Efesus 4 - Eipomek

“Nun dib tenenyap ninye nirya ara, kanye yuk-yuk tenena kumce, tonok kanye bobuka, teleb ubuka ansinibuka unamabe,” nyabuk yupu

¹ Ara, na kayapu. Nun Deiyoknye Yesus ati pil dolamsiba, yu nang arye, tomopnikce, tapu koubuka wenena aik dongopnikba, asukumuk unune. Narye anggunti nyapsine. Allah ati dib teneplum arye, akunum lyepsuka ati ara, Allah arye anggunti, ‘Na mapu unamaka ati, winibuka, winibuka diksukumuk wininamake,’ tenyamsuk atonun, adiparyuk aninguk tenebuka unamlulume, nyapsine.

² Talya-talya winina kumce, yuk nang sik amu tam bukuka kanye talima darapdongobuka telebuk unamlume. Yuk nang ati minopce lik upsiliba, derelana ap, wenena ap, kum bukni, malye upsikca babye, ‘Dauplye’ tenen, bico tenepdamunce, nimalye arye, melilanauk unamlulume.

³ Allah El Dib Kanye nun talima pum weksukce, nun nirya ati kanye dukdongopsukce, nong tonok nang atonun kipdeipsukba, unyabe. Ati, ‘Kanye talima dukdongobuka telebuk unyaba ara, malye winibibyeba, bokuka yuk-yuk ubibirye, malye ning winibibya deice arye nong sekdayipyak’ tenen, pia pi dobuka piripdemunce, yuk nang nirya ati, nimalye arye, teleb ubuka neiktoto unamlulume. Ninye weik ululum bukni, tonok kanye bobuka, talima dukdongobuka telebuk unamlulume.

⁴ Nun dib tenenyap ninye nirya ara, kanye dukdongobuka nong tonok atonun unyabe. Allah El Dib Kanye arye, tonok nong atonun kilisulule. Aning atonun, Allah arye nunti, ‘Aninye lyepnamne’ tenen, yukupsukba, dib tenebuburye wini talak ara, ‘Elcuk dolyasilyopura, el ap, neika pia unamaba ara, dan talak arye, dolyanamsil do’ tenen, aning atibuk kintinipdeibuka dinauk unyabe.

⁵ Nun Weik Ninye Deiyoknye tonok ulule. Nun dib tenebuka talinyap yupu ara, tonokuk ulule. Dib tenebibyopura, mek dongosinyaka ara, tonok ulule.

⁶ Nun dib tenenyap ninye ara, nun Ni Kopropa Allah tonok usulule. Elcuk nun nirya ara, lyepsukce, tonok nong atonun kipdeipsuke. Nun Ni Kopropa Allah ara, aning-aning nirya deice tam ulirye, aning nirya talilule. Aning-aning nirya talilya deice arye, pil dolule. Nun dib tenenyap ninye nirya ara, nun kanye talima noutam usulule.

⁷ Ara, nun nirya ara, nong tonok atonun unyap bukni, Kristus arye, tenyamsuk touk bico tenepsukce, ‘Mambul pil teleb kibuka donamak’ tenen, el mikip deice arye, pil dona deiyok ning yala-yala nirya bokuka, yuk-yuk aresulule.

⁸ Winibuka arisilya ati ara, Allah yupu noutam ton ayupu sekik. Ayupu ara, ani. ‘Allah arye, nyabuk. “Elda im deice welebuk talak ara, el minopce biyukba, el mikip arye, akunum bisibuka yaniplobuk nang nirya ara, el aminyan tam banmek. Im deice biyukopura, sik tukwak mutuku unyak ninye ati, pil dona deiyok ning yuk-yuk bokuka aribuk,” nyabuk.’ (Mazmur 68:18)

⁹ Ayupu nyabuk noutam ara, “Welebuke,” nyabuk deice arye, akunum laka upsile. Ara, im deice tuba tamubuka min kum welyamuk talak ara, minop talak tukwak mutuku yanamuk.

¹⁰ Tukwak mutuku yayuknye bira, yuknye kume. Ara, im deice welebuknye Yesus Kristus uka. Tuba tamubuka im deice tam welebuka deiyok ara, ‘Im sirya, mutuku sirya aulul ning nirya ara, tenepnirye, aning-aning nirya deice tam na unyopura, aning nirya teleb unamne’ tenen, im deice welebuk.

