Daniel 3 - Eipomek

Patung emas arye memamik ning ap, weik uku buk dilamuk ning ap ati, nyabuk yupu

¹ Ura, Babel mutuku ninye deiyoknye Nebukadnesar birye, tonok patung ton, emas ning arye memebuka deibuk. Aning el cang ara, dua puluh tujuh (27) meter. El pala ara, enam (6) meter deice dekuka, deibukce memebuk. Aning memebuka deibuk mutuku ara, Provinsi Babel mutuku tam noutamak bukni, mutuku si Dura mutuku, lyu mutukuak, memebuka deibuk.

^2-3 Winibukopura, Babel mutuku weiknye Raja Nebukadnesar birye, “Wini talak ara, na amu tam mambul pil dolulum nang nirya buluplulume,” nyabuk. Ara, ‘Weik ninye deiyok nang, nirya bulubuka yanululume,’ nyabuk nang nirya ara ani. Ara, Raja el yala nang ap, Gubenur nang nirya ap, Bupati nang nirya ap, Raja biti, ‘Winiplulum, aninguk winiplulum,’ nyana deiyok nang ap, Raja el uang yo bok ap, bon-bona ap, delina deiyok nang ap, malye winibikiba, yupu lipsisikuka bokolina deiyok nang ap, wenena deiyok ning, weik kel bikamik nang ap, tonda sik amu tam deiyok nang nirya ap ati, yukubukba, yanuka bulubik. Bulubuka yayika deiyok ara, ninye deiyoknye Nebukadnesar birye, weik patung memepdeiayamuk ning, si erepnameka ati, nirya bulubuka yayik. Yayikce, apatung urasin dam anyuk, lelebuka tikilyayik.

⁴ Akunum tikikopura, ninye deiyoknye Raja, el melinanye tonok, weik yupu arye nyabuk. “Amapo, mutuku-mutuku nirya daumunce, yupu yuk-yuk nyamunce, yala yuk-yuk umunye ninye nirya ara, nun ninye deiyoknye birye nyapmasil yupu ara, moubuka kekeplulume.

⁵ Winipnamaba ati, wini talak ara, pong-pong ana ning, sik si terompet ap, suling ap, kecapi ap, tonda, pong-pong ana yuk ning, aning-aning nirya ap, bikilina ati, lelim weika arye nyabikcopura, nun nirya arye, apatung ati, si erepnamabe. Ara, sik nirya arye, ninye deiyoknye Nebukadnesar birye, memebuk patung si erena ati, urasin amubuka tuku deice mabibirye, apatung si erepnamabe.

⁶ Tonda yatanye do, anyapmap yupu moubuka kum kekeplirye, anyapmap touk, aning ati, si kum ereplinye bira, adiparyuk tapu koubukabibirye, elda weik uku buk pakanmalya noutamuk, dongopnamabe.”

⁷ Ati ara, pong-pong ana, aning-aning nirya arye, weik lelim nyayikopura, sik amutuku-amutuku nirya unmek ninye ap, yupu yuk-yuk nyanmek ninye ap, yala yuk-yuk unmek ninye nirya ap ara, ninye deiyoknye Nebukadnesar birye, memebuk patung si erena ati, urasin amubuka, tuku deice mabuka, apatung si erebik.

Daniel ap, el kwit capu winilye nang, sikda Yahudi nang ulamik ati, Babel mutuku ninye deiyoknye nyabuk yupu ati, yanibik yupu

⁸ Atalak ara, Babel mutuku ulamik nang bukni, ton tam nang ara, ‘Yahudi yala nang ara, malye wininyak’ tenen, kalikuka dilamik nang ara, atalak ara, sik aunmek.

⁹ Anang arye, sik deiyoknye Raja Nebukadnesar, el si erena ati nyabik. “Nun patapsil ning ara, tuba kam pia umince, talipnamsilame,” nyabik.

¹⁰ Nun ni koproba Raja ance, ‘Aning wininamlume,’ nyapdeipmasilam yupu ara, ani. ‘Ninye nirya arye, pong-pong ana ning, aning-aning nirya pong-pong abikiba, lelim kekebicopura, sik nirya arye, adiparyuk emas arye memebuka deipmasin patung, el si erena ati, urasin amubuka, tuku deice mabuka, si erebuka kipnamlume,’ nyapdeipsulume.

¹¹ Aning atonun, ‘Yatanye do, aning ati si erebuka, kum kiplinye bira, adiparyuk tapu koubuka, weik uku buk pakanmalya kan-kanuk, dongopnamalume,’ nyapsulume.

