Efesus 6 - Eipomek

Anggun mapu nirya, anggun ni yapu ap, anggun nin yapu ap ati, “Wininamlulume,” nyapdeibuk yupu

¹ Anggun mapu nirya ara, nun Deiyoknye Yesus ap, kanye talima dukdongobuka neika umunye talak noutamak nirya ara, anggun ni yapu ap, anggun nin yapu ap ati, si erebuka sik yupu moubuka kekepmunce dobolbanlulume. Aning ara, diksukum winina ati, ‘Anggun ton wininamlulume,’ nyapdeipsine.

^2-3 Allah arye, nyapsuke. ‘Allah arye, “Anggun mapu nirya ara, anggun ni yapu ap, anggun nin yapu ap ati, kipmunce sik yupu kekenamlulume. Winibuka umunyeura, Allah melipsilirye, mikip arepsilyopura, keting tamun weik arye, tonap kam unamlume. Tonda, aning-aning nirya telebuk wininamsile. Anggun ni yapu ap, anggun nin yapu sik yupu kum kekepmunyopura, aning kum wininamsile,” Allah arye, nyabuk.’ (Ulangan 5:16) Ara, Allah arye, ninye ati, “Wininamlume,” nyapdeiyamuk yupu weik aupmal bukni, wini nyapmasin yupu deice ara, deiyok koubuka, “Winipmunyopura, narye teleb kipdeipnamsine,” nyabuka, minyuma ning nyapdeiyamsuke.

⁴ Tonda, anggun ninye wisi ati ayupu nyapnusine. Anggunce anggun mapu ati, weik arye, wenebuka derepmunyopura, anggun mapu ara, ‘Se’ tenen, kanye imun kanye bobuka, talima sukulule. Ati, anggun mapu ati, yu upsiliba mikip arye, wenena meme nyapsine. Aning kum bukni, nun Deiyoknye Yesus arye, ‘Wininamake,’ tenesilye touk, anggunce el yupu dobuka, anggun mapu nebice talak nirya ara, “Aning wininamlulume, aning ara, kum wininamlume,” nyabuka, namin asa aryuk peterenamlume.

Pil melin nang ap, pil deiyok nang ap ati, nyabuk yupu

⁵ Sik yo bok deice deksikiba, talye ati pil domunye nang ara, anggun deiyok nang arye, nyasice yupu ara, moubuka kekepmunce, ‘Nun deiyok nang ara, pia mambule’ tenen, si erebuka unamlume. Aning nirya ara, tenepce winina kum bukni, anggun kanye talima diksukum ubuka telebuk wininamlulume. Ara, ‘Kristus nyapsutuba, el yupu kekebuka dobolbana atonun winipnuyabe’ tenen, anggun deiyok nang arye, nyasice yupu ara, kekebuka teleb ubuka wininamlulume.

⁶ Aning ara, ‘Nun deiyok nang arye, eipsikce talakuk, sik yupu kekebibirye, teleb ubuka pil donamap bukni, kum disice talak ara, bataknamabe,’ tenena kume. Ara, ‘Talima arye, pil teleb ubuka kum donamap bukni, nun deiyok nang arye, disice talak kanye deipnamsitinge,’ tenena kume. Aning kum bukni, anggun deiyok nang arye, disice talak babye, kum disice talak babye, telebuk pil donamlulume. Ara, anggun pil don talak nirya ara, utenenamlulume. Ara, ‘Allah arye, tenelul touk, tenepce tilila arye, winina kum bukni, dipkoprop telebuk unamne. Kristus el pil melinanye atonun unamne’ tenen, anggun deiyok nang arye, nyasice pil, teleb kibuka donamlulume.

⁷ Yata pil do nirya, pil donamlum talak ara, kanye bokoltona kumce, utenenamlulume. ‘Kume, narye talye ninye ati, sik pil kum donune. Nara, nun Deiyoknye Yesus, el pil ati donamne’ tenen, anggun deiyok nang arye, arukusinyak pil nirya ati, pia pi dobuka, teleb ubuka donamlulume. Ara, ‘Na Deiyoknye Yesus el si erena ati, apil donune,’ tenenamlulume.

