Daniel 2 - Eipomek

Babel mutuku deiyoknye, Nebukadnesar lengdar mabuk yupu

¹ Babel mutuku deiyoknye, Nebukadnesar bira, keting tamun bitinye, talibuka ulamuk talak ara, tonok lukunyan noutamak arye mapmokce, lengdar mabuk. Mabukopura, el ikin kanye bobukce, kanye teniltonauk unmokce, alukunyan ara, teleb ubuka kum mabuk.

² Weiknye birye aning winibuka eibukopura, elce, ‘Awinipmal ning melibuka, lak lepnamniyak’ tenen, el amu tam pil don nang ati nyabuk. “Aning-aning nirya, weik kel nang ati, bulubuka, na dam yalulume,” nyabuk. Elce yukubuk nang ara, ani. Ara, asing keten nang ap, ninye kum winipmanto ning, kel bikamik nang ap, keting, wala ap, kurya ap deiyok kel bikamik nang ap, tonda ninye bikilina deiyok ning, kel bikamik nang ap, sik nirya ati, yukubukba, el dam bulubuka wekelyayik.

³ Akunum nyabukopura, sik bulubukabikce, el dam yanduka tikikopura, el lengdar mapmok ning ati nyabuk. “Na lengdar mapmance, na talima daksakmanilba, ‘Yata deiyok arye do?’ tenen, malye kanye bobuka teniltonauk unmane,” nyabuk.

⁴ Nyabukopura, sik Kasdim mutuku nang arye, sik yupu Aram yupu deice arye, ninye deiyoknye ati asipdeyik. “Diba, nun ni koproba, nun patapsil ning ara, ‘Anda pia unamlam’ tenen, ‘Se,’ tenebabe. Ance winipmal ning ara, an mapu kekenmabak arye lak lepminba, ‘Yata deiyok arye winipmakil do?’ tenen, moubuka teneipdebirye, kel kibibirye, lak lepnukiyabe,” nyabik. Ayupu nyabik nang ara, sik wala ap, kurya ap, deiyok kel bikamik nang arye nyabik.

⁵ Nyabuka asibikopura, ninye deiyoknye birye tamubuka, sik keting ap, wala ap, kurya ap, deiyok kel bikamik nang ati, nyabuk. “Narye anggunti, akunum nyapmasune. Na lengdar mapman ning, kum laka nyapnumunyopura, anggun nong nirya, obuka sekukapsinirye, anggun aik nirya dakuka, ulublopnamane.

⁶ Bukni, anggunce na lengdar mapman ning ati, ‘Deiyok ara, ani,’ nyabuka, laka nyapnumunyopura, narye kanye deipsinirye, dekna teleb ning arepnamsine. Ati ara, anggunce na lengdar mapman ning ati, moubuka kel kipmunce, alengdar nong ara, nati laka lepnululume,” nyabuk.

⁷ Deiyoknye birye nyabukopura, Babel mutuku aning-aning nirya, weik kel bikamik nang arye, tamubuka nyabik. “Naio, ance lengdar mapmalam ning laka nyapsiminba, nun an pil don nang nirya kekebuka bikibirye, ‘Deiyok ara, atiba,’ nyabuka, laka lepnukiyabe,” nyabik.

⁸ Nyabikbuk, ninye deiyoknye birye tamubuka nyabuk. “Anggunce, talye asilen yupu atonun nyanmanulum ning ara, na akunum bikmasine. Ara, anggun walwal ati ara, anggunce, ‘Lo ton tuba arepsutue’ tenen, nyanamanulume. Tonda, narye anggunti, talye nyaltakna yupu atonun, kum nyapsine. Winira nyapmasina atonun, winipnamsine.

⁹ Anggunce, na lengdar mapman ning ati, ‘Deiyok ani’ tenen, moubuka kum kel kipmunce, talye nyaplopnununyopura, ‘Anggun nong deice ikin ning deipnamsine,’ nyapmasin touk, winipnamsine. Tonda, na akunum kel kipnamsine. Ara anggunce, ‘Nun deiyoknye, yu kanye bopmasilce, nyapmasil ning ara, bataksutue’ tenen, talye yupu ap, tilila yupu ap, deice arye kunusa don yupu atonun, nyanmanulume. Bukni, na lengdar mapman ning, bita kel kipmunce, laka nyapnumunyopura, na babye, ‘E, aning ati winipmanue,’ tenepnamane. Nyapnumunyopura, narye anggunti, ‘Anang ara, lengdar mapman ning nong ara, kel kibuka lak nyapmanto nang unyake,’ tenepnamasine,” Babel mutuku ninye deiyoknye birye, nyabuk.