¹² Na nio, ayupu nyapdeipsulum bukni, sik Yahudi yala nang winilye ara, nun ni Babel mutuku nirya talipsulumnye birye, ‘Winipnamlulume,’ nyapdeipmamu yupu ati, ‘Dauplye’ tenen, kum kekepmake. Anang si ara, Sadrak, Mesak, Abednego ap, sik nirya ara, ance nyapsulum yupu yanibuka batakmake. Ara, sik anang ara, ance si erelyam minop kwemdina ning ap, tonda patung emas memeplum ning ap ati, ‘Aning ara, nun like. Aning si, kum erepnuyap’ tenen, batakmake.

¹³ Nyabikura, ninye deiyoknye Nebukadnesar birye, ayupu kekebukce, anang ati, yu weik ubukba, “Awinilye nang, Sadrak ap, Mesak ap, Abednego ap ara, na dam boyalulume,” nyabuk. Nyabukopura, sik awinilye nang nirya bobuka, ninye deiyoknye, el dam boyayik.

¹⁴ Boyayikopura, ninye deiyoknye Nebukadnesar birye nyabuk. “Yata ati winipmalum do?” nyabuka, asipdeyuk. “Se, Sadrak ap, Mesak ap, Abednego ap, sik nirya ara, minop kwemdina ning ap, weik patung emas arye, memebuka deipman ning ap, sik si erenmak talak ara, anggun ton kum si erepmalumce, kum kipmalum ning ara, yata deiyok ati do?

¹⁵ Wini talak ara, anggunce aning si erena ati, kintinipmalum do? Pong-pong ana, aning-aning nirya arye, lelim weik taplyopura, anggun nirya arye, aning si erena ati, akunum kintinipmalum do? Kintinipmamunce, aning ati si erepmunyopura, teleb uka. Bukni, anggunce, ‘Aning nun kum si erepnuyabe,’ tenepmunce, si kum erepmunyopura, anggun tapu koubuka, weik uku buk pakanmalyak noutam dongopnamsine. Uku buk pakanmalyak noutamak dongopmasinye talak ara, yata minop kwemdina ning ton aulamtopura, yanuka lyepsutu do? Pia kume.” Nebukadnesar birye, Daniel ap, el kwit capu, sik bitinye nang ap ati, nyabuk.

¹⁶ Ura, ayupu nyabuk talak ara, Sadrak, Mesak, Abednego ap, sikce ninye deiyoknye Nebukadnesar ati, tamubuka nyabik. “Nai Rajao, nun dem aryuk, kum lyepdatibye. Anyapmasilam yupu ara, nun bidamnye arye, yupu kum sekdatibye,” nyabik.

¹⁷ Nyabikce, ayupu ton nyabik. “Nun kele, nun talibuka si erenyap Allah ara, nun ap unyaba ati, weik uku buk noutamak dongopsiminya babye ara, Allah arye lyepdopnamsile. Ati, na ni ance, ‘Winipnamane,’ tenepsiminyopura, telebe dawinipsilyame,” nyabik.

¹⁸ “Bukni, nunce anyapmakiyap yupu, nun si erenyapnye, Allah kum kekepsilya babye, nun deiyoknye Raja, an nyapmalam yupu ara, nunce kekebuka, minop kwemdina ning ap, patung emas ning memebuka deiplum ning ap, si kum erenamabe.” Daniel ap, el kwit capu bitinye nang ap arye, nyabik.

Babel mutuku Sisinanye birye, ‘Daniel ap, el kwit capu winilye nang ap, opnamane’ tenen, kintiniplobuk yupu

¹⁹ Nyabikopura, ninye deiyoknye, Sisinanye Nebukadnesar yu weik ubukba, Sadrak ap, Mesak ap, Abednego ap ati, el urasin yubuka, ining bi dokukce, yu weik ubuk. Winibuka ati, elce el amu tam nang ati, nyabuk. “Uku buk mitik anun arye dilul atonun kum bukni, tonap tabakuka, uku sekmunyeba, weik uku buk dilirye, tin weik upnule,” nyabuk.

²⁰ Nyabukopura, elce el yin talin nang, mikip weik nang ati, nyabuk. “Anggunce Sadrak ap, Mesak ap, Abednego ap, mikip arye talipdongobuka, tapu koupmunce, weik uku buk pakanmalyak, dongopnululume,” nyabuk.

²¹ Nyabukopura, awinilye nang, tapu koubik. Winibuka tapu koubik talak ara, anang sik ongon baju celana ap, kisok kwatin ap, alip tam ongolamik cang baju ap, kum kwiriplobik. Angopmek touk, tapu koubuka, weik uku buk dinmoka noutamak, dongobik.

