Daniel 1 - Eipomek

Yehuda yalanye welnye el si Daniel bira, Babel mutuku ninye deiyoknye Nebukadnesar dam, bobuka delilbiyikba ulamuk yupu

¹ Ura, Yehuda yala ninye, sik ninye deiyoknye, Yoyakim ulamuk. Raja Yoyakim birye, keting tamun winilye deice arye, Yehuda yala ninye talibuka, ulamuk talak noutamak ara, Babel mutuku ninye deiyoknye, el si Nebukadnesar, el deiyok kibuka, Yerusalem mutuku yanuka warikik.

² Tonda, Allah arye nyapdeibukba, Yoyakim Yehuda yala ninye, sik ninye deiyoknye, talibuka ulamuk mutuku nirya, yanuka warikikce, obuka sirya dakik. Obikopura, Allah yupu aik pum tam deiamuk bona weik, yanuka doprobike. Winibikopura, Allah el si eren aik deiamuk ning, weik tam tonap, ninye ap bobukabikce, Babel mutuku bobiyikce, amutuku noutamak bukni, mutuku si Sinear mutuku noutamak, Nebukadnesar, Isa Mutuku Dongonye si erelamuk aik pum tam, binuka deibik. Deibik aik ara, aisa el mem ning delilamuk aik deibik.

³ Winibikopura, ninye deiyoknye Nebukadnesar arye, el amu tam pil donanye Aspenas biti, “Winipnulyame,” nyabuk yupu ara, ani. “Ance Israel ninye bobuka, boyanuka deipmap nang kan-kan arye, Yehuda mutuku taleamuk ninye deiyoknye Raja, el tam nang ton, bimince, wibuka na dam boyalyame. Tonda, Israel ninye talibuka ulamik nang arye, delilamik nang kan-kan ap, ninye ton dobuka, na dam boyalyame,” nyabuk.

⁴ Nyabukce, ayupu ton nyabuk. “Sik aboyanamalam nang ara, sik nong poudongona kum nanguk, wibuka boyanulyame. Anang ara, sik urasin dipdebuka, anyapmakin nanguk, wibuka boyanulyame. Ara, pia urasin teleb nang ap, sekolah weika arye kel kibik nang ap, