabukce, sekuka deiamuk surat ara, sik Israel deiyok nang arye, Raja el amu tam deiyok-deiyok nang ati, binuka arebik. Ara, weik balamle mek, Efrat mek atam, otam keting kumulban tam ulamikce, amutuku taleamik ninye deiyok-deiyok nang ati, sik dam binuka arebik. Tonda, atam taleamik ninye deiyok Gubenur nang ap, Bupati nang ap ati, asurat bokuka arebik. Aning akunum arebikopura, sik atam taleamik ninye deiyok-deiyok nang arye, ‘Nun ton melipnuyap’ tenen, teleb aren ning ton, weik tonun bulubuka, Allah si eren aik lipsisikuka dona ap, anyaik pum tam pil dona ap, nun Israel yala nang melina ap ati, sik melin ning arepsik.