Daniel 8 - Eipomek

Daniel lengdar mana atonun deice arye, yim domba basam ap, yim kambing basam ap, laka ubukba, eibukce, nyabuk yupu

¹ Babel mutuku ninye deiyoknye, Raja Belsiyasar talibuka ulamuk talak noutam ara, keting tamun winilye deice arye, na Daniel birye, lengdar mana atonun deice eipse. Aning eipsa ara, like bitinye ning eipse. Minop talak yuma ara, yuk ning ton eipse.

² Aning like bitinye talak, lengdar mapsirye eipse ning ara, ani. Na una ati dopropse mutuku ara, Persia mutuku noutam bukni, provinsi si ara, Elam unmase. Anoutam ara, Susan mutuku uk, lak kibukba eipse. Ara, Susan mutuku noutam tikmasirye, natikmase mekin, el si ara, Ulai mekin tikmase.

³ Amekin tikmasirye dinmase talak ara, Ulai mekin piridipna dam ara, yim domba basam ton, el kisok deice, cang taice ning, ara, yang bitinye belepmokba eipse. Bukni, yang tonok ning ara, cang weik ubuk bukni, yuk yang ara, mitik touk ubukba eipse. Ton yang ara, mitik cang ubuk ning ara, min yuma belebukba eipse. Bukni, aminyan talak belebuk cang weik yang, akunum uamuk ning ara, aminyan belebuka tikukba eipse.

⁴ Natikuka dinmaseba, ayim domba basam ara, timur tam ap, barat tam ap, selatan tam ap, tonda utara tam ap, bikbik abuka banmok talak ara, el kisok urasin ara, yang erepdeibukce, banmokbuk eipse. Adomba bikbik abuka banmok talak ara, yuk kam ulamle ning arye, ton yanuka kum opmanto ubik. El mikip weik upmoka ati, el urasin tam ara, yuk sapi ato ning nirya ara, tikman kumto ubik. Adomba el mikip arye, ‘Winipnune. Aning ton oplopnunʼ tenepmanto ning ara, ton kumce, awininmok ning ara, ‘Na siuk erepnune,’ tenebukce, maknya kintinina deice banmokba, yuk kam ulamla ato ning do, yuk nang do nirya, el tenepmok touk ara, lyepdanmanto kum ubikba, aning ton eipse.

⁵ Narye adomba ati, tuba dinauk unmasirye, ‘Aning ara, yata deiyok ati ulul do?’ tenen, tuba tenilamse talak ara, yim kambing basam ton, keting kumulban tam arye panabukce, tukwak mutuku nirya, im sirya nirya, tuku deice yanina kum bukni, mitik tonun alip tam bikbik abuka, yanganmokbuk eipse. Atalak ara, mikip arye bikbik abuka yanganmoka ati, el yan ara, tuku deice yanibuka, kum yanganmok. Tonda, ayim kambing, el asing dana-dana ubuka noutam arye, yang tonok cang weik belyamuk ning ton eipse.

⁶ Yim kambing basam ara, yim domba basam el dam ton, amek lilun dam yanuka tekmukak eipse. Ayim kambing basam, el yu weik ubukba, ‘Domba basam opnunʼ tenen, adomba basam tikmok tamuk, bikbik abuka yayukce, lukuka donokmanto ubuk.

⁷ Ayim kambing arye, domba basam onmok ning ara, na tuba tikmasirye, moubuka dinmase. Yim kambing basam ara, pia yu upmoka ati, el kisok taice arye, mek dam tikmok yim domba lukuka obuk. Obukba, ayim domba, el kisok deice belyamuk taice ning bitinye ara, lukuka pepsakuk. Winibuka ati, ayim domba basam ara, mikip kumce, mitang ubuka ati, tamubuka opmanto kum ubuk. Adomba elda, tuku deice sakuka poulbinmokba, yim kambing arye yanuka, adomba el nong deice, yanipdongobuka onmok. Akambing arye, domba onmok talak ara, akambing el mikip pia weik upmoka ati, ninye tonoknye babye, ton adomba melibuka, kum lyepmanto ubuk.

