Efesus 5 - Eipomek

“Malye winin ning nirya batakuka, Allah pia diksukumuk ulul touk, unamlulume,” nyabuk yupu

¹ Allah arye, anggun nirya ati, ‘Na mapu unyak,’ tenepsilirye, kanye talima melisiliba, anggunda el mapu akunum ululuma anya arye, Allah pia diksukum ulye touk, kel kipmunce, ‘Nun babye, atonun unamap’ tenen, unamlume.

² Ara, minop talak ulamik Yahudi ninye arye, ‘Allah nun malye winin ning namin kipsilirye, nun moronyap yupu kekenamsil’ tenen, Allah el si erena ati, kam ning obuka arena ap, nintong teleb ning dobuka, uku dongona ap, ulamika atonun, Kristus arye nunti, bico tenebuka kanye talima arepsukce, elcuk el bidamnye nong, Allah ati aribukce, nun yok pununa ati dibukura, Allah arye, kanye deibuk. Yesus arye, kanye talima arepsukce, bico tenesilye touk, anggunce yuk ninye nirya ati, bico tenebuka melilanauk unamlulume.

³ Ara, anggunda, Allah arye, wipdeipsukura, el mapu akunum ululuma ati, anggun kan-kan noutamak ara, talye yolana ap, malye-malye winin ning yala-yala nirya ap, ‘Aning-aning nirya, weik arye, dobuka taliptinye’ tenen, kanye talima pum tam ‘Se,’ tenena ap, anirya ara, mitikto babye pia kum unamlulume. Allah arye, ‘Na ninye, pia pung diksukum nanguk unamak’ tenen, wibuka delilul ninye ara, ato malye winin ning pia kum wininyaka anya arye, anggun babye, amalye ning nirya kum wininamlulume. Kum winipmunyopura, yuk nang arye, anggun Efesus mutuku ululum ninye ati, ‘Sikda winibuka, winibuka malye wininyak’ tenen, kum nyapsitinge.

⁴ Aning atonun, Allah el mapu ara, diksukum un ninye unyaka anya arye, anyapnusin ning ara, anggun babye, pia kum wininamlulume. Ara, yupu si dabuka derelamunce, ninye wan yupu ap, talye-talye yupu nyaplobikirye, yebyeban yupu ap, ‘Yuk nang akutupnamak’ tenen, talye kwalinyak yupu ap, teleb nang kum winipnamting ning yupu talina ap, anirya ara, pia kum nyanamlulum bukni, teleb ning ara, Allah atibuk, “Nun ni telebe,” nyabuka pia nyanamlulume.

⁵ Amalye winin ning nirya, “Kum wininamlume,” nyapmasina ara, urdem ati kum nyapsine. Pia dipkoprop tenenamlulume. Anggun talye yolana ap, malye-malye winin ning yala-yala nirya ap, ‘Aning-aning nirya, weik arye, taliptinye’ tenen, kanye talima pum tam ‘Se,’ tenenauk, unyak ninye ara, Allah ap, Kristus ap, neika kum uptinge. Ara, Allah ap, Yesus ap lyepsirikirye, nun talima talisirikceba, pia teleb kibuka unamabak ara, amalye winin ning wininyak ninye tonok babye, ansinibuka kum unamabe. Allah arye, amalye wininyak ninye dobuka, pia yukak deipliba, talyeuk unamake. ‘Aning-aning nirya weik arye doproptinye’ tenen, mun tululul nang ara, ‘Dip’ tenena, kum nang arye, ‘Nun ni koprop’ tenen, talye ning ap, Isa Mutuku Dongonye si erelamak nang atonun unyake. Aunyak ninye babye, Allah arye, arenamsil ning dobuka, el ap, neika kum unamake.

⁶ Na kayapu, talye nang arye, talye-talye yupu, nong kum upnamle yupu talye nyaplobikiba, ‘Mankau arye, tilila ning dib tenebibyak’ tenen, anggun kanye moupnamlulume. Talye ati kum nyapsine. Amalye nyapmasin ning nirya wininyak ninye arye, Allah el yupu yaniplobuka, wininyaka ati ara, Allah yu weik upliba, sik nong deice ikin ning weik deiplirye, weika arye, wenelule.

