Efesus 2 - Eipomek

Allah arye, pia kam una deiyok ning arepsuk ning ati, nyabuk yupu

¹ Na kayapu, anggun Efesus mutuku ululum ninye ara, minop talak anggun malye-malye winilalum ning ap, Allah el yupu yanilalum ning ap, winibuka ulalum deice arye, akunum diplamak ninye atonun ulalume.

² Minop talak ara, sik Yesus ati dib tenena kum ninye arye, malye-malye winilamak touk, anggun babye, atonun malye winilalume. Asing arye, kum eilinyap bukni, im noutamak balamak Isa mere, sikti, talipsinaba, sik weik deiyoknye Isa Mutuku Dongonye, el yupu kekebuka ulalume. Ara, Allah el yupu yaniltalamak ninye ara, Isa Mutuku Dongonye elcuk sik kanye talima taliliba, malye weik wininyake.

³ Minop talak, min dib kum tenyamubu talak ara, nun nirya arye, amalye wininyak ninye ap, ansinibuka ulamuburye, talye kanye bobuka, nun kanye talima noutamak tenelamubu ning ap, malye ning patalamsuk ning ap, adeice arye, talye kanye bobuka malye-malyeuk winilamubu. Amalye tenena ap, malye winina ap ara, tukwak unyak ninye nirya arye, atonun wininyake. Allah el winilul ning ara, pia kum tenenyak touk, nun babye, minop talak kum tenelamubu. Winibuka ulamupa deice arye, malye-malye winilamak ninye atonun, Allah arye, nun ninye nirya ati, ‘Aninye malye wininyaka ati, na lik’ tenen, ‘Wenebuka oplopnamne,’ tenyamsuke.

⁴ Malye-malye weik winilamubu ning ap, malye tuba wininyap ning ap ati, wenebuka oplopsutue. Akunum opmasutu bukni, Allah arye, nun nirya ati, pia weik arye, bico tenepsukce, lyepsuke. Lyepsukce, Kristus ap, talima dukdongopsuka deice arye, kam bulina atonun, teleb kipdeipsukce lyepsuke. Allah arye, nun malye winina ati talye oplopsutu bukni, ‘Se sikda bicoe’ tenen, namin kibuka mitang asa arye, kanye talima arisilya ara, mitik tonun arye kume. Weika arye, bico tenesulule.

⁵ Nunce el yupu yaniplobuka malye-malye ulamupa deice arye, akunum diplamak ninye atonun ulamubu bukni, Kristus ap, talima dukdongopsuka deice arye, kam bulina atonun, teleb kipdeipsukce, lyepsuke. Allah arye, lyepsuka ara, yuk deice arye, kume. El bico tenyamsukce, el kanye aryuk talye meilyamsuka deice arye, lyepsuke. Nun teleb winina ati kume.

⁶ Kristus obik bukni, Allah arye, Kristus kam bukeibuk deice arye, Kristus ap, kanye talima dukdongopsuka anya arye, nun babye, kam bukeipsuke. Aning atonun, Allah arye, Kristus dobuka im deice bobinuka, erepdeibukba bukuk. Aning deice arye, Kristus ap, akunum kanye talima dukdongopsukce, nun babye, im deice bukeipsuke. Aning nirya ara, Yesus Kristus ap, kanye talima dukdongobuka neiktoto unyaba deice arye, kilisulule.

⁷ Ara, Allah arye, Kristus ap, kanye talima dukdongobuka kam bukeipsukce, im deice tam bukeipsuka deiyok ara, ani. Ara, Allah arye, utenyamuk. ‘Aninye lyepnirye, kam bukeibuka im deice deipnyopura, atalak arye, diprongobuka, aminyan doyanamle talak, sirya talak unamak ninye nirya, kel biknikirye, nyanamniyake.’ “Kume, nun lyena ati, Allah arye bico tenepsilirye, el kanye aryuk talye arisilye ning ara, nukmanto kume. Pia weik arye, talima aresulule. Kristus arepsukura, elce pil dobuka, lyepsuka deice arye, akunum laka kipsuka ati, aning akunum bikmabe,” nyabuka, ‘Na si erepnamniyak’ tenen, Allah arye, aning nirya pil dopsukce, lyepsuke.

⁸ Allah el kanye aryuk lyepsuke nyapmasina ara, talye ati kum nyapmasine. Deiyok ara, ani. Anggunce, Allah ati dib tenelulum deice arye, Allah bico tenepsilirye, talyeuk lyesulule. Aning ara, anggun teleb pil dobuka, diksukum ululuma deice arye, kum lyesulule. El kanye aryuk bico tenepsukce, lyepsuke. El kanye aryuk lyesulula ara, ‘Talye dem aryuk dib tenena deiyok ning arepniba, aninye arye, dib teneptinge’ tenen, arepsilirye, kanye deibuka lyesulule.

