Daniel 11 - Eipomek

Mesir mutuku ninye deiyok kina ap, Siria mutuku ninye deiyok kina ati, sekik yupu

¹ Malaikat arye Daniel biti, dukdongobuka nyabuk yupu ton ani. Media mutuku ninye deiyoknye, el si Darius birye, Raja kibuka, Media mutuku nirya taleamuk talak ara, keting tamun tonok noutam nirya ara, narye el tam kipdopsirye, ‘El ti kalekniba, el mikip ton kipdeipnamneʼ tenen, Darius melilamse.

² Narye anti nyapnukin yupu ara, dipkoprob nong upnamle ninguk nyapnukine. Ara, ani. Yuk-yuk arye yanuka, deiyok kibuka, Persia mutuku talinamak bukni, winilye Raja ap arye, Persia mutuku talibikirye, Raja kibuka unamake. Sik yuk-yuk bukni, winilye nang arye, Persia mutuku talibuka daulamikca ani, aminyan ara, Raja dumunye ton tiklirye, anang punuplyopura, Persia mutuku uk talipnamle. Min yuma talak, Persia mutuku talinamaka deiyok nang, sik winilye Raja nang ara, mitik bona talin nang unamak bukni, el adumunye Raja bira, bona weik talinanye unamle. Anye el talinamle ning, pia weik uplya deice arye, aminyan talak ara, mikip ton ap upliba, elce, ‘Winipnamabe,’ nyapnamle yupu deice arye, deiyok kiplyeba, yuk mutuku nang, dana-dana tam unyak nang weik tonun, el yupu kekebikirye, sik ap, el ap, Yunani mutuku talipnamle Raja ati, obuka sirya daknamake.

³ Aning winipliba, akunum sirya nyaplyopura, malye weik kinanye tonok ton, aminyan talak Raja kiplirye, el mikip weik deice arye, Yunani mutuku ap, Yunani nang ap, weik tonun talipnamle. Winiplyopura, el kanye aryuk, ‘Aning winiptinye,’ teneplye touk, aninguk winipnamlarya.

⁴ Winibuka ninye deiyok kibuka, daupnin balamlya ani, aminyan talak ara, el anye akunum diplyopura, elce taleamlye mutuku nirya ara, noutam bokuka, yuk-yuk wiliprobikirye, dumbarye kipdopnamake. Atalak ara, min yuma talak Raja kiamuknye, elce delinamle mapu, sikce amutuku nirya ati, Raja kibuka kum talinamake. Aning kum bukni, yuk talye nang, sik delinamak mapu arye, Raja kibuka talinamake. Atalinamak nang arye, ninye deiyok kibuka, amutuku talinamak bukni, sikda, min yuma tikamuknye, el mikip weik arye, amutuku taleamuk touk, sik aminyan dumbarye Raja nang arye, kum wininamake.

⁵ Atalak ara, dabu mutuku outam, arah utara tam, Mesir mutuku talipnamle Raja ara, mikip weik tonun talibuka unamle. Bukni, Raja el mikip ara, aminyan talak ara, mitik tonun upnamle. Ati, el amu tam, el yin talin nang, sik deiyok nang kan-kan arye, tonok yin talina deiyoknye ton, elda pia mikip weik arye, tiklirye, min yumanye malye kiplirye, amutuku nirya, elcuk talibuka, Raja unamle.

⁶ Yata wiribuka keting tamun ton, akunum uplyopura, dabu mutuku tam, arah utara tam mutuku talipnamle Raja ap, iknapye tam, arah selatan tam talipnamle ninye deiyoknye Raja ap, sikce, “Nunda epdanuka neika upnimirye, olana kumce, teleb kibuka neika unamname,” nyapdikirye, akunum uprikcopura, dabu tam arah utara tam, Raja Mesir mutuku Raja ara, el kilmu iknapye mutuku, arah selatan Siriya mutuku talipnamle Raja ati, arepliba dopnamle. Bukni, akil ap, aRaja ap, teleb yupu kibuka neika una ara, pia ouku weik kum mapnamdake. Aminyan talak ara, Mesir mutuku kil ap, el akanye, Siriya mutuku Raja ap, tonda sik mapu nirya ap, sik amu tam pil melin nang weik tonun ap, sik nirya ara, yuk nang arye obukabikirye, sirya danamake.

⁷ Winipnamak bukni, aning akunum winipliba, mitik tonun aminyan talak ara, Mesir mutuku dipnamle kil, el tamnye ton, anye birye Raja kiplirye tiklyopura, elce Mesir mutuku talipnamle. Winiplyopura, iknapye tam, Siria mutuku talipnamle Raja, el yin nang ati, olalbinamake. Olalbinamak talak ara, elce sik iknapye tam nang ap, sik yin talen nang ap arye, cang weik poka dobuka, ulamice mutuku ara, binuka wekelbikirye, eitam unyak nang, Siria mutuku nang ati, obuka sirya dakikiba, Mesir mutuku Raja bira, amutuku nirya talipnamle.