⁷ Ati, amalye wininyak ninye atonun ninye nirya ap, anggun ap, ansinibuka una meme. Sikce malye wininyak ning yala-yala nirya ara, anggun Yesus ati dib tenelulum ninye arye, pia kum wininamlulume.

⁸ Sik malye wininyak ninye ap, ansinibuka una meme nyapmasina deiyok ara, ani. Minop talak ara, anggun Efesus mutuku ululum nang ara, pia malye-malye ulamluma deice arye, kunuknak atonun ninye ulamlum bukni, wini talak ara, nun Deiyoknye Yesus ap, talima dukdongobuka umunya deice arye, dirina ninye atonun akunum ululume. Ati Dirina Deiyoknye arye el mapu una ati, akunum teleb kipdeipsuka ati, dirina nang ulamak atonun diksukumuk unamlulume.

⁹ Deiyok ara, ani. Duk moulamle yo arye, el yo yala ulye touk, duk moulule. Duk moulamle atonun, diksukum una ap, teleb ninguk winina ap ati, dirina usilibuk, duk moulamsil ning ara, nyapnusine. Ara, teleb winin ning, yala nirya ap, Allah ara, malye ning tonok ning babye, kum ulirye, pung ulye touk, diksukum winin ning nirya ap, tilila nyana kum aniryuk, dipkoprop yupu uk nyana ap ara, aning-aning nirya ara, dirina ning ulule. Teleb yo arye, teleb duk moulamle atonun, anggunda dirina atonun ninye ululuma anya arye, ateleb winin ninguk, pia ati wininamlulume.

¹⁰ Tonda, anggun nirya arye, ‘Se, nun yata wiriptibyeba, Allah el kanye deipnamsil do?’ tenen, pia piribuka kel biknin banamlulume.

¹¹ Malye yo arye, malye yo duk moulamle atonun, sik malye wininyak ninye, sik talima kunukna deice arye, nong kum upnamle ning, malye ninguk wininyake. Sik wininyak ning nirya ati ara, pia memepdopmunce, aning kum wininamlulume. Talye kanye bobuka, aninye ap, ansinibuka una kum bukni, sik malye wininyak ning ati, laka deice arye, yupu nyapmunce, batakanamlulume. Ara, yuk nang nirya ara, moubuka kel kiptingce, ‘Amalye winin ning bataknamak’ tenen, anggunce, “Kume, sik malye winin ninye ara, kunuknak atonun malye wininyak ning ara ani-ani,” nyabuka, laka arye, laka nyapmunce, yupu sekelongonamlulume.

¹² Sikti, yupu sekenamluma deiyok ara, ani. Ara, sik pia malye winikirye, Allah yaninyak ninye arye, yuk nang kum elinyak ak, dungnubuka wininyak ning ara, pia malye anya arye, nun teleb nang arye, yupu deiceuk laka nyabibyopura, alye upsute.

¹³ Yata ning do nirya, kunuknak arye dobuka, dirinak deibibyopura, laka kipliba, ninye nirya arye, “E, aning ara, winibuka ulule. Malye ning ani, teleb ning ani,” tenebikirye, moubuka kel bikinyake.

¹⁴ Yata ning do nirya, dirinarye aning deice deipliba, lak akuk ulule. Laka upliba, moubuka kel biktibirye, ‘Aning teleb ning, aning ara, malye ning’ tenen, bikinyabe. Aning ati ara, ayupu ton nyanyabe. “Amio, an diplumnye bira kam buklyame. Kristus el dirinarye, teleb kipdeipnamkile.”

¹⁵ Aning-aning nirya ati ara, anggun Efesus mutuku ninye ara, walwal unyak nang atonun talye mankau kanye bobuka kum unamlume. Anggunda, ‘Walwal arye, malye winibibyak’ tenen, pia kanye moubuka umunce, weik kel nang arye, winilamak touk diksukumuk wininamlume.

