Efesus 3 - Eipomek

Paulus birye, “Yahudi yala kum ninye arye, ‘Allah ati dib tenepnamak’ tenen, pil donune,” nyapdeibuk yupu

¹ Na kayapu, arup nyapmasin touk, Allah arye, nun nirya ati, Kristus pil dopsuk deice arye, nong tonok atonun kibuka, kanye talima dukdongopsuka ati ara, narye anggun Yahudi yala kum ninye ati, Allah morosunune. Wini talak ara, narye anggunti, Yesus Kristus el yupu peterelamsise ati, yu nang arye, na tomobuka tapu koubuka wenena aik dongopnikba, unune.

² Ara, na kanye ara, na nyapnusin yupu ara, yuk nang arye, akunum laka nyabikba, kekepnulume. Ara, Allah arye, anggun Yahudi yala kum ninye ati, bico tenyamsukce, el kanye aryuk, ‘Sik melibuka lyepnamne’ tenen, kintinipsuk ning ara, ‘Paulus birye, ayupu dobuka peterelbinamle’ tenen, elce na wipdeipnukba, el laka teleb yupu, ninye lyen yupu, anggunti peterelyasise.

³ Aning ara, asurat noutamak arye, mitik anun akunum sekmasine. Ara, Allah arye, ‘Wininamne,’ tenyamuk ning, minop talak duknyamukbuk, ninye kum bikamik bukni, na kanye talima tamupnukce, laka arye, nyapnuke.

⁴ Ati, na akunum sekmasin yupu dobuka yinipnamlum deice arye, moubuka kekepmunce, kel biknamlulume. Ara, Allah arye, ‘Wininamsine,’ tenyamsukce, Kristus pil dopsuka deice arye, akunum kintinipsuk bukni, dungnyamsuk ning, ‘Deiyok ani’ tenen, moubuka kel bikamse touk, asekmasin yupu yinipmunce, ‘Anggun babye, kel biknamlume’ tenen, nyapsine.

⁵ Allah arye, Kristus arepsukopura, elce pil dopsuka deice arye kintinipsuk ning ara, minop talak ulamik ninye nirya ati, lak akarye, kum nyalamuk arye, kum biklamik. Bukni wini talak ara, Allah el yupu dobuka peterelbana ati, deiyok kouna, deiyok Rasul nang ap, el yupu laka nyabuka peterena ati nabi-nabi nang ap ati, Allah El Dib Kanye arye, ayupu nirya lak akarye, nyaliba, anang nirya moubuka kel bikinyake. Adeiyok nang nirya ara, Allah arye, wipdeiyamuka anya arye, sikda malye winina kumce, pia pung diksukum nang unyake.

⁶ Allah arye, duknyamuk bukni, el Dib Kanye arye, laka nyasulul yupu ara, ani. Ara, Allah el laka teleb yupu, ninye lyen yupu kekebuka dib tenebikca deice arye, sik Yahudi yala kum ninye babye, Allah doproplirye, melibuka talinamle. Sik babye, el mapu unamake. Allah arye, Yahudi yala ninye, Israel ninye ati, “Wininamsine,” nyalilamuk ning nirya ara, anggun Yahudi yala kum ninye babye, dolonamlume. Anggun ap, Israel ninye ap, kanye talima dukdongobuka, nong tonok atonun akunum teleb kipdeipsuke. Tonda, Allah arye, “Kristus deice arye, winibuka wininamsine,” nyabuka nyalisilye ning nirya ara, anggun ap, nun ap, neiktotouk dolonamabe. Aning nirya dolonamaba deiyok ara, el laka teleb yupu, ninye lyen yupu dib tenenyap deice arye, arisiliba dolonyabe.

⁷ Ara, Allah arye ninye lyena ati, el laka teleb yupu peteren, pil donanye kipdeipnuka deiyok ara, laka nyapnusine. Ara, Allah bico tenepnukce, el kanye aryuk, apil dona deiyok ning talya urdemuk arepnuke. Allah el mikip arye, pil dopnuk deice arye, ‘Na laka teleb yupu peterena deiyok kounanye unamle’ tenen, akunum wipdeipnuke.

⁸ Na kanye ara, Allah el mapu nirya ara, ilil weik asa unyak bukni, na Paulus ara, ilil pia kumnye unune. Nara, ilil pia kumnye ununa babye, Allah el kanye deipnukce, ‘Paulus ara, Ninye Lyena Yupu, Kristus el pia teleb yupu bobuka, Yahudi yala kum ninye peterelbinamle,’ tenepnukce, wipdeipnuke. Allah arye, Kristus deice kintinipdeipsukce, el ap kanye dukdongobuka upyopura, arenamsil ning nirya ara, nukmanto kum ati, nunce kum biktibye.

⁹ Tonda, Allah arye, tenepnuke. ‘Paulus bira, na yupu laka nyabuka peterenamle,’ tenepnuke. Aning ara, ani. ‘Ninye nirya moubuka kekenamak’ tenen, Allah arye, ninye lyena ati, bico tenepsilirye, el kanye aryuk pil donamsil ning ara, ‘Paulus bira, “Allah arye, winibuka, winibuka wininamsile,” nyabuka, peterenamle’ tenen, wipdeipnuke. Allah arye, aning-aning nirya kwepdeiyamuk deiyoknye birye, ninye lyena ati tenyamsuk ning ara, dungnyamukce el demuk kel bikamuk. Aning nirya duknyamuk bukni, Allah arye nati, ‘Aning laka nyapnyopura, Paulus kekeplirye, aninye nirya ati laka nyabuka peterelbinamle’ tenen, wipdeipnuke. Na Paulus arye, nyapsine.

