Daniel 6 - Eipomek

Daniel tongobikce, pia yu weik kuse atonun ning, el si ara singa kuse ulamik noutamak, binuka dongobik yupu

¹ Babel mutuku taleamuk talak ara, amutuku nirya bokukabukce, Provinsi yupa weik, 120 bokeibuk. Bokeibukce, Provinsi kipdeibuk touk, Gubenur nang yupa weik, 120 nang wipdeibukba, amutuku-amutuku yuk-yuk talilamik.

² Tonda, sik Gubenur wipdeibuk nang, 120 nang, sik kalikna ati, Raja arye winilye nang ton wipdeibuk. Ara, ‘Na talye urdemuk wiplopniba, Gubenur nang arye pil bita kum dobicak’ tenen, Daniel ap, yuk nang bitinye nang ap, wipdeibukba, sik Gubenur nang pil dolamik ning nirya ati, kalikna deiyok nang ulamik.

³ Akintinip deibuk mutuku, ‘Talinamak’ tenen, Gubenur wipdeibuk nang ap, sik kalikna ati, wipdeibuk nang nirya ap ara, aulamikce, mitik teleb ulamik bukni, Daniel tonok ara, kel weik kopropnye ulamuk. Ara, Daniel birye, pil pia teleb ubuka dolamuk ning ap, el pia diksukum ulamuk ning ap, adeice arye, pia teleb ulamukba, ninye deiyoknye, Raja Darius birye bikamuk. Daniel pia teleb ulamukba, ninye deiyoknye birye, ‘Na mutuku weik kalikna deiyoknye kina ati, Daniel wibuka deipniba unamle,’ tenebuk.

⁴ Utenebukba, sik Gubenur nang ap, yuk kalikna deiyok nang ap nirya arye, Daniel biti, ‘El aulul talak ara, yata malye winin ning ton uptuba, eiptibirye, kel biktibye do?’ tenen, dilnililamik. Pia dilnililamik bukni, el malye winin ning ton, pia kum ulamukba, ton kum eibik. Ara, Daniel el weiknye kina ati, dolamuk pil ara, pia teleb asa arye dolamuk. Malye pil ton kum dolamuk.

⁵ Winilamukba, sik anang arye nyabik. “Nunce el malye winin ning ton kum eibaba ati ara, Daniel birye si erelye, Allah arye nyalilye yupu atibuk, ‘Malye ulule,’ nyapnuyabe,” nyabik.

⁶ Nyabikopura, sik anirya Raja amu tam weik deiyok nang ap, sik Gubenur nang ap, Raja ati, ‘Wininamlulume, teleb ning ani,’ nyabuka, yupu melibuka nyana deiyok nang ap, adiparyuk ninye deiyoknye Raja Darius, el dam binuka nyabik. “Nun ni, nun patasilye ning ara, ani. Ance nun talipsulumnye, anda pia kam unamlame,” nyabik.

⁷ “Anyapmap ning ara, ance pil yuk-yuk dona ati, wipdeipsulum nang unyabe. Ara, Gubenur nang ap, Gubenur amu tam nang ap, nun kalikna ati, wibuka deiplum nang ap, tonda deiyok yuk ning talibik nang ap, nun nirya yupu talebuburye, nyabupu ning ton, lak nyapnukiyabe. Nun deiyoknye ance, ‘Amutuku nang nirya, aninguk talibuka unamak’ tenen, pia konop yupu nyapdeipnalyame. Ara, like yupa weik mapra balamipya ani, inina tiga puluh (30) sum mapnamap talak ara, nun nirya arye, an siuk erenamkiyabe. Atalak nirya ara, Isa Mutuku Dongonye si do, yuk ninye si do, ton pia kum erenamabe. Ati, atalak noutamak ara, yata nang do nirya, yuk ning si erebikcopura, ance nyapminba, dipkoprob an yin nang arye bobukabikirye, yu ning, weik kuse atonun, el si singa kuse ulamlya dam, binuka donoknamake. ‘Ayupu winibuka nyapnamsilam’ tenen, yanuka moropkiyabe,” nyabik. Nyabuka morobikopura, Raja kekebukce, ‘Aning ara, pia telebe ati ara, aning winipnamane. Ati, wini talak nirya, yuk ning si erena kum diparyuk, na siuk erenamniake,’ tenebukce, nyabuk.

⁸ Raja Darius arye nyabukura, el amu tam, sik deiyok nang arye tamubuka nyabik. “Nun deiyoknye, anti moropkiyabe. Aseknulam surat ara, an si sekuka, tanda tanggan kipminye deice arye, anyapnalam ning ara, tonap tamubuka, kum dopropnamlam ati, nyapkiabe. Winipminba, sik Media mutuku nang ap, Persia mutuku nang ap, ikin yupu delilamak atonun upnamle. Ara, ance nyapdeipnusilam yupu kum upnamle ati, nyapkiabe. Babel mutuku noutamak unyap nang nirya arye, aninguk pia talinamabe. Ati na nio, ‘Winipsutum’ tenen, yanuka moropkiyabe,” nyabik.

⁹ Nyabik touk, ninye deiyoknye Darius birye, “Yuk si nirya kum erenamlulume. Aning kum bukni, na siuk erepnamlulume,” nyapdeibukba, sik sekik surat deice, el si sekuka, tanda tanggan kibuk.

¹⁰ Ayupu nyapdeibukba, Daniel kekebuk. Kekebukopura, adiparyuk tamubuka, el ulamuk aik biyukce, asum-asum nirya ulamuk touk, el im aik jendela kukuk. Ara, Yerusalem tam botcamik jendela ara, kukeibukce, el Allah si erelamuk touk, gutam tuku dipdongobuka, Allah morobukce, Allah el si erena ati, mot sebuk. Ara, Allah yupu mot sebuka winililamuk touk, asum babye atonun, Allah ati, teleb abuka kinmok.

¹¹ Wininmok talak ara, Daniel biti, ‘Yata ton wininamle do?’ tenen, kaliklamik nang arye eibik ara, atalak tuba Allah el si, erebuka moronmok.

¹² Eibikopura, sik anang adiparyuk, “Daniel bira, yuk Allah si erenmale,” nyabuka, ninye deiyoknye dam binuka nyabik. Ara, ayupu nyabik, “Nun deiyoknye ance nyapsulume. ‘Na mutuku unyak ninye nirya mapra balamica ani, tiga puluh (30) sum kipnamle talak nirya ara, na siuk erenamniyake. Yuk ning si ton kum erenamyake,’ nyabuka, nyapdeipsulume. Ara, nunce anti nyapkupu ura, ance telebe nyabuka, surat seklumce, asurat deice, an si sekuka tanda tanggan kiamlum ning ara, tuba tenepmalam do? ‘Aning kum winiplirye, yuk Allah si ereplinye bira, dobuka singa kuse unyakak donoknamne,’ nyamlum do, kum nyamlum do?” nyabuka asibik. Nyabikba, Raja arye nyabuk. “Dipkoproba ara, Media mutuku nang ap, Persia mutuku nang ap, wininyak touk, narye, ‘Wininamlulume,’ nyapse ning ara, tamubuka kum batakmanto ning ara, akunum nyapdeipse,” nyabuk.

¹³ Nyabukura, sik anang arye, ninye deiyoknye Raja Darius biti nyabik. “Minop talak Yehuda yala ninye obuka sirya dakupurye, tongobuka boyanamuburye, yanuka deiamupu nang kan-kan noutamak arye, tonoknye el si Daniel aulule. Elda nun amu tam pil donanye ulul bukni, yata deiyok ati, nun ni an nyaplum ning ara, ‘Talya ning’ tenen, kum kekepkukce, el si erelye Allah atibuk, tonok sum ara, like winilye talak arye Allah morolule,” yanuka nyabik.

¹⁴ Nyabikba, ninye deiyoknye akekebukce, ‘Se’ tenen, Daniel biti bico ubukba, ‘Yata deiyok ati, na nyapse yupu ara batakukce, Allah tuba morolul do?’ tenebuk. Tonda, weiknye birye tenebukce, ‘Yata nyaptinye deice arye, Daniel bira lyeproptinye do?’ tenen, tuba teninmoka ani, sintam kibuk.

¹⁵ Sintam kibukba, sik anang arye tamubuka, aninye deiyoknye dam yayikce, “Nun ni, anda kel biklyame. Media mutuku nang ap, Persia mutuku nang ap, sik wininyak touk, anda ninye deiyoknye birye, ‘Winipnamlulume,’ nyapdeiamsulum ning ara, tamubuka kum doproptume,” nyabik.

¹⁶ Nyabikopura, atalak aniryuk, ninye deiyoknye Darius arye, ‘Yata wiriptinye kuma,’ tenebukce, “Daniel dobuka, yu weik singa kuse ulamika dam, dopkweteplulume,” nyapdeibukba, dopkwetebik. Dokwetebikopura, ninye deiyoknye birye tamubuka, Daniel biti nyabuk. “An si erelyam Allah ara, ‘El arye lyepkutue’ tenen, patapnile,” nyabuk.

¹⁷ Akunum tongobikopura, singa kuse ulamikak binuka, dopkwetebik pum bisik ara, weik keil pala dobuka, bublan tirikdongobik. Ninye deiyoknye birye, bikilina ning, akeil pala deice deibuka, el si sekeibuk. Aning atonun, el amu tam weik deiyok nang babye, atonun winibik. Winibika deiyok ara, ‘Daniel singa kuse noutamak dopkwetepmap nang ara, yuk nang arye, akeil pala dangabuka, ubula doprobicak’ tenen, winibik.

¹⁸ Winibukopura, ninye deiyoknye, Raja Darius tamubuka, el aik koproba biyuk. Biyuk talak ara, din ning babye, tonok ton dina kume. Tonda, el pil don nang ati, “Arup ara, na kanye delina ati, bukmelibuka mot sebuka, ton kum wininamlume. Na dam babye, yangana meme,” nyabuk. Tonda, alukunyan ara, pia wi kum mapmokce, kam berenga uk dipmok.

¹⁹ Winipmoka anya arye, ninye deiyoknye Raja, beren tam berekelongoyuk talak ara, minopce bukukabukce, singa kuse ulamik dam, bikbik abuka dilbiyuk.

²⁰ Akunum dilbiyukce, imun kanye bobuka, “Daniel anda Allah el pil donanye ulyamce, Allah el kamnye mikip deice arye, akunum lyepdopmakil do?” nyabuka, weik yupu deice arye binuka nyabuk.

²¹ Nyabukura, Daniel birye tamubuka nyabuk, “Na deiyoknye, ‘Anda tia ati, kam unalame’ tenen, patapnile,” nyabukba, Darius kekebuk.

²² Daniel birye, ayupu ton nyabuk. “Na si erenun Allah arye, el im deice pil don nang, malaikat dopdeipmanilba, yu singa kuse nirya sik si yanuka, lipdongobuka talipmanguba, sikce na nong kum dipmaniake. Na telebuk unmane. Aning ara, na si erenun Allah ara, el kele. Ara, malye un ning, el dam ton kum wininune. Tonda, na deiyoknye an dam ton, malye kum wininune. Ati, Allah arye lyepdopmanile,” nyabuk.

²³ Nyabukura, kekebukce, ninye deiyoknye, pia weik kanye deibukce, el mapu ati nyabuk. “Wini talak, Daniel adiparyuk, singa kuse dam arye doproplulume,” nyabukba, el nong dobuka boyayik. Winibikce, ‘Daniel el nong bol deice dila ton upmal do?’ tenen, moubuka dipdeyuk bukni, dila ton kum upmok. Ara, Daniel dipkoprob Allah ati, diba tenelamuka ati, telebuk ubuk.

²⁴ Daniel akunum dobuka deibikopura, ninye deiyoknye birye, Daniel biti, malye yupu nyapmek nang, sik aunmeka ati nyabuk. “Sik anang nirya bobuka yanululume,” nyabukba, bobuka yayikura, sik anang ap, sik kilapu ap, mapu ap nirya, adiparyuk singa kuse ulamika pum tam dopkwetebik. Adopkwetebik talak ara, sik singa kuse dam kum poulbinmek buk, si akuka kalikmeka arye, adiparyuk sik nong ap, yok ap nirya, karubuka sirya dibik.

²⁵ Akunum dibikopura, ninye deiyoknye Darius birye, surat sekukabukce, ninye yala mutuku-mutuku nirya ulamik nang ap, sik yupu yuk-yuk nyalamik nang ap nirya ati, dobukabukce, “Teleb arye wininamlume, nyapmasina ara, anggun unamlumak, teleb pil dopmunyeba, aning-aning weik, upra banamsil ati, telebe nyapsine,” nyabuk.

²⁶ Tonda, ayupu ton nyabuk. “Na taleamsiseba, ninye mutuku-mutuku nirya ululum nang ati, nyapsine. Nun nirya arye, Daniel birye si erelye Allah uka, el si erebibirye unamabe. Elda Kam Una Deiyoknye, pia tuba ulula ati, pia aunamle. Winiplirye, elcuk talisiliba unamabe. Tonda, Allah arye talipnamsil ning ara, pia kum kum danamle. Deiyok ara, Allah ara, mikip weiknye ulula ati, elda kum kum danamle.”

²⁷ “Allah aniryuk lyepsilirye, melinamsile. Ikin upsilye ning lyebuka, kanam asa ulisulule. Tonda, ninye arye kum winipmanto ning ap, laka kilin ning ap, pil dosulule. Ara, im deice ap, tukwak mutuku ap nirya, elce ulisulule. Ara, dipkoprob Daniel, singa kuse ulamika pum tam, dobuka dopkwetepsiba, Allah arye melibukba, singa arye, el nong ton dila si kum tobikak, dila kum eipse. Aning ati nyapsine.”

²⁸ Tonda, Daniel winibuka deice arye, Darius arye, Babel mutuku taleamuk talak nirya, Daniel weiknye ulamukce, telebuk ulamuk. Aning atonun, Darius el pununa ati, Persia mutuku ninye deiyoknye, el si Kores, Babel mutuku taleamuk talak babye, Daniel weik si erenanye ulamuk touk, tuba ulamuk.