Esra 1 - Eipomek

Persia mutuku taleamuka ninye deiyoknye, Kores birye, “Yahudi yala ninye, sik mutuku koproba binuyake,” nyabukba, tamubuka biyik yupu

¹ Ura, Persia mutuku ninye deiyoknye, Raja talibuka ulamuknye, el si ara Kores. Raja Kores birye, amutuku deiyok koubuka min yuma taleamuk keting tamun noutamak arye, mambul yupu ton nyapdeibuk. Ara, Allah el si Yahweh arye, Persia mutuku deiyoknye Raja Kores dam yanuka, el kanye talima tamubukba, el talima noutamak arye yupu nyapdeibukba, Raja Kores kekebukce, ayupu dobukabukce sekuk. Akunum sekukopura, el amu tam nang ati, “Ayupu nirya dopropmunce, na talinun mutuku noutamak nirya, yinibuka laka nyalbanamlulume,” nyapdeibuk. Raja Kores birye awinipmuk ning deiyok nirya ara, minop talak Allah el si Yahweh arye, el yupu laka nyalamuknye, Yeremia biti, yupu nyapdeibukba, kekebukce sekeibuk ning ara, ‘Nong upnamle’ tenen, winibuk. Aning nirya deiyoknye bira, Allah el uka.

² Persia mutuku ninye deiyoknye, Raja Kores birye sekeiamuk yupu ara, ani. Kume im deice ap, tukwak ap nirya talibuka ulul Allah, el si Yahweh arye nyapnuke. “Pemerintah Raja Persia mutuku talibuka ulyamnye, ance ayupu kel biknulyame. Yata mutuku do nirya, tukwak mutuku noutam unyak ninye deiyok nang nirya ap, sikce talinyak ning nirya ara, an taruk deice deipkine. Narye anti akunum wipdeipkine. Deiyok ara, Yehuda yala nang anggun tam noutamak bukni, Yerusalem mutuku noutamak ara, Allah na si eren aik dopnamnulume.

³ Ati ara, ance talilyam mutuku noutamak unyak bukni, Allah el mapu unyak ninye nirya ati ance, ‘Telebe,’ nyabuka, ‘Anggun ni koproba Allah melipsilyeba, anggunce el si eren aik dopnamlulume,’ nyapminyopura, anang nirya arye Yehuda tam noutamak, Yerusalem mutuku binamake. Yerusalem mutuku bikirye, Allah na si eren aik dopnamake. Nara Allah, Israel yala ninye ati, bico tenebuka pia melinune. Nara Yerusalem mutuku noutamak unune. Narye ayupu nyapkina ati, ance, ‘Telebe dabilyame,’ nyapminba binamake,” Allah arye nyapnuke.

⁴ Raja Kores birye ayupu nyabukce ayupu ton nyabuk. “Tonda, yata nang do nirya, olalamik talak kum diplamikce, tuba kam unyak nang ara, Allah arye wiamuk ninye ati, wini talak nun ap neika unyap buk, Yerusalem mutuku binamak nang nirya ara, sik dam ululum ninye arye melinamlulume. Ara, Israel ninye akunum sik mutuku koproba tamubuka binamaka ati, anggun Persia mutuku umunye ninye nirya talibuka ululum ning, dekna weik ning dobuka, anang ati arepnamlulume. Ara, emas ap, perak ap, ninye arye weilamak ning ap, teleb bona ap dobuka, Yerusalem binamak nang ati arepnamlulume. Tonda, Yerusalem mutuku bikirye, Allah si eren aik dobikirye, el si erena ati arenamak ning, anggun Persia nang arye, aning-aning nirya bulubuka, el wiamuk ninye ati arepnamlulume. Allah el si Yahweh arye ayupu nyapdeiamnukba, anggun na amu tam nang ati nyapsine,” Persia mutuku ninye deiyoknye, Kores birye nyabuk.

⁵ Nyabukopura, sik Israel ninye bukni, yuk-yuk ninye deiyok kibuka ulamik touk, Yehuda yala deiyok nang ap, Benyamin yala deiyok nang ap, Allah el aik pum pil melibuka dona deiyok nang ap, anang sik melin nang, Lewi yala nang ap, ‘Binamap’ tenen, kintinibik. Ara, yata yala nang do nirya, Allah arye sik kanye talima tamubukce, sik talima noutamak, mikip kipdeibukba, kanye deibukabikce, ‘Yerusalem mutuku tamubuka bibirye, Allah el si Yahweh, el si eren aik dopnamabe,’ tenebikce, kintinibik.

⁶ Atalak ara, Persai mutuku ninye nirya, sik neiktoto aulamik touk, bulubuka arebik ning ara, emas ap, perak ap, ninye arye weilamak ning ap, teleb bona ap dobuka, Yerusalem binamik nang ati arebik. Tonda, Yerusalem mutuku bikirye, Allah si eren aik dobikirye, Allah el si erena ati, kanye deibuka arenamak ning, yuk teleb-teleb ning nirya, sik Persia nang arye, aning-aning nirya bulubuka arebik. Ara, sik kwit capu bisik banuyik talak ara, Israel ninye ak arebik.

⁷ Aninguk kum bukni, Raja Kores birye, ‘Akonop ning ton dobuka bobinamak’ tenen, minop talak Allah el si Yahweh, el si erelamik aik pum deiamik ning ton arebuk. Aning ara, minop talak Yerusalem mutuku, Allah si eren aik noutamak deiamik bukni, Babilonia mutuku ninye deiyoknye, Raja Nebukadnesar birye, Israel ninye obuka malye kibukce, ubula dopromuk ning ton, Raja Kores birye aning dobuka, tuba tamubuka Israel nangak arebuk. Minop talak ara, Raja Nebukadnesar birye, Israel ninye obuka malye kibukce, akonop ning nirya, ubula dobukabukce, el mutuku bobinuka, el isa si eren aik pum, binuka deiamuk.

⁸ Ati ara, Persia mutuku ninye deiyoknye Kores birye nyapdeibukba, aning nirya dobukabukce, amutuku noutamak Raja taleamuk ning nirya, aning si seklamukce, Bendahara atonun kalikuka pil dolamuknye, el si Mitredat arebikba, elce aning nirya nukuka dobukabukce, Yehuda yala nang sik deiyoknye el si Sesbazar biti arebuk.

⁹ Aning si sekdobukce, arebuk ning ara ani. Emas ongolilamik makau, piring tiga puluh (30) ap, tonda perak piring delilamik ning seribu (1.000) ap, mek yun makau dua puluh sembilan (29) ap, arebuk.

¹⁰ Tonda, din ning likne emas makau tiga puluh (30) ap, amakau atonun ning bukni, perak arye memamik ning empat ratus sepuluh (410) ap, tonda, yuk dekna weik, teleb ning seribu (1.000) ap, aning-aning nirya akunum nukukabikce, Sesbazar biti arebuk.

¹¹ Ara, emas ap, perak ap, yuk ning ayala-ayala ning yupa nirya ara, lima ribu empat ratus (5.400) ning nirya nukukabikce, sik Yehuda yala ninye deiyoknye Sesbazar biti arebuk. Winibukopura, minop talak Israel ninye obuka sirya dakikce, sik mutuku noutam arye alubuka doprobikce, Persia mutuku tam bukni, provinsi Babel mutuku bobinamikba, sik amu tam ulamik nang nirya, atalak Babel mutuku batakuka, sik mutuku koprop Yudea mutuku tam bukni, Yerusalem weik mutuku tuba tamubuka biyik. Sik biyik talak ara, aning-aning nirya libuka bobiyik.