Esra 5 - Eipomek

Israel ninye arye, Allah el si eren aik lipsisikuka dona ati, tuba tamubuka deiyok koubik yupu

¹ Yerusalem dana-dana mutuku tam ulamik nang, yuk yala nang arye, malye kanye bobikce, Persia mutuku weik deiyoknye, Raja Artasasta biti, surat sekdeibikba, anye birye Israel ninye ak, ‘Anyaik melibuka don pil bataklulume,’ nyapdeibukba, batakik. Bukni, talye daulamika ani, yuknye el pununa ati, Darius tikukce, Persia mutuku taleamukba, keting tamun bitinye akunum ubukura, Allah el yupu laka nyana deiyok nang, Hagai ap, Zakaria ap arye, sik Israel ninye ati, “Israel ninye talibuka melisulul Allah, el si deice arye nyapname,” nyabuka, yupu weik nyalamrikba, Israel ninye kekebikce, tonap anyaik pil deiyok koubuka dopnin balamik. Ara, Yehuda tam ap, Yerusalem mutuku noutamak ap, ulamik nang ati nyabik. Tonda, Hagai ara, ninye si Ido, el tam nang arye deiamiknye.

² Ayupu nyaprikba, ninye si Sealtiel el mi Zerubabel ap, tonda Yosadak el mi Yesua ap arye, anyaik dona ati, deiyok kouna deiyok nang kiprikba, Allah el si eren aik, Yerusalem mutuku noutamak, pil tuba tamubuka dopnin balamik. Tonda, Allah el yupu lak nyana deiyok nang arye ton, melibuka pil dopnin balamik.

³ Winilamikba, Efrates mek atam ubuka, otam keteng wekelbalamle tam talilamuk deiyoknye, Gubenur Tatenai ap, el amu tam bukni, yuk weiknye el si Syetar-Boznai ap, tonda yuk deiyok-deiyok nang ap arye, malye kanye bobikce, Yerusalem tam yayikopura, ‘Yata deiyoknye birye, ‘Telebe,’ nyapdeiamsuk yupu deice arye, anyaik lipsisikuka don pil donmalum do?’ nyabuka asibukce wenebik.

⁴ Tonda asipdeyik. “Anyaik lipsisikuka donmalum nang ara, yata nang arye donyak do? Sik si ara laka nyapsulume. Sik si dan do? Aninye si, sisipsumunyeba, biknamabe,” nyabik.

⁵ Nyabuka asipdeyikce, ayupu deice wenebik bukni, Allah arye, sik Israel yala nang, sik deiyok kibuka ulamik nang ati, ‘Yuk nang arye malye kibicak’ tenen, melibuka kaliknauk ulamuka ati, sik Israel deiyok nang arye, sik Gubenur Tatenai tam nang nyabik yupu kekebik bukni, ilil una kumce, anyaik lipsisikuka pil tuba donauk ulamik. Wininmeka ani, ati ara sik dam yanuka wenepmek nang arye, Persia tam ninye deiyoknye, el si Raja Darius biti, aning nirya laka nyana ati, surat sekuka dopkwetebikce nyabik. “Kume naio, nunda Yehuda noutam Yerusalem mutuku dilbipuba, sik Israel nang arye, sik arye si erenyak Allah ati, el si erena aik tuba tonap lipsisikuka donmake. Wininmaka ati, ‘Nunda, yata wiripnamap do?’ tenen, asipkiyabe,” nyabuka, surat sekuka, Raja Darius biti dopkwetebik. Asurat dopdeibikce, sikda, ‘Kume, ninye deiyoknye Darius birye, surat ton seklirye, nun tam tamubuka, kamun dopdeipsituopda, yupu ton ap kum nyapnamyabe,’ tenebik.

⁶ Sik anang ara, Gubenur Tatenai ap, el amutam deiyoknye, el si Syetar-Boznai ap, tonda sik amutuku yuk deiyok-deiyok nang ap arye, Babel tam weik deiyoknye, Raja Darius ati, surat sekuka dopwetebik. Asekik surat noutam nyabik yupu ara, ani.