¹⁰ Nyabukopura, sik wala ap, kurya ap, deiyok ning kel bikamik nang arye, sik ninye deiyoknye ati, tamubuka nyabik. “Naio, ance nyapmasilam ning ara, tukwak mutuku im sirya, mutuku sirya nirya ara, tonoknye babye, an nyapmasilama atonun ning, kel kibuka laka nyapmanto nang ton, kum unyake. Minop talak donirye dipdongobuka, wini talak babye ara, ninye deiyoknye Raja mikip ap, ninye deiyok talina weik ap babye, ton kum ulamikce, an anyapmasilam atonun, ton kum ulamik. Ara, sik wala ap, kurya ap, kel bikamik nang ap, ninye ati suna nang ap ati, yuk mutuku Raja nang arye, ayupu atonun kum nyalamik. Bukni, ance atalak aryuk, ayupu nyapmasilame.”

¹¹ “Nun ni koproba, ance tenebuka nyapmalam ning ara, nun pia kanye imun upsile. Ara, nun kanye ara, ance tonoknye babye, an moropmasilam ning, kel bikmanto nang ton, pia kume. Pia kum eilinyap ning, isa tonok ara, daulul ning, si erenyap ning anyuk, yanduka lak lepketing bukni, aning ara, nun ninye dam kum unyaka anya arye, kum lak lepketinge. Anya arye, nun ninye aniryuk, kum laka lepkitibye. Aning ara, kum winipmanto,” nyabik.

¹² Nyabikopura, Babel mutuku ninye deiyoknye, ayupu kekebukce, yu weik ubukba, el nong yupu tana kumce, urdem tikukce, el amu tam pil dolamik nang ati, nyabuk. “Babel mutuku noutamak unyak weik deiyok ning, kel bikamik nang nirya, bulubuka deipmunce, anang nirya obuka, sirya daknamalulume,” nyapdeibuk.

¹³ Ayupu nyabukba kekebikopura, ‘Weik deiyok ning, kel bikamik nang nirya ara, opnuyap’ tenen, epre biyik. Atalak ara, ‘Daniel ap, el kwit capu winilye nang ap, sik nirya babye, tapu koubuka opnamap’ tenen, eprabiyik.

Lengdar mabuk ning deiyok ara, ‘Daniel birye laka lepnamle’ tenen, Allah arye lak kipdeibuk yupu

¹⁴ Atalak Daniel bira, weik kel bikna deice, kel kibukopura, Raja Nebukadnesar, el amu tam pil donanye, el si Ariok ati, yupu namin asa arye, yanuka nyabuk. “ ‘Babel mutuku ninye olbinun’ tenen, kintinipmalam ati ara, pia kanye moupmince, binulyame,” nyabuk.

¹⁵ Daniel birye, Ariok biti nyabuk, “Ninye deiyoknye birye, yata ati, ‘Weik kel bikamik nang nirya oplulume,’ abuka mikip arye nyapmasil do?” Nyabuk buk, Ariok birye, Daniel biti ninye deiyoknye nyapmok yupu nirya, lak nyabuk.

¹⁶ Ayupu akunum nyabukopura, Daniel birye weiknye birye, nati lo arepniliba, el lengdar mabuk ning laka nyapniba, el lengdar mabuk ning, ‘Deiyok ara, ani,’ tenebuka, ‘Kel kipnul’ tenen, Babel mutuku ninye deiyoknye, Raja dam biyukce, ‘Lo ton arepnutume,’ nyabuka, binuka morobuk.

¹⁷ Daniel birye, binuka morobukopura, tamubuka el asik koproba biyuk. Biyukopura, Daniel el kwit capu, Hananya ap, Misael ap, Asarya ap ati, anyapmok ning nirya ati, laka nyabukba, kekebuka bikik.

