Daniel 7 - Eipomek

Dumbarye ning ton, Daniel dam lak kibukba, lengdar mapmoka deice arye, eibuk yupu

¹ Babel mutuku ninye deiyoknye, Belsiyasar taleamuk talak bukni, keting tamun tonok deice, Daniel birye mapmok talak ara, lengdar mabukce, lengdar dib eibuk ning ara, nong kum ubuk bukni, el kanye noutamak ara, Allah arye el kel bikna ati, arebukba, moubuka bikuk. El tenebukce, lengdar deice eibuk ning deiyok ara, mitik tonun sekdeibuk.

² Daniel birye sekuk ning ara, ani. “Na Daniel lukunyan mopmanu buk, alengdar mapsirye, eipse ning ara, ani. Weik kumanya outam tonap, itam ap, tonda otam ap, atam ap, im deice arye yayuk kumanya ara, weik mekwen deiamukak yan dobukba, amekwen weik arye, lonting-lonting abuk.

³ Lonting-lonting abuk talak ara, mitik anun weik kam ning atonun ning, dumbarye mambul weik ninguk, amekwen pum tam arye welebik. Akam ulamle ning dumbarye, sik urasin atonun kume. Sik urasin yuk-yuk ubukak, eipse.”

⁴ “Min yuma weleyayuk ning, el urasin ara, weik yu kuse atonun ning, el si singa kus, aning ara singa atonun uamuk bukni, el pol belyamuk ara, Maplya maka pol atonun uamuk. Winyamuka bukni, na tuba dinmasiba, talye karin arye, el pol nirya kum dayuk. El pol kum ubuk tam ara, ninye winilamak touk, yan bitinye arye yanibuka tikukce, ninye kanye bolamak touk ubuk.

⁵ Kam ning bitinye ning, amek kwen pum tam panabuka laka kibukba, eipse ning ara, el nong urasin ara, weik yua basam atonun bukni, el urasin ara, bai kam atonun ubuk. Aning ara, el si beruang nyalamak touk ubuka ati, el potong ara, cang ubukba eipse. Eipse ning ara, el yan duk deice aniryuk, yanibuka tikmok. Tikmok talak ara, el si bam bol dam yace yok winilye, si arekdongobuka, bopmukak eipse. Ninye yupu atonun ton aning ati, yupu nyabukba, kekepse ning ara, ani. ‘An tikmince, teneplum touk, tup ning weika arye dinmalyame,’ nyanmokba kekepse.”

⁶ “Abitinye panabrik ninguk, dinmase bukni, kam ning yuk ning ton, winilye ning panabuk. Aning ara, weik yu kuse atonun bukni, el potong ara, mirin ning panabuk. El si ara, macan tutul nyalamak ning. Apanabuk ning, el balye tam ara, maka pol atonun dumbarye uamuk. Tonda, el kisok babye, dumbaryeuk uamuk. Winyamuk ning welebuk. Awelebuk ning ati, ‘Ninye im sirya, mutuku sirya nirya talipnamle’ tenen, mikip deiyok ning arebuk.

⁷ Aning nirya, tuba pia dinmase bukni, aminyan talak kam ning dumbarye ning ton welebuk. Aning el mikip ara, pia weik anya arye, weik ilil upnukce, sirim talipnuke. Ara, el si ara, kat ning besi atonun uamuka anya arye, el din ati, ninye obuka dinmokce, sekdoba ara, yan arye yaniplobuk. Min yuma panabuka tikmek kam ning winilinye, sik urasin yuke. Aminyan weleyayuk ning, dumbarye ning, el urasin ara, yuk ubukba eipse. Aning el kisok dup ara, yang 10 uamukak eipse.”