¹⁰ Atalak noutam nirya, Allah arye, ‘Wininamne,’ tenyamsuk ning ara, winira akunum lak kipmasile. Ara, ani. Allah arye, lyepsukura, elti, dib tenenyap ninye noutamak pil dosilye ning nirya arye, im deice unyakce, ninye deiyok nang ap, im deice mikip weik unyak nang ap, eipsikirye, ‘Se, Allah ara, aning-aning nirya moubuka teneplirye, pia weik mambulnye, ulule’ tenen, kel bikinamake.

¹¹ Aning nirya ara, talye ati kum uamuk. Kume. Minop talak Allah arye, aning nirya ati, ‘Winibuka winipnamne,’ akunum tenyamuka anya arye, aning dipkoprop tenyamuk touk Allah arye, nun Deiyoknye Yesus Kristus deice pil dopsukba, adeice arye, akunum lak upsukba, kel bikinyabe.

¹² Nunce Yesus Kristus ati dib tenebibirye, el ap, talima dukdongobuka unyap deice arye, nun Ni Kopropa Allah ati moroptibye. Tonda, Allah ati moronyap talak ara, kanye teniltona kumce, ‘Dipkoprop kekepsilirye, kum bataknamsile’ tenen, ilil kum asa aryuk, nun talye kanye bobuka yupu nyaptibirye, elti, moroptibye. Ara, Yesus dib tenenyap deice arye, wininyabe.

¹³ Ati, na kayapu, anggun Efesus mutuku umunye ninye, anggun melina ati, pil dolamsa ati, wini talak ara, na nong deice ikin ning delininyakba, donmana ati, anggunce, ‘Se’ tenen, imun kanye kum bonamlulume. Anirya ara, anggun teleb kilina ati wininune anya arye, kanye deibuka unamlulume.

Paulus birye, Efesus mutuku nang ati, Allah morobuk yupu

¹⁴ Ara, na kayapu, Allah tenyamsukce, pil dolamsuk ning nirya ara, tenepne ning ara, nun Ni Kopropa Allah ati, ‘Anda pia teleb’ tenen, urasin kanupdongobuka moronune.

¹⁵ Nun Ni Koprop Allah arye, el mapu nirya ara, im deice unyak nang babye, tukwak mutuku unyak nang babye, kwepdeiamsuka anya arye, elda nun ni kopropa usulule. El siuk erebibirye, el mapu unyabe.

¹⁶ Na Paulus birye, anggunti, Allah morosunun ning ara, nyapnusine. Ara, ‘Nun ni Allah kopropa arye, aning-aning nirya talilulce, mambul weiknye ulye touk, el Dib Kanye arisiliba, melisilya deice arye, el mikip weik aresiliba, anggun kanye talima weik arye, melinamsile’ tenen, Allah morosunune.

¹⁷ Winipsilyopura, anggun dib tenelulum deice arye, Kristus anggun kanye talima noutamak usiliba, el ap, kanye dukdongobuka unamlume. Tonda, weik yo yating tuku pum bisik bilirye, weik neplyopura, ayo lulukna kumce pia teleb tiklamle touk, Allah bico tenepsilirye, melisilye ning noutam ululuma deice arye, ‘Sik yuk nang nirya ati, bico tenebuka melilamunce, pia teleb unamlum’ tenen, Allah morosunune.

¹⁸ Tonda, Allah el mikip melibuka aresilya adeice arye, anggun ap, Allah el mapu nirya ap, anggun nirya Kristus arye, kanye arisilye ning ara, ‘Weika arye, kel kinamlum’ tenen, Allah morosunune. Kristus bico tenepsilirye, weik arye, melisilya ara, pia kum nukmanto. Ninye arye, weik mutuku dup, el cang ap, pala ap, el kup-kup dana-dana ap, amutuku dup bukuka cang ap, tapu deibuka kum kiklipmanto ati ara, Kristus arye, bico tenepsilirye, el kanye aryuk, melisilya ara, laka nyapmanto kum ulule.

¹⁹ Kristus arye, kanye arisilya nirya ara, moubuka kum kel kiptibye bukni, elce bico tenepsilirye, melisilye ning dolomunce, el ap, talima dukdongobuka umunyopura, aminyan ara, Allah el pia teleb winilye touk, ‘Anggun babye atonun, pia teleb wininamlum’ tenen, Allah morosunune.

²⁰ Nunce Allah ati, ‘Winipsutue’ tenen, yupu deice moronyap ning ap, nun kanye talima noutamak tenenyap ning ap ati, ‘Anirya ara, pia weik,’ tenenyap bukni, nun ni Allah ara, weik mambulnye, mikip pia weiknye ulula anya arye, nun morolamap ning ap, tenelamap ning ara, mitik tonunuk ulule. Elce nun kanye talima noutamak pil dosilye mikip deice arye, nun kum tenelamap ning ara, pia mambul weik ning, pil dopsutue.

²¹ Nunce Allah ati, dib tenenyap ninye, nun noutamak arye, pil dosiliba, pia teleb unyap ning ap, Yesus Kristus arye, pia mambul pil dosilye ning ap, anirya adeice arye, Allah el si weik arye, erenamabe. Ara, wini talak ap, aminyan doyanamle talak nirya ap, “Allah elda pia mambule,” nyabuka el si erenamabe. ‘Aning ara, nun ap, nunce debibyeba dadeipdanin, banamak ninye babye, Allah el siuk pia erenamak’ tenen, patanulule. Aning ara, ‘Dipkoprop winipnamle’ tenen, na Paulus birye, “Amin,” nyapsine.