⁷ “Telebe nun deiyoknye Raja Darius. Nun kanye ara, ‘Aning-aning nirya telebuk upkutuba, anda talye kanye deibuka, telebuk pia unamtume,’ tenenyabe.

⁸ Nun ni Rajao, nunce winiryuk winibupu ning ara, laka nyapnukiyabe. Nunce, Yehuda tam biburye, Israel ninye arye, sik si erenyak Pia Mikip Weik Ulul Allah, el si erena aik dam biburye dipdepu. Nunce eibuburye bikupu ning ara, sik Israel yala nang arye, anyaik ila tamubuka tonap lipsisikuka donmake. Ara, weik keil ‘Urasin teleb upnamleʼ tenena ati, besi arye keil urasin puturubuka kintibikirye, teleb ubuka delinyake. Tonda, anyaik abilinga noutam ara, weik kat yo ap yekuka deibikirye, anyaik lipsisikuka donmake. Apil nirya ara, pia pi dobuka, mikip weik tonun pil donmakiba, teleb kibuka donyake.

⁹ Sikce, wininmek bukni, eibupuopura, atam deiyok nang ati, asipdepu. Nunce, ‘Yata deiyoknye birye, ‘Telebe,’ nyabuka, surat sekuka dopdeiamsuk yupu deice arye, anggunce tamubuka anyaik lipsisikuka don ning kintinibuka deiplumce, apil donmalum do?’ asibuka wenebupu.

¹⁰ Tonda, naio, an babye bikna ati, nunce ton asipdepu. Ara, “Anyaik lipsisikuka donmalum deiyok nang ara, yata nang arye donyak do? Sik si yate nang do? Aninye si nirya, sisipsumunyeba, bikibirye, asi sekeipnuyabe,” nyabupe. Ara, ‘Sik tam nang ara, yata nang arye deiyok talibuka, yupu nyabikiba, apil donyak do?’ tenen, bikibirye, ‘An dam yanuka laka nyapkitipye,’ tenena ati asipdepu.

¹¹ Asipdepuba, sik Israel yala deiyok nang arye tamubuka nyapsike. “Kume, tukwak mutuku nirya ap, im deice ulul ning nirya ap, memebuka deiyamukce, aning nirya talilirye, deiyok kibuka, Pia Mikip Weik Ulnye, Allah ara, el amu tam ubirye, el piluk melibuka donyabe. Minop talak ara, nun Israel yala nang ulamupu tam mutuku nirya talyamsuk deiyoknye, nun mikip weik Raja birye, Allah el si erena aik domuk. Teleb kibuka domuk bukni, aminyan talak yu weik nang, Babel mutuku nang arye, anyaik ulubukabukce, sice buklobik. Anyaik malye kibikba, daulamuka ani, wini talak ara, nunce anyaik tuba tonap tamubuka lipsisikuka donmabe.

¹² Deiyok ara, nun Israel yala nang, nun apu yapu nirya malye-malye weik ulamik buk, im deice nirya talibuka, Pia Mikip Weik Ulul deiyoknye Allah arye sikti, malye kanye bobuka, yu weik ubuk. Winibuka ati ara, sik wenena ati, Allah arye atalak arye, Babel tam nirya talyamuknye, Kasdim mutuku nang arye deiyamikba, dadeipdanen yangalamika ani, yanuka deiyamiknye, el si Raja Nebukadnezar biti, lo aribukba, anye birye, nun tam yanuka, mal obuka sirya daksukce, Allah el si eren aik nirya ulubukabukce, sice buklobuk. Winibukopura, nun apu yapu Israel yala nang weik tonun tomubukce, tapu koubuka, el mutuku Babel mutuku tamubuka bobinamukce, ikin pil weik aruklamukba, daulamik.

