Esra 10 - Eipomek

“Yuk mutuku kilapu donyaba ning ara, batakabe,” nyabik yupu

¹ Atalak ara, Esra birye, Allah si eren aik urasin tam binuka kanupdongobuka bukukce, “Se, dipkoprob nunda pia malye unyabe,” nyabuka, engebukce, Allah ati laka nyabuka morobuk. Israel nang noutam ara, sal babye, kilapu babye, tonda sik mapu babye, sik nirya ara, weik tonun bulubuka, Esra aunmoka dam, yanuka wekmeka ati, sik nirya anyaik damuk yanuka antanapdongobuka wekmek nang nirya ara, ‘Se, yata wiripnuyap do?’ tenen, mikip weik tonun engenmek.

² Wininmek talak ara, Elam yala nang, el si Yehiel bukni, el mi Sekanya birye, Esra biti nyabuk. “Nunda aunmab mutuku noutam ulamik nang arye, deiamik kilapu dobuka donyaba deice arye, akunuma nun ni Allah ati, batakuburye, el dam akunum malye kilinyabe. Dipkoprop aning akunum wininyaba ara, nun Israel nang ara, lo ton tuba aupnamsila ati, nun malye ning batakibirye, nun ni Allah, el dam tamubuka yatibye.

³ Ati ara, nun nirya arye Allah el dam yanuka, ‘An yupu uk kekebuka dobolbanamabe,’ nyabuka, nyalin yupu nyapdeibibirye, nunce yuk mutuku kilapu dobuburye, mapu deibupu ning ara, sik ap, sikce deiamsik mapu ap nirya ara, adiparyuk batakibirye, anang yukak yakdonoknamabe. Ara, nun deiyoknye Esra, ance, ‘Wininamlume,’ nyapsiminye yupu ap, tonda Allah arye, ‘Aning ara, wininamlume, aning ara pia kum wininamlume,’ nyapdeipsuk yupu, moubuka talibikirye, ilil upliba, moubuka dobolbanyak nang arye nyapsice yupu ara, ayupu nirya kekebibirye, dobolanauk unamabe. Tonda, Allah arye, ‘Anggunda aning-aninguk talibuka wininamlume,’ nyapdeipsuk mem yupu aupmal touk, aninguk talibibirye, moubuka unamabe.

⁴ Na nio, Esra anda, nun deiyoknye ulyama ati, ance deiyok talibuka tikmince, ‘Aning ara, adiparyuk winipnamlume,’ nyapsiminye touk, wininamabe. Ance nyapsiminba, nunda dipkoprop, anyapsiminye touk, wininamabe. Nunce dukdongobuka melipnamabe. Na nie, aning nirya ara, an weik tonun adiparyuk, nyapnulyame,” Sekanya birye, Esra biti nyabuk.

⁵ Nyabukba, Esra birye deiyok koubuka, Sekanya birye nyabuk atonun winibuk. Ati, Esra birye, imam-imam nang nirya, sik weik deiyok nang ap, sik pil melin nang, Lewi yala nang ap, tonda yuk daulamik Israel nang nirya ati, nyabuk. “Dipkoprop anggun nirya arye, nyapnalume. Ara, ‘Nun nirya ara, Sekanya birye nyapmasil touk, dipkoprob wininamabe. Allah el yupu nyapsilye touk, kekebibirye, aninguk talibuka wininamabe,’ nyabuka, na kekenmanyak arye, nyalin yupu deice arye nyapnalume,” nyabuka, Esra birye nyabuk. Winibuka nyapdeibuk touk, sik nirya arye aninguk winibik.

⁶ Sik anang nirya arye, “Dipkoprop aning ara, wininamabe,” nyabuka, nyalin yupu deice arye akunum nyaplyopura, Esra bira, Allah si eren aik dam arye batakuka, Elyasib el mi Yohanan, el ulamukak biyukce, el aik binuka mapmok. Abinmok talak ara, ‘Se, nun Israel nang malye winilamupu’ tenen, engenauk unmok. Ara, minop talak, Babel mutuku yin talin nang arye, Israel nang obuka sirya dakikce, tapu koubuka, sik mutuku noutam binuka deiamikba, daulamika ani, aminyan talak tamubuka, Yehuda tam yanamik nang, sikce Allah el yupu batakuka, malye ulamik ning ati, ‘Se, yata ati wininyak do?’ tenen, tuba teninmokce, din ap, mek ap, pia ton kum dinmokce, din si tebuka mapmok.