⁸ Aning nirya winibukopura, ayim kambing basam ara, ‘Nara, pia mikip weiknyeʼ tenen, maknya kintinina pia weik unmoka deice, el bidamnye, si weik tonun erenmok. Bukni, akambing basam ara, el mikip arye talibuka opnin banmoka ani, atalak noutam ara, el kisok deice, taice weik belyamuk ning ara, cebuka sakuk. Acebuka sakukak arye, pia bol yuk taice ning ton dumbarye, el kisok noutam arye belebuka tikik. Abelebuka tikik taice ning nirya ara, dana-dana yuk-yuk belebuka tikikce, lake kibikba eipse. El kisok deice bukni, tonok taice ning ara eitam, ton ning ara utam, ton ning ara, keting palanyangan tam, ton ning ara, keting kumulban tam panabukce, dana-dana tam ubukba eipse.

⁹ Adumbarye kisok taice belebukura, akan-kan arye, tonok ning ara, mitik tonun kisok taice ton belebuka tikuk. Amitik tonun kisok taice ara, el mikip weik ati, dabu tam ara, arah utara tam ap, keting palanyangan tam ap, tonda pia urasin teleb mutuku, Israel nang mutuku tam nirya ara, elcuk, ‘Amutuku nirya talipnamneʼ tenen, dinmok.

¹⁰ Akisok taice ara, el mikip pia nepnin balamuka ani, el mikip pia weik ubukba, im tamto welepmokak eipse. Winibuk talak ara, elce, ‘Na mikip weik kipmanila ati, im deice tam yin talen nang ara, im noutam tiklamle kurya ara, sik dam binuka opnune,’ tenebukce, ton tam ning ara, binuka obuk. Winibukce, kurya im deice tiklamle ning ara, weik tonun dobuka, tukwak mutuku deice dopkwetebukce, el yan arye yanipdongobuk.

¹¹ Aninguk kum bukni, elce im deice unyak yin talen nang nirya, sik weik deiyoknye biti, wabuka malye nyabukce, im deice weik deiyoknye, el si erebuka kina ati, asum-asum nirya, tukwak nang arye, kam ning boyanuka arelyangalamik ning ara, ‘Aning ara, bataklulume,’ nyabuka, yupu sekukce, kum kipdeibukba, sik imam-imam nang arye, aning ton kum arepmanto ubik. Tonda, im deice unyak yin talen nang, sik weik deiyoknye biti, el si erena ati domik aik nirya ara, malye weik kibuk.

¹² Aning nirya winibuka deice arye, Allah el si erelamikce, tukwak mutuku ulamik nang ara, ton nang arye, sikce dipkoprob winin ning batakikce, deiyok koubuka, pia malye dem winilamikce, Allah el si erena ati arelamik ning ara, batakuka, amalye ning ati, el si erebuka kina ap, el si erena ati, sikce kam ning boyanuka arelbalamik. Adeice arye, sikce Allah el dipkoprob yupu ara, akunum dobuka, tuku deiceuk dopkwetebik. Wininmeka ani, akisok taice uamuk malye pia weik deiyoknye, elce pil dolamuk ning nirya ara, nonguk kibukce, teleb ap, mikip weik ap, tabaknin balamuk.

¹³ Winibukopura, na kekenmasiba, Allah el pil donanye, im deice malaikat tonok arye, yuk malaikat ati, malye nyabuka, ayupu nyabuka asipdeyuk. “Se, awininmalba eipmap ning ara, yata wiribuka talak arye, tuba winipnin balamlya ani, akunum winibuka sirya dakanamle do? Tonda, yata wiribuka talak ton noutam arye, amikip weik malye deiyoknye birye, Allah ati malye nyaplirye, asum-asum nirya, Allah el si erena ati arelbanyak ning ara, ‘Bataknulyame,’ nyabuka, yupu seklirye, kum kipdeipnamle do? Elda yata wiribuka talak ton, mikip weik kiplirye, aning nirya malye kibuka, talibuka tiknamle do? Tonda, yata wiribuka talak ton ap, im deice yin talen nang ap, sik yin talen deiyoknye ap, malye kiplirye, yaninauk unamle do? Tonda, im deice weik deiyoknye, el si eren aik ati, pia malye kibuka yanipdongopmal ning ara, yata wiribuka talak ton, malye kipdeipnamle do?” nyabuka, asipdeyuk.