⁸ “Nara, el kisok yang uamuk ning atibuk, pia dinmasirye, ‘Aning ara, yata deiyok ati ulul do?’ tenenmase talak ara, talye karin arye, akisok yang 10 noutamak arye, mitik yang tonok ton welebuk. Amitik yang welebukopura, min yuma upmok yang winilinye ning nirya luksakuk. Winibuk talak ara, mitik yang welebuk ning ara, ninye asing atonun, ubuk. El si bam bol arye, yupu nyabuk ning ara, erepdanuka, kwalilan yupu atonun nyabukba, kekepse.”

⁹ “Wininmok ning anyuk, tuba dinmasiba, ninye deiyok nang bun ning, pia teleb ning ton, yanuka ubukba, eipse. Tuba dinmase talak ara, pia minop talak donirye, Kam Ulamuka ani, Pia Tuba Kam Unamle Deiyoknye yayukce, abun ning deipmeka noutamak arye, tonok ning deice yanuka bukuk. Ayanuka bukuknye bira, el ongopmok baju ap, el potong ap ara, pia teleb ning kurulamle touk ubuk. Ara, ngarye maka potong, pia kurulamle touk ubuk. El ninye deiyok nang bun ning deice, bukmokak ara, uku buk atonun ning, labum-labum abuka pakanmokak eipse. Tonda, el yanuka bukmok ning amu tam ara, el yuk arye balamle ning, yan serek el si roda ton uamuk. Ayan serek ara, yan sirya ara, uku buk labum-labum abuka, pakanmokak eipse.

¹⁰ Atalak ara, el yanuka bukmoka dam arye, weik mek balamle touk, uku dilamuk mek, kutukuka sakukce biyuk. Winibukba, im deice ninye, yupa pia weik, nukmanto kum beribu-beribuan ap, berjuta-jutaan nang ap nirya arye, el tibuk kanye deibikce kinmek. Sik nirya arye, ‘Elce tenebuka nyapsilye touk wininamap’ tenen, el dam kintinibuka kekenmek. Atalakuk, sik im deice unyak ninye, pia kum nukmanto ninye ton, el dam yanuka wekuka, antanap dongopmek diparyuk, tukwak ninye nirya bukni, sik yuk-yuk winilamik ning, sekiamuk buku yanuka deibikce, ‘Ninye yupu bokeipnuyap’ tenen, abuku yanuka yok deibik.”

¹¹ “Winibik talak ara, na tuba anyuk dinmase. Wininmasiba, asum eipmase mitik yang, belepmok ning arye, el yupu ara, erepdanuka kwalilan yupu, tuba nyanmokba kekenmase. Malye yupu nyabuka erepdanuka, kwalilan tuba unmokba, el nong oplobik. Obuka batakikce, el nong nirya dobuka, weik uku dinmoka noutamak dongobikura, el nong dibuka, sirya dakuk.

¹² Winibuk talak ara, sik yuk-yuk beletikmek kam ulamik ning winilye nirya ara, weik deiyok nang unamake ati, mikip weik umauk ning nirya ara, kum ubukba, talye urdemuk ulamik. Sik mikip weik deiyok ning kum dayuk bukni, sik awinilye kam ning nirya ati, sik kam un talak ara, ‘Winibuka mitik tonun ton kam unamlulume,’ nyabuka, nyapdeiamuk touk, lo arebukba, mitik tonun ton tuba kam ulamik.”

¹³ “Alukunyan noutamak babye, na lengdar mapmasirye, lengdar deice dinmase. Wininmase talak ara, Ninye Mi Atonunye, ninye urasin atonun upmok ning welebukba, aning ton eipse. Tonda, el anye yangayuk talak ara, dua bum arye, deibuka antanapmok deice yangayukak eipse. Ninye Mi Atonunye yanganmoknye ara, el minop talak arye, kam ulamuka ani, Pia Tuba Kam Unamle Deiyoknye, el dam bana ati, sik im deice unyak ninye arye, menekuka banmekak, Ninye Mi Atonunye, sik aminyan tam banmok.

