Esra 3 - Eipomek

Allah el si erena ati, deiyok koubuka, sik kam ning obuka, uku dongolamik ning, tuba tamubuka dobik yupu

¹ Ura, Israel ninye Babel mutuku noutamak arye batakuka, sik mutuku koproba Yudea mutuku tam tamubuka biyikopura, Israel ninye sik yuk-yuk ulamik mutuku tamubuka biyikce, aik dobuka daulamik. Winilamika ani, wala tekbarye akunum ubukopura, awala uk tanggal satu akunum ubukopura, sik nirya bulubuka nikak, Yerusalem mutuku binuka wekikce, “Wini talak ara, Allah el si erenamabe,” nyabik.

² Ati ara, akunum deiyok koupnuyika ati, Yosadak el mi Yesua bira, Allah el aik pum tam pil melibuka dona deiyoknye ulamuka anya arye, el ap, el kwit capu nang ap, tonda Sealtiel el mi Zerubabel ap, el kwit capu nang nirya ap, sik nirya arye pil deiyok koubik. Sik minopce dobik pil ara, Israel ninye ati bico tenebuka pia meliamuk Allah, el si erena ati, keil yangapdeibik. Aning deiyok ara, ‘Allah ati si erebibyeba, nun malye winin ning namin kipnamsil’ tenen, kam ning obuka, akeil pala kibuka yangeiamik deice, uku sekuka dongonamikak ati kintinibikce, ila tamubuka dobik. Akeil pala kibuka yangapdeibik ning ap, akeil yangeibik deice uku sekuka kam ning obuka dongobik ning ap ara, minop talak Allah el pil dolamuknye Musa birye, “Allah el si erebuka arena ati, keil pala yangeipmunce, el arin ning aning, aning arenamlulume. Tonda, Allah el arena ati, winibuka-winibuka arenamlulume,” nyabuka sekeiamsukce, el buku noutamak deiamuk touk winibik.

³ Ura atalak ara, amutuku dana-dana tam ulamik ninye, yuk-yuk mutuku ninye ati, Israel nang arye ilil weik ulamukba, apiluk dolamik. Ara, sik malye winin ning namin kina ati, kam ning obuka uku danamikak ati, akeil pala kibuka yangapdeibik. Akeil pala kibuka yangapdeibika ara, minop talak uamukak uk deibuka dalamik. Akunum dobikopura, sik weilamik ning, kam ning bobukabukce, Allah el aik pil melibuka dona deiyok nang arebikba, anang arye aning obuka, akeil pala kibuka yangeiamik deice uku dalamik. Winilamika deiyok ara, ‘Nun malye wininyap ning ati, Allah wenepsilirye, opsilyak tenen ati, nun malye ning, namin kibuka pununa ati, aning obibirye, Allah el si erena ati, uku dabibyeba uku diplyopura, Allah arye aning eibuka kum opnamsile’ tenen, ati winilamik. Aning nirya ara, Allah arye, “Wininamlume,” nyamuk touk, beren tam babye, sintam babye nirya, aning atouk winilamik.

⁴ Tonda, Musa birye, “Atalak akunum uplyopura, winipnamlulume,” nyabuka, Allah yupu noutamak sekeiamuk touk, Allah el si erena ati, mitikto bai asik dobikce, tia talak ati, anyaik pum ulamikce, kwalina kwalilamik. Atalak ara, Musa birye, “Asum-asum nirya, Allah el arena ati, kam ning winibuka opmunce, uku danamlulume,” nyapdeiamuk touk, aninguk winipnin balamik. Atalak dam kipnaba, aning obuka uku dalamik.

⁵ Aweik kwalina talak akunum upnopura, aning akunum winipnin balamik anya arye, aminyan talak, ‘Nun malye winina ati wenebuka opsilyak,’ tenen, ‘Nun malye ning pununa ati, kam ning obuka, Allah el arenamabe’ tenen, uku dalamik. Tonda, Allah arye, “Wininamlume,” nyapdeiamuk touk, weik sum winiryuk wala upnopura, ‘Asum ara mambul sum,’ tenebuka, Allah ati si erebuka si erena ati, kam ning obuka elti, arelamik. Tonda, Allah el si Yahweh arye, el yupu noutamak, “Atalak wininamlume, atalak ton winibuka wininamlulume,” nyabuka, weik sum wipdeiamuk touk, yuk weik sum nirya ara, atonun winibuka, winipnin balamik. Tonda, sik Israel ninye arye, ‘Allah ati, si erebuka, telebe nyanamap’ tenen, teleb ning talye urdemuk dobukapna arye, Allah el si Yahweh ati, si erelamikce arelamik.

⁶ Ura, Allah el si eren aik tamubuka deiyok koubuka, Ayukumna yo min kum ikmek talak bukni, tekbarye wala tanggal satu ubukura, aninye nirya arye, tuba tonap, deiyok koubuka, Allah el si erena ap, tonda sik nong pununa ap ati, sik kam ning obuka arebikba, apil melibuka dona deiyok nang arye uku dalbalamik. Allah el si eren aik, tuku pum bisik keil weik yangapdeipnunyik ning ara, min kum deiabik talak ara, el arin ning deiyok koubuka arelbalamik.

Allah el si eren aik deiyok koubuka, domik yupu

⁷ Israel ninye nirya arye, aik pil melibuka don nang arena ati, yo bok uang moubuka deibik. Ara, keil deibuka puturun nang ap, yo cakukabikirye, aik nong dopnamika deiyok nang ap ati arebik. Tonda din ap, mek ap, zaitun yo duk mek minyak mek ap ara, bubukabikce, sik Sidon mutuku nang ap, Tirus mutuku nang ap ati arebik. Arebik ning deiyok ara, ‘Amutuku nang arye, aning doprobikirye, Libanon mutuku bikirye, weik kepyal yo deiyok tapu kobikirye, bobuka laut mekwen deice, Libanon mutuku arye, Yafo mutuku boyanamak’ tenen, arebik. Awinibik ning nirya ara, Persia mutuku talibuka, ninye deiyoknye ulamukce, el si Raja Kores birye, “Winipnamlume,” nyapdeibuk touk, winilamik.

⁸ Ura, Allah el si eren aik dopnamika ati, Yerusalem mutuku tamubuka biyikopura, daulamika ani, keting tamun bitinye noutamak bukni, wala bitinye akunum ubuk. Akunum biyikopura, Yerusalem mutuku Allah si eren aik tuba tamubuka dopnuyik talak ara, Sealtiel el mi Zerubabel ap, Yosadak el mi Yesua ap, sik kwit capu nang nirya ap, ton yuk nang nirya ap, Yerusalem mutuku biyikce, anyaik dona ati, pil deiyok koubik. Ura, anang noutamak ara, Allah el aik pum pil melibuka dona deiyok nang ulamik. Tonda, sik melin nang, Lewi yala nang ap, Yerusalem biyik. Anang nirya ara, minop talak arye sik Babel mutuku nang arye, Israel ninye obikce, anang nirya bobuka, Babel mutuku bobinmikba, keting tamun weika arye daulamika ani, wini talak ara Babel mutuku batakuka, Yerusalem mutuku tuba tamubuka biyik. Allah el si Yahweh, el aik pum pil melibuka dona deiyok nang arye, ‘Anyaik don pil yupu bokna deiyok nang ubikirye, pil melildanamak’ tenen, Lewi yala nang wipdeibik. Sikce wipdeibik nang ara, keting tamun dua puluh tahun deice tam ulamik nanguk wibik. Akunum wipdeibikba, anang arye Allah el si Yahweh, el si eren aik pil dolamik talak ara, deiyok nang kibuka, ‘Pil teleb kibuka donyak do?’ tenen, dipra balamik.

⁹ Ati, Yesua el kwit capu ap, elce deiamuk mapu ap, el kwit capu nang nirya ap, tonda Hodaya yalanye Kadmiel ap, elce deiamuk mapu ap, tonye el si Henadad ap, elce deiamuk mapu ap, tonda anang arye deiamik mapu ap, anang nirya, sik weit capu silip ap, neiktoto pil dolamik. Anyapmap nang nirya ara, Lewi yala nang ulamikce, Allah el aik pum pil dona deiyok nang ati melibuka pil dolamik. Yuk nang Allah el aik dolamik talak ara, anyapmap nang arye deiyok nang kibuka, ‘Yahweh el aik teleb kibuka donyak do?’ tenen, dilbalamik. Sik nirya arye, Allah yupu aik dona ati, Lewi yala nang melilamikba, apiluk dolamik.

¹⁰ Atalak ara, sik aik don nang arye, Allah el si eren aik dona ati, weik keil pala kibikce, yangabuka ayukumna yo ikik talak ara, Allah el aik pum pil dolamika deiyok nang, sik pil don talak ongolamik baju ongobukabikce, binggong nyan ning, el si terompet dobukabikce, pong-pong nyabik. Tonda, sik Lewi yala nang bukni, ninye si Asaf, elce deiamuk mapu arye, sikce talipmek ning ara, piring pala atonun ubuka, kat ning arye memamika ak, onmekce lelim nyabik. Sik nirya yanuka, anyaik dopnamika dam tikuka, Allah el si Yahweh ati, si erebuka mot selamik. Aning winibika nirya ara, Raja Daud, Israel ninye sik ninye deiyoknye ulamuk talak arye, “Wininamlume,” nyapdeiamuk touk winibik.

¹¹ Winibikopura, Allah el si Yahweh ati kanye deibukabikce, “Allah ara, pia teleb ulula anya arye, ‘Telebe,’ nyababe,” nyabuka, el si erebuka mot senmek. Amot noutamak senmek yupu ara ani. “Nun ni Allah, anda pia teleb ulyame. Ance nun Israel ninye ati, pia kum batakasimince, bico tenebuka melisilyamnye,” nyabuka mot senmek. Mot akunum sebikopura, Allah el si eren aik ayukumna ati, weik pala keil yangabuka, tuku pum bisik ayukumna yo deibik. Akunum deibikopura, anyaka bulubuka unmek Israel ninye nirya arye, sik ni koproba Allah, el si Yahweh ati, weik yupu arye el si erebikce unmek.

¹² Abulubuka wekmek nang weika arye, sik talima noutamak weik kanye deibikce, weik yupu arye, ‘Telebe,’ nyabik. Bukni, Allah el aik pum pil melibuka dona deiyok nang, wisi nang ap, tonda Lewi yala nang, wisi nang ap, tonda Israel yala yuk-yuk bukni, sik yala deiyok nang, wisi nang ap nirya arye, mambul kanye bobuka engebik. Aengebik ning deiyok ara ani. Ara, Allah si erelamik aik minop talak domika elilamik nang arye, winiryuk ayukumna yo ikmekba, eipmekce malye kanye bobuka, malye yupu nyanmekce engebik. Ara, minop talak domik aik atonun ubukba kum eibik ati, engebik.

¹³ Ati ara, sikce yuk-yuk ton kum, tonok kanye bobukabikce, sik kanye talima noutamak arye tenibuka, ton nang engebikba, ton nang arye, ‘Telebe,’ nyabuka, Allah si erenmek. Tonok talak aryuk yupu neiktoto weik arye nyanmeka ak, yuk mutuku nirya kekenmek. Anang ara, engenmek bukni, yuk mutuku unmek nang arye, ‘Engenmak do, mot senmak do?’ tenen, kel bikmanto kum ubik. Ara, lelim pia weik nyanmeka atia.