¹⁴ Nyabuka asideyukura, yuk im deice malaikat arye, tamubuka nyabuk. “Kume, asum-asum nirya, beren tam ap, lukunyan ap, daupnin balamlya ani, yupa pia weik, dua ribu tiga ratus (2.300) sum ton, tuba kipnin banamle. Tonda, atalak noutam nirya ara, ninye arye, Allah el si erena ap, el si erebuka kina ati arelamak ning ara, keting noutam ap, lukunyan ap, arelyanaganyak ning ara, amalye winina deiyoknye birye, yupu sekliba, ninye arye aning boyanuka, ton ap kum arelyanganamake. Bukni, anyapman talak akunum uplyopura, Allah arye, el si eren aik ara, tuba tamubuka teleb kipdeipnamle,” nyabukba kekepse.

Malaikat Gabriel birye, Daniel lengdar deice eipmok ning, laka nyalyayuka ati, sekik yupu

¹⁵ Atalak ara, na Daniel birye, aning nirya wininmokba, eipmase ning ara, ‘Se, aning nirya ara, el nong moubuka kel biktinyeʼ tenen, kanye tuba teninuk unmase. Winimase talak ara, kum tenipmase bukni, talye karin arye, ninye bol atouk upmoknye ton, na urasin tam yanuka, tikmokba eipse.

¹⁶ Anye bira, malaikat bukni, ninye urasin atonun yanuka, na urasin tam tikilyayuk talak ara, kekenmasibuk, Ulai mek koubuka, otam arye, ninye yupu ton nyabukba, aning kekepse. Ara, “Anda Gabrielo, ance anye el lengdar deice eipmo ning nirya ara, ‘Moubuka kel biktuʼ tenen, el dam bimince, alengdar deice eipmok ning nirya, el nong noutam ning, laka nyapnulyame,” nyabukba kekepse.

¹⁷ Nyabukba, Malaikat Gabriel ara, na nong dam koprop tikilyayuk. Winibuk talak ara, na pia ilil upnukba, adiparyuk lokuka, tuku deice poulbise. Winipseba, amalaikat Gabriel birye, nati nyapnuk, “Anda ninye arye deipkiknye ulyam bukni, na nyapnukin ning ara, moubuka biklyame. Lengdar deice arye winipmanuba, eipmalam ning nirya ara, aminyan talak, tukwak mutuku nirya, sirya daknamle talak winipnamle ning ati, alengdar deice arye eipmalame,” nyabuka laka nyapnuk.

¹⁸ Malaikat Gabriel elce, ayupu tuba nyanmok talak ara, na wi weik talipmanukba, tuku deice sakuka poulbinmasirye, tia talak mapmase. Bukni, amalaikat Gabriel birye, na melina ati, na nong talibuka bukeipnukba, na tamubuka bukse. Buksiba, elce nati nyapnuk.

¹⁹ “Narye anti, yupu ton laka nyapnukine. Ara, aminyan talak, sirya daknamle talak ara, ance arup eipmalam ning nirya ati, Allah el yu upliba, wininmale ning ati, laka nyapnukine. An lengdar deice arye winipmauba, eipmamu ning ara, Allah arye, ‘Atalak ani,’ tenyamuk touk, aminyan sirya daknamle talak wininmale ning ati eipmalame,” nyapnuk.

²⁰ Ara, an dinmalumba, yim domba basam kisok deice, taice ning bitinye belyamuk ning ara, winipmanto ning eipmalame. Bukni, ataice ning bitinye ara, el nong ara, Persia mutuku ninye deiyoknye birye, talipnamle ning ap, tonda Media mutuku ninye deiyoknye birye talipnamle ning ati eipmalame,” nyapnuke.

²¹ Tonda, yim kambing basam, el nong bol deice potong weik uamukba, eipmalam ning ara, winipmanto ning ati eipmalame. Aning el nong ara, Yunani mutuku talibuka, ninye deiyoknye unamlanye biti eipmalame. Akambing, el asing dana-dana noutam arye, tonok taice ning pia belebuka tikmauba, eipmalam ning deiyok ara, ani. Ara, minop ninye deiyok kibuka, Raja kipmalirye, Yunani mutuku talipnamlanye bitia.