¹⁴ Winibukba, pia minop talak donirye, Kam Ulamuka ani, Pia Tuba Kam Unamle Deiyoknye, abukmoknye birye, el anye bira, Ninye Mi Atonunye ati, weik mambul ning weik arebuk. Elti arebuk ning ara, ani. Ara, ‘El mikip weik arye, aning-aning nirya talinamle’ tenen, deiyok ning ap, weik dirina ap arebuk. Tonda, ninye im sirya, mutuku sirya nirya ap, aminyan winipnamle ning nirya ap, ‘Elcuk tenelye touk unamle’ tenen, deiyok ning ton arebuk. Tonda, anyarepnya deice arye, ninye ayala-ayala nirya ap, yupu yuk-yuk nyanyak nang nirya ap, tonda im sirya, mutuku sirya nirya unyak ninye nirya arye, ‘El siuk erenamak’ tenen, adeiyok ning ton dobuka, Ninye Mi Atonunye biti arebuk. Tonda, el anye mikip weik arye talinamle ning ap, talibuka pia unamle ning ap nirya ara, ninye yuk nang arye, pia kum kum kipdeipnamake. Elce aning nirya talinamla ara, apia unamle.” Daniel birye nyabuk.

Daniel birye, lengdar deice mabukce eibuk ning, nong ubuk ning ati, laka nyabuk yupu

¹⁵ Daniel birye nyabuk. “Lengdar deice mapsirye dinmasiba, winibuk ning nirya ati, epsirye, ‘Aning ara, yata winipnamala ati upnil do?’ tenen, na kanye talima boktopnukba, kanye imun kanye bobuka unmasirye, pia teniltonauk ulamse.

¹⁶ Winipnukba, narye otam tikmok im deicanye dam bisirye, awinipmukba, eipmase ning nirya ati, ‘Aning eipmase ning nirya ara, yata deiyok ati ulul do? Aning nirya nong ara, lak nyapnilyame,’ nyabuka, binuka moropse. Abinuka moropsiba, el anye birye aning nirya nong ati, laka nyapnuke.”

¹⁷ Alaka nyapnuk ning nong ara, ani. “Aweik dumbarye kam un ning belepmokak eiplum ning deiyok ara, ani. Ara, aminyan talak, ninye deiyok nang dumbarye welebikirye, amutuku-amutuku nirya talibuka, unamak ati eiplume. Sik anang arye yuk-yuk bukni, ninye deiyok kibuka, tukwak mutuku nirya, tia atibuk talinamake.

¹⁸ Wininamak bukni, weik Erena Ulul Deiyoknye, Allah arye aning-aning nirya deice tam ulirye, elce wibuka deiamukba, el mapu koproba ati ara, ‘Sikce na talinun ning nirya, pia talinamak’ tenen, ninye deiyok ning arepnamle. Areplyopura, el mapu arye, adeiyok ning dobuka, talibikirye unamaka ara, pia ati, sik kam unamak ara, min kum dipnamake,” nyapnuke. Ayupu ara, im deice unmoknye birye, na Daniel ati, nyabuka laka nyapnuke.

¹⁹ Nyapnukba bikse bukni, na Daniel birye, tonap anye binyak asipdese. Ara, weik kam ning belepmek ning bukni, dumbarye ning belebuka ara, sik winilye ning atonun, kum ubuka ati ara, el urasin yuk upmokba, weik ilil upnuk ning ati ara, ‘Aning ton kel kiptinye’ tenen, patapnuke. Ara, el unmok ning urasin eipse ara, pia kanye ikin upnuke. El unmok ning ara, ani. Aning el din ati ara, ninye weika arye dobuka, mikip weik deice arye, obuka dinmok. Aning el taruk kala ara, weik kat ning, el si tembaga atonun uamuk. Tonda, el si tace ara, kat ning, besi atonun uamuk. Winyamuka deice arye, el din patanmoka ati, obuka dinmok ning ara, sekuka yaniplobuk. Winipmoka ati ara, narye, ‘Akam ulul ning ara, el deiyok ara, yata ning ati do?’ tenen, asipdese.

