Esra 6 - Eipomek

Minop talak, Persia mutuku nirya talibuka weik deiyoknye, Raja Kores birye “Wininamlume,” nyapdeiamuk yupu

¹ Ura atalak ara, yuknye erepdeibikba, tikukce Persia mutuku tam nirya taleamuk ninye deiyoknye, el si Darius birye nyapdeibukba, minop talak Raja Kores arye yupu nyapdeibukba, sekuka deiamik buku, ‘Dan unmal do?’ tenen, provinsi Babel mutuku nang dekena weik ning, delin aik pum arye, deiamikak nirya, moubuka bita dipdenin biyik.

² Bukni, asekuka deiamik yupu ara, epdeyikba, Babel mutuku asukum pia, kum deiamika ati, Media tam, mutuku si Ahmeta mutuku deiamikak eibik. Eibikopura, asekeiamik yupu noutamak ara, ayupu awamuk ning ara ani.

³ Na Raja Kores birye nyapsine. Persia mutuku tam nirya talibuka, ninye deiyoknye na si Raja Kores birye, deiyok koubuka taleamse talak, keting tamun tonok ning akunum ubuka anya arye, mambul yupu nyapdeipsiniba, dipkoprob adiparyuk aning ara winipnamlulume. Ayupu deiyok ara, Allah el si Yahweh, el si eren aik, Yerusalem mutuku dopnamak aik ara, minop talak yu nang arye uluplobik bukni, ‘Wini talak ara, tuba tamubuka dopnamak’ tenen, nyapse. Tonda nyapse. Allah el si eren aik dopnamakak, ayukumna ara, weik keil yangabuka ayukumna yo deipnamake. Ara, Israel nang arye, sik Allah el si Yahweh si erena ap, sik malye winin ning kum kibuka delina ati, sik kam ning obuka uku dabikirye, Allah ati arenamake. Ati ara, anyaik dolbinamake. Anyaik el cang ara, tukwak uapce ikilwelena ara, dua puluh tujuh (27) meter nukuka dopnamake. Aning atonun, anyaik el pala babye atonun, dua puluh tujuh (27) meter nukuka, pala kibuka dopnamake.

⁴ Anyaik el abilinga weik pala keil dobuka yangapdeibikirye, anerye otam winilye lelepdeipnamake. Tonda, anyaik pum bukni, akeil deice ara, weik yo lakase doprobikirye, aik pum tam deibuka dopnamake. Ara, keil lelildongona atia. Aning-aning nirya deken ning ara, na Raja Kores birye talinun ning noutamak arye dokuka arepneba, anyaik melibuka dona deiyok nang unamake.

⁵ Tonda, minop talak Allah el aik noutamak delilamik ning ara, Raja Nebukadnesar birye ubula dobukabukce, Yerusalem mutuku arye dobuka, Persia mutuku tam bukni, provinsi Babel mutuku bobinamuk ning nirya ara, tamubuka arepipyopura, Israel ninye arye, tuba tamubuka, Yerusalem mutuku bobikirye, anyaik noutamak deipnamake. Ara, minop talak aning nirya, Allah el si eren aik pum uamuk ning, emas ap, perak ap arye, memebuka delilamik ning ati nyapne. Ara, urdem ati kume, aning nirya ara, Allah el ning ulula atia. Israel nang arye, aning dobuka Allah el aik deipnamake. Na Raja Kores birye, “Wininamlume,” nyapdeipsine.

⁶ Nyapna arye, ayupu ton nyapsine. “Israel nang arye, Allah el si eren aik dopnamaka ati, sik ninye deiyok nang, Gubenur Tatnai, Efrat mek lilunak ulamuk provinsi talilyamnye ap, tonda, Seyetar-Bozenai ap, tonda sik amu tam pil donyaka deiyok nang nirya ap arye, Israel ninye ati malye kilina pia meme. Yerusalem mutuku tam bana meme. Ara, anggun Efrat mek lilun otam provinsi talilulum nang nirya ati nyapsine,” Raja Kores birye nyapdeibuk.