⁹ Nunda teleb pil dolamupa deice arye, kum lyepsuka ati, yata ninye do nirya, sikce, “Kume, na teleb pil dolamsa deice arye, lyepnuke,” nyabuka kwalin yupu kum nyaptinge.

¹⁰ Allah el kanye aryuk lyepsukce, teleb kipdeipsuka ati ara, Kristus ap, talima dukdongopsuka deice arye, winiryuk ninye atonun kipdeipsukba, unyabe. Lyepsukce, winiryuk ninye atonun kipdeipsuka deiyok ara, ani. Ara, minop talak Allah arye, nun dib tenenyap ninye ati, ‘Teleb winin ning yala-yala nirya pil dobuka unamake,’ tenyamsuka ati, Kristus deice arye, winiryuk ninye kipdeipsukba, unyabe. Na Paulus arye, nyapsine.

“Kristus ap, talima dukdongobuka unyaba deice arye, tonok yala nang atonun unyabe,” nyabuk yupu

¹¹ Ara, na kayapu, Allah arye, tonok nong atonun akunum kipdeipsuka ati ara, na nyapnusin yupu ara, luba kum kipnamlulume. Minop talak Yahudi yala nang arye, anggun Efesus mutuku ninye ati, nyalamsik. “Anggun Efesus mutuku ninye ara, anggun apu yapu ara, Yahudi yala kum nang arye, deipsika ati, sikda bai tam nang atonun unyake. Yahudi yala kum ninye unyake. Sikda den bola mouse ning kum sekenyaka ati, sikda malye nang unyake,” nyalamsik. Ayupu nyalamsik ninye arye, sik badamnye ati nyalamik. “Nunda Yahudi yala ninye ara, yuk nang nirya, ‘Sikda Allah el mapu koprop unyake tenenamsiyak’ tenen, den bola mouse ning sekenyapa anya arye, nunda teleb nang unyabe,” nyalamik. (Nyalalamik bukni, den bola mouse ning sekena ara, ninye taruk arye, pil donyaka ati ara, adeice arye, Allah el mapu koprop kum kipdatibye.)

¹² Tonda, minop talak ara, anggun ap, Kristus ap, talima dukdongobuka min kum ulalume. Anggun apu yapu ara, Israel yala ninye kum ulamika ati, Israel yala ninye ap, ansinibuka neika kum ulalume. Allah arye, Israel ninye ati, “Wininamsine, winibuka, winibuka arenamsine,” nyapdeiyamuk bukni, anggun Efesus mutuku nang ara, bai tam ninye asik nang atonun ulaluma ati ara, aning nirya ara, kum dopropmanto ulalume. Anggunda, Allah el si bikna ap, elti, dib tenebuka neiktoto una ap, pia kum ulaluma ati, ‘Allah arye, lyepnamsila ati, kintinibuka dinamabe,’ kum tenyamlume. Talye demuk ulalume.

¹³ Minop talak ara, anggunda pera mutuku pia unyak ninye, pia bai tam ninye atonun ulalum bukni, wini talak ara, kume. Kristus el ining panabuka biyuka deice arye, Kristus ap, kanye talima dukdongobuka, akunum tonok nang kipdeipsuka ati ara, Allah el tam nang kipdeipsukce, el dam akunum dopdeipsuke. Wini talak anggun babye, Allah el mapu akunum ululume.

“Minop talak ara, yuk-yuk ulamubu bukni, Kristus deice arye, kanye talima dukdongopsukce, ansinibdeipsukba, Allah el mapu unyabe,” nyabuk yupu

¹⁴ Minop talak ara, nun Yahudi yala nang ap, anggun Yahudi yala kum nang ap, neika dukdongobuka una kumce, pia yuk-yuk ulamubu. Bukni, wini talak ara, Kristus el nong tonok dibuk deice arye, nunda insinipdeipsuke. Min arye, nun danatam, anggun dana tam anoutamak ara, weik cang poka atonun uamukba, kanye talima wilipdanamuburye, eipdanmanto kum ulamubu. Winibuka ulamubu bukni, Kristus arye, apoka atonun domsuk ning ara, daklobukce tonok yala nang atonun, akunum dukdongopsuke. Winipsuka ara, Yesus Kristus arye, nun pununa ati, el dipsuk deice arye, lyepsuke.