¹¹ El Kristus aryuk, ‘Apil, yala-yala nirya donamak’ tenen, el mikip deice arye, pil dona deiyok ning yala yuk-yuk bokuka, tukwak ninye ati arepsuk ning ara, ani. Allah yupu dobuka peterelbana ati, deiyok koupnamik Rasul nang ap, “Allah yupu ani,” nyanyakce, aminyan winipnamle ning lak lena nabi nang ap, Allah ati dib kum tenenyak ninye, ‘Dib tenepnamak’ tenen, peterelbana nang ap, Allah ati dib akunum tenebik ninye, sik deiyok nang ap, Allah yupu sekik ning peterena nang ap, apil dona deiyok ning nirya, el mikip deice arye, bokuka yuk-yuk arepsuke.

¹² Aning nirya arepsuka deiyok ara, ‘Allah ati dib tenenyak ninye arye, teleb pil moubuka dobikirye, yuk dib tenenyak ninye ati, melibuka unamak’ tenen, arepsuke. Aning atonun, Allah dib tenenyak ninye arye, ateleb pil nirya donamaka deiyok ara, ‘Dib tenebikcopura, Kristus ap, talima dukdongobuka ubikirye, el nong tonok atonun unyak ninye nirya melipdakirye, sik kanye wisiplibuk, teleb ulilanamak’ tenen, apil dona deiyok ning yala-yala nirya donamabe.

¹³ Aning pia pil dobuka melipdabirye, daulamibya ani, aminyan talak ara, nun dib tenenyap nang nirya ara, tonok kanye bobuka, ansinibuka, Kristus ati dib tenebibirye, Allah el Mi Kopropa Kristus ap, kanye talima dukdongobuka ubibirye, elti, weika arye, kel biknamabe. Winibuka upyopura, nun kanye talima wisipsilirye, Kristus pia diksukum, teleb kibuka ulamle touk, nun babye moubuka, telebuk kipdeipnamsile.

¹⁴ Pia moubuka telebuk kipdeipsilye talak ara, mitik mapu arye, ‘Aning dib do, tilila do?’ tenen, teniltonauk ulamak touk, tuba kum unamabe. Aning atonun, mek linglinga mekwen deice bolkekenmalye talak ara, itam-utam kilanmalya ani, bobalamle tonun kum unamabe. Aning atonun, tonda yo bok tuku deice sakmalibuk, kumanya doplye talak ara, kumanya mikip arye, otam binaplya, atam yanaplya kinmalya ani, erelolamle atonun, kum unamabe. Sik yuk nang arye, talye peterenyak yupu, yala yuk-yuk peterepsikca babye, ayupu kekena kum, yupu tunim abuka unamabe. Sikda, ‘Anang ara, nun tamuk kipdopsiting’ tenen, tenepce talye tilila yupu peterepsikca babye, kanye boktopsilirye, nun kanye orbina ayana kum kinamsile.

¹⁵ Aning kum bukni, kanye teniltona kumce, kanye talima arepsiliba, Allah el dipkoprop yupu peterelanamabe. Bico tenepdabirye, dib yupu uk nyabuka peterelanamabe. Winibuka ulamibya ani, Kristus ap, kanye talima dukdongobuka ulamibya ani, nun talima wisipsilya deice arye, nun wininamap ning nirya ara, telebuk unamsile. Kristus ara, Nun Deiyoknye diksukum winilye touk, nun babye neiktoto wininamabe. Winipmanto ati ara, elda nun nong kisok atonunye usulule. Nunda, el nong atonun unyabe. Ati elce tenesilye touk, aninguk wininamabe.

¹⁶ Tonda, nun taruk ap, yan ap, nong deice upsuk ning, mil-mil arye, dukdongopsiliba, nun nong tonok aryuk, pil teleb ubuka dolamabe. Aning atonun, nun yuk-yuk unyap bukni, Kristus nun Deiyoknye nun talima talisilirye, el mikip deice arye, dukdongopsilyopura, nun pil yala yuk-yuk donyap deice arye, kanye talima arepdanuka melilanyabe. Wininyaba deice arye, nun kanye talima nirya wisisulule. Atalak noutamak nirya ara, nun nirya arye, yuk dib tenenyak ninye nirya ati, kanye dukdongobuka, bico tenepdabirye, melilanamabe.