⁷ Ura daunmoka ani, aminyan talak ara, elce lak yupu ton nyabuka, sekeibukba, Yudea noutam nirya ap, Yerusalem weik asik noutam ap nirya, dobuka bobinmekce, laka nyanmek. Ara, ‘Wini talak ara, anggun Israel nang nirya, anggun apu yapu, pera mutuku, Babel mutuku delilbinamikce, ikin pil dilamikba, pil dolamik nang nirya arye, deiamikba, dadeipdanin yangalamika ani, batakikba, tamubuka nun mutuku, Yerusalem mutuku yanuka unmalum nang ap, Yehuda tam yanuka unmalum nang ap nirya ati, nyapsine. Anggun nirya ara, like winilye sum arye, minopce asukum yanuka, na damuk, Yerusalem mutuku bulupnamlume,” nyabuka, yupu nyapdeibuk.

⁸ Tonda, ayupu noutam arye, yupu ton nyabuk. “Talye kum nyapsine. ‘Sik aryuk binamabe,’ tenena meme. Yatanye do nirya, like winilye sum arye Yerusalem mutuku bulubuka yangana ati, lo arepmabiba, asukum kum yanamak nang ara, sik ulamle ning ap, sik tuku ap, sikce talilamikce ning yuk-yuk ning nirya ap ara, alubuka dopropnamabe. Tonda, sik anang ati ara, ‘Anggunda, Yerusalem mutuku noutam ara, pia kum unamlume. Nun Israel yala nang unamabak arye, yakdonokipyopura anggun ap, neika pia kum unamabe,’ nyapdeipnamsiabe. Aning ara, nun Israel yala nang ati, deiyok talibuka, ninye deiyok kibuka unyap nang arye, ‘Akunuma, winipnamabe,’ nyapdeibupu touk wininamabe.” Esra birye nyapdeibukba, anyasik yupu bobinuka laka nyalbanmekba, aulamik nang nirya kekebik.

⁹ Sik nirya kekebika ati, like winilye sum, akunum ubukopura, sik Yehuda yala tam ninye ap, Benyamin yala tam ninye ap ara, adiparyuk bulubuka, Yerusalem mutuku noutam bukni, Allah si eren aik damuk yanuka bukmek. Ara, wala pindikin buk, tanggal dua puluh (20) deice ara, Allah si eren aik urasin tam bulubuka bukmek. Asum ara, weik mok cenmoka ati, sik anang nirya ara, pia arukna unmokba, ‘Se, yupu talipnamap ning ap, malye winilamupu ning ap ara, mambule’ tenen, ikin kanye bobuka unmek.

¹⁰ Winibikopura, Esra birye, sik anang kan-kan tikukabukce, sik nirya ati nyabuk. “Anggunda, kunum malye winilulume. Nun ni Allah arye, ‘Wininamlume, aning ara, pia kum wininamlume,’ nyapdeiamsuk yupu ap, el ap ati, yaninauk ululume. Ara, anggunce Israel mutuku noutam ara, yuk malye winin ning ton, winilulum bukni, anggunce yuk dana-dana tam mutuku kilapu dobuka, doluluma deice arye, pia malye winin ning ton, tabakuka winipmalume. Ati, anggun malye winilamunyeba, pia weik kipninbalyopura, aning deiyok upmalya ati, Allah arye weik tonun wenepnamsile.

¹¹ Ati ara, malye umunye ning ara, duknuna kum bukni, lakakibuka, laka nyanamlume. Nun apu yapu, sikce si erelamik Allah, el si Yahweh dam aryuk, ‘Se, dipkoprob nun malye wininyabe,’ nyabuka, laka nyanamlume. Aninguk kum bukni, winipmunyopura, Allah elce, ‘Winipnamake,’ tenesilye ninguk, el kanye delin piluk talibuka donamlume. Ara, nun dana-dana tam unyak nang ap, nun mutuku noutam unyak ninye asik nang ap, sik Israel yala nang arye, yuk mutuku kilapu dobuka boyamunce, neika umunye kilapu nirya ap ara, yukak yakdonoknamlume. Anang nirya yakdonoknamlume,” Esra birye nyabuk.

¹² Nyabukopura, abulubuka yanmek Israel nang nirya ara, yupu mikip weik tonun nyabik. “Se, ance nyapsilam yupu ara, dip nyapsilame. Nunce anyapmasilam touk, adiparyuk wininamabe.

¹³ Bukni, nun asukum bulubuka yanmapce, wekmap nang ara, pia weike, tonda wini talak ara, mok weik cenamle li akunum upmasila ati, arup babye weik mok cenmala ati, nunda bai tam asukumuk pia kum tiktibye. Tonda, amalye winilamupu ning ara, pia ikin weik ati, like tonok do, bitinye do, winilye sum deice aryuk do, aning nirya kum lipsisikdatibye. Nun malye ning ara, minopce kum kipdeipdatibye. Deiyok ara, nun nirya ara, anyapmasilam malye una ara, pia weik wininyaba atia.