¹⁵ Nun ap, anggun ap, ‘Nun lik,’ tenelalamuburye, kanye talima wilipdanuka pia yuk-yuk ulamubu. Bukni, Allah arye, “Aning wininamlulume, aning ara, kum wininamlulume,” nyapdeibukba, Musa arye, sekeipsuk yupu ara, mem yupu uamuk ning ara, Yesus dibuka deice arye, akunum sirya dakukce, kum kipdeibuk. Amem yupu weik aubukba, nun Yahudi ninye arye, ayupu talibuka ulamubu bukni, Kristus el nong arepsukce, lyepsuka deice arye, amem yupu nirya kum kipdeipsuke. Winipsuka deiyok ara ani. Ara, ‘Yahudi yala nang ap, Yahudi yala kum nang ap, yuk-yuk unyak bukni, na nong deice arye, aninye nirya kanye talima dukdongopniba, nong tonok atonun kibuka ukirye, winiryuk nang atonun unamake’ tenen, winipsuke. Yesus el nong arepsuk deice arye, akunuma, nun Yahudi yala nang ap, anggun Yunani yala nang ap, el Yesus ap, kanye talima dukdongobuka namin arye, teleb kipdeipsukba, wini talak ansinibuka nun neika unyabe. Wini talak ara, ‘Like,’ kum tenelanyabe. Mangkau kanye bobuka neika dukdongopdanuka unyabe.

¹⁶ Tonda Allah arye, utenyamuk. ‘Na wanwanun yo deice opmaniyaka deice arye, aninye nirya ap, na ap, kanye talima dukdongobuka teleb kipdeipnyopura, Allah ap, aninye nirya ap, ansinibuka teleb ulinamne,’ tenyamsukce, nun pununa ati dibuk. Wanwanun yo deice dibuka deice arye, nun Yahudi yala nang ap, anggun Efesus mutuku ululum Yahudi yala kum nang ap, ‘Nun like,’ tenelalamubu ning deiyok ara, akunum kum kipdeipsuke.

¹⁷ Kristus yayukce, Allah el laka teleb yupu, ninye lyen yupu peterelamsuke. Ninye yala nirya ap, Allah ap, kanye dukdongobuka neiktoto teleb una ati, el yupu peterelamsukba, anggun pia bai tam ulalumce, Allah damak ara, pia pera atonun ninye ulalumbuk, anggun babye, kekelamlume. Aning atonun, nun Yahudi yala ninye Allah dam ara, miningdam ton unyap ninye babye, ayupu ton kekelamubu.

¹⁸ Ara, anggun ap, nun ap, ninye aning-aning nirya babye, nun Ni Koprop Allah ap, kanye talima dukdongobuka neiktoto una ati, tonok bisikuk usulule. Tonda, ninye ap, Allah ap, ‘Lik’ tenelana kumce, kanye deibuka teleb una ati ara, Yesus Kristus dibuka deice arye, dib tenebibyopura, Allah El Dib Kanye arepsiliba, Allah ap kanye deibuka neika unyabe.

¹⁹ Kristus deice arye, Allah ap, neika unyaba ati ara, minop talak anggun Yahudi yala kum ninye ara, yuk mutuku ninye asik nang atonun, pia bai tam ninye atonun ulamlum bukni, wini talak ara, kume. Wini talak ara, anggunda Allah arye, ‘Anang ara, na mapu koprop’ tenen, talisulul ninye nirya ara, ansinibuka, tonok mutuku nang atonun kipdeipsukba, neiktoto unyabe. Anggunda, dipkoprop Allah el yala nang, el mapu koprop ululume.

²⁰ Winipmanto yupu ton nyapnusine. Aik dona deiyok nang arye, pia unamle aik dopnamikce talak ara, anyaik ayukumna ati, tuku palibuka, keil yangapdeibikirye, adeice ak, aik nong dolamak atonun, Allah arye el mapu nun nirya ati, teleb kilisulule. Allah el yupu dobuka peterelbana ati, deiya kouna deiyok nang, Rasul nang ap, Allah el yupu laka nyabuka peteresinyaka deiyok nabi-nabi nang ap, sikda aik ayukumna ati, keil yangaldelilamak atonun winisinyake. Pia aik dopnamikce talak ara, aik dika deililamak keil ara, ‘Aik abilinga nirya funguk upnamle’ tenen, konop keil deibikirye, akeil deice, anyaik nong nirya dobuka deililbalamak touk, Kristus el babye, akonop keil atonun, nun Deiyoknye usulule.

²¹ Aik dopmakce talak, aik nong dopnin balamica ani, aning-aning nirya dukdongobuka dobikirye, sirya daklamak atonun, Kristus ap, ansinibuka unyaba deice arye, Allah arye talima dukdongobuka, tonok aik nong atonun unyabe. Nunda, Allah el pung diksukum aik atonun unyabe. Elce, ‘Anyaik pum tam ara, na unamne’ tenen, nun kanye talima noutamak pil dosulule.

²² Ara, anggun Efesus mutuku ninye babye aning atonun, Kristus ap, kanye talima dukdongobuka ulamunyopura, Allah arye anggun ap, yuk dib tenenyak ninye nirya ap dobuka, tonok aik nong atonun kilisululce, dukulongosulule. Anyaik pum tam atonun ara, nun talima ara, Allah El Dib Kanye arisilibuk, wekuka usilya deice arye, Allah el babye, nun talima pum tam usulule.