¹⁶ Winibuka telebuk umunye talak noutamak nirya ara, ‘Lo talak ton kum upsiliba, teleb pil kum doptibnye ati, lo tuba awapsilye talak ara, pia pi dobuka telebuk wininamap’ tenen, pia moubuka telebuk wininamlume. Wini talak ara, malye-malye winin ning ap, malye wininyak ninye ap, weik aupmale ati, “Anggun kanye moupnamlulume,” nyapmasine.

¹⁷ Aning ati ara, kanye bona kumce, talye kanye bobuka walwal arye, kum wininamlum bukni, nun Deiyoknye birye, ‘Wininamake,’ tenesilye touk, aninguk moubuka kel biknin banamlume. Walwal asa arye, malye kum wininamlum ning ton nyapnusine.

¹⁸ Ara, kanye wangalamak mek dibikcopura, sik kanye wangabikiba, talye yolana ap, malye-malye winina ap, wininyaka anya arye, mek dibibyeba, kanye wangapsiliba malye winina ara, meme. Aning kum wininamlum bukni, Allah El Dib Kanye arepsukbuk, nun kanye talima wekuka usilinye birye, ‘Allah El Dib Kanye arye, nun kanye talima talisilye deice arye, el mikip kipdeipnamsile’ tenen, el amutamuk unamlulume.

¹⁹ Anggun nirya arye, anggun ap, neika ululum nang ati, mot sebuka, kanye talima kwa dilanamlulume. Ara, Mazmur Allah yupu deice sekeipsuk ning ap, ‘Allah el si erepnuyap’ tenen, anggun kanye aryuk mot sekuka nyamunye ning ap, Allah arye, anggun talima noutam, ‘Winibuka nyanamlulume,’ nyabuka laka nyasiliba, mot nyamunye ning ap, amot yala-yala nirya nyanamlulume. Amot-amot nirya nyanamlum talak ara, anggun kanye talima noutamak arye, Allah el si erepmunce, elti, kibuka si erenamlulume.

²⁰ Winibuka wininamlum talak nirya ara, nun Deiyoknye Yesus, el si deice arye, nun Ni Kopropa Allah ati, “Aning-aning awapsilye ning nirya ara, telebe,” nyabuka, Allah el si pia erenamlume.

Sal ap, kilapu ap, dopdakirye, neika unamake ati, nyabuk yupu

²¹ Tonda, anggunce Kristus ati, ‘Elda mambule, nun Deiyoknye usulule’ tenen, winimunya deice arye, anggun ap, neika umunye ninye ati ara, sik amu tam bukuka nimalye arye, unamlume. Kanye talima kum ereldanamlulume.

²² Anggun kilapu nirya arye, anggun akanye yapu ati, sik amu tam bukmunce, sik yupu kekebuka nimalye arye, unamlulume. Winibuka unamlum talak ara, ‘E ara, nun Deiyoknye Yesus, el si erena ati, el amu tam bukibirye, el yupu kekenyapa atonun, nun akanye yapu sik amu tam bukuka unyabe,’ tenenamlulume.

²³ Wininamluma deiyok ara, ani. Ara, Kristus arye, nunti lyepsukce, elti, dib tenenyap ninye nirya ara, dukdongopsukba, el nong atonun unyaba anya arye, nun kisok atonun ululnye ara, el Kristus uka. Elda, nun lyena ati, Lyena Deiyoknye usulule. Aning atonun, anggun kilapu nirya, anggun akanye yapu ara, anggun deiyok nang unyake.

²⁴ Nun dib tenenyap ninye nirya arye, nun Deiyoknye Kristus ati, el amu tam bukuka, el yupu moubuka kekebibirye, elce nyasilye yupu kekebuka, nimalye arye, ulamapa atonun, yata winin ning do nirya, aning-aning nirya ati, anggun kilapu nirya ara, anggun akanye yapu ati atonunuk, adiparyuk sik amu tam bukmunce, sik yupu kekebuka, nimalye arye, unamlume.

²⁵ Ara, anggun sal ati, ayupu nyapnusine. Ara, Kristus arye, elti, dib tenebupu ninye ati, pia bico tenebuka talima arepsukce, nunti lyepsuk atonun, anggun sal babye, anggun domunye kilapu ati kanye talima arepsilyopura, bico tenebuka pia telebuk unamlume.