¹⁸ Daniel birye nyabuk. “Nun nirya arye, Allah moropnuyabe. Nun ni koproba, Allah im deice ululnye ati, moropmabibuk, elce ninye deiyoknye lengdar mapmokce, eibuk ning, Allah arye, nun kanye talima dobukapsilirye, nun dam lak kipdeipsilyopura, Raja dam nyapnamabe. Tonda, Allah arye, sik Babel mutuku deiyok nang ati, bico tenen ning areptuba, ‘Sikce nun kum opnamsiyak’ tenen, moropnuyabe. Winibibya deice arye, sik Babel mutuku wala ap, kurya ap, deiyok ning weik kel bikamik nang ap, nun ap, neika kum opnamsiyaka ati nyapsine,” nyabuk.

¹⁹ Nyabukba, kekebikce, Allah morobikopura, alukunyan noutamak aniryuk, Allah arye Daniel biti, lengdar wi dung-dung anmok talak arye arebukba, duknyamuk yupu nirya, lakoprop kibukba, Daniel birye eibuka bikuk. Bikukopura, Allah im deice ululnye ati, si erebuk.

²⁰ Daniel birye Allah ati, si erebukce, ayupu nyabuk. “Allah anda pia unamlamnye, telebe nyabuka, si erepkine. Anda weik kel kina ning nong noutam ning, kel kina ap, mikip weik ap ara, anuk ulyame.

²¹ Allah ancuk wini talak ara, ‘Winipnamle’ tenen, kintinilisilyame. Tonda, ‘Atalak ara, aning li upnamle’ tenen, kintinilisilyame. Ancuk minop talak, deice tam erebuka ulamikce nang ara, dobuka amu kipdeipmince, sik ulamica ning pununa ati, winiryuk ning wibuka, erelilyamnye bira, an uka. Tonda, weik kel kina deiyok ning ap, nong noutamak kel bikna ning arelyamnye bira, Allah anuk ulyame.” Daniel birye, nyabuk.

²² Nyabukce, ayupu ton nyabuk. “Allah ance pia duknun ning ap, nong noutam ning ap ara, lakoprop kilisilyame. Tonda, kunukna noutamak ulul ning nirya ara, an kel weiknye koproba, ulyame. Anda Dirina Weiknye ulyame.

²³ Ati ara, nun ni Allah anda, nun apu yapu arye, an si erelamkike. Tonda, ance mikip ap, weik kel kina deiyok ning ap, arepmanilama ati, telebe nyapkine. Nunce moropmakiyap ning ara, ance akunum lak kipdeipmanilame. Ara, ninye deiyoknye, lengdar mapmok ning nong ara, akunum lak kipdeipmalamba, kel kipmana ati, telebe nyapkine,” Daniel birye nyabuk.

Babel mutuku ninye deiyoknye birye, lengdar mabuk ning ati, Daniel birye, lak nyabuk yupu

²⁴ Nyabukopura, Daniel adiparyuk, ninye deiyoknye, el amu tam pil dolamuknye, Ariok dam biyuk. Ara, ‘Babel mutuku pia weik arye, kel bikamik nang nirya opnamne’ tenen, akunum kintinibuka ulamuknye, el dam biyuk. Biyukopura, Daniel birye nyabuk. “Ance, ‘Babel mutuku kel bikamik nang nirya opnaman’ tenen, kintinipmalama ara, bataknulyame. Nara, ninye deiyoknye, el dam binirye, el lengdar mabukce, kanye ikin ubuk ning ara, ‘Adeiyok atia,’ nyabuka, binuka laka nyapnuna ati, nyapkine,” nyabuk.

²⁵ Nyabukopura, Ariok birye, Daniel bobuka, ninye deiyoknye Nebukadnesar dam bobiyuk. Birikopura, ayupu nyabuk. “Kume lengdar mapmom ning ara, ‘Nong ara ani,’ nyabuka, lak nyapmantonye bira, Yehuda yala ninye bobuka, amutuku boyayikba, unyak ninye noutamak arye, tonoknye akunum eipmana arye, bobuka an dam yane,” Ariok birye nyabuk.

²⁶ Anye birye nyabukopura, Babel mutuku ninye deiyoknye birye, Daniel biti asipdeyuk. “Anda Daniel, ton si ara Beltasar, ance kel kipmamu ning ara, na lengdar mapsi ning, lak nyapniminba, kekepnirye nong biktinye do?” nyabuka asipdeyuk.

