Daniel 9 - Eipomek

Daniel birye Allah ati, morobuk yupu

¹ Media mutuku koproba anye, Ahasiweros, el mi Darius ati, erepdeibikba, elce Babel mutuku ninye ap, Babel mutuku nirya ap, taleamuk. Atalak noutamak bukni, min yuma keting tamun noutamak ara, na Daniel birye, mambul ning kel bikse.

² Babel mutuku ninye deiyoknye, Darius birye, keting tamun tonok deice, Babel mutuku nirya taleamuk talak ara, na Daniel birye, Allah yupu moubuka, yinilamsirye kel bikse. Ara, Allah el si Yahweh arye, el yupu Yeremia, dam nyapdeibukba, nabi Yeremia birye sekamuk buku noutamak, moubuka yinilamsirye eipse. Ara, yu nang arye, Yerusalem mutuku ninye nirya obuka, sirya dakikce, amutuku aik nirya uluplobikba, aik olonguk daupra balamuka ani, Yerusalem mutuku ara, keting tamun tujuh puluh tahun (70) akunum uplyopura, aminyan talak Yerusalem mutuku aik, tamubuka teleb kibuka dopnamake. Aning nirya ara, Allah el yupu lak nyalamuknye, Yeremia biti lak nyalamukba, Yeremia arye, sekdeipsuk buku noutamak, yinilamsirye kel bikse.

³ Aning nirya eipsa ati, narye Allah ati moropse. Allah Yahweh elda aning-aning nirya talibuka, deice tam weik eren ululnye birye, ‘Winipnamne,’ tenelye touk ulula ati ara, elti, moropse. Ara, ‘Allah bico teneplirye, bico upliba, nun Israel ninye ati lyepnamsil’ tenen, moropse. Amoronmase talak ara, ikin kanye bopmasa anya arye, malye kain baju ongopsirye, na din dina kumce, si tebuka unmasirye, Allah atibuk, “ ‘Aning ara, winipsilyak’ tenen, lyepsilyame,” nyabuka moronmasirye, ikin kanye bopmasa ati, uku sice deice bukmase.

⁴ Na ni koproba, Allah el si Yahweh ati, moronmase ning ara, ani. “Na ni Allah, anda aning-aning nirya talebuka, deice tam erebuka, pia mikip weik deiyoknye ulyame. Ati ara, nun Israel ninye, nun malye wininyap ning ara, kunusa kum dopnune. Nun malye ning nirya ara, an dam lak nyabuka, lilipdeipkina arye moropkine. Ara dipkoprop, anda Allah, weik erebuka eitamnye, mikip weiknye ulyame. Tonda, ance, “Winipnamsine,” nyabuka, nyalin yupu nyapdeiamsulum ning ara, kum batakasilyame. Adiparyuk anyalisilyam touk, dipkoprob winisilyame. Ati ara, Allah antibuk, dib tenekinyak ninye ara, ance sikti, pia bico tenebuka melilyame. Amelilyam ninye ara, ance, “Aninguk wininamlulume. Aning ara, pia kum wininamlulume,” nyaplumba, ayupu moubuka talibuka wininyak ninye ati, melilyame.

⁵ Bukni, nun malye wininyap ninye ara, Allah ance nunti, “Aning winina meme,” nyapsulum bukni, aninguk tamubuka wininyabe. Tonda, ance, “Aning ara, wininamlulume. Aning ara, pia kum wininamlulume,” nyapsulum yupu yaniltabirye, batakanyabe. Winibya deice arye, an nyapdeiamsulum ning nirya ara, akunum batakupe.

⁶ Aninguk kum bukni, Allah an yupu lak lena deiyok nang, an amu tam pil don nang, sik nabi-nabi nang arye, nun dam an nyalamlum yupu lak lelamsike. Ara, an si deice arye, sik nabi-nabi nang arye, nun ninye deiyok nang, Raja nang ap nirya, nun deiyok nang sik dam ap, tonda nun apu yapu nang ap, tonda amutuku noutamak ulamik ninye nirya ap, nun ulamupu ninye ap ati, nyalilamsulum yupu ara, moubuka kum kekenyabe.

⁷ Ati, na ni Allah, aning-aning nirya talebuka, pia deice tam erebuka, Pia Mikip Weik Deiyoknye ulyame. Anda dipkopropnye, pia diksukumuk umince, nun dam teleb ninguk ubuka, diksukum piluk dosilyame. Bukni, nunce nun bidamang ati, malye winipdeipdabiba, pia malye weik unyaba ati ara, alye dakalanyabe. Ara, nun nirya, Yehuda yala ninye ap, Yerusalem mutuku noutamak unyap ninye ap, Israel ninye nirya ap, alye dakalaninto unyabe. Tonda, nun yala nang arye, an dam malye weik winilamububa, ance nun yala bokeiplumba, yuk pera mutuku daunyak ninye ap, dam mutuku unyap ninye ap nirya ara, malye wininyap ning ati, alye dakaninto unyabe.

⁸ Diba, na ni Allah anda, Yahweh ulyame. An dam alye dakne ning ara, nun deiyok nang nirya ap, nun talipsik nang nirya ap, nun apu yapu nang ap, nun nirya arye, an tenena kum ning winibirye, an dam malye wininyaba ati ara, nun alye weik usulule.

⁹ Winibiba, nun ni Allah, nun malye winina ati ara, ance talye lukparabuka, wenebuka opsutum bukni, ance dipkoprob nunti, bico tuba tenesimince, kanye teleb arepkiliba, nun malye winin ning ati, kum kipdeipsimince, nunti namin kibuka, melisilyame. Dipkoprop nunda, pia weik malye winibirye, an nyapdeiamsulum yupu yaninyap nang bukni, bico tenebuka melisilyame.

¹⁰ Nun ni Allah an nyapdeiamsulum yupu kekebuka, kum wininyabe. Se, nun ni Allah Yahweh, ance, ‘Aning ara, wininamlulume. Aning ara, pia kum wininamlulume,’ nyapdeipsulumba, an amu tam pil don nang, an yupu lak lena nang, nabi-nabi nang arye, nun dam laka nyalamsik bukni, nunce aning nirya kekebuka, kum winilamupu touk, tuba kum wininyabe.

¹¹ Nun Israel yala ninye nirya ara, ance, ‘Aning wininamlulume. Aning ara, pia kum wininamlulume,’ nyapdeiamsulum ning ara, moubuka kekebibirye, moubuka kum talinyabe. ‘Allah nyapdeipsuk yupu, nun like’ tenen, anti balye tam kibuka, talye batakanyabe. Adeice arye, nun ni Allah, an dam malye winilikinyabe. Ara, an amu tam pil donanye Musa, el dam nyapdeiamlumba, sekamuk yupu buku noutamak, lak nyalamlum yupu ara, ‘Allah na yupu yanimunyopura, narye kanye imun weik ning, anggun nong deice delinamsine. Tonda, weik arye wenepsinirye, supdongopnamsine,’ nyapdeiamsulum ning ara, wini talak nun deice akunum yangalule. Ara, talye ati kume. Nunce pia malye winilamupu buk, ance nunti, ‘Malye uk wininamak’ tenen, supdongopsulume. Asupdeipsuluma deiyok ara, nun malye winilamupa atia.

¹² Ati ara, Allah ance nun ninye deiyok nang ap, nun Israel yala ninye nirya ap ati, “Na yupu yanipmumnyopura, dipkoprob wenepsinirye, ikin ning weika arye arepnamsine,” nyabuka, nyalin yupu deice nyamsulume. Ayupu nyapsulum touk, malye winilamupu ati, weik ikin ning, pia weik nun nong deice delilamsulume. Ara, Allah ance, Yerusalem mutuku noutamak unyak ninye nirya ati, weik kanye imun wenena ning wenyamsuluma deice arye, malye nang arye, Yerusalem mutuku ninye obuka sirya dakikce, amutuku aik ap, amutuku ning nirya ap dakuka, atu kiplomik ning ara, tukwak im sirya, mutuku sirya nirya unyak ninye noutamak ara, awinyamuk ning atonun ton, kum winiplume.

¹³ Aning ara, Musa sekamuk buku noutamak arye, “Anggunda, malyeuk tuba winipmunyopura, dipkoprob weik kanye imun ning dopropnamlume,” nyapdeiamlumba sekamuk. Ayupu nyapdeiamsulum touk, wini talak ara, Allah ance nun wenena ati, ikin ning, nun deice delinmasilame. Wininmasilambuk, nunce nun ni koproba Allah, an Yahweh ati, ‘Diba aning ara, nun bidamang malye winilamupa dekna ati, ikin ning dopropmabe,’ tenena kumce, tamubuka an dam malyeuk updeipkupu. Ara, nunce, ‘Nun malye wininyap ning nirya ara, batakibirye, Allah el dipkoprob yupu uk talipnamabe,’ kum tenebupe. Tonda, Allah ance, ‘Aning ara, wininamlulume. Aning ara, pia kum wininamlulume,’ nyapsulum ning ara, moubuka kum talibupu.

¹⁴ Amalye winilamupa deice arye, nun ni Allah ance, nunti wenepmasilame. Ara ance, ‘Sik aninye dam, weik ikin ning doprobikirye, kanye imun unamle’ tenen, kintinyamsulum ning, akunum nun dam yanmasilaba dopropmabe. ‘Anang wenepnaman do, kum do?’ tenena kum diparyuk, wenelamsulume. Deiyok ara, ani. Nun ni Allah Yahweh, ance pil dominye ning ara, dipkoprob diksukum ninguk, pil dosilyame. Bukni, nunce an yupu ara, pia moubuka kum kekenyabe. Daniel birye, Allah ati nyabuk. Nyabukce, ayupu ton dukdongobuka nyabuk.

¹⁵ “Ati ara, na ni Allah, ance aning-aning nirya talebuka, pia deice tam erebuka Pia Mikip Weik Deiyoknye ulyama ati, an siuk erenyape. Ance an mapu Israel ninye, Mesir mutuku noutamak ulamik talak ara, ikin weik asa ulamik bukni, an taruk mikip deice arye, bobuka yanamsulume. Ara, ‘Sikce na mikip ara, biknamak’ tenen, winyamlume. Ance weik mambul pil dolamluma deice arye, ninye weika arye, an siuk erenyake. An si ara, luba pia kum kipnamake. Tuba tenenauk unamake. Bukni, wini talak nunda tuba malye winibirye, an si yanikinyabe. Ara, nunce an nyapdeiamsulum touk, kum wininyaba deice, an dam malye wininyabe.

¹⁶ Se nun ni koproba Allah, ance aning-aning nirya talebuka, pia deice tam erebuka, pia mikip weik deiyoknye ulyame. Bukni, nunda malye weik winilamupu bukni, Allah ance minop talak arye dipdongobuka, wini talak babye, tuba diksukum piluk dolyame. Diksukumuk winiminya ati ara, telebuk ulamlum touk, na ni Allah, an yu upmakilye babye, bataklyame. Ara, wini talak babye, dotalak babye, weik kanye imun ning, nun Yerusalem mutuku ninye deice delinamsilam ning ara, bataksutumce, ila tuba tonap, kum arenamsilyame. Yerusalem mutuku ara, ance wipdeipluma anya arye, an mutuku koproba atonun ulule. Yerusalem mutuku kon deice ara, pia teleb kipdeiplumba, pia teleb lek mutuku atonun ulule. Ati, ‘Amutuku wenen ning ton, kum arenamsilyame’ tenen, moropkine na nio. Se, nun ni Allah, Yerusalem mutuku ara, ance wiplum mutuku bukni, nun ap, nun apu yapu ap, nun nirya arye, malye wininyaba deice, sik yuk mutuku kili sal nirya arye, Yerusalem mutuku ati, malye yupu nyanyake. Nun unyaba dana-dana unyak ninye nirya arye, an mapu Yerusalem mutuku unyak nang ap, Yerusalem mutuku ap ati, malye nyanyakce, ‘Sikda malye wininyake,’ nyabuka, yep-yep asinyake,” Daniel birye, Allah ati nyabuka morobuk.

¹⁷ Daniel birye ayupu ton morobuk. “Ati nun ni Allah, nara an amu tam pil donanye Daniel birye, an Allah ati, ‘Melipsilyame,’ nyabuka, moropkin ning ara, kekepnimince, melipsilyame. Ara, an ‘Naʼ tenen, mutuku Yerusalem noutamak, asik dobuka ulamupua ani, yuk ninye biyikce, nun aik nirya akunum dakuka uluplopsik ning ara, tamubuka teleb kipdeipsilyame. Aning winipdeipsiminba, yuk mutuku ninye nirya arye, awinipminye ning eibikirye, ‘Se, dipkoprob Allah ara, eluk ulule,’ tenebikirye, an siuk kel biknamake. Yerusalem tamubuka teleb kum kipdeipsiminyopura, ‘Yuk mutuku nang arye, tonap malye yupu tuba nyapkicak’ tenen, moropkine na nio.

¹⁸ Tonda, nun ni Allah, ance nun moropkiyap ning kekepsilyame. Nun ni Allah, nun aik dobuka ulamupu mutuku, yuk nang arye, binuka uluplopsikba, imun kanye uk bobuka, unyap ning ara, ance eipsimince, melipsilyame. Ara, Yerusalem mutuku ara, ance ‘Amutuku noutamak ara, na si deipniba, amutuku noutamak ara, na si erenamniake,’ nyapdeiamsulum mutuku ati, moropkine na nio. Tonda, nunce anti, moropmakiyap ning ara, nun kanye aryuk, ‘Nunda diksukum unyap nang anya arye, morobibyopura, dipkoprob Allah kekenamsile’ tenen, kum moropkiyabe. Aning kum bukni, nun wininyap ning ati, talye lukparabuka, wenebuka opsutum bukni, ance eipsimince, bico tenebuka, nunti melisilyame. Ance bico tenesilyama ati, ‘Allah el teleb ulye deice arye melipnamsil’ tenen, morokinyabe,” nyabuka, Daniel birye, Allah ati morobuk. Tonda ayupu ton morobuk.

¹⁹ “Nun ni Allah, ance aning-aning nirya talebuka, pia deice tam erebuka, Pia Mikip Weik Deiyoknye ulyame. Nun ni Allah, ance nun moropkiyap yupu ara, kekepsilyame. Tonda, nun malye wininyap ning ara, kum daneipnamsilirye, nunti namin kibuka lyepsilyame. Tonda, nun moropkiyap ning ara, kekepsimince, ‘Anang ap, Yerusalem mutuku ap ara, lyepnune,’ tenepsilyam, na nio. Amoropkiyap ning ara, pia ouku una meme. Adiparyuk, min yuma melipsilyame na nio. Deiyok ara, yuk ninye nirya arye, ‘Allah elda ninye lyenanye ulule’ tenen, akunum kel bikike. Tonda, Yerusalem mutuku noutamak ara, an si deipsulume. Tonda, an mapu Yerusalem mutuku unyak ninye nirya ara, an ‘Naʼ tenen, ninye diamuka. Ati ara, ance lyepsiminba, ‘Ninye nirya arye, an siuk erenamkiyak’ tenen, moropkiyabe na nio.” Daniel birye, Allah ati morobuk.

Malaikat Gabriel birye, Daniel biti, aminyan talak upnamuk ning ati, yanuka lak nyapdeibuk yupu

²⁰ Na malye winilamse ning ap, Israel ninye nirya, sik malye winilamik ning nirya ap ati, ‘Allah Yahweh arye, nun malye winin ning nirya kum daneipnamsilirye, nunti namin kibuka, lyepdopnamsil’ tenen, moronmase. Tonda, Allah wibukabukce, pia teleb kipdeibuk mutuku, Yerusalem mutuku ara, malye nang arye uluplopsik ning ara, ‘Allah arye punuabuka, tamubuka telebuk kipdeipnamsil’ tenen, moronmase. Aning nirya, tuba moronmase talak ara, malaikat el si Gabriel birye, na dam yayuk.

²¹ Allah moronmasiryuk dinmasiba, malaikat Gabriel, yayuke. Gabriel bira, Allah el yupu nyapliba, ayupu bobuka, lak nyalbananye ulule. Gabriel bira, asum lengdar mapmasa deice eipmasinye bira, Gabriel el uka. Na tuba Allah moronmase talak, Gabriel lakuka min yuma yangayukak, eipse. El yayuk keting ara, sintam ninye arye, Allah el si erena ati, kam ning obuka, uku dalamak ketinguk, yangayukak eipse.

²² Atalak ara, malaikat Gabriel adiparyuk, na dam yayukce, “Danielo, na an dam yanmana ara, deiyok ani. Ara, aminyan talak winipnamle ning ara, laka nyapkiniba, ance ayupu nong noutam ning ati, ‘Deiyok atiaʼ tenen, kel biknamlame. Aminyan talak upnamle ning ara, nong lak nyapkiniba, ance moubuka kel biknulama ati, lak nyalyanmakine.

²³ Ance Allah ati, deiyok koubuka moropmamu talak ara, Allah adiparyuk akunum kekepmakila ati ara, elce winipnamle ning ara, anti lak nyalyakine. Deiyok ara, Allah arye anti, weik arye kanye deipkuka atia. Ati ara, narye nyapnukin yupu ara, an moubuka kekepnunilyame. Narye an lengdar maplum ning, lak lepkiniba, el nong kel biknulame,” malaikat Gabriel birye, Daniel biti nyabuk.

²⁴ Gabriel birye nyabuk yupu ara, ani. Allah arye anggun Israel ninye ati, tekbarye tujuhpuluh kali, tekbarye talak (490) ton, lo tabakuka arepnamsile. Anyarepnamle ning deiyok ara, ani. Ara, Allah el ‘Naʼ tenen, ninye, Israel ninye ap, tonda, Yerusalem mutuku noutamak unyak nang ap arye, ‘Sik malye wininyak ning nirya bataknamak’ tenen, lo arepnamsile. Ara, sik malye-malye wininyakce, Allah el yupu yanibuka batakanyak ning ara, batakikirye, ‘Tamubuka, Allah dam tamubuka yanamak’ tenen, lo arepnamsile. Winibicopura, Allah el ‘Naʼ tenen, mutuku, Yerusalem mutuku ara, malye winilongolamice ning nirya, kum kipdeibuka, teleb kipdeipnamle. Atalak ara, sik malye winilamak ning nirya, kum daneipnamsile. Winibuka lyepsilirye, pia diksukum winin ninguk arenamsile. Adiksukum winina ara, pia kum kum danamle. Tonda, Allah arye arelamukba, ninye arye lengdar deice elilamak ning ap, Allah el yupu laka len nang, nabi-nabi nang arye, aminyan talak winipnamuk ning ap, winipnamle ning ap, laka nyanyak yupu ap, nong lak upnamle. Tonda, Allah el Pia Teleb Lengna Aik kintinibikirye, teleb ubuka dopnamake.

²⁵ Anyapkin ning ara, ance sekmince, moubuka kel biknamlyame. Allah arye nyapliba, deiyok nang arye, ‘Yerusalem mutuku noutamak, Allah el si eren aik, tamubuka teleb kibuka dopnamak,’ nyapdeibice talak arye, deiyok koubuka, anyapce nukikirye, Allah arye wipdeipliba, anggun talipnamsil weik deiyoknye ton yanamle talak ara, anoutam talak ara, tekbarye, tujuh kali tujuh (49) talak kipnamle. Winilamica ani, atalak akunum uplyopura, Allah arye wipdeipnamle ninye deiyoknye yanuka talipnamsile. Winiplirye, tonap tabakuka, lo arepnamsil ning ara, enam puluh dua kali tujuh (62 x 7) talak ton (434) kipnamle. Atalak ara, tujuh kali enam puluh dua (62 x 7), ara (434) talak noutamak ara, Yerusalem mutuku aik ap, amutuku bana ati bisik nirya ap, Yerusalem mutuku ongomkanim abuka, dana-dana tam nirya, mek sekuka palipnamak ning ap, aning nirya pil dobikirye, moulinamake. Aning nirya domikirye, moupdeipnamak bukni, apil donamak talak noutamak nirya ara, weik imun kanye deice arye unamake.

²⁶ Allah arye wipdeipnamlanye birye, talipnamsil bukni, lo ton tabakuka, enam puluh dua kali tujuh (62 x 7) talak ton (434) sirya dakuka akunum winiplyopura, el talipnamsilanye bira, el malye winina kum diparyuk opnamake. Obicopura, el ning nirya kum upliba, ninye nirya arye, ‘Se, elda talye urdemuk ulamuke. Elce, ‘Wininamne,’ tenelamuk ning ara, nong kum ubuke,’ tenenamake. Winibice talak ara, yuknye ton yanamle. Anye bira, ninye talina deiyoknye, mikip weiknye ton yalirye, Yerusalem mutuku ap, Allah el si erenyak aik, Yerusalem domice ning ap, nirya ulubuka daklopnamle. Atalak ara, Allah arye, ‘Anye el winilul ning nirya, sirya daknamle talak ani, atalak akunum kum danule,’ tenebuk touk, atalak ara, weik mek mikip arye, minopce olamle atonun, minopce anye, el ulul ning nirya, kum danamle. Atalak arye dipdongobuka, doryanamle talak noutamak nirya ara, mal olana ap, weik imun ning ayala-ayala nirya ap ara, pia weik unamle. Winibuka unamalbuk, Allah tenebuk touk, sirya dakne talak upnamlarya.

²⁷ Amalye unamlanye, ninye deiyok kibuka talinamlanye birye, ninye weik bulubuka wekmacak arye, “Na yupu kekepnumunyopura, narye anggunti, wininamsine,” nyabuka, sik dam nyalin yupu deice arye nyapnyopura, ninye weika arye, ‘Telebe, an yupu kekenamabe,’ nyabuka, el tam kipnamake. Ara, tekbarye talak noutamak arye unamake. Atalipnamle talak noutamak ara, el anye birye, “Sik malye winin ning pununa ati, ‘Allah arye kum kipdeipsilirye, nunti namin kipnamsil’ tenen, Allah ati kam ning obuka, arelyangalulum ning ap, tonda Allah el si erena ati, arelyangalulum ning ap nirya ara, bataknamlulume. Aning kum wininamlulume,” nyabuka, yupu seknamle. Winiplyopura, el anye birye, Allah el si eren asik deice tam ara, pia weik malye ning deipnamle. Aning ara, malye winina deiyok ning dobuka, Allah el si erena asik deice deipnamla deice arye, anyaik pia malye upnamle. Tonda, aning ara, asukumuk deiplyopura, dauamlya ani, Allah arye, ‘Apia malinye bira, wenebuka opnirye, kum kipdeipnamne,’ tenebuk talak akunum uplyopura, weik wenen ning arepliba, anye kum daneipnamle. Aning nirya ara, malaikat Gabriel birye nyabukba, Daniel birye kekebukce sekuk.