²² Ati ara, weik deiyoknye, el yupu mikip arye, “Winiplulume,” nyapmok ati, winira uku weika arye sekmekba, tin pia weik unmoka ati ara, Sadrak ap, Mesak ap, Abednego ap bobuka, ‘Auku buk pakanmokak dongolbinuyap’ tenen, bobiyik nang ara, auku tin buppu arye, anang dibik.

²³ Atalakuk bukni, sik awinilye nang, Sadrak ap, Mesak ap, Abednego ap, atapu koupdongopmek touk, eitam arye dopkwetebikba, sakukabikce, weik uku buk pakanmok noutam poulbiyik.

²⁴ Winibik talak ara, talye karin arye, ninye deiyoknye, Nebukadnesar eibukce, lukdayuk. Lukdayukce, minopce bukukce, el pil don nang ati, weik yupu arye nyabuk. “Kume, winilye nanguk tapu koubuka, weik uku buk kan-kan dongopmapu nang anyuk do?” nyabuk. Nyabukba, sikce tamubuka, ninye deiyoknye biti nyabik, “Naio dib nyapmalame,” nyabik.

²⁵ Nyabikba, ninye deiyoknye birye, “Winilye nanguk dongopmabe,” nyapmalum bukni, “Weik uku buk dinmala noutamak ara, dinmanabuk, ninye dumbarye banmakak eipmane. Adumbarye nang nirya ara, sik tapu koubuka dongopmapu ning ara, kum danmale. Tonda, sik nong bol deice ara, uku dila babye, ton pia kum upmale. Dumbarye ning ara, minop kwemdina ning atonun bukni, el urasin ara, malaikat atonun unmalak eipmane,” nyabuk.

²⁶ Atalak, Nebukadnesar weik uku buk dinmok aik, bisik bublan dam tikuk. Tikukce, elce ayupu nyabuk. “Sadrak ap, Mesak ap, Abednego ap, anggunda Allah erenanye, el pil don nang ululuma anya arye, weik uku buk dinmala kan-kan noutamak arye, kubuka yamunce, yalulume,” nyabuk. Nyabukopura, Sadrak ap, Mesak ap, Abednego ap, weik uku buk dinmok aik pum tam arye, kubuka yayik.

²⁷ Nyabukba, anang kubuka yayikopura, anye el amu tam Gubenur nang nirya ap, Bupati nang nirya ap, Raja ati, ‘Winiplulum, aninguk winiplulum,’ nyana deiyok nang ap, el pil don nang, pegawai nang nirya bulubuka yayikce, warikdongobuka, awinilye nang ati dinmek. Dinmekak, awinilye nang, sik nong babye, kisok potong babye, sik deice cang baju ongopmek ning babye, anirya ara, tonok ton uku kum dibuk. Ongon baju babye, urasin yuk atonun ton kum ubuk. Uku tulum tong babye, ton kum nyabuk.

²⁸ Winibukopura, Raja Nebukadnesar birye nyabuk. “Sadrak ap, Mesak ap, Abednego ap, sikce si erenyak Allah ati, ‘Telebe,’ nyabuka, si erepne. Sikce si erenyak Allah arye, el malaikat dopkwetepmalba, el pil don nang Sadrak ap, Mesak ap, Abednego ap lyepmala ati bikne. Sikda na nyapse yupu yanipnikce, sik tenepmeka ara, ‘Nun opsitinga babye, teleb uka. Ara, nun si erenyap Allah arye lyepnamsila atia,’ tenebik. Utenebika ati, na yupu yanibuka, sik Allah ati, diba tenebik.

²⁹ Ati ara, narye nyapniba, im sirya, mutuku sirya nirya daunyakce, yupu yuk-yuk nyanyak ninye nirya ap, tonda yata yala ninye do, nirya babye, Sadrak, Mesak, Abednego ap, sikce si erenyak Allah ati, malye yupu nyapmunyopura, narye nyapniba, na amu tam yin nang arye, anggun opsikirye, nong ara, sekuka bataknamsiake. Tonda, anggun aik dakuka bataknamsiake. Ara, yuk nang arye, si erenyak ning arye, awinilye nang wenena ati, uku buk noutamak donokmanba, lyepdopmal atonun, yuk Allah ton pia kum ulule. Ati ara, nun nirya arye, sik si erenyak Allah, el si ati, malye yupu pia kum nyanamabe,” Babel mutuku ninye deiyoknye, Nebukadnesar birye nyabuk.

³⁰ Ayupu nirya akunum nyabukopura, Sadrak, Mesak, Abednego ap, ‘Na amu tam, Babel mutuku noutamak, mambul pil talibuka ninye deiyok nang unamak’ tenen, erepdeibuk.