⁸ Winibuka tenepmunce, pil teleb ubuka donamluma deiyok ara, nyapnusine. Ara, anggun kele, yatanye do nirya, pil teleb ubuka doplyopura, nun Deiyoknye Yesus arye, anye bira el pil dobuk ning ati, dekna ning arepnamle. Ara, yo bok deice arye, dekikceura, urdem ati, pil don nang babye, sik kanye aryuk pil donyak nang babye atonun, pil donyaka dekna ati, pil dolamaka atonun, Yesus arye, dekna ning arepnamsile.

⁹ Ara, anggun pil deiyok nang ati ara, ayupu nyapnusine. Arup ara, anggun pil melin nang ati, “Winipnamlulume,” nyabuka sekmasin touk, anggun deiyok nang arye, sik amu tam unyakce, anggun pil melibuka donyak ninye ati, teleb ubuka neika unamlulume. Anggun melin nang ati, ‘Ilil upnul’ tenen, “Amapo, na nyapmasin touk, pil kum dopnumunyopura, ikin ning, anggun nong deice adiparyuk deipnamsine,” nyabuka, wenena kume. Ayupu ara, talye kum nyapsine. Ara, anggun kele, anggun amu tam talye pil melin nang ap, anggun deice tam pil deiyok nang ululum ninye ap, anggun Weik Deiyoknye bira, tonokuka. Elda im deice ulirye, tukwak mutuku ninye nirya dipdebuka, yupu bokeipnamsil ning ara, ansinibuka unamsile. ‘E anang ara, na kayapu nang ati, kum wenepnamne’ tenen, kanye kum wilisulule. Weik nang babye, mitik nang babye atonun, tenepsilirye, nun winilamap atonun dekna arenamsile. ‘Ton nang ara, mambule, ton nang ara, mambul kume,’ kum tenesulule. Nun winilamap atonun, yupu lepsisikuka bokolisulule.

Isa Mutuku Dongonye ap, isa mer ap arye, ‘Na mapu malye updeipsikcak’ tenen, Allah el mikip deice arye, arisilye ning ati, nyabuk yupu

¹⁰ Winira na kayapu, asurat sirya dakna ati, yuk yupu ton nyapnusine. Anggun ap, nun Deiyoknye Yesus ap, talima dukdongobuka neiktoto unamlum talak noutamak arye, el mikip weik arisilya deice arye, lamapdongobuka mikip arye, unamlulume. Mikip unamlum ning ara, Allah el mikip deice aryuka.

¹¹ Sik yin talin nang arye, kat ning dobuka ongobikirye, olalbalamak touk, Allah arye, mikip kilin ning arisilye ning nirya dobuka unamlulume. Tonok ning babye, batakana meme. Winipmunyopura, Isa Mutuku Dongonye arye, tenepce tilila yupu ap, malye-malye winilisilye ning deice arye, ‘Malye winipting’ tenen, kiklipdesutu babye, mikip arye, lamapdongobuka unamlulume. Malye kum wininamlulume.

¹² Aning ara, talye kum nyapsine. Nun nong deice ikin ning deipsikirye, nun kanye talima malye kilina ati, usulula deiyok ning ara, ninye arye, kume. Tonda, nunti opmanto usulul ning ara, ninye arye, kume. Aning kum bukni, malye ulul ning nirya talibuka, deice tam mikip ulya deiyoknye Isa Mutuku Dongonye ap, tonda Isa Mutuku Dongonye el amu tam unyak bukni, im ap, tukwak ap, im sirya, mutuku sirya bokuka, talilya deiyok isa mer ap, pia malye tukwak kunuknak mutuku noutamak mikip ulul isa mer ap, asing kum elinyap bukni, im noutamak unyak isa mer ara aning-aning nirya ap, aisa mer nirya arye, nun dib tenenyap ninye ati, ‘Malye kibuka, optibye’ tenen, yaniltasinyake. Ati, winipsikiba, ikin weik usilye ning deiyok ara, ninye arye kume, ara Isa Mutuku Dongonye aryuka.