¹³ Ikinuk daulamika ani, bukni, aminyan talak yuk ninye deiyoknye, el si Raja Kores, deiyok talibukce, Babel mutuku nirya talyamuk talak, keting tamun tonok noutam ara, Raja Kores birye, ‘Telebe, anggun Israel yala nang arye, Allah si erelamlum aik ara, tuba lipsisikuka dona ati, anggun mutuku tamubuka betume,’ nyapdeipsukba, amutuku yanuka, apil donmabe.”

¹⁴ “Aninguk kum bukni, minop talak Raja Nebukadnezar birye, Yerusalem mutuku uamuk Allah si eren aik pum tam, nun apu yapu arye deiamik dengna weik ning, emas ap, perak ap ara, ‘Aning ara, Allah el si eren aik pil dona ati deipnamabe’ tenen, deiamikba, anyaik uamuk ning ara, ubula dopdomukce, el mutuku, Babel mutuku tamubuka boyanuka, el isa si erelamuk ning ati, sik aik pum tam deiamuk. Deiamukba daulamika ani, aminyan talak Raja Kores birye, aning nirya bobiyukce, tonoknye el si Sesbazar biti aribuk. Sesbazar bira, Raja amu tam bukni, deiyoknye Gubenur atouknye ulamuk.

¹⁵ Tonda, Raja Kores birye, adengna weik ning dobuka, Gubenur Sesbazar biti aribukopura, ayupu nyabuk. ‘Aning nirya doropmince, Yerusalem mutuku bimince, Israel yala nang, sik si erenyak Allah, el si eren aik pum tam bobinuka deipnamlyame. Tonda, ance nyapminba, sik atam nang arye, Allah el si eren aik tuba ton ap lipsisikuka dopnamake. Ara, anyaik minop talak uamukak tuku deiceuk, dobikirye, aupnamlarya,’ nyapbuka, Raja Kores nyapdeibuk.

¹⁶ Nyabuka ati ara, anye ati, Gubenur Sesbazar birye Yerusalem mutuku yayukce, ‘Israel nang arye, Allah el si eren aik dopnamak’ tenen, elce anyaik amu tam, fondasi nyalamak keil ton memepdeibuk. Akeil akunum kintinipdeibuk talak arye dipdongobuka, atalak nirya ara, nun Israel nang arye, Allah el si eren aik tuba tonap, lipsisikuka donmapua ani, tuba donmap bukni, min sirya dakuka kum donmabe. Tuba donmap touk unmape,” nyapsik. “Sik Israel yala nang, sik deiyok nang arye nunti nyapsike,” nyabik. Ara, Gubenur Tatenai ap, el amutam deiyoknye, Syetar-Boznai ap, tonda sik amutuku yuk deiyok-deiyok nang ap arye, Babel mutuku weik deiyoknye, Raja Darius biti nyabik.

¹⁷ Nyabikopura, ayupu ton nyabik. “Ati ara, nun ni Raja Darius, anti moropkiyabe. Ance, ‘Telebe,’ teneptumopura, Babel mutuku noutam, an weik deiyoknye aik pum tam, mambul ning seken buku delilamak ning dipdelyame. Ara, minop talak Raja Kores birye, sik Israel yala nang ati, ‘Anngun eremlulum Allah si eren aik lipsisikuka pil doplulume,’ nyabuka ara, dipkoprop nyabuk do, kum do? Ayupu nyabukce, asurat sekeiamuk ning ara, ‘Aupmal do, kum do?’ tenen, ‘Dipdelyame’ tenen, moropkiyabe, nun nai. Dipdemince, auamlya eipminyopura, asurat ton nun dam dopkwetepsiminba, ‘Winiplulume, winiplulume,’ nyabuka, ‘Surat ton sekuka dopkwetepnamsilam’ tenen, moropkiyabe, nun nai,” nyabuka morobik. Ara Gubenur Tatenai ap, el amu tam deiyok nang ap arye, asurat sekuka kintinibikce, Babel mutuku talyamuknye, Raja Darius dam dopkwetebik.