“Nun dib tenenyap nang ara, Allah el mapu unyaba ati, el teleb ulye touk, nun babye, atonun unamabe,” nyabuk yupu

¹⁷ Ara, na kayapu, anyapnusin yupu ara, talye ati kum nyapsine. Kume, nara nun Deiyoknye Kristus, el pil melina deiyoknye ununa deice arye, ayupu nyapdeipnusine. Anggun Yahudi yala kum nang ara, dib tenena kumce, anggun kanye talima noutamak talye-talye tenenyak nang deice arye, malye-malye winilamak touk, anggun Efesus mutuku nang arye, sik talye nang wininyak atonun tuba kum wininamlume.

¹⁸ Sik dib tenena kum ninye arye, ‘Allah el winilul ning ara, nun lik’ tenen, kum kekelamikce, sik kanye talima pia gat akunum kibukba, pia walwal nang akunum unyake. Unyaka anya arye, sik kanye tenen ning nirya ara, kuna atonun akunum ubukba, Allah ap, kanye dukdongobuka neika upmanto kum ninye akunum unyake.

¹⁹ Winibuka unyakce, sik kanye talima noutamak ara, ‘E, awinin ning ara, malye ning ati, Allah arye, wenepsilyak’ tenen, malye kanye bobuka kum tenepmanto nang unyake. Wini talak ara, ‘Malye ning anye, teleb ning anye’ tenen, moubuka kum tenenyake. Winibuka talye kanye bobuka pia malye ukirye, ubula yolana ning aning-aning nirya ap, malye-malye winin ning nirya ap, weik arye, wininyake. Wininyakce, ‘Kume, amalye winin ning yala-yala nirya ara, tuba tonap wininamabe’ tenen, pataplibuk unyake. Sik pia malye wininyak ning ara, pia kum bataktinge.

²⁰ Bukni, na kayapu, anggun Efesus mutuku ninyeo, anggunda amalye-malye winin nang atonun ning deice arye, kum peterelamsikba, Kristus ap, kanye talima dukdongobuka un ning ara, kum bikamlume.

²¹ Aning pia kum bukni, na kele. Yesus babye, el nong ap, el yupu ap, el winilul ning ap, pia diksukum winilye touk, adeice aryuk peterelamsikba, Kristus el yupu kekeplumce, elti, moubuka kel bikamlume.

²² Ara, anggunda peterelamsikba, kel bikamlum ning ara, tuba tamubuka tonap nyapnusine. Ara, anggun minop talak dib kum tenyamlum talak ara, anggun kanye talima noutamak malye ning patalamsuka deice arye, anggun winin ning nirya malye kililalalume. Pia malye anya arye, “Pubundanalamle baju kwiribuka bataklamak touk, anggunce minop talak malye winin ning min arye winilamlum ning ara, aning nirya bataklulume,” nyabuka peterelamsike. Malye winin ning patana deice arye, teleb tenen ning ara, kum kipnin balamlya ani, sirya dakalule. Winiplyopura, teleb kibuka kum teneptibye.

²³ Tonda, ayupu peterepsik. Ara, “Winiryuk baju ongolamak atonun, Allah el mikip deice arye, anggun kanye talima noutamak nirya winiryuk ning atonun kipdeipsiliba, winiryuk diksukum ninguk tenenamlulume. Allah arye, winiryuk ninye atonun kipdeipsuk ning ara, kel bikmunce unamlulume.

²⁴ Aning ara, Allah arye, utenebuk, ‘Kume, malye ning tonok babye, kum uniliba, pia diksukumuk unye touk, na mapu babye, atouk unamake,’ tenepsukce, winiryuk kanye arepsuke,” nyabuka peterelamsikba, akunum kekebuka kel bikamlume.

