Daniel 12 - Eipomek

Aminyan sirya dakan talak upnamla ati, sekuk yupu

¹ Daniel birye nyabuk, “Malaikat arye, ayupu nyapnukopura, ayupu ton dukdongobuka nyapnuke.” Anyabuk yupu ara, ani. “Siria mutuku taleamuknye, akunum diplyopura, atalak noutam ara, Allah el pil donanye malaikat, el si Mikael, laka kipnamlarya. Mikael bira, sik Israel yala nang ati, melibuka kalikilule. Atalak ara, Daniel an mutuku nang, sik Israel nang kalikinamle bukni, atalak noutam ara, kanye imun weik talak ton yanamle. Aning ara, minop talak ara, kanye imun weik ning ton yangalamuk bukni, aning nirya ara, mitik ikin uka. Asirya talak yanamle ning ara, pia ikin weik upnamle. Minop talak ulamik nang arye dipdongobuka, wini talak unyak nang babye, aning atonun ikin ning ton yanamukba, kum dopromik ning yanamle. Bukni, an mutuku nang, Israel nang kan-kan noutam arye, ninye weik ton, Allah arye lyepropnamlarya. Ara, yata nang do nirya, sik si Allah kam deiyoknye, el buku noutam si sekuka deiamlye nang nirya ara, dipkoprob lyepropnamle.

² Tonda, atalak noutam aryuk, ninye weik tonun akunum diamikce nang babye, tamubuka kam buknamake. Ara diamikba, tuku palyamik nang ara, tuku pum tam arye kam buknamake. Kam bukikirye, ton tam nang ara, pia bola koplobuka, kam una deiyok ning dopropbikirye, tuba tamubuka bukikirye, kam kipman pia telebuk unamake. Bukni, ton tam nang ara, kanye imun weik ning doprobikirye, alye dakdanamake. Sikda, kanye imun weik ning doprobikirye, uku bisik bikirye, malye nyabuka ngalukikirye, pia engenauk unamake.

³ Tukwak mutuku ulamik talak noutam, kel weik bikna deiyok ning deice arye, kel bikamikce, diksukumuk ulamik nang ara, sik deice ara, im dirina ulamle touk ubuka, sik weik dirina deiceuk unamake. Tonda, tukwak mutuku ulamik talak ara, ton nang arye yuk nang ati, “Teleb winin ning ara ani, malye winin ning ara, ani,” nyabuka, akunum peterelamikba, sik yupu kekelamikce, diksukum winin ninguk talibuka, winilamik nang weik ulamik. Adiksukum ning peterelamik nang ara, kurya im deice tiklirye, dirina ulamle atonun nang ukirye, pia kamuk unamake.” Malaikat arye, na Daniel biti nyapnuk.

⁴ Nyapnukopura, amalaikat arye nati, ayupu ton ap nyapnuk. “Danielo, Allah yupu nyapdeipliba, sekmalam buku ara, ‘Yuk nang arye eibikcakʼ tenen, wini talak aryuk, siknipdongopnulyame. Winipmince, ‘Yuk nang arye, abuku yokuka eibikcakʼ tenen, abuku deice ara, bikilina ati, yo pia arye deibuka, taplak dongoplyame. Winyaminya ani, sirya daknamle talak aryuk, aning nirya ara, laka kipnamle. Aning-aning nirya, sirya daknamle talak kipnulyopura, ninye weik tonun, ‘Aning kel biktibye, aning ton kel biktibyeʼ tenen, dana-dana tam mutuku nirya, minop banauk upnamake. Winipnamaka deice arye, kel bikin ning babye, pia weik upnin banamle.” Malaikat arye nyapnuke.

⁵ Min yuma talak, yupu laka nyapnuk malaikat arye, ayupu akunum nyabukopura, na Daniel birye, dipdesirye, ninye bitinye nang ton eipse. Tonoknye bira, amutuku balamuk mek, atam lilun tikmokba eipse. Tonye bira, amek dam bukni, otam lilun tikmokba eipse.

⁶ Amek dam atam tikmoknye birye, tonoknye ton, mek pu tam tikmoknye biti, nyabuk. “Akanye imun weik ning, wininmalba eipmap ning nirya ara, yata talak arye laka upnamle do?” nyabuka, asipdeyuk.