²² Tonda, minop talak, kambing basam kisok deice, taice tonok belebuka tikmok ning cebuka sakukba, adeice arye, yuk taice ning dumbarye ton, belebuka tikilyangayukba, eipmalum ning ara, minop talak tonoknye birye, Yunani mutuku nirya talipnamle bukni, aminyan talak ara, amutuku noutam, yuk-yuk bokuka, dumbarye nang ton panabikirye, ninye deiyok kibuka, amutuku bokuka, dumbarye kiplyeba, amutuku-amutuku talipnamaka atia. Bukni, sik adumbarye ninye deiyok kibuka, tukwak mutuku ap, ninye ap, talibuka unamak ning ara, min yuma, yim kambing atonun ning ara, el mikip weik upmal ning atonun, sik adumbarye deiyok nang arye, aning atonun kum upnamake. Min yuma pia mikip weik upnamle bukni, sik aminyan talak dumbarye, ninye deiyok kibuka, Raja nang ara, sik mikip ara, mitik tonun unamake.

²³ Adumbarye nang arye, ninye deiyok kibuka, Yunani mutuku taleamikca ani, sik talinamak mutuku noutam unamak nang ara, pia malye winin ning weik, talibuka winipnin banamake. Bukni, aminyan malye winin ning, sirya danamle talak dam uplyopura, yuknye ton tiknamle. Ara, adumbarye mutuku noutam, tonok mutuku talibuka unamlanye, elda pia weik mandipna ap, yu weik ululnye birye, ninye deiyok kiplirye tiknamle. Elda, tilila yupu nyana kel weiknye unamla ati, tilila yupu weik nyanamle.

²⁴ Aninye deiyoknye Raja bira, mikip weiknye birye, talipnamle bukni, el mikip upnamle ning ara, el bidamnye aryuk, mikip weik kum unamle. Tonda anye birye, ninye weik oplirye, tonda aning-aning weik ton, ulubuka dakloplirye, sirya dakliba, kum danamle. Winipliba, ninye eibikirye, ninye nirya ilil weik unamle. Tonda, anye birye, ‘Winipnamne,’ teneplye ning nirya ara, dipkoprob winipnamlarya. Ati, elce wininamle ning nirya ara, dipkoprob wininamle. Tonda, el malye weik winipnamle ning deice, yuk mikip unyak nang yupa weik, tonda Allah el mapu koproba yupa weik, obuka kum kilinamle.

²⁵ Anye bira, el kel weik deice arye, ‘Na yupu dem kekepnitingʼ tenen, ‘Naʼ tenen arye, tilila yupu nyapnamla deice, ninye weik tonun, el yupu ati, ‘E dip nyanmasile,’ tenebikirye, diba tenenamake. Ati, el wininamle ning nirya ara, nonguk kipnin banamle. Aninye deiyoknye, mikip weik, malye weik unamle Raja, elda maknya kintiniplya deice arye, kanye erenanye unamle. Tonda, elce, “Aning ara, wininamne,” nyaplyeba, el yupu kekepnamak nang, diba tenebikirye, ‘Nunda telebuk unamabe,’ tenepnamak bukni, kum bikmakibuk, elce ninye weik opnamle. Aning atonun, amalye mikip weik Raja bira, Allah elti, ilil tenena kumce, yaniplirye, ‘Allah el winin ning nirya ati, malye kibuka, kum kipnindeipnamneʼ tenen, piripnamle bukni, kum winipnamle. Piripnamle bukni, aminyan talak ara, aninye deiyoknye Raja ara, Allah el bidamnye, mikip weik deice arye, anye weneplirye, obuka kum kipdeipnamle.

²⁶ Allah el si erena ati, kam ning oyakirye, beren tam talak babye, keting noutam talak babye, Allah el si erenamaka ati, arup lengdar mapmoma deice, laka nyapmakuba, eipmanu ning ara, dipkoprob aminyan dotalak nong upnamle. Bukni, aeipmamu ning nirya ara, aminyan talak wininamle ning ati, wini talak nirya ara, ayupu ninye yuk nang, kekenmacak ton, min kum laka nyapnalame.

²⁷ Atalak ara, na Daniel bira, na nong mikip kum upnuk talak ara, like bitinyeto, winilyeto, sum ton, uk weik dilamnuke. Winilamnukba ulamsa ani, tamubuka buksopura, ninye deiyoknye Raja arye, nati, ‘Apil dopnilyame,’ nyabuka, arepnuk ninguk donmase. Bukni, lengdar deice mapmasiba, awinimukba, na asing arye eipmase ning ati, ‘Se, aning ara, el nong ara, yata ati do? Yata winipnamle do?’ tenen, ilil upnukba, teniltonauk ulamsirye, pia moubuka, ‘Deiyok atiaʼ tenen, bikmanto kum uamse.