²⁵ Ati ara, Allah arye, ‘Na unye touk diksukumuk unamake,’ tenesulula ati ara, winibuka unamlume. Ara, na tenebuka, tilila yupu nyalamak ning nirya batakuka, anggun neikak ululum ninye ati, dipkoprop yupu uk nyanamlulume. Nun nirya ara, nong tonok atonun kibuka unyaba ati, dipkoprop yupu uk nyalanamlulume.

²⁶ Allah yupu sekamik atonun, anyuk wininamlulume. Ayupu ara, ani. ‘Yu upsilye talak ara, dipkoprop malye kum kililanamlulume.’ (Mazmur 4:4) Tonda, anggunce yuk nang ati, yu upsilye talak ara, minopce lipsisikdanamlulume. Yu tuba upmasilibuk, keting wekelbilirye, kuna daklyopura, pia malye ati, winina meme. ‘Mapmapya ambusum noutam aryuk lipsisiknamap,’ tenena kume. Yu upsiliba, tulum kanye bopdamunye talak ara, minopce lipsisikdanamlulume.

²⁷ Tonda, malye winina deiyoknye, Isa Mutuku Dongonye birye, anggunti, ‘Anang sik talima lipdopniba, malye winipting’ tenen, kalikisulul ati ara, elti, mitik tonun babye lo arina, meme.

²⁸ Min arye, ubula dolamik nang ara, wini talak tuba tamubuka tonap, ubula kum donamake. Aning kum bukni, ‘Sik bona utotowa talina kum ninye ati na ning noutamak arye bokuka, sikti, melibuka arepnamne’ tenen, sik bidamnye taruk deice arye, yuk ninye melipmanto pil, teleb pil adiparyuk donamake.

²⁹ Teleb pil donamak talak ara, tenebuka tilila yupu kum nyanamake. Dib yupu uk nyabuka, teleb kipdanuka pil donamake. Malye nang arye, yupu nyakibuk, yuk ninye kekenyakce, malye kanye bolamak yupu atonun yupu nirya ara, kum nyanamlulume. Aning kum bukni, anggunce yuk ninye ati, ‘Sik ikin upyle ning yata ning do? Yata teleb yupu nyaptinya deice arye, sik talima kwa diptinye do?’ tenepmunce, ninye talima kwa dina yupu uk nyanamlulume. Ara, ‘Na yupu teleb ubuka nyapnya deice arye, sik kekepnamake ninye melipnamne’ tenen, yupu moubuka nyanamlulume.

³⁰ Tonda, anggun winimunye ning nirya ati, winibuka tenenamlulume. Winipniba, Allah El Dib Kanye arye, kekebuka eipnilirye, ‘Se, sik malye wininmake,’ tenepnilirye, ‘Malye kanye boplyak’ tenen, malye una kumce, pia diksukumuk unamlume. Allah El Dib Kanye ara, talye ati kum arepsuk bukni, basam amul seklamak atonun, Allah El Dib Kanye arepsuka deice arye, urasin kintinilina atonun winipsuke. Ati, adeice arye, nun kele. ‘Akunum lyepsukce, deksuka ati ara, daulamibya ani, sirya talak weik mambul sum ara, sirya memeproplirye, teleb kipdeipsilirye, el dam bobinamsil’ tenen, bikinyabe.

³¹ Tonda, yu usilye ning ap, yuk nang malye upsikiba yu usilye ning ap, derelana ap, yupu deice walana ap, anirya ara, batakanamlulume. Tonda, yuk nang arye, ‘Anang ara, malye nang, tenepnamak’ tenen, lulupdeibuka nyalulum yupu ap, yu usiliba, yuk nang ati malye-malye winina ap, nirya ara, batakanamlulume.

³² Amalye winin ning nirya akunum batakmunyopura, anggun nirya arye, yuk ninye nirya ati, bico tenebuka melilanauk unamlume. Wininamlum talak noutamak ara, yuk nang arye, anggunti,malye usinyak ning ati ara, ‘Dauplye,’ tenebuka, namin kinamlulume. Ara, Allah arye, anggun ap, Kristus ap, kanye talima dukdongopsuka deice arye, anggun malye winin ning nirya ara, kum kipdeipsukce, namin kisilya atonun, anggunce yuk nang ati, atonun wininamlulume. Na Paulus arye, nyapsine.