⁷ Nyabukce, ayupu ton nyabuk. Anggun anyapmasin nang nirya ara, Israel ninye Allah el si eren aik dopnamakak ton, pia kum dililbanamlulume. Israel nang ati, ikin ning sik nong deice delina meme. Yehuda yala nang sik Gubenur birye deiyok koubuka, Israel ninye sik deiyok nang nirya arye, Allah el si eren aik tuba tamubuka dopnamake. Minop talak anyaik dolamik sukumuk, tuba tamubuka dopnamake.

⁸ Tonda, anyapmasin yupu ara, ‘Akunuma,’ tenena kume. Aninguk kum bukni, narye anggun na amu tam deiyok nang ati, nyapniba, anggunce Israel ninye sik patalye ning ati, melibuka arenamlum ning ati nyapnusine. Ara, Yahudi yala ninye, sik deiyok nang, wisi nang arye Allah el aik pil donamaka ati, melibuka arenamlum ning ara, nyapnusine. Na talinun mutuku noutamak bulubuka delinyak uang yo bok, pajak bokuka arenamabe. Ara, anggun ululum mutuku noutamak arye, Efrat mek dam mutuku bukni, otam mutuku keting wekelban tam delinyak uang yo bok uk dobukapmunce, auang yo bok bokuka, sik Israel deiyok nang ati arenamlulume. Aning arenamaba deiyok ara, urdem ati kume. Ara, sik donamak pil batakna kumce, ‘Tuba pil dopnin banamak’ tenen, aning bulubuka arenamabe.

⁹ Aning atonun, Allah el aik pum pil melibuka dona deiyok nang, sik imam-imam nang patanamle ning ton arenamlulume. Ara, Allah el aik pum pil don nang, Yerusalem mutuku unamak talak patanamle ning ara, yim sapi winiryuk ning ap, yim domba ap, domba mi ap, arenamlulume. Deiyok ara, urdem ati kume. Aning doprobikirye, obuka Allah im deice ulinye, el arena ati, uku danamake. Tonda, sik imam nang arye moronamsiyak touk, anggunce gandum ap, garam ap, anggur duk yu mek ap, minyak zaitun ap, arenamlulume. Arepmunyopura, sik Israel yala nang arye, sik ni koproba Allah im deice ulinye arebikiba, ‘Kanye deipnamle’ tenen, wininamlulume. Anyaik pil donamak talak noutamak nirya ara, anggunce melibuka arenamlum ning ara, pia kum batakanamlulume. ‘Asum-asum nirya pia arenamlulume.

¹⁰ Deiyok ara, aning-aning nirya dobuka, sikti, arepipyopura, sikce, aning dobuka Allah im deice ulinye arena ati, arebicopura, elce kanye deipnamle. Tonda winibicopura, anggunce na Raja Kores ap, narye deyamse mapu ap ati, anggun ni koproba Allah moronamsiyake. ‘Allah arye melipsuturye, teleb kipdeipsutuba, nun wininamap ning nirya, telebuk unamsile’ tenen, nyapne.

¹¹ Ati ara, narye yupu tonap dukdongopbuka nyapsine. Dipkoprop nyapsine. Yatanye do nirya, anyapdeipsin yupu yaniplinye do, anyapdeipsin yupu batakuka yuk yupu nyaplinye bira, el ulamlye aik ayukumna yo kwinibuka, tace ketebikirye, el nong lukukabikirye, lakak lumupdeipnamake. Winibikirye, el aik babye dakuka uluplopnamake.

¹² Ati ara, Yerusalem mutuku ara, Allah arye wipdeiamukce, ‘Amutuku uniba, na si kibuka si erenamniake,’ tenyamuk mutuku anya arye, na patapnil ning ara, nyapnune. Ara, ninye deiyok nang, Raja nang do, yata mutuku nang arye do, yata yala nang arye, ‘Lik,’ tenebuka, ayupu yaniplobikirye, yuk yupu nyabicopura, Allah arye wenebuka opnamle. Aning atonun, ‘Yerusalem mutuku Allah el si eren aik binuka uluplobicopura, Allah arye, anang nirya obuka, sirya daknamle’ tenen, nyapsine. Na Raja Kores birye nyapsine. Nyabukce, surat sekeiamuk ningak yinibik. Ayupu akunum yinibikopura, Raja Darius birye nyabuk. “Na Raja Darius birye nyapmasin yupu uk, kekebuka winipmunyopura, aning ara, teleb uka. Ati, adiparyuk pia pi dobuka, kanye deipmunce, ayupu kekebuka, pil moubuka dopnin banamlulume, nyapsine. Na Raja Darius birye nyapsine,” nyapdeibuk.

