Daniel 4 - Eipomek

Babel mutuku ninye deiyoknye, Nebukadnesar birye, lengdar like bitinye ning mabuk ati, nyabuk yupu

¹ Babel mutuku ninye deiyoknye, Raja Nebukadnesar birye, lengdar like bitinye mabuk ning ati, sekuk yupu ara, ani. “Na Raja Nebukadnesar birye, mutuku-mutuku nirya ululum ninye ap, ululum ninye ayala-ayala nirya ap, tonda anggun yupu yuk-yuk nyalulum ninye ap, anggun nirya ap ati, ayupu nyapsine. Se, na tenepne ning ara, anggun nirya teleb aryuk, pia weik upra banamlume. Tonda, anggun wininamlum ning nirya, telebuk unamsila ati, telebe nyapsine.

² Anyapnusin ning ara, aning-aning nirya deice tam, Pia Mikip Weiknye Allah arye, ‘Na dam, ninye pia kum kipmanto ning,’ nyapmanil ning ap, tonda lak pitin kilin ning ap, na dam upmanilba, eipman ning ara, anggun dam laka nyapnusine.”

³ “Allah arye, el laka kilin ning arisilye ning ara, weik mambule. Tonda, elce ninye kum winipmanto ning usilye ning ara, weik mambule. Allah elda, ninye deiyoknye ati, pia kam tuba unamle. Allah arye, aning-aning nirya talibuka ulya ara, pia aunamle. Atalak-atalak nirya, kume kum danamle.

⁴ Na Nebukadnesar bira, na aik koproba kanye deibuka, pia teleb ulamse talak ara, na taleamse ning nirya ap, pil dolamse ning nirya ap ara, telebuk ulamnuk.

⁵ Tonok sum lukunyan ton mapmase talak ara, lengdar mapmasa deice arye, lak kibukba eipse ning ati, pia weik kanye ikin upnukce, ilil weik upnuke.

⁶ Lengdar mapseura, narye lengdar mapmase ning ati, lak lena kel weik biklamak nang, Babel mutuku ulamika ati, na amu tam nang ati nyapsiba, yupu nyalbiyik. Ara, ‘Anggun nirya yamunce, na lengdar mapman ning ati, yanuka nong laka nyapnululume,’ nyapdeipsiba nyalbiyik.”

⁷ “Yukupsiba, Isa Mutuku Dongonye, mikip deice arye, aning-aning bikne nang ap, keting ap, wala ap, kurya ap, deiyok ning weik kel bikamik nang ap, aminyan winipnamle ning, laka len nang ap, asing keten nang ap, yukupsiba, sik nirya na dam yayik nang nirya ati, na lengdar mapsa ning, sik dam nukuka laka nyapse. Laka nyapsirye sikti, nyapse. ‘Na lengdar deice mapmasirye, eipmase ning ara, ‘Anye eipse, aning ton epsi,’ nyabuka, laka nyapse bukni, sik anang arye, tonoknye babye, alengdar mapsa ning, nong kum laka nyapnik.

⁸ Kum laka nyapnikopura, sirya talak ara, Daniel el si ton Beltsasar, na dam yayukba, na lengdar mapsa ning, el dam laka lebse. Daniel el si Beltsasar bira, na si erena ati, minop kwemdina ning si atonun, elti asi arepse. Anye Daniel bira, dib kanye pia telebnye, el deice yayukce, el talima pum tam wekukba, kel weiknye ulule.”

⁹ Anye yukupsiba yayukopura, narye elti, nyapse. “Beltsasar anda, ninye weik kel kina deiyoknye ulyame. Ati anda na kele. Dipkoprop dib kanye dipsukum arye, an talima pum tam pil dopkiliba, duknun ning nirya laka kibuka, laka nyalyame. Duknun ning ikin weik uptua babye, anda ikin kum upkutue. Aning nirya, laka nyapsutume. Ati ara, na lengdar mapsa ning ara, laka nyapkiniba, ance, ‘Nong ani,’ nyabuka lak nyapnunilame.”

¹⁰ Lengdar mapmase deice arye, dinmasibuk, tukwak mutuku noutamak arye, konoba yo ton tikamuk. Ayo ara, cang weik yo tikamuk.

¹¹ Ayo ara, pia cang weik welyamuk. Winyamukce, el cang ara, im bata nunubuka, tikamukba, mutuku sirya, im sirya ninye mutuku-mutuku nirya arye elilamik.

¹² Tikamukce, ayo bok ara, pia sukup-sukup abuka palamukce, el duk ara, pia weik moulamuk. Moulamukba, ninye nirya, ayo dukuk dilamikce, kam ulamik. Tonda, ayo tikamuka amu tam ara, pata mutuku ulamik kam ulamle ning nirya ara, ayo amu koa wekelyangalamik. Tonda, maka ayala-ayala nirya, ayo taruk deice, sik aik dolamik. Tonda, ayo duk ara, bai tam kam unyak ning nirya ara, asukumuk dilyangalamik.

¹³ Tonda amapmasirye, lengdar deice dinmasibuk, Allah el pil donanye malaikat, im deice arye, koulukuka yanganmokak eipse. Amalaikat ara, yupu nyananye biti, moubuka kalikuka dilnilinanye ulamukak eipse.

¹⁴ Kolukukce, yupu weik arye, yanuka nyabuk. “Ayo ara wepmince, ataruk-ataruk nirya sekuka bataknalyame. Winipmince, bok nirya an taruk arye koubuka, bataknamlyame. Tonda, duk nirya ara, dakuka bokeipnalyame. Winipminyopura, maka nirya, ayo taruk deice aik donyak ap, ayo dam unyak bai tam kam unyak ning ap, anirya ara, yakwetepminba, yukak bindopnamake.

¹⁵ Bukni, ayo sirika dem ara, batakminba, el tikamuk tuku anyuk uplirye, el yating pia atuku pum bisikuk auplule. Winiplyopura, kat tapu besi ap, tembaga ap arye, memamice ning dobuka, yan koupdongopnalyame. Winibuka batakminba, mutmuta arye palipnamle. Winiplirye, mok purwu, el nong deice saklamliba, mutmuta ap, talye kam ulamle ning ap, sik neika kam unamake.

¹⁶ Atikuk cang yo ara, ninye deiyoknye ulule. Atalak ara, ninye bolamak kanye ara, kum bopnamle bukni, talye ulamle ning, kam do, basam do, bolamak kanye atonun bobuka, unamle talak nirya ara, keting tamun tekbarye mapnamle.

¹⁷ Anyapmap ning ara, Allah el pil don nang malaikat, nun diksukumuk unyap nang nirya, bulubuka, yupu talebuburye, nyabupu ning nyababe. Ati ara, ninye kam unamak nang, mutuku nirya arye, ‘Dipkoprop Allah aning-aning deice tam, Weik Erena Deiyoknye ululnye birye, nun nirya talipnamsile’ tenen, kel biknamake. Tonda, Allah elce tenelye touk, tukwak mutuku ninye deiyok nang kina ati, ‘Anye birye talipnamle’ tenen, wipdeipliba talinyake. Tonda, Allah arye, ‘Anye bira, talye bona utotoa talina kumnye ulul bukni, ereipnun,’ teneplirye, erelilule.” Nebukadnesar birye, nyabuk.

¹⁸ Nyabukce, Daniel biti nyabuk. “Ati, Beltsasar, nara Nebukadnesar birye, lengdar mapmasirye eipse ning, akunum laka nyapkine. Ati, ance wini talak, na lengdar mapman ning nong ara, laka nyapnilyame. Ara, na Babel mutuku noutamak, weik kel kiamikce unyak nang nirya ara, laka kum nyapnitinge. Bukni, Allah el Dib Kanye ara, an kanye talima pum tam ukulula ati, na lengdar mapsa ning, laka nyapnutume. Ati laka nyapnilyame,” Nebukadnesar birye, Daniel biti nyabuk.

Daniel birye, Nebukadnesar lengdar mabuk ning ati, laka nyabuk yupu

¹⁹ Aning lake nyabukba, Daniel el si ton Beltsasar, el ton akunum kekebuk. Kekebukce, nyapmok ning ara, kanye imun ning anya arye, ilil ubuk. Ilil ubukba, aninye deiyoknye birye, Daniel, ara el si ton Beltsasar biti nyabuk. “Na lengdar mapsa ning, nong lak lena ati, anda talima daksakuka, ilil una meme,” nyabuk. Nyabukba, Beltsasar birye tamubuka nyabuk, “Naio. Se, alengdar mapmalam ning, an mal olan nang deice upnamtu ning ati, mapmatumopura, ara teleb bukni, an bidamnye ati, lengdar mapdeipdanmalame. Ati, kanye ikin upnamkile.

²⁰ Ayo eiplum ning ara, pia weik yo tikamukce, el cang ara, im bata nunubuka weletikamukba, mutuku sirya, im sirya ninye mutuku-mutuku nirya arye elilamik,” nyabuk.

²¹ “Winyamukce, ayo bok siliklamuk ara, pia sulum-sulum alamukce, el duk ara, pia weik moulamuk. Winilamukba ninye ap, bai tam kam un ning ap nirya, ayo dukuk dilamikce, kam ulamik. Tonda, ayo tikamuka amu tam ara, pata mutuku ulamik kam ning nirya ara, ayo amu koa wekelyangalamik. Tonda, maka ayala-yala nirya, ayo taruk deice, sik aik dolamik.

²² Na weik deiyoknye, anda lengdar mapmoma deice, aweik yo nong ara, an nong atia. Lengdar mapmoma deice, weik yo cang ubukba, ninye mutuku-mutuku nirya arye, elilamika atonun nong ara, an tonok weik erenanye umince, an taleminye ning ara, im sirya, mutuku sirya ulule.”

²³ “Tonda, na deiyoknye ance dinamlumbuk, malaikat im deice arye kouluka yayuknye, weik yupu arye nyapkuke. Amalaikat arye nyabuk. ‘Ayo ara, wepmince ayo sirika dam ara, batakminba, el tikamuk tukwak anyuk uplirye, el yating pia atuku pum bisik aupnamle. Winiplyopura, kat tapu besi ap, tembaga ap arye, memamik ning dobuka, yan koupdongopnalyame. Winibuka batakminba, mutmuta arye denepdongopnamle. Winiplirye, mok purwu, el nong deice saklamliba, mutmuta ap, talye kam ulamle ning ap, sik neika kam unamake. Keting tamun ara, tekbarye deice (7 tahun) unamle.’ Malaikat arye nyapkuke,” Daniel birye nyabuk.

²⁴ Ayupu nyabukopura, Daniel birye Nebudkadnesar biti, ayupu ton nyabuk. Alengdar deice maplumce, eiplum ning nong ara, nyapnune. Ara, na deiyoknye, an bidamnye atibuk, Allah aning-aning deice tam, Pia Mikip Weik Deiyonye ulirye, im deice ulinye arye, nyapkukba, eiplume.

²⁵ Allah arye nyapliba winipnamkile. Ara, Na nio, anda ninye unyakak arye yakuka. bai tam donokikiba, unamlame. Winipkikiba, talye kam ulamle ning ap, sik ap, neika kam unamlume. Atalak ara, sapi basam maning dilamak touk, an babye, aninguk maning dinamlyame. Winibuka unamlam talak nirya ara, keting tamun tekbarye (7) mapnalame. Winipnamlama deice arye, ‘Dipkoprop Allah aning-aning deice tam, Weik Erena Deiyoknye ululnye, aniryuk ninye nirya talipnamsile. Tonda, Allah elce tenelye touk, tukwak mutuku ninye deiyok nang kina ati, anye birye talipnamle’ tenen, wibuka deipliba talinyake. Allah arye, ikin ning deipnakila deiyok ara, arup nyapmakin ning, ‘Kel kipnamle’ tenen, winipnamakile.

²⁶ Tonda malaikat arye, “Yo weplumce, sirika bataklumba, tukwak anyuk upnamlule,” nyabuk ning ara, ani. Na deiyoknye, an akunum keting tamun tekbarye mapmince, ‘Dipkoprop mikip weiknye bira, Allah eluk ulirye, im sirya, mutuku sirya nirya talibuk,’ tenepminyopura, ila tuba tamubuka melipkiliba, an adiparyuk ninye deiyoknye kibuka, unamlam ati eiplume.

²⁷ Ati ara, na deiyoknye, ance na nyapnye yupu kekepnilyame. Winipmince, ninye bona utotoa talina kum nang ati, sik dam teleb kibuka pil dopmince, sikti noutam wilibuka delinamlame. Aning winipminyeura, Allah arye anti, pia kanye delinamkile. Bukni, narye nyapkise yupu luba kipmince, aning kum winipminyopura, tamubuka kanye ikin upnamkile. Daniel birye, weik deiyoknye Nebukadnesar biti, nyabuk.

Nebukadnesar birye, lengdar mabuk ning nong lak kibuka ati, Allah si erebuk yupu

²⁸ Daniel birye, laka nyabuk ning nirya ara, ninye deiyoknye Raja Nebukadnesar biti, winibuk.

²⁹ Wala obarye (12) akunum ubukopura, Nebukadnesar birye, el ulamuk aik dam, Babel mutuku domik im aik welebuka, dipre banmok.

³⁰ Wininmokce nyabuk. “Babel mutuku weik asik dobik ning ara, na mikip deice arye dopse. Winipseba na si ap, na mikip ap, atibuk pia si ereninyake. Ninye mutuku nirya arye nati, ‘Elda weik mambulnye,’ nyaninyake.” Ninye deiyoknye, Nebukadnesar birye nyabuk.

³¹ Anyanmok yupu, min kum sirya dakmokbuk, im deice arye, ninye yupu atonun yupu arye nyabuk. “Ninye deiyoknye Nebukadnesar, an moubuka kekepsilyame. Amutuku taliplum ning ara, mikip weiknye birye dopropnamle. Winipnamkil ning ara, akunum tenebuka ati, yupu kum sekmanto. Dipkoprop winipnamle,” nyabuk.

³² “Anda ninye unyakak arye yakuka, bai tam donokikiba unamlame. Winipkicopura, talye kam ulamle ning ap, anggun neika kam unamlume. Atalak ara, sapi basam maning kwapu dilamak touk, an babye aninguk dinamlyame. Winibuka unamlam talak nirya ara, keting tamun tekbarye (7) mapnalame. Mapnalama deice arye, dipkoprob Allah aning-aning deice tam, Weik Erena Deiyok ululnye, elcuk ninye nirya talipnamsile. Tonda, Allah elce tenelye touk, tukwak mutuku ninye deiyok nang kina ati, ‘Anye birye talipnamle’ tenen, wipdeipliba talinyake. Allah arye ikin ning deipnamkila deiyok ara, arup nyapmakin ning, ‘Kel biknamle’ tenen, winipnamakile,” nyabuk.

³³ Atalak aniryuk anyapmok touk, winibuk. Nebukadnesar biti, ninye nirya arye duknubuka, sapi basam kan-kan biyukopura, sik neika maning kwapu dilamik. Winilamik talak ara, mok purwu arye, el nong deice saklamukba, el kisok potong cang ara, bip maka potong tiklamle atonun uamuk. Tonda, el taruk burye kala ara, bip maka yan burye kala atonun uamuk.

³⁴ Anyapdeiamuk touk, keting tamun tekbarye akunum mabukopura, Nebukadnesar Allah ati morobukba, el kanye ara, ninye kanye bolamak atonun tamubuka, arebukba doprobuk. Doprobukce, Allah ati morobuk. “Se, na ni Allah, ance teleb kel kin ning arepmanilame. Winipmanilama ati, narye an kam pia unamlamnye, siuk erepkinirye, antibuk kinamkine. Na ni Allah, anda ninye deiyoknye Raja umince, taliplum ning nirya ara, pia kam tuba aupnamle. An babye, pia kam unamlame. Aning nirya ara, pia kume kum danamle,” nyabuka morobuk.

³⁵ “Ninye tukwak mutuku unyap ninye nirya ara, weik konop nang ton, kum unyabe. Kume, an mikip atonun nang ton, kume. Allah ancuk, an pil don nang, malaikat taliplum ning babye, tonda ninye tukwak mutuku nirya taliplum ning babye, an tenelyam touk ulyame. Ati ara, yatanye birye ton, an mikip yanipkutu do? Tonda yatanye birye, wenena atonun an winipminya ati, ‘An yata deiyok ati winipmalam do?’ nyabuka, asipdekutu do? Pia kume.” Nebukadnesar birye nyabuk.

³⁶ Nyabukce, ayupu ton nyabuk. “Na ninye kanye bolamak atonun kanye arepnukba, bopse talak ara, ninye deiyoknye kiyamsiba, winililamnika deiyok ning ap, tonda, ‘Na ninye deiyoknye kiyamsiba, mambulnye,’ tenen, si erelamnika deiyok ning ap, Allah arye tamubuka arepnuke. Arepnukopura, na amu tam, weik nang pil dolamnik nang ap, melibuka, ‘Winiplulum, wininamlululme,’ nyabuka, nyalamnik nang ap, adeiyok yuk-yuk tam talilamik nang ap, anang arye, ‘Anye tamubuka dopropnamap’ tenen, nati erepdeiamnike. Erepdeiamnika ani, akunum eipnikopura, sikce nati, ‘Ninye deiyoknye Raja unamsile’ tenen, tamubuka erepdeipnike. Winipnikba, min yuma talak ara, mitikto deiyoknye ulamse bukni, wini talak ara, pia weik erena deiyoknye unune.”

³⁷ “Ati ara, wini talak ara, na Nebukadnesar birye, im deice ulul ninye deiyoknye Raja ara, Allah el tonoke. El siuk erepnirye, unamne. Ara, urdem ati kume. El pil dolye ning nirya ap, el ulul ning nirya ap, pia dipkoprob diksukum ninguk winilule atia. Tonda, ninye kanye talima erepdakirye, kwalinyak ninye ati ara, Allah elce amu tam kililule,” Nebukadnesar birye nyabuk.