²⁷ Nyabukopura, Daniel birye tamubuka, ninye deiyoknye ati nyabuk. “Na ni ance, ‘Duknuna ning laka lepnutume,’ nyapmanilama ara, yata wiribuka lak nyapkitinye do? Asing keten nang do, wala ap, keting ap, kurya ap, deiyok ning, weik kel bikamik nang do, ninye ati sunyak nang do, ninye kum winipmanto ning, pil donyak nang do, sik nirya arye, aning kum laka lepketinge.

²⁸ Bukni, Allah im deice ululnye birye, duknun ning nirya ara, elcuk talibuka ulirye, lak kilisulul ati, duknuna ning ap, aminyan talak winipnamle ning ap ati, elcuk lak lepkutue. Wini talak ara, weiknye Nebukadnesar, an kel biknamnilyame. Allah arye lengdar mana ning aripkuka deice arye, aminyan dowinipnamkil ning ati, akunum lak lepkuke. Ati ara, lengdar maplum ning ap, tonda, ‘Lengdar do, dipdip do?’ tenena deice, eiplum ning ap, nong ara, narye lak nyapnukine.” Daniel birye nyabuk.

²⁹ Daniel birye, ninye deiyoknye, Raja Nebukadnesar biti, nyabuk. “Naio an mapmalumak arye, lengdar mapmalumce, lengdar deice eipmalum ning ara, dotalak winipnamle ning ati eiplume. Duknuna ning nong noutamak, lak lena deiyoknye Allah arye, dowinipnamle ning ati, an dam arepkuk bukni, moubuka kum kel biklume.

³⁰ Nara, an pil donanye birye, duknuna yupu ati, lak nyapnukine. Ara, nara kel weiknye kume. ‘Nara weik kelnye unune, sik yuk nang nirya ara, mitik kel nang unyake,’ tenena deice arye, kum nyapnune. Bukni, ‘Ance lengdar maplum ning, nong kel kina ap, tonda an kanye talima pum tam tenelyam ning ap, moubuka kel kipnulyam’ tenen, aning-aning nirya, lak lena deiyoknye, Allah arye nyapnuk ning ara, lak nyapnukine,” Daniel birye, Nebukadnesar ati, nyabuk.

Daniel birye, Nebukadnesar lengdar mapmok ning, nong lak nyabuk yupu

³¹ Daniel birye, Nebukadnesar ati nyabuk. “Wini talak ara, an lengdar deice arye winipmokba, eiplum ning ara, laka nyapnukine. Ara, tonok ning ton, ninye arye ninye urasin atonun puturubuka delinyak ning, el si ara, patung eiplume. Apatung ara, pia urasin teleb ap, mil weik ap kibuka, pung deice arye, erebuka tikmok. Erebuka timokce, bol deice malmalya panmokba, eipluma deice arye, ilil upkuke.

³² Apatung el kisok tam ara, kat dekna weik ning emas, pia teleb ning arye memamik. Tonda, el taram tam ap, taruk tatang ap ara, perak arye memamik. El mun noutam ap, keilak ap ara, kat ning el si tembaga arye, memamik.

³³ El gutam dam arye dipdongobuka, ber yok tam nirya ara, kat ning besi arye memamik. Yan kwamnyuk arye dipdongobuka, yan tatang nirya ara, kat ning besi ap, kiri tuku uku arye damikba, kat uamuk ning ap, taplakuka memamik. Aning nirya ara, ance eiplume.

³⁴ Ura na deiyoknye, ance dinmalum talak ara, mutuku yangan keil tonok, ninye arye pikilkwetena kum buk, el yuk noutamak tobuka sakukce, apatung yan tam besi ap, kira tuku ap, taplakuka memamik ning yanuka, teikuka sice buklobuk.

³⁵ Atalak aniryuk, apatung nirya sakukce, amemamik ning, kat ning emas ap, perak ap, kiri tuku kat ning ap arye, memamik ning nirya ara, dakuka uluplobuk. Uluplobukce, kumanya yayukce, uluplobuk ning nirya ara, pubukba, erepdakuka bindobuk. Tuku libuka yamultaklamak atonun winibukce, sikce buklobuk. Atalak ara, asem maplirye, sesal lemlya beras kala koklobikiba, kumanya yalirye bobuka balamle touk, weik kumanya mikip yayukce, aning nirya bobuka bindobuk. Tonok ning babye, ton kum batakuk. Bukni, apatung obuk keil ara, weik mutuku bulamle touk winibukce, im sirya, mutuku sirya nirya erepdobuk.” Daniel birye nyabuk.

³⁶ Nyabukce, ayupu ton nyabuk. “Aning awinibuk ning, el nong ara, na ni koproba, an lengdar mapmom ning deiyok ara, lak nyapnukine.

³⁷ Na ni koproba Raja ninye deiyoknye, anda pia telebnye. Yuk ninye deiyok nang atonun kume. Yuk ninye deiyok nang daunyak bukni, anda sik nirya talibuka deice tam ulyame. Allah im deice kwepdeibukce, eitam ululnye birye, na ni anti, ‘Amutuku nirya taliplirye, mikip weik ap, weik mambul una ap, urasin pia teleb una ap unamle’ tenen, wipdeibkukba ulyame.

³⁸ Winipdeipkuka deice arye, ance tukwak mutuku ubuk ning nirya ap, ninye yupa nirya ap, maka bai tam kam ulul ning nirya ap, aning-aning nirya ap, talibuka ulyame. Apatung kisok, emas arye memamik ning ara, kiklina ara, winipmanto ning atia. Bukni, el nong dipkoprob antia.” Daniel birye nyabuk.

³⁹ Nyabukce, ayupu ton nyabuk. “Bukni, nun ni koproba, an talibuka uminye mutuku nirya ara, sirya akunum kum uplyopura, yuk mutuku ninye deiyoknye ton, tiknamle bukni, elce talibuka unamle ning nirya ara, mitik weik ning uka. Aninguk ara, pia weik ning. Aminyan talak ara, ninye deiyoknye, winilinye ton tiknamle. Weiknye, el urasin ap, mikip ap ara, tembaga atonun upnamle. Elcuk mutuku-mutuku nirya talibuka unamle.

⁴⁰ Aning akunum winiplyopura, ila tuba dumbarye ninye deiyoknye tonap, dukdongobuka yanamle ning ara, el mikip ara, pia mikip weike. Kat ning, el si besi atonun upnamle. Kat besi ning arye, aning-aning nirya teiklirye, nirya obuka bataklamle touk, aweik deiyoknye birye, yuk ninye deiyok nang nirya ati, malye kibuka opnamle. Yuk mutuku-mutuku nirya, sik ninye deiyok nang ati, atu atonun kiplopnamle. Ara, kat ning besi atonun, aninye deiyoknye birye, winipnamle ati nyapkine.” Daniel birye nyabuk.

⁴¹ Nyabukce, ayupu ton nyabuk. “Tonda, na ni ance dinmalumba, apatung el yan ap, taruk ap ara, weik kat ning ubuk. Ton tam ara, kiri tuku upmok. Ton tam ara, kat ning besi upmokba eiplume. Aeiplum ning nong ara, ani. Ara, aninye deiyoknye birye, talinamle ning nirya ara, noutam arye bokuka, wilipnamle. Aning ara, na ni ance dinmalumba, aupmok ning ara, kat ning besi ap, kiri tuku ap tablakikba, eiplum touk upnamle. El mikip ara, besi atonun upnamle bukni, ton tam ara, kiri tuku ap, taplakik anya arye, atam ara mikip kum, mitanguk kipnamle.

⁴² Winibukba, eiplum ning ara, yan duk tam ara, kat ning besi ap, kiri tuku ap, taplakuka memamik atonun, aninye deiyoknye birye talinamle ning nirya ara, ton tam mikip weik upnamle, ton tam ara, mikip kumce, mitang upnamle.

⁴³ Aning atonun, na ni ance dinmalumba, kat ning besi ap, kira tuku ap tabakuka upmokba, eiplum ning deiyok ara ani. Ara, aninye deiyoknye talinamle ninye ara, tonok yalauk kum talinamle, bukni, ninye aning-aning weik tabakuka, deiplirye talinamle. Wininamaka ati, tonok kanye bobuka, kum unamake. Ara, kat ning besi ap, kiri tuku ap, taplakuka tonokak deipting bukni, lokolsaklamle touk, anang babye wininamake.” Daniel birye nyabuk.