²⁰ ‘Aning ara, na kel kiptinye’ tenen, ‘Se,’ tenepse. Tonda, aning el kisok deice arye, yang tagu barye (10) yang uamuk. Awamuk bukni, anoutamak arye, mitik yang ton kutukuka panalyayukba, min arye aupmok yang winilinye, luksakuk. Tonda, mitik yang welebuk ning ara, el asing dam uamuk. Tonda, el si bam bol deice arye, erepdanuka, kwalina yupu uk nyanmok. Ayang ara, mitik bukni, el urasin mikip weik ubukce, yuk belepmek ning nirya ara, sik mikip kumce, mitang ubuk. Tonda, aning el asing ton uamuk. Tonda, el si bam bol deice arye, weik erepdanuka, kwalina yupu weika arye nyanmok. Ati ara, awinibukba eipse ning ara, “Deiyok yata ning ati, winibukba eipse do?” nyabuka asipdese.

²¹ Atalak ara, narye awininmok ning atibuk, pia dinauk ulamse. Wininmase talak ara, amitik yang belepmok deiyoknye birye, Allah el wipdeiamuk mapu ati, akam ubuk ning arye anang ati, ‘Obuka kum daneipnaman’ tenen, onmokak, eipse.

²² Akam ning arye, Allah el mapu tuba onmokbuk, sirya talak ara, minop talak arye, Kam Ulamuka ani, Pia Tuba Kam Unamle Deiyoknye yayuk. Yayukce, weik Erena Deiyoknye Allah, aning-aning nirya deice tam ululnye, elce wipdeiamukba, el mapu nang ati, ‘Na mapu, sik tonok ara, pia dipkoprob unamak’ tenen, ninye yupu bokeibuk. Nyabuka deice arye, dumbarye kam ulamuk ning ati, oplobuk. Amalye deiyoknye oplobukba, atalak arye dipdongobuka, doryanamuk talak ara, weik Erena Deiyoknye, el mapu aning-aning nirya talibuka, ninye deiyok ninye ulamikce, Allah talinamle ning nirya talibuka ulamikba, eipse.

²³ Awinibukba eipse ning nirya ati ara, asukum tikmok im deice anye birye, nati laka nyapnuke. ‘Awinibukba eiplum ning nirya ara, an kel biknulam’ tenen, laka nyapnukine. Aning nong ara, ani. Weik kam ning sirya talak, dumbarye ning welebukba, eiplum ning, el nong ara, ani. Winilye nang arye, kutukuka ninye deiyok nang kibuka, tukwak mutuku nirya taleamica ani, aminyan talak ara, dumunye yanuka kutukuka tiklirye, tukwak mutuku unyak ninye nirya, sik deiyoknye kiplirye talinamla ati, ance eiplume. Tonda, akam ulamle ning winilye weletikikba, sik urasin yuk-yuk ubuka, eiplum ning deiyok ara, ani. Sikce ninye deiyok kibuka, tukwak mutuku nirya talipnamake. Winibuka talipnamak bukni, dumbarye ning ara, urasin yukuk uplirye, ninye deiyoknye, dumunye tiklirye, sik winilye ninye deiyok nang nirya ara, obuka sirya daklirye, malye kipnamle. Elce anang nirya ara, el amu tam deipnamle. Winiplirye, el dem arye, im sirya, mutuku sirya nirya unyak ninye nirya babye, tukwak im sirya, mutuku sirya nirya babye, obuka sirya daklirye, yanipnamle.