¹³ Aning ati ara, ‘Isa Mutuku Dongonye arye, anggun kanye talima malye kipdeipsilyeura, malye ubibyak’ tenen, Allah arye, nun kanye talima mikip kilina ati, arisilye ning nirya ara, dolonamlulume. Tonok ning babye, batakana kume. Ara, yin talin nang arye, ‘Ninye oldan talak arye opsicak’ tenen, sik nong deice kat ning ongolamaka atonun, Allah arye, nun kanye talima mikip kilina ati, arisilye ning dopropmunce, kintinilinamlulume. Aning nirya dobuka kintinipdeiptumura, dan talak arye do nirya, malye ning yalirye, kiklilesilya babye, ilil kumce, pia lamapdongobuka, mikip arye, unamlulume. Kintinina kumopura, mikip kum uptume. Malye ning arye, malye kibuka bisipsilyopura, malye winipra banamlume.

¹⁴ ‘Winipsilyak’ tenen ati, pia kintinibuka kanye tonok tenebuka mikip arye, unamlume. Allah arye, arepsiliba, ongonamlum ning ara, ani. Ara, yin talin nang deiyatinga delilamak atonun, Allah el dipkoprop yupu kekepmunce, moubuka talinamlume. Allah el yupu ara, anggun deiating atonun upnamsile. Tonda, yin talin nang arye, taram deice ting kiniklamak atonun, Allah el diksukum ulye touk, nunti, ‘Diksukum ninye unamak’ tenen, teleb kipdeipsilyopura, anggun babye, diksukumuk unamlume. Diksukumuk una ara, anggun taram deice ting kiniklamak atonun upra banamlulume.

¹⁵ Yin talin nang arye, sik yan deice kat sepatu ongolamak atonun, Allah el laka teleb yupu, ninye lyena ati, el teleb yupu kel bikimunya deice arye, kintinip deipnamlulume. El laka teleb yupu kekebibya deice arye, el ap, ansinipdeipsiliba, kanye deibuka unyabe. Winipmanto ara, Allah el laka teleb yupu ara, ninye yan deice ongolamak ning, kat sepatu atonun, upnamsile.

¹⁶ Aning-aning nirya kweirya dobuka kintinipmunyopura, yin talin nang ara, ‘Mal arye opsicak’ tenen, kelapye dobuka, sik urasin tam talibuka balamak touk, pia mikip arye, Allah ati dib tenenamlume. Isa Mutuku Dongonye arye, nunti, ‘Sik kanye malye kipdeipnyeura, malye unamak’ tenen, kiklildesilye ning ara, uku mal dopnarye, dolamak touk ulule. Anggunce Allah ati, dib tenepmunya deice arye, Isa Mutuku Dongonye el uku mal tangapmunce, kiklilden ning nirya, obisiptume. Ati, anggunce Allah ati mikip arye, dib tenenamlum ning, ara anggun kelapye atonun upnamsile.

¹⁷ Yin talin nang arye, ‘Nun kisok copsicak’ tenen, kat topi kalulamak atonun, anggun kanye tenen ning kalekna ati, Allah arye, akunum lyesilya ara, pia tenenauk unamlulume. Tonda, Allah El Dib Kanye el parang ya atonun ning, Allah el yupu ara, moubuka kel kipmunce, talibuka unamlulume. Anggun kisok kaluna atonun ning ara, Allah arye, lyesulule tenena atia. Anggun parang ya atonun ning ara, Allah el dipkoprop yupu atia.