²⁶ Kristus arye, elti, dib tenebupu ninye ati, dibukce lyepsuka deiyok ara, nyapnusine. Ara, elce utenyamsuke. ‘Anang ara, na mapu unamak’ tenen, na laka teleb yupu deice arye, sik malye winin ning kum danalina ati, aninye ara, mek likina atonun kipdeipnirye, sik malye winin ning nirya kilipnirye, kum daneipnyopura, aninye pia teleb kipdeipniba, ‘Na mapu dipkoprop unamake,’ tenepsukce dibuke.

²⁷ Yesus Kristus arye, winipsuka deiyok ara, ani. Aning tenebuk. ‘Sik malye winin ning nirya kum kipdeipniba, malye ning tonok ning babye kum upliba, nati dib tenenamniyak ninye ara, pia diksukumuk unamak ninye kipdeipnirye, na tenen ninye una ati, aninye dobuka deipnamne’ tenen, Yesus Kristus tenyamsukce winipsuke. Ara, Yesus arye, nunti, ‘Na ti dib tenenyak ninye ara, malye ning tonok ning babye, kum upliba, pia diksukumuk unamak’ tenen, lyepsukce, teleb kipdeipsuke.

²⁸ Aning atonun, anggun sal nirya arye, anggun bidamang nong ati, kanye deibuka teleb ulilamlum atonun, anggunce anggun dolalum kilapu ati, adiparyuk talima arepsilibuk, bico tenebuka, melinauk unamlume. Yatanye do nirya, elce domlye kil ati, bico tenebuka melinauk ululnye bira, awinilya deice arye, elcuk, el bidamnye ati melilanamle.

²⁹ Anggun kele. Ninye mutuku-mutuku nirya sik bidamnye nong ati, ‘Na lik’ tenen, malye kum ulilanyake. Aning kum bukni, din dibuka, telebuk ulilanyake. Ati, anggun sal arye, anggun dopromunye kilapu ati, bico tenebuka teleb kibuka melinamlume. Aning atonun, nun dib tenenyap ninye ara, nun patapsilye ning nirya ara, Kristus arye, melibuka aresulule.

³⁰ Nun nirya ara, yuk-yuk unyap bukni, Kristus arye, kanye talima dukdongopsukce, el tonok nong atonun kipdeipsuka anya arye, nun patapsilye ning ara, melibuka aresulule.

³¹ Allah yupu noutamak ara, sal ap, kilapu ap, dolana ati, ayupu ton sekdeibik. Ayupu ara, ani. “Yatanye do nirya, el li kopropa ap, el lin kopropa ap, batakuka, el kil doplyopura, sik bitinye ara, nong tonok atonun kibuka, kanye talima deipdarikirye, neikauk unamrake,” Allah arye, nyabuk. (Kejadian 2:24)

³² Ayupu ara, sal arye, kil donamak ning ati, sekdeipsuk bukni, ayupu noutamak ara, ‘Nong tonok atonun unamdake,’ nyabuka sekdeipsuk ning ara, ikin aniryuk kel kiptibye. Ayupu deiyok ara, weik kel kiptibya deice arye moubuka kekeptibye. Ayupu nyasilye touk, na Paulus birye, ayupu deice arye, nun dib tenena ninye ati, nyapsine. Ara, ‘Kristus ap, elti, dib tenebice ninye ap, kanye talima dukdongobuka, nong tonok atonun unamake’ tenen, Allah arye, nyapdeipsuke.

³³ Ayupu deiyok noutamak ning ara, bitinye upsil bukni, dipkoprop nyapsine. Anggun sal nirya ara, anggun babye anggun bidamnye ati kanye deibuka teleb ulildalamlum atonun, anggun domunye kilapu ati, pia bico tenebuka melinauk unamlulume. Tonda, anggun kilapu nirya arye, anggun akanye yapu ati, kipmunce, sik yupu kekebuka namin asa arye, neika unamlulume.