⁷ Asipdeyukura, tonye bira, urasin teleb baju, el si lenan baju ongopmoknye bira, elda amek pu tam tikmoknye birye, el taruk bitinye im deice tam erebukce, yupu ton nyabuk. Atalak na kekenmasiba nyabuk ning ara, ani. “Kam deiyoknye Allah, Pia Kam Unamlanye, el si deice arye, dipkoprob yupu nyapkine. Aning eipmap ning nirya ara, dipkoprob nong upnamlarya. Awininmal ning nirya ara, keting tamun tiga setengah tahun deice arye winipnamle. Allah el mapu ati, yu nang arye, sik deice ikin ning boyanuka deibikca ati, olanauk ulamikca ani, sirya akunum winibikcopura, adinmalamba, kanye imun weik ning wininmal ning ara, atalakuk winibuka sirya daknamle,” nyabukba kekepse.

⁸ Anyapnuk ning nirya ara, dipkoprob na amul deice arye, akunum kekepse bukni, ayupu nong noutam deiyok ning ara, ‘E aning deiyok ati nyanmanileʼ tenen, kum tenepsirye, moubuka kum bikse. Ati, narye tamubuka nyapse. “Na nio, aning nirya ara, aning nirya winipnin balamliba, sirya daknamle talak ara, yata ning winiplyeba, eipnamap do?” nyabuka asipdese.

⁹ Asipdesiba, anye birye tamubuka, nati nyapnuk, “Kume Danielo, anda, ‘Aning kel biktinyeʼ tenena kume. Ayupu nong laka upnamle ning ara, kum laka nyapkitinye. Deiyok ara, ayupu ara, akunum siknipdongopmana ati, kum biktume. Sirya daknamle talak aryuk, laka kibuka ayupu deiyok ning ton, nong lak upnamle. Wini talak ara, kum biknamlame. Ati, an wini talak aryuk binulyame.

¹⁰ Ton tam nang weik tonun, sikti, ‘Lek teleb nang upnamakʼ tenen, ikin ning uplya deice arye, mingne kibuka, telebuk kipdeipdanamake. Sikda, pia teleb, lek diamuk upnamake. Bukni, yuk nang ara, sikda malye winin ninguk talibuka ukirye, malye ning talibuka wininamake. Ati ara, amalye winin ninguk wininamak nang ara, ayupu deiyok ning, moubuka kum bikinamake. Bukni, ‘Dibaʼ tenen, kel weik bikina deiyok ning kel bikamikirye, diksukumuk unyak nang ara, sikcuk, awininamle ning ara, ‘Deiyok aniʼ tenen, bikinamake.

¹¹ Bukni, tonok ning ton, laka nyapkitinye. Ara, Allah el si erena ati, kam ning obuka, asum-asum nirya arelyanganyak ning ara, malye nang arye, aning nirya kum kipdeipnamak talak ap, tonda pia malye nang arye, malye weik winin ning dobuka, Allah el si eren aik pum tam arye, laka deipnamak talak ap ara, aning bitinye akunum winipmace talak arye, dipdongobuka, otam ara, yupa weik, seribu dua ratus sembilan puluh (1.290) sum, ton ap kipnin banamle.”

¹² “Tonda, Allah elce nyapdeibuk yupu ati, diba tenebikirye, batakna kumce, aninguk moubuka talibikirye, yupa weik, seribu tiga ratus tiga puluh lima (1.335) sum noutam arye, pia diksukumuk upnamak nang ara, Allah arye sikti, pia kanye deibuka unamle. Sikda, ‘Aning nirya, dan talak winipnamle do?’ tenen, sik nirya arye, kalikuka dinamak nang ara, Allah arye pia kanye deibuka unamle.

¹³ Ati, wini talak Daniel anda, ayupu batakna kumce, ayupu pia talibuka ulaminya ani, aminyan talak ara, an adiparyuk dipnalame. Bukni, aminyan talak, mutuku nirya sirya daknamle talak ara, anda tamubuka kam bukminba, Allah arye anti, dekna teleb ning ton arepkiliba, dopropnalame.” Amalaikat arye, na Daniel biti, winibuka laka nyapnuke.