¹⁸ Aning nirya bobuka, unamlum talak noutamak nirya ara, Allah El Dib Kanye arye, anggun kanye talima talisilirye, el mikip deice nyasilye touk, Allah morona ap, aning-aning nirya ap, anggun patan ning ati, Allah morona ap, pia wininamlulume. Ati, ‘Allah El Dib Kanye mikip arisilya deice arye, Allah moronamabe’ tenenauk umunce, talye kanye bobuka, lik una kum aryuk unamlulume. Tonda, batakana kum, pia pi dobuka, Allah ati pia moronamlume. Allah moronamluma ara, ani. Ara, ‘Allah arye wibuka, el mapu kipdeipsuk nang nirya ati, Allah arye melinamsile’ tenen, anggunce Allah moronamlume.

¹⁹ Tonda na kayapu, nati Allah moronamnulume. Ara, ‘Paulus bira yupu nyanamle talak nirya ara, Allah arye, teleb yupu arepliba, teleb kibuka peterenamle’ tenen, Allah moronamnulume. Tonda, Paulus birye, ‘Ayupu ati derepnamniyak do?’ tenen, ‘Ilil kumce, mikip asa ubuka, Allah el laka teleb yupu, teleb kibuka petereptue’ tenen, anggunce nati Allah moronamnulume. Allah arye, el laka teleb yupu deiyoknye bira, minop talak duknyamuk bukni, wini talak akunum laka kipdeipsuk ati peterenyabe.

²⁰ Na Paulus birye, ayupu dobuka peterelbalamsa ati ara, yu nang arye, ‘Ayupu ara, nun lik’ tenen, tomopnikce, tapu koubuka wenena aik dongopnikura, asukumuk tuba unune. Aunun bukni, ayupu laka peterena deiyoknye tuba unune. Dipkoprop teleb ning ara, anggunce, ‘Paulus bira, ilil pia kum aryuk, mikip kibuka, mikip arye peterenamle,’ tenen, Allah moronamnulume.

Asurat sirya dakna ati, nyabuk yupu

²¹ Ara, na kayapu, nun weit atonunye Tikikus, nun Deiyoknye Yesus ap, kanye talima dukdongobuka ulirye, batakana kum, pia pi dobuka Yesus ati pil dolule. Tikikus birye, na wininye ning ap, imun unulul ning ap, nirya ara, anggun kekena ati, anggun dam yalirye, laka nyapsiliba kekepmunyopura, na unye ning nirya kel biknamlume.

²² Narye, Tikikus dobuka, anggun dam dopdeipne ning deiyok ara, aninguka. Yuk ton kume. Elce anggun Efesus mutuku ululum ninye ati, nun winisilye ning ap, nun unyap ning ap, laka nyapsiliba kekepsumunyeura, ‘Aning deice arye, anggun kanye talima mikip kipdeipnamsile’ tenen, anggun dam dopdeipsine.

²³ Telebe, sik dib tenebik ati, nun weit yapu atonun ninye nirya ati, Allah moronun ning ara nyapnusine. Ara, ‘Nun Ni Koprop Allah ap, nun Deiyoknye Yesus Kristus ap, sik bitinye arye, anggun nirya ati, mambul ning arenamsirak’ tenen, Allah morosunune. Arinamsirak ning ara, ani. Ara, yuk nang ap kanye deibuka, nimalye arye neika una deiyok ning ap, yuk nang ati bico tenebuka melildana deiyok ning ap, Allah ati weik arye diba tenena deiyok ning ap, ‘Adeiyok ning nirya arepsirikceura, pia telebuk unamak’ tenen, narye anggunti, Allah morosunune.

²⁴ Tonda, yata mutuku ninye do nirya, nun Deiyoknye Yesus Kristus ati, sik kanye el deiceuk deibuka, eluk talibuka unyakce, pia kum batakanyak ninye ati ara, Allah moronun ning nyapnusine. Ara, ‘Allah bico tenesilirye, el kanye aniryuk talye arisilye ning ara, weik arye, arepsilirye, teleb kipdeipnamsil’ tenen, Allah morosunune. Telebe akunum nyapsine. Na Paulus birye, asukumuk deipsine.