²⁴ “Tonda kisok deice arye, yang tagu barye (10) belebukak eiplum ning, el nong ara ani. Dumunye el talinamla kan-kan noutamak arye, ninye deiyok nang, Raja nang ton, tagu barye nang (10) welebikirye, dumunye el talilye mutuku nirya talinamake. Winilamica ani, aminyan talak ara, ninye deiyoknye ton, panabuka tiklirye, talipnamle. El anye talipnamle urasin ara, minop arye talilamik nang atonun kume. El anye birye, el urasin yuk upliba, sik ninye deiyok nang, winilye nang ara, obuka malye kiplirye, yanibuka amu kipnamle. Winiplirye, sik talilamik ning ara, elcuk talinamle.

²⁵ Winipnamle talak ara, el anye birye, Weik Erena Deiyoknye Allah, aning-aning nirya deice tam ululnye, Allah ati, malye yupu nyanamle. Malye yupu nyaplirye, Allah el wipdeiamuk nang ati, pia ikin ning, sik nong deice tuba delinamle. Winiplirye, Allah arye, ‘Aning wininamlulume. Aning ara, pia kum wininamlulume,’ nyapdeiamuk mem yupu ati ara, amalinye birye yanipnamle. Tonda Allah arye, ‘Na tenyamse talak ani,’ nyabuka, el si eren ati nyapdeiamukba, el mapu arye, el si erenamak keting tamun ap, wala ap, asum ara, ‘Kum kipdeipnamle’ tenen, piripdenamle. Winibuka unamle talak noutamak ara, Allah arye, el mapu dobuka, amalye weik deiyoknye ati, arepnamle. Ara, pia diba kum bukni, tia talak ati, Allah el mapu pirilena ati, anye el amu tam deipnamle. Atalak ara, keting tamun winilye ap, tonok ning noutamak ap deice arye, amalye deiyoknye birye, Allah el mapu talinamle.

²⁶ Allah tenelye touk, wininamle bukni, aminyan talak ara, Allah ap, el im deice pil don nang, malaikat nirya ap, yupu talibikirye, ninye deiyok kibukce, mikip weik deice arye, tukwak mutuku ninye talinamlanye bira, el talipnamle ning nirya dopdobikirye, pia kum kipdeipnamake. El ap, el mikip nirya ap, pia kum kipdeipnamake.

²⁷ Winipnamak talak ara, tukwak im sirya, mutuku sirya nirya, ninye deiyok kibuka, talinyak nang nirya ap, sik si erena ati kinyak ning ap, sik mikip deice arye, tukwak mutuku talinyak ning ap nirya ara, im deice nang dopdobikirye, Weik Erena Deiyoknye, aning-aning talibuka, mikip weik ulul Allah ara, el mapu amu tam deipnamake. Winibicopura, Allah el mikip weik deice aryuk, aning-aning nirya talinamle. Winipnamle talak ara, pia ati, min kume kum danamle. Allah aning-aning deice tam ulirye, Weik Erena Deiyoknye, mikip arye talinamle ning nirya ara, pia aunamle. Min kum kum danamle. Yuk deiyok nang nirya ara, el amu tamuk ubikirye, el siuk erebuka si erenamake. El nyalul yupu nirya, moubuka kekebikirye, aninguk wininamake. Im deice anye birye, na Daniel biti nyapnuke. Daniel arye nyabuk. “Ara, aning-aning nirya eipmase talak ara, mining dam tikmoknye dam bisirye, ‘Aning nirya nong laka nyapnilyame,’ nyabuka moropsiba, laka nyabukba kekepse,” Daniel birye nyabuk.

²⁸ “Ayupu nirya ara, na Daniel lengdar mapsirye, dinmasiba, wininmokak eipse ning ap, anye birye laka nyapnuk ning ap ati, kanye imun upnuk. Winipnuka anya arye, akekepse yupu ara, narye ninye yuk nang dam kekena ati, kum laka nyapse. Aning eipse ning ap, kekepse ning ap nirya ara, akunum laka nyapne. Akunuma,” Daniel birye nyabuk.