Allah el si eren aik tuba tamubuka dobikce, weik sum kwalya kwalina ati, kintinibik yupu

¹³ Ura atalak ara, Persia mutuku tam ninye deiyoknye Raja Darius birye, “Winipnamlyame,” nyapdeibuk ati, Efrat mek lilun arye otam keting wekelban tam talibuka ulamuk ninye deiyoknye, Gubenur Tatnai ap, tonda deiyoknye Seyetar-Bozenai ap, tonda sik kwit capu nang nirya ati, Darius birye nyabuk touk, ayupu uk kekebuka ulamik.

¹⁴ Ura, sikce meliamikba, Israel yala wisi-wisi nang ap, sik amu tam pil dolamik nang ap, sik nirya arye pia dukdongopbuka dopnin balamika ani, Allah el si eren aik nirya adiparyuk dobikce sirya dakik. Ara, Allah arye Israel ninye ati, “Wininamlume,” nyamuk ning ap, tonda Persia mutuku ninye deiyok nang Raja Kores ap, tonda aminyan talak Raja Darius ap, anyapce aminyan talak Raja Artasasta ap arye, sik tam nang ati, “Winibuka melinamlume,” nyapdeiamik touk, melilamik. Tonda, Allah el yupu laka nyalamrik nang, nabi Hagai ap, Ido yala nang arye deiamiknye nabi Zakaria ap arye, Allah el yupu deice arye, “Winibuka unamlulume,” nyabuka peterelamdika deice arye, sik Israel yala ninye, sik ning nirya teleb upnin balamik.

¹⁵ Allah el si eren aik dobuka sirya dakik talak ara ani. Ara, ninye deiyoknye Raja Darius birye, Persia mutuku taleamuk talak, keting tamun tekbarye noutam bukni, awala si ara Hadar, tanggal 3 asum arye sirya dakik.

¹⁶ Allah el winiryuk aik melibuka don pil sirya dakikopura, Allah el aik pum pil dolamik nang, imam nang ap, sik pil melin nang, Lewi yala nang ap, tonda minop talak Babel mutuku bobinamikba, daulamika ani, tuba tamubuka Yerusalem mutuku yayik nang, wisi nang nirya ap, sik nirya weik arye, kanye deibikce, Allah el si eren aik weknuyik talak ati, mot sebukabikce, kam ning obuka, Allah ati arenmekce, el si erenmek.

¹⁷ Atalak ara, ‘Allah el aik tuba tamubuka dopmaba ara, bublan kukuka weknamap sum ara, weik sum kipnamle,’ tenebikce, sik Yahudi yala ninye arye, Allah ati kam ning obuka weika arye arebik. Ara, yim sapi seratus ap, yim domba dua ratus ap, domba mapu empat ratus ap, obukabikce, Allah ati arebik. Tonda, sik Israel nang arye, ‘Nun malye winin ning nirya, Allah arye namin kipsilirye, kum keipdeipnamsil,’ tenebikce, yim kambing dua belas (12) obukabikce, uku dabik. Ara, Israel ninye sik yala ara, yuk-yuk dua belas (12) ulamik touk, sik malye winin ning kilina ati, yim kambing dua belas yuk-yuk dobukabikce, obuka, Allah arena ati, uku dabik.

¹⁸ Aning akunum winibikopura, Allah arye nyamukba, Musa birye sekeiamuk buku noutamak nyabuk touk, Allah el aik pum pil dona deiyok nang, sik imam nang wibuka, yupa yuk-yuk bokuka si sekeibik. Aning atonun sik melin nang ati, Lewi yala nang ton wibuka, yupa yuk-yuk bokuka, si sekeibik. Awinibik ning deiyok ara, aminyan talak Allah el si eren aik noutamak pil donamik ning ati, akunum kintinibik. Aning nirya ara, minop talak Musa birye, “Wininamlume,” nyapdeiamuk touk winibik.