¹⁴ Ati ara, nunce anti moropkiabe, “Ance nun deiyok-deiyok nang ati, ‘Winipnamlume,’ nyapsiminba, sikce nun Israel yala nang nirya ati, ‘Wininamlume,’ nyapnamsiake. Ara, Yerusalem mutuku dana-dana noutam nirya, asik dobuburye, anyapmasilam malye ning, yuk mutuku kilapu dobuka domuburye, neika unyap ning ati ara, nun deiyok-deiyok nang arye, ‘Atam nang ara, asum yanamlume. Tonda, anggun yuk asik ululum nang ara, atalakuk anggunda bulubuka yalulume,’ nyapsikiba, kekebibirye, anyapsikce touk, wininamabe. Sikce yupu nyabikiba, yanuka bukipyopura, nun mutuku yuk-yukak bukni, sik deiyok nang arye, yupu lipsisikuka bokeipnamsiake. Winitebyopura, nun deiyok-deiyok nang ap, yupu bokolina deiyok nang, yupu lipsisikuka bokolina deiyok nang ap arye, winipsikiba, aminyan talak, nunce malye winilamupu ning ati, Allah elce nunti, yu upmalye ning kum daninbalamlya ani, aminyan talak, tuba kum derenamsile.” Sik abulubuka wekmek Israel yala nang nirya arye Esra biti nyabuka moronmek.

¹⁵ Anyabik ning ati, yuk nang arye ton, “Kume, aning ara, pia kum wininamabe, aning ara, malye ninge,” kum nyabik bukni, dumbarye nang aryuk, ‘Nunda, aning kume, tenepmabe,’ nyabik. Ara, Asael el mi Yonatan ap, Tikwa el mi Yaseya ap, nyapdikba, tonda bitinye nang ton, Mesulam ap, tonok Lewi yalanye el si ara, Sabetai ap, sik anang aryuk, ‘Nunda kume, aning kum wininamabe,’ nyapdik.

¹⁶ Dumbarye nang aryuk, ‘Nunda kume,’ nyabika ati, minop talak Babel mutuku yin nang arye, nun apu yapu malye kibuka, Israel nang tapu koubuka, Babel mutuku bobinuka delilbinamikba, daulamika ani, tamubuka yanamik Israel nang nirya ara, “Yo, Esra birye nyapdeipmasil touk, aninguk wininamabe,” nyabik. Ati ara, imam Esra birye, Israel yala nang deiyok kibuka ulamik nanguk, sik yala yuk-yuk daulamik touk, ninye ton wibuka, wipdeibukce, sik ayala-ayala deiyok nang ton, sik si nirya ara, si sekena buku noutam arye, sekuka deibuk. Winibukba, takubarye (10) wala kibuk talak ara, tanggal satu keting noutam yayuk sum noutam arye, sik anang nirya bulubuka yayikce, yuk mutuku kilapu dolon ning ati, yupu talibik.

¹⁷ Winilamika ani, wala winilye akunum mabikce doyayuk talak ara, sik amutuku noutam ulamik nang arye, yuk dana-dana tam mutuku kilapu dobuka dolamikce, malye winilamik ning ara, yupu talibuka lipsisikikce, teleb kipdeibuka sirya dakik.

Yuk mutuku kilapu dolamik nang, sik si sekik yupu

¹⁸ Ara, sik Israel yala nang arye, yuk mutuku kilapu dolamik nang nirya ati, wibuka sik si sekik. Sik imam pil dolamik nang noutam, ton bokuka yuk mutuku kilapu dolamik nang ara ani. Ara, Yosadak birye deiamuknye Yesua ap, el kwitcapu sik si ara, Maaseya ap, Elieser ap, Yarib ap, tonda Gedalya ap, sik si nirya sekik.

¹⁹ Sik anang nirya ara, sik taruk erebikce, nyalin yupu deice arye, “Diba, yuk mutuku nang arye deiamik kilapu, nunce dobupu kil ara, bataknamabe,” nyapdeibikce, sik yuk mutuku kilapu dolamikce, malye ulamik ning nirya, kum daneibuka teleb kilina ati, domba basam yim obuka boyayikce, uku dongobuka, Allah ati arebik.

²⁰ Tonda, aning atonun, Imer yala nang ara, Hanani ap, Zebaja ap, babye atonun winipdik.

²¹ Tonda, Iram yala nang ara Maaseya ap, Elia ap, Semaya ap, Yehiel ap, tonda Uzia ap babye atonun arebik.

²² Pasyur yala nang ara, Elyoenai ap, Maaseya ap, Ismael ap, Netanel ap, Yozabad ap, tonda Elasa ap, babye atonun arebik.