⁴⁴ Nyabukopura, ayupu ton dukdongobuka nyabuk. “Atalak ara, aweik deiyoknye birye, im sirya, mutuku sirya nirya talinamle bukni, atalak noutamak ara, Allah aning-aning nirya, pia talibuka im deice ululnye birye, yuk weik Deiyoknye erepdeipnamle. Anye birye talinamle ning nirya ara, el Kerajaan nyalamak ning, pia aupnamle. El ti ara, yuk mutuku ninye nirya arye, talibuka el obuka malye kum kiptinge. Tonda, elce talinamle mutuku ap, ninye ap, yuk deiyok nang arye kum taliptinge. Aweik Deiyoknye birye, yuk ninye deiyok nang ap, yuk mutuku nirya ap, malye kipnamle. Bukni, yuk mutuku nang arye, elti, kum malye kipnamake. Elda pia tuba unamle.”

⁴⁵ “Naio ance min talak arye, winipmoba eipmom ning ara, nong ara laka nyapkine. Ara, weik mutuku yangan keil noutamak, teleb uka dana-dana kibuk ning ara, ninye taruk deice arye kum winibik. Aweik keil cobuka sakuk ning ara, kat ning besi ap, tembaga ap, kira tuku ap, perak ap, emas ap deice arye memamik patung yanuka, siknibuka nirya oplobuk. Awinibuk ning ara, Allah el mikip weiknye birye anti, ‘Kel kipnamle’ tenen, laka nyapkuke. Ara, an ninye deiyoknye winipnamkil ning ati, laka nyapkuke. Ati ara, an lengdar mapmalumce, eiplum ning ap, narye, ‘Nong ani,’ nyapmakin yupu ap ara, pia diba tenebuka kel biknamlyame. Ara, pia dipkoprob yupu nyapmakina atia.” Daniel birye, Babel mutuku ninye deiyoknye, Nebukadnesar biti nyabuk.

Ninye deiyoknye birye, Daniel biti, dekna weik ning arebuk yupu

⁴⁶ Daniel birye, ayupu nirya akunum nyabukopura, ninye deiyoknye, Nebukadnesar birye, Daniel el kanye deibukce kina ati, gutam tuku dipdongobuka, kanupdongobuk. Winibukopura, el amu tam pil don nang ati, yupu nyapdeibukba, sikce Daniel biti, kanye deibuka kibikce, siltong teleb lelamle ning ap, dekna teleb ning, yuk ning ap, dobuka boyayikce, Daniel biti arebik.

⁴⁷ Arebikopura, ninye deiyoknye Raja arye, Daniel biti nyabuk. “Dipkoprop nyapne. Ance si erelyam Allah ara, elda aning-aning nirya deice tam ulirye, aning nirya talilule. Elda Allah tonok ulule. Elcuk ninye deiyok nang nirya talilulba, sikda el amu tam unyake. Allah el tonok duknun ning nirya, laka kilina deiyoknye ulule. Elda, anti laka kibuka nyapdeipmakuk touk, ance akunum laka nyapmanilame.” Nebukadnesar birye, Daniel biti nyabuk.

⁴⁸ Ninye deiyoknye birye, Daniel biti nyabuka, kanye deibuka kibukopura, el kanye delin ning, weika arye arebuk. Arebukopura, ‘Babel mutuku nirya, ninye deiyoknye Gubenur atonun talibuka unamle’ tenen, erepdeibuk. Ara, Nebukadnesar birye, Daniel biti erepdeibuk. Tonda Nebukadnesar birye, ‘Daniel bira, Babel mutuku weik kel bikamik nang nirya ara, sik deiyoknye unamle’ tenen, Daniel biti wibuka erepdeibuk.

⁴⁹ Winibukopura, Daniel birye, Babel mutuku ninye deiyoknye biti morobuk. “Naio, an amu tam pil dona ati, ‘Babel mutuku nirya talibikirye, melibuka pil donamkiyak’ tenen, na kayapu Sadrak ap, Mesak ap, Abednego ap, sik ton ninye deiyok nang kina ati, erepdeiptume,” nyabuka morobuk. Aning moropmok touk, Nebukadnesar kekebukce, anang winilye ton wipdeibukba, el amu tam pil talibuka dolamikce, weik nang ulamik. Daniel el tonok ara, Babel mutuku ninye deiyoknye ulamuk aik, weik aik pum tam weik pil talibuka, Babel mutuku ninye deiyoknye, Nebukadnesar el dam ulamuk.