Minop talak, Mesir mutuku noutamak ulamikbuk, Allah arye Israel ninye, sik min yuma mapu min kum obuka ati, Kaplina Kwalina kwalipnamika ati, nyabuk yupu

¹⁹ Ura, sik nirya Yerusalem mutuku noutamak daulamika ani, keting tamun tonok ton, akunum ubukopura, wala tonok ning noutamak bukni, tanggal empat belas (14) deice arye, weik sum ubukopura, kwalina kwalibik. Ara, minop talak Persia mutuku tam nang arye, Israel ninye malye kibikce, dobuka bobinamik nang bukni, tuba Yerusalem mutuku akunum tamubuka yayik nang arye, kwalina kwalibik. Akwalina deiyok ara, Allah arye Mesir ninye sik min yuma mapu omuk talak ara, Israel ninye sik min yuma mapu kum omuk. Deiyok ara, sik malye winin ning pununa ati, domba basam obukabikce, bublan dam yo dana-dana ap, deice tam ap, ining likeipmek ning eibuka ati, sik min yuma mapu ona kumce, sik aik kaplibuka biyuk. Winibuka ati, akwalina si ara, Kaplina Kwalina nyalamik.

²⁰ ‘Kaplina Kwalina kwalipnamabe,’ tenena ati, sik imam nang ap, sik amu tam pil melin nang, Lewi yala nang ap arye, ‘Allah dam yatibirye, el si ereptibye’ tenen, tonda, ‘Nun malye wininyap ning nirya, Allah arye kum daneipsilirye, kum keipdeipnamsil’ tenen, Musa arye nyamuk touk talima ap, nong ap teleb kilin pil dolamik. Akunum winibikopura, sik Lewi yala nang arye domba basam mi obik. Ara, minop talak sik Babel mutuku nang arye, Israel nang malye ulamikce, Babel mutuku bobinamik ani, tuba tamubuka Yerusalem mutuku yayik nang nirya ati, Kaplina Kwalina kwalipnuyika ati, domba mi obik. Tonda, sik Lewi yala nang ap, sik yuk Israel yala nang ap, sik kayapu nang, Allah el aik pum pil melibuka dona deiyok nang, imam nang ap ati, Kaplina Kwalina domba mi obik. Akunum obikce, Allah yupu aik pil don nang ati arebikopura, ‘Allah arye nun malye winin ning nirya ara, namin kipdeipsilirye, lyepnamsil’ tenen, Allah arebik.

²¹ Ura, minop talak, Persia mutuku nang arye, Israel yala ninye obikce, Israel ninye nirya Persia mutuku bobinuka deiamikba, daulamika ani, tuba tamubuka yayik nang arye, Kaplina Kwalina domba mi opmek ning dobuka dibik. Tonda, yuk talye Israel ninye nirya arye, ‘Nun meliamsuknye, nun ni koproba Allah, el si Yahweh ati, el siuk erenamabe,’ tenebik nang arye ton, Kaplina Kwalina domba mi opmek ning dibik. Anang ara, ‘Nun dana-dana tam yala yuk-yuk unyak ninye, Allah ati dib kum tenenyakce, malye-malye winilamik ning tuba kum wininamabe. Tonda Allah arye, ‘Aning ara, na like, aning ara kum wininamlulume,’ nyapdeiamsuk ning, tuba kum wininamabe’ tenen, akunum batakik. Aning batakik nang nirya ara, sik nirya arye Kaplina Kwalina domba mi opmek ning dibik.

²² Atalak ara, like tekbarye talak noutam nirya, sik nirya arye kanye deibuka, aweik sum Kwalina, el si Nena Kum Roti Kwaning Kwalina kintinibuka, deipna arye kwalilamik. Akwalina kwalipnamika deiyok ara, ani. Ara, ‘Nun ni koproba Allah, el si Yahweh arye, Asyur mutuku ninye deiyok nang, Raja Kores bira, el kanye talima tamubukopura, anye birye weik melilamsukba, Allah el aik dobupe,’ tenebik. Ara, Allah el si eren aik tuba tamubuka domik talak, Asyur mutuku Rajanye birye, weik tonun melilamukba, anyaik tuba ton tabakuka dolamika ani, sirya dakuka dobik. Ati ara, kanye deibuka, ‘Nun Israel ninye talibuka usulul Allah ati, el si erepnuyap’ tenen, weik kwalina kwalibik.