⁸ Aning akunum winiplyopura, el adiparyuk el mutuku, Mesir mutuku tamubuka bilirye unamle. El mutuku tamubuka bilyopura, sik iknapye tam nang, sik si erelamak isa mer, sik urasin atonun puturubuka deiamik ning babye, alubuka, el mutuku tamubuka bobinamle. Tonda, sik Siria mutuku nang, ‘Nun ni yapu aniʼ tenen, talye ning bukni, isa si erelamik ning, urasin atonun kibuka, dekna teleb weik ning, emas ap, perak ap arye, memebuka deiamikce, isa si erelamik ning nirya ara, dobuka sik mutuku, Mesir mutuku bobinamake. Winibikcopura, yata wiribuka keting tamun nirya ara, utam mutuku, Mesir mutuku talibuka, unamle Raja arye, iknapye tam, Siria mutuku Raja kipnamak deiyok nang ati, ‘Dauplye, sik talye daunamakʼ tenen, kum olbanamle.

⁹ Dabinuka ulamlya ani, aminyan talak ara, iknapye tam, arah selatan Siria mutuku talibuka ulamlye Raja arye, ton ap dabu tam, arah utara tam, Mesir mutuku talibuka ulul Raja ati, olbinamle. Winipnamak bukni, iknapye tam Raja ap, el yin talen nang ap arye, tamubuka sik mutuku, Siria mutuku tamubuka binamake.

¹⁰ Siria mutuku tamubuka binamak bukni, winibikcopura, itam, arah selatan tam, Siria mutuku unyak nang taleamlya deiyoknye, aRaja arye deiamlye mapu, sikce tamubuka, ‘Kume wini talak ara, nunce itam mutuku, arah selatan tam, Israel nang unyak mutuku taleamlye Raja ati, olbinuyapʼ tenen, kintinibikirye, sik mapu yin talen nang babye, pia weik tonun kintinibuka deipnamake. Atalak noutam arye, Raja Sirya ap, el yin talen nang nirya ap arye, deiyok kiplyeba, olalbinamak ning ara, mek weik tonun, opnin balamle touk ubuka, sik Israel nang unyak mutuku noutam mikip arye, talye luparabuka olalbinamake. Winibikirye, like bitinye talak arye binamak ning ara, Israel nang arye, cang weik poka domik mutuku dam bikirye, ‘Obuka sirya daknamapʼ tenen, piripnamake.

¹¹ Ura, Siria mutuku Raja ap, el yin talen nang ap arye, winibikcopura, iknapye tam arah selatan tam mutuku, Mesir mutuku talibuka ulamlye Raja ara, aning nirya kekeplirye, yu upliba, sik nirya mal olanmakcakuk, dabu tam mutuku binamle. El mutuku koproba, Mesir mutuku arye, dabu mutuku bilyopura, sik nirya mal olanmakcakuk bilyopura, aRajanye deiyok kipmaliba, el yin talen nang weik, amutuku bulupmakce nang nirya arye, Siria mutuku taleamlye Raja ap, el yin talen nang ap ati, bikirye obuka, sirya daknamake. Atalak ara, Siria mutuku ninye deiyok Raja arye, el yin talen nang, pia weik tonun bulubuka deipnamle bukni, Mesir mutuku taleamlye Raja ap, el yin talen nang ap arye, Siria mutuku nang ati, obikirye, malye kipnamake.

¹² Winibikcopura, Mesir mutuku taleamlye Raja, el mal olan dam yin talen nang arye, Siria tam nang weik akunum opmaliba, dipnamak ning ati, el kanye ereplirye, ‘Nara pia mikip weiknye ununa ati, na yin talen nang arye, ninye weik akunum opmakce, sirya dakmakeʼ tenen, maknya kintinibukaplirye, unamle. ARajanye, el yin talen nang arye, ninye pia weik obikiba dipnamak bukni, aminyan talak ara, aning atonun tuba kum wininamake. Ati ara, aRaja elce, ninye deiyoknye kibuka, unamle talak ara, lo mitik tonunuk talinamle. Keting tamun weik tonun, ton kum mapnamle.

¹³ Deiyok ara ani. Ura, aminyan talak ara, dabu tam ninye deiyoknye, arah utara tam, Siria mutuku Raja kibuka, talipnamlanye bira, like bitinye olbana ati ara, yin talen nang, weik tonun ton kintinip deipnamle. Min yuma talak wipdeiamuk yin nang ara, mitik weik tonunuk wipdeiamuk bukni, atalak wipdeipnamle yin talen nang, sik yupa ara, pia weik kintinip deipnamle. El yin talen nang, sik yupa ara, pia weik deyamukbuk, daulamikca ani, aminyan talak keting tamun yata wiribuka talak, akunum kiplyopura, Siria mutuku Raja ap, el yin nang pia weik ap, tonda ninye on ning babye, pia weik, aning-aning nirya boyanuka, el mutuku arye batakuka, arah selatan tam bikirye, ‘Mesir mutuku tam nang obuka, sirya daknamapʼ tenen, mal olalbinamke.

¹⁴ Aning nirya uplye talak ara, ninye pia weik arye, arah selatan tam, Mesir mutuku talipnamle Raja arye, talinamle ninye kan-kan, ton nang arye, ‘Anye bira, nun like ati ara, elti, yaniptapnamabe,’ tenebikirye, el nyanamle yupu ati, kum kekenamake. Winibikirye, el ap, sik ap, yupu deice arye uapdanuka derelanauk unamake. Aning atonun ton, Daniel an mutuku sisa nang koproba, kan-kan arye, ton Israel mutuku ninye arye, pia mandipna kanye bobuka, Mesir mutuku Raja ati, el yupu kekena kumce, batakuka yaninauk unamabe,’ tenebikirye pirilenamake. Winipnamaka deiyok ara, ani. Ara, ayu tenepnamak nang kan-kan arye, ton deiyoknye birye, lengdar mana atonun eipnamla deice arye, kunum lak upliba eiplirye, sik yuk nang ati, laka nyapnamle. Laka nyapliba, diba tenepnamak bukni, sik arye, aMesir mutuku deiyoknye Raja biti, ‘Obuka malye kiptibye,’ tenepnamak bukni, elti, kum batakmanto upnamake. Winibuka pirilenamak bukni, ‘Winipnamabe,’ tenenamik ning ara, nong kum upnamle. Winipnamaka atonun, Danielo, anggun Israel yala nang kan-kan arye, ton nang ara, ‘Kume, aning ara teleb uka. Ati ara, lengdar mapmoknye, el tam kipdopnamabe. Ati nunce, nun talisilnye biti, bataknamabe. Anye batakeipyopura, sik Mesir mutuku nang arye, nun nirya kum talenamsiake,’ tenebikirye, pirilenamake. Winibuka pirilenamak bukni, sik Mesir mutuku nang arye, Israel tam nang ati, obuka sirya daknamake. Israel tam nang arye, ‘Winipnamabe,’ tenyamik ning ara, nong kum upnamle. Tali nong diamuk piriplopnamake.

¹⁵ Aning nirya akunum winiplyopura, aminyan talak ara, dabu tam Sirya mutuku talilul ninye deiyoknye Raja arye, el yin talin nang weika arye, kintiniplyopura, sik Mesir mutuku nang unamak mutuku noutam yanuka, obuka sirya daknamake. Dabu tam arye batakuka iknapye tam yalyeura, sik Israel yala nang arye, Mesir mutuku nang unamak mutuku noutam ara, tonok asik dam yanuka, obikirye bisipnamake. Ura minop talak, Mesir mutuku noutam bukni, anyasik domik nang arye, ‘Kume, yuk pera mutuku nang, nun mal olan nang yakirye, nun mutuku talye luparabuka kum wekuka opnasiakʼ tenen, cang weik keil arye, keil poka arye dobuka, weik asik dana-dana nirya antapdongamik. Aning nirya akunum winilamik bukni, aminyan talak, Sirya mutuku deiyoknye Raja bira, Mesir mutuku weik asik dam yalyopura, elce nyapliba, el yin talin nang tuku weik palibukabikirye, deipnin banmaca ani, acang keil poka dam akunum deice tam deibicopura, atuku deice yanibuka welebikirye, acang poka deice kaplibuka, weik asik domica dam weknamake. Wekikirye, anyasik unyak nang nirya ati, obuka malye kibikirye, sirya daknamake. Sirya mutuku Raja arye, anyasik domice ning ara, dakuka uluplopnamake. Atalak ara, sik iknapye tam ninye ara, Mesir mutuku talibuka unamle Raja ap, el yin nang ap nirya arye, ‘Anyasik noutam unyak nang dam, binuka melipnamabeʼ tenen, Mesir mutuku noutam arye batakuka, Israel nang unamak mutuku bikirye, Sirya mutuku nang ati, opdenamak bukni, Mesir mutuku Raja arye, ninye ona kel weik nang wibuka deipnamle nang babye, mikip kum upnamle ati, aning nirya, kum winipmanto upnamle. Ati ara, sikce Sirya tam unamak Israel yala nang, sik yin talin nang ati, kum obuka daknamake. Anyasik weik ning ara, sik Sirya tam yin nang arye, obuka sirya daknamake.

¹⁶ Ati, atalak ara, dabu mutuku tam ninye deiyoknye, arah utara tam, Siria mutuku talipnamle Raja ara, yuk tam nang nirya arye, elti, kum obuka sirya danamake. El ap, el yin talin nang ap, sikcuk sik yuk mutuku nang nirya obikirye, sik unyak mutuku nirya ara, alubuka doprobikirye, Raja Siria teneplye touk ubuka, talye karin wipnin banamlarya. Winipnamla ati ara, sik Israel nang, urasin pia teleb mutuku noutam ululumak nirya ara, anye birye alubuka doproplirye, elcuk talipnamle. Tonok mutuku babye kum bataknamle. Amutuku-amutuku nirya talipnamle.

¹⁷ Winiplye talak ara, Siria mutuku talipnamle Raja arye, el yin talin nang weik kintinibuka deiplirye, arah selatan, iknapnye tam, Mesir mutuku talipnamle Raja, el dam binamle. Bukni, el talima noutam arye, ‘Na nyapnamne yupu ara, kwinisa dobuka tenepce nyapnamne,’ teneplirye, Mesir mutuku talipnamle Raja ati, winibuka nyalbinamle. ‘Yo, an ap, an taliplum mutuku Mesir unyak nang ap, nun Siria tam unyap nang ap, ninye mal olana kumce, teleb ubuka neika unamtibye’ tenenmana ati, anggun ap, nun ap arye, mal olana kum ati yupu, nyalin yupu deice arye nyapdanamabe,’ nyapnamle. Uteneplirye, Mesir mutuku Raja dam nyalbinamle. Bukni, Siria mutuku ninye deiyoknye, el talima noutam arye, ‘Kume, dipkoprob ning ara, Mesir mutuku ninye talinyak tam nirya ara, naryuk alubuka dopropnamne. Ati, na kilmu dobuka, Mesir mutuku ninye deiyoknye arepniba, doplyopura, na kilmu arye, nati lak nyanamle yupu deice arye, melipnamnile. Winiplyopura, narye Mesir mutuku nang dam binuka, malye kipnirye opnamne,’ tenepnamle. Uteneplyopura, aning nirya piripnamle bukni, aning nirya nong kum upnamle. Ati, elce, ‘Mesir mutuku nirya alubuka dopropnamne,’ tenelamlye ning ara, nong kum upnamle.

¹⁸ Aning akunum winipdeliba, nong kum uplyopura, Siria mutuku Raja arye, Mesir mutuku batakuka, otam mutuku, weik laut mekwen, el si Laut Mediterania, aweik mekwen lilun tam unamak nang ati, sik dam binuka, ‘Optinyeʼ tenen, piripdenamle. Otam bilirye, el ap, el yin nang arye, amutuku-amutuku unamak nang weik tonun, malye kibuka obikirye, sik mutuku alubuka dopropnamake. Winipnamle bukni, yuk mutuku noutam arye, tonok ninye deiyoknye ton tiklirye, amutuku deiyok kibuka taliplirye, el ap, el yin talin nang ap arye, Siria mutuku Raja ati, obuka sirya danamake. Winipnamaka deice arye, Siriya mutuku Raja arye, ‘Nara pia mikip weiknye unune,’ tenen, maknya kintininamlanye ap, pia malye tenenamle ning nirya ap ara, kum kipdeipnamake. Dipkoprob ning ara, Siria deiyoknye maknya kintinilana ap, talima erelana ap tenelamle ning nirya ara, tamubuka, el atenelamlanye, el nong deiceuk upnamlarya.

¹⁹ Winiplyopura, Siria mutuku Raja arye, Laut lilun mutuku nirya batakuka, el mutuku, dabu tam (arah utara) tamubuka binamle. Elce, ‘Na mutuku tamubuka binirye unamne. Na weik keil aik ap, cang keil poka ap, doamse ninguk, amutuku uk tamubuka binirye, amutuku unamne,’ teneplirye binamle. Bukni, aminyan talak, yuk mutuku nang arye, Siria mutuku deiyoknye bira, obuka sirya danamake. Winibikiba, el anye bira, yuk nang arye anye ton kum eipnamake. Ninye arye obikiba, elda tunim apnamle.

²⁰ Minop talak Siria mutuku taleamuk Raja dipliba, punupnamle Raja ara, el amu tam pil don nang, sikti, “Na talinun mutuku noutam nirya unyak nang ati, pia yu deice arye, nyalbinamlume. Ara, ‘Sikda pajak yo bok aren ning nirya ara, amutuku talibuknye biti, weik tonun bulubuka delilyanganamlume,’ nyapmunyeba, nati arepnikcopura, na talipnamne dengna weik ning ara, pia weik tonap upnin banamle,” nyapdeipliba, wininamake. Anye bira, el lo mitik tonun aryuk talipmalya ani, aminyan talak ara dipliba, kum danamlarya. Bukni, ara yuk nang arye, elti, yu upliba, mal olan talak arye, el obikiba kum dipnamle. Aning kum bukni, anye dipnamle ning ara, talyeuk dipnamlarya. Lak sukum arye, kum opnamake. Amalaikatnye biryuk, na Daniel biti, ayupu ton nyapnukba kekepse.

“Utam mutuku talipnamle Raja ara, pia malye unanye birye talipnamle,” nyabuk yupu

²¹ Amalaikat aryuk, ayupu ton nyapnuk. Aminyan talak ara, adipmalinye pununa ati, yuknye birye, Raja kibuka Siria mutuku talipnamle. Anye bira, el li yapu ara, Raja nang kum ulamika ati, amutuku deiyok nang arye, ‘Elda nun mutuku talipnamsil’ tenen, elti, kum wibuka erebuka ati, dipkoprob, elda Raja kum kipmantonye unamle. Winipnamle bukni, amutuku nang kum bikmace talak, talye mangkau kanye bobuka unamak talak ara, elce talye karin arye, tiklirye, pia malye weik una deice arye, amutuku talina ati, deiyok kiplirye talipnamle. Elda, Siria mutuku talilyanamle talak ara, amutuku nang arye, kum bikamikce talakuk yalirye, namin kina ati, tilila yupu ap, kanye delin yupu ap, yanuka nyapnamla deice arye, Raja kiplirye, amutuku talipnamle.

²² Elce amutuku talipnamle talak arye, el yin talin nang ara, mikip weik deice arye, mal olbinamak talak ara, yuk mutuku yin talin nang nirya ati, obuka sirya dakanamake. Tonda, Allah el si eren aik pum tam, pil dona deiyoknye, imam nang, sik deiyoknye ap ara, Raja arye nyapliba, el tam nang arye, anye ton opnamake. Winipnamla deice arye, elti, ara, ‘Anye bira, nun pia like,’ tenebikce nang nirya ara, el ap, el yin talin nang ap arye, obikirye kum kipdeipnamake.

²³ Tonda Raja bira, elce talipnamle mutuku noutam ara, ninye pia weik tonun kum unamake. Mitik tonun unamak bukni, el kel weik arye, minin yupu ap, tilila yupu ap, tenebuka arye, nyanamle yupu deice arye, yuk mutuku ninye deiyok nang, yuk Raja-Raja nang ati, ‘Kume, sik ap, nun ap ara, teleb ubuka neika ubirye, melilanamabe,’ nyabuka, tilila yupu bukni, nyalin yupu deice arye, nyapdeipnamla deice arye, sik amutuku-amutuku nang nirya arye, ‘Yo nunda neika melipdanamabe,’ nyabuka, nyalin yupu nyapdanamake. Nyapnamaka babye, el anye, elcuk anyapnamak ning ara, adiparyuk yanipnamle. Winipnamla deice arye, ninye yupa pia weik tonun, kum talipnamle bukni, el mikip weik upliba, el anye biryuk, yuk mutuku weik tonun ton talipnamle.

²⁴ Anye el kel weik deice arye, namin kiplirye, sik mutuku tuku pia telebak unyak nang, sik bona talin nang unyak nang nirya ara, sik dam binuka oplirye, amutuku tuku ara, alubuka dopropnamle. Sikda, mangkau kanye bobikirye, ‘Yo tunim abuka, teleb aryuk unamaba’ tenen, unamak talak aryuk, anang oplirye, sik mutuku noutam, pia teleb mutuku nirya ara, alubuka dopropnamle. Elce aning nirya winipnamle ning ara, min talak el li yapu ap, el apu yapu nang ap arye, aning atonun pia kum winilamik ning bukni, elcuk amalye un ning, talye lukparabuka winipnamle. Winiplyopura, elce obuka sirya daklirye, amutuku nang minop talak talilamik ning ara, alubuka dopropnamle. Dopropnamle bona yuk-yuk ning nirya ara, elce bokukaplirye, el tam kipnamak nanguk arepnamle. Tonda, el mal olan nang ati, yuk mutuku nang arye, sik weik asik dana-dana tam, keil poka antanap dongobuka domikce, kaliklamikak ap, yuk mikip weik mutuku ap nirya ara, elce, ‘Amutuku nirya olbinyopura, sik mutuku alubuka dopropnamne’ tenen, yupu taliplirye, kintinip deipnamle. ‘Yuk mutuku nang ton mal olbinaman’ tenen, kintinipnamle bukni, el lo ton, kum upnamla ati, keting tamun weik tonun ton, amutuku nirya kum talipnamle. Lo mitik tonun ton, akunum uplyopura, el babye dipliba, tunim apnamle.

²⁵ Bukni, elce amutuku-amutuku tuba talipnamle talak ara, anye adiparyuk malye kibuka, elce, ‘Iknapye tam, arah selatan Mesir mutuku nirya talibuka, Raja kibuka ulinye biti ara, narye olbinamne ati, kintinipnun’ tenen, el yin talin nang ton, weik tonun kintinip deipnamle. Mesir mutuku nang olbinmane bukni, arah selatan tam Mesir mutuku talipnamle Raja ara, Raja el yin talin nang yupa pia weik tonun kintinipnamle. El yin talin nang ara, pia mikip weik nang, akunum kintinip deipnamla ati, Siria mutuku talipnamle Raja arye, ‘Mesir mutuku olbinaman’ tenen, kintinip deipnamle bukni, winipmanto kum upnamle. Winipmanto kum upnamla deiyok ara, ani. Ara, yuk mikip nang arye, tilila yupu ton talibikirye, nyapnamaka deice arye, Siria mutuku talipnamle Raja birye, ‘Winipnamne,’ tenepnamle ning nirya ara, nong pia kum upnamle. Elce tenipnamle ning ara, nong kum upnamle.

²⁶ Aninguk kum bukni, Siria mutuku weik deiyoknye Raja, el amu tam pil dona deiyok-deiyok nang ap, el ap, el aik pum tam, pia teleb kwaning dobuka, neika dinyak bukni, adeiyok nang nirya ap, yuk nang ap, sik neika yupu talibikirye, sik nirya arye, ‘Anye opnamabe’ tenen, el ona ati, yupu talinamake. Raja ap, sik ap, neika unyak bukni, aminyan talak ara, anang aryuk, ‘Se, amutuku talisilye Raja bira, nun lik ati, opnamabe,’ tenenamake. Winibikirye, yupu talinamake. Tonda, el yin talin nang ara, yuk mutuku nang arye yanuka, pia weik tonun opnamake. El tam nang babye, weik tonun obikiba, dipnamake.

²⁷ Atalak ara, Raja nang bitinye arye, ‘Amutuku tuku nirya ara, nun bitinye aryuk taliptinimnye,’ tenenamdaka ati, sik bitinye ara, tonok meja dam bukdikirye, kwaning neika dipdikirye, yupu talinamdake. Kekena teleb yupu nyapdanamdak bukni, dipkoprob sik talima noutam ara, yu ulamlebuk, neika unamdake. Tonda, “Winipnamne,” nyabuka, tilila yupu uk nyapdanamdake. Bukni, sik bitinye arye, ‘Winiptinimnye, winiptinimnye,’ tenebuka, kintinipnamdak ning nirya ara, nong kum kiplirye, aning nirya kum danamle. Aning nong kum upmala deiyok ara, ani. Ara, Allah arye, ‘Aning ara, atalak uptue. Aning ara, yuk talak ton winipnamle. Anang bitinye ara, kum unamdake’ tenen, akunum kintininyamuk talak ara, dam akunum upmala ati, sikce, ‘Winiptinimnye,’ tenebuka, kintinipnamdak ning nirya ara, nong pia kum kiplirye, aning nirya kum danamle.

²⁸ Ati ara, Siria mutuku talibuka, Raja unamlanye ap, el yin talin nang nirya ap, Mesir mutuku batakuka, sik mutuku tamubuka binamake. Tamubuka binamak talak ara, yuk-yuk mutuku nang ati, mal olalbikirye, alubuka dopropnamaka bona nirya ap, bobinamake. Tonda, Raja el kanye ara, ‘Allah el si erenyak aik pum tam pil dolirye, imam-imam nang, sik deiyoknye bira, oplopnirye pia kum kipdeipnamne,’ tenelye kanye ara, tuba aupmalibuk, el mutuku tamubuka binamle. Tonda, elce, ‘Winipnamne,’ teneplye ning nirya ara, Israel mutuku noutam arye, aning tuba teneplye touk, unamle. Bukni, Mesir mutuku batakuka bilye talak ara, Israel nang ati teninamle ning nirya ara, tuba aupmalibuk, el mutuku tamubuka binamle.

²⁹ Dabinuka daulamlya ani, like weikto uplyeura, daulamlya ani, minop talak Allah arye, ‘Atalak ani,’ akunum tenyamuk touk, atalak akunum uplyopura, Siria mutuku taleamlye Raja ara, tonap tamubuka, arah selatan tam, Mesir mutuku talibuka ulamlye Raja ati, ‘Anye oplopnirye, el mutuku alubuka dopropnamne,’ teneplirye, tamubuka Mesir mutuku olbinamle. Winipnamle bukni, minop talak winyamlye ning ara, urasin yuk, aminyan talak upnamle ning ara, urasin yuk upnamle. Min yuma talak Mesir mutuku olyanamuk talak ara, ninye weik omukce, sik ning weik tonun, alubuka dopropmok ning atonun, abitinye talak ara, kum winipnamle.

³⁰ Siria mutuku taleamlye Raja arye, Mesir mutuku kum obuka, sirya daknamla deiyok ara, ani. Ara, Sitim mutuku nang ara, Siprus mutuku arye mekwen deice balamle kapal bukuka yakirye, el Siria mutuku Raja ati, yanuka obikiba, el ilil weik upnamle. Ilil weik uplyopura, Mesir mutuku bataklirye, tamubuka bindopnamle. Bukni, elda yu weik uplyopura, Israel nang unamak mutuku tamubuka binamle. Winiplyopura, el yu ati, ‘Allah el si erenyak aik pil dona deiyoknye, imam-imam nang, sik deiyoknye biti, adiparyuk obuka, kum kipdeipnamle,’ tenyamuk ning tuba teneplirye, Yerusalem mutuku tamubuka benamle. Tonda, Allah ati diba tenena kum nang, amutuku noutam unamak nang arye, Raja ati nyapnamak yupu kekeplirye, ‘Sikda teleb,’ tenebuka, sikce nyanyak yupu kekeplirye, anang ati melibuka unamle.

³¹ Raja birye winyamlya ani, Allah el si eren aik, pia lek aik ara, malye kilina ati, elce yin talin nang weik dopdeipnamle. Allah el si eren ati, Israel nang arye kam ning boyakiba, asum-asum nirya, imam nang arye, aning obikirye, uku dongonyakak ara, sik ayin talin nang arye, aning nirya kum kipdeipnamake. Winibikiba, Raja birye, Allah el si eren aik pum tam ara, pia malye weik un ning boyanuka deipnamle. Winipnamla ara, Allah elce, ‘Se, wini talak ara, ‘Naʼ tenen nang, Israel nang ap, na ap ara, anyaik ara, tonap kum bitibye. Anyaik ara, na akunum batakne,’ teneplirye, anyaik ati, lik upliba bataknamle. Anyaik bataklyopura, oldiamuk upnamle.

³² Raja elce tilila yupu weik nyapnamle deice arye, ninye weik tonun, Allah el si tuba kum erebikirye, akunum batakuka, talye kanye bobuka unamak nang ati, yukupliba, anye el yupu kekebuka, el tam uk kipdobikirye, elti, melinamake. Bukni, dipkoprob Allah elti, tuba talibuka unamak nang arye, atilila yupu nyanamle Raja ati, kum kekenamake. Aning kum bukni, malye kibikirye, ‘Anye bira nun like. El yupu kum kekenamabe’ tenen, el nyanamle yupu ati, yaninauk unamake.

³³ Atalak ara, sik kel weik bikina deiyok ning, akunum kel bikamikce nang arye, amutuku diba tenenyak nang peterenamaka deice arye, telebuk unamake. Winipnamak bukni, like weikto talak ton, sik malye nang arye, akel bikamik nang ap olanmakca ani, ouku weikto arye, kel weik nang ton obikcopura, dipnamake. Ton tam kel weik nang tomobikirye obuka, uku dongobikiba, uku arye dipnamale. Sik malye weik unamak nang arye, kel weik bikamik nang ara, sik bona nirya alubuka dopropnamake. Tonda, ton tam kel weik nang ara, weik tonun tomobuka, wenen aik dongopnamake.

³⁴ Sik malye un ning talibuka unyak nang arye, kel weik nang, Allah ati diba tuba tenenyak nang ati, yanuka opnamak talak ara, yuk nang ton, Allah el mapu koproba ati, mitik tonun ton, yanuka melinamake. Bukni, amelipnamak nang kan-kan, ninye weik tam ara, anang sik kanye diksukum kum unamake. Tenebuka, Allah el tam nang neika unamak bukni, dipkoprob ning ara, sik malye-malyeuk unyak nang, sik tam nanguk unamake.

³⁵ Ura, atalak ara, sik kel weik bikuka unamak nang kan-kan, ton tam nang, malye nang arye anang ati, obikcopura dipnamake. Bukni, Allah elti, dipkoprob tenebikce, el tam nang unyaka ati, adipnamaka deice arye, Allah arye anang teleb kipdeipnamle. Allah arye anang ati, malye winina ning pia kum, pia teleb nang kibuka, telebuk kipdeipnamle. Tonda, sik malye nang arye, opnamak kel weik nang ara, Allah arye anang, sik minop talak malye ulamik ning nirya ara, namin kiplirye, pia kum kipdeipnamle. Sik malye nang arye, Allah el mapu opnamak bukni, Allah el tam nang unyaka ati, aning nirya ara, sik mikip kilina ap, ‘Telebuk wininamak do, kum do?’ tenen, asilena ap ati upnamle. Ikin ning yalyeba, asilen ning ara, aminyan sirya daknamle talakuk, Allah arye aning nirya kum kipdeiplirye, el tam nang, tamubuka teleb kipdeipnamle. Tonda, Allah arye, ‘Ikin weik unamle ning ap, aning-aning nirya, kum kipdeipnamak ning nirya ap ara, atalakuk, min kum kum winipnamle,’ akunum tenebuk. Aning-aning kum kipdeipnamle talak ara, kabula. Aning ara, minop talak Allah arye, ‘Atalakuk, aning nirya kum kipdeipnamnarya,’ tenen akunum kintinip deiamukce, tenyamuk touk winipnamle.

³⁶ Bukni, aning-aning min kum kipdeipnamle talak ara, Siria tam mutuku talipnamle Raja birye, el kanye aryuk tenipnamle touk, aninguk wipnin banamle. Tonda, el talima eren deice arye, maknya kintiniplirye, nyanamle. “Kume nara, pia deice tam ulinye unune. Ninye arye si erenyak ning, dewa-dewa ap, ninye arye, ‘Nun ni koproba ani’ tenen, si erenyak talye ning nirya ap, tonda aning-aning nirya, deice tam erebuka ululnye, Allah Yahweh ara, na amu tamuk ulule. Ninye arye, si erenyak ning nirya ara, mambul kume. Na uk ara, mambul weiknye unune. Na tonok ara, weik deiyoknye unune,” nyapnamle. Utenepdalirye, el siuk weik tonun erenamle. Tonda, elce Allah Yahweh ati, pia malye-malye yupu weik tonun nyanamle. Ura, amutuku deiyoknye, Raja Siria bira, elce aning winipnamla ara, Allah arye, ‘Anye winipnamle,’ akunum tenyamuk touk ati, aning winipnin balamlya ani, Allah arye, ‘Atalak akunum,’ tenyamuk touk, akunum uplyopura, Raja malye weik ulamuka ati ara, Allah arye anye el deice, ikin weik ning deipnamle. Adeice arye, Allah el yu tenyamuk ning ara, sirya daknamle. Allah arye, akunum tenyamuk ning nirya ara, dipkoprob nong upnamle!

³⁷ Bukni, aning-aning min kume, kum danamle talak ara, Raja, el si ereipnamlanye bira, Siria mutuku ninye deiyoknye, el apu yapu nang ap, el li yapu ap arye, si erelamik ning nirya babye, ‘Sikda mambule,’ tenena kumce, aning babye, sik si kum erenamle. Aning nirya ara, yaninauk unamle. Atonun, kilapu arye si erenamak isa babye, ‘Elda mambul pia kume,’ tenena deice arye, atalye isa el si babye, kum erenamle. Raja birye aning-aning nirya ara, si ton kum erenamle. El dem atibuk, ‘Nara weik mambulnye, Allah unune,’ tenepdalirye, maknya kintininamle. Ati, el siuk erelanamle.

³⁸ El Raja bira, tamubuka el punun nang arye, si kum erelamik ninguk, aninguk si erenamle. Asi erenamle isa ara, ani. Ara, ninye arye cang weik keil arye, antanap dongobuka dolamak cang keil poka noutam, weik asik nirya ati, ‘Aisa elcuk, nunti kalekuka melipsiliba, yuk mutuku nang arye, yanuka kum opnamsiak’ tenen, si erenyak isa siuk, el Raja babye, aisa siuk erenamle. Elce aisa si erena ap, si erebuka kina ap ati, dengna weik ning, pia arenamle. Ara, emas ap, perak ap, yuk urasin teleb dengna weik keil ap, aning nirya boyalirye, aisa si erebuka kina ati arenamle. Ati, el punun nang, si kum erelamik isa ati, si erelirye, teleb ning arenamle.

³⁹ Raja bira, elce weik asik doplirye, cang weik keil poka dobuka unamak mutuku ara, ‘Yuk mutuku nang arye, na dam yanuka, mal olyanikcak’ tenen, yuk-yuk mutuku nang ati, ‘Anggunda, na dam yanuka melipnamnulume,’ nyabuka moropnamle. Ara, yata mutuku nang do nirya, talye isa si erenyak nang ati, ‘Anggun ton, na melina ati, na dam melilyanamlume,’ nyabuka moronamle. Moroplyopura, anang ton, el dam yanuka melinamake. Tonda, yata mutuku nang do nirya, el dam yanuka melipnamak nang ara, sikce, Raja ati, ‘Telebe, an tamuk kibibirye, an siuk erenamabe,’ nyabuka, elti, si erebuka kinamak nang ati, teleb ning weik tonun arenamle. Ara, Raja birye, sik anang ati, bona weik tonun arenamle. Tonda, el amu tam bukni, anang kan-kan, sik deiyok nang ton erepdeiplyopura, ‘Sikce yuk mutuku nang ati, talibikirye, ninye deiyok nang nirya unamak’ tenen, anang erepdeipnamle. Tonda, sik dengna ning arena ati ara, el talipnamle wa tuku ton bokuka, adeiyok nang nirya ati arenamle.

Sirya dakan talak winipnamle ning ati, sekuk yupu

⁴⁰ Winibuka unamle bukni, Allah arye, ‘Sirya tam Raja ara, el amutuku-amutuku taleamlye talak akunuma. Aning-aning nirya kum kipdeipnirye, sirya daknamne,’ minop talak arye akunum tenyamuk talak uplyopura, Allah arye lo arepliba, iknapnye tam, arah selatan tam mutuku, Mesir mutuku taleamlye Raja ap, el yin talin nang ap arye, dabu tam, arah utara tam mutuku talibuka ulamlinye, Raja Siria biti, mal pibinamake. Winipnamak talak ara, Siria mutuku talipnamle Raja arye, pia yu upliba, tamubuka iknapnye tam mutuku, Raja Mesir mutuku taleamlinye ap, el yin nang ap ati, pia mikip arye olyanamake. Siria mutuku nang arye, Mesir mutuku nang ati, olyanamak talak ara, mal olan talak, tuku deice ban ning, el si kereta kuda, tonda kereta perang ap, tonda kuda basam balye tam bukikirye, ninye olbalamak yin nang ap, tonda ninye olbana ati, laut mekwen deice ban ning, sik kapal laut perang deice arye, ninye pia weik bukuka bikirye, Mesir mutuku taleamuk Raja ati, olyanganamake. Sikce ninye olyanganamak ning ara, talye karin yanuka, malye kibikirye, atam arye kirikuka, otam ton binamake. Winipmanto ara, weik yinya doplirye, mikip asa balamle touk ubuka yakirye, dana-dana tam mutuku nirya ara, ninye weik opnamake. Winipmanto ning ton, weik mek oplirye balamle touk, ninye weik tonun olyanamake. Winibikirye, amutuku-amutuku nirya ara, doprobikirye, alapdopnamake.

⁴¹ Raja Siria mutuku taleamlinye ap, el yin talin nang ap arye, Israel nang, sik mutuku noutam bikirye ninye ara, nukna kum, yupa pia weik tonun, puluan ribu nang ton, obikcopura dipnamake. Bukni, Edom mutuku nang mitik tonun ap, Moab mutuku nang mitik tonun ap, tonda Amon mutuku nang mitik tonun ap, kam tuba unamak nang ara, kum obuka, sirya daknamake. Amutuku si sekmap nang, sikce talibuka unamak mutuku ara, Siria mutuku Raja arye, kum obuka, sirya daknamle. Amutuku nang ara, teleb aryuk, tuba kam unamake.

⁴² Siria mutuku taleamlye Raja arye, elcuk yuk mutuku weik tonun tabakuka oplirye, sik mutuku tuku ton, alubuka doproplirye, talibuka unamle. Tonda, Mesir mutuku noutam unyak nang babye, kum lyepdanamake. Mesir mutuku talibuka unamle Raja babye, Siria mutuku Raja arye, oplirye, amutuku babye, alubuka dopropnamle.

⁴³ Siria mutuku Raja arye, Mesir mutuku nang taleamikca dengna weik ning, emas ap, perak ap, tonda yuk urasin pia teleb ning nirya ara, alubuka dopropnamle. Winipnamle talak ara, Sudan mutuku nang ap, Libia mutuku nang ap arye, el tam kibikirye melipnamake. El yupu kekebikirye, el amu tam melibuka unamake.

⁴⁴ Winipnamle bukni, atalak ara, keting panalyangan tam, timur mutuku tam unamak nang ap, arah utara, dabu tam mutuku unamak nang ap arye, ‘Ilil uptueʼ tenen yupu, el dam nyabikiba kekeplirye, ‘Se yata winipnamne do?’ tenen, lukdanuka, ilil un ning ati, nyabikiba kekeplirye, pia yu weik upliba, malye kibuka bilirye, yuk mutuku noutam ton unyak nang ati, olbilirye, ninye weik obukaplirye, kum kipdeipnamle.

⁴⁵ Winipnamle talak ara, iknapnye tam taleamuknye, Siria mutuku taleamlye Raja ara, elce, ninye weik tonun akunum oplirye, sirya daklyopura, el tia talak una ati, tenda aik kintinip deipnamle. Ara, keting kumulbalye tam, weik laut mekwen el si Laut Mediterania otam, keting panalyangan tam ara, Allah el ‘Naʼ tenen, mutuku, el si erena ati aik domik mutuku, Yerusalem mutuku ara, awamukak bukni, anuotam mutuku ara, asukumuk el doltakan tenda aik kintinip deipnamle. Bukni atalak ara, Siria mutuku taleamlye ninye deiyoknye Raja bira, el asukum aryuk dipnamle. Winipnamle deiyok ning ara, yuk mutuku nang nirya arye, sikce elti, kum yanuka melipnamake. Yuk nang arye, el obikcopura, dipnamle. Ura, Malaikat arye, na Daniel biti nyapnukba, kekepsirye sekse.