²³ Tonda, sik Lewi yala nang ara, ani. Ara, Yozabad ap, Simei ap, Kelaya ap, el si ton bukni, yuk si ara, Pethaya ton nyalamik. Tonda, Yudah ap, tonda Elisa ap babye, atonun arebik.

²⁴ Atonun, Allah si eren aik mot nyana ati wibuka deiamik yala nang ara, tonoknye Elyasib birye, yuk mutuku kil domuka ati, el babye ton aninguk arebuk. Allah si eren aik wekelbana ati, bisik bublan dam kalikin nang ara, Salum ap, Telem ap, tonda Uri ap, ulamika ati, sik babye atonun arebik.

²⁵ Ara, sik Israel yala nanguk bukni, yuk nang ara, Paros birye deiamukba, dadeipdanin yangalamika ani, deiamik yala nang, sik si ara, ani. Ara, Ramya ap, Yezia ap, Malkia ap, Miyamin ap, Eleasar ap, Malkia ap, tonda Benaya ap sik babye atonun arebik.

²⁶ Tonda, Elam yala nang arye deiamik nang, sik si ara, ani. Ara, Matanya ap, Zakaria ap, Yehiel ap, Abdi ap, Yeremot tonda Elia ap babye, aning atonun arebik.

²⁷ Atonun, Zatu yala nang arye deiamik nang, sik si ara, ani. Ara, Elyoenai ap, Elyasib ap, Matanya ap, Yeremot ap, Zabad ap, tonda Asazia ap babye, aning atonun arebik.

²⁸ Tonda, Bebai birye deiamukba, dadeipdanin yangalamika ani, deiamik yala nang, sik si ara, ani. Ara, Yohanan ap, Hananya ap, Zabai ap, tonda Atlai ap, sik babye, aning atonun arebik.

²⁹ Bani birye deiamukba, dadeipdanin yangalamika ani deiamik yala nang, sik si ara ani. Ara, Mesulam ap, Maluk ap, Adaya ap, Yasub ap, Seal ap, tonda Yeramot ap babye, aning atonun arebik.

³⁰ Tonda, Pahat-Moab birye deiamukba, dadeipdanin yangalamika ani deiamik yala nang, sik si ara, ani. Ara, Adna ap, Kelal ap, Benaya ap, Maaseya ap, Matanaya ap, Bezaleel ap, Binui ap, tonda Manasye ap babye, aning atonun arebik.

^31-32 Tonda, Hiram birye deiamukba, dadeipdanin yangalamika ani, deiamik yala nang, sik si ara, ani. Ara, Elieser ap, Yisia ap, Malkia ap, Semaya ap, Simeon ap, Benyamin ap, Maluk ap, tonda Semarya ap babye, aning atonun arebik.

³³ Tonda, Hasum birye deiamukba, dadeipdanin yangalamika ani deiamik yala nang, sik si ara, ani. Ara, Matnai ap, Matata ap, Zabad ap, Elifelet ap, Yeremai ap, Manasye ap, tonda Simei ap babye, aning atonun arebik.

^34-37 Tonda, Bani birye deiamukba, dadeipdanin yangalamika ani, deiamik yala nang, sik si ara, ani. Ara, Madai ap, Hamram ap, Uel ap, Benaya ap, Bedeya ap, Keluhu ap, Wanya ap, Meremot ap, Eliyasib ap, Matanya ap, Matnai ap, Yaasai ap babye, aning atonun arebik.

^38-42 Aning atonun, Binui birye deiamukba, dadeipdanin yangalamika ani, deiamik yala nang, sik si ara, ani. Ara, Simei ap, Selemya ap, Natan ap, Adaya ap, Maknadbai ap, Sasai ap, Sarai ap, Asareel ap, Selemya ap, Semarya ap, Salum ap, Amarya ap, tonda Yusuf ap babye, aning atonun arebik.

⁴³ Tonda, Nebo birye deiamukba, dadeipdanin yangalamika ani, deiamik yala nang, sik si ara, ani. Ara, Yeiel ap, Matica ap, Zabad ap, Zebina ap, Yadai ap, Yoel ap, tonda Benaya ap babye, aning atonun arebik.

⁴⁴ Sik asi sekik nang nirya ara, sikce yuk mutuku dana-dana tam ulamik nang arye deiamik kilapu, dobuka neika ulamik. Winibuka malye winilamika ati, sikce dolamik kilapu ara, adiparyuk batakik. Winibikce, sik akilapu ap, sikce deiamik mapu ap ati, “Tamubuka anggun mutuku uk binamlume,” nyabuka, yakdonokikba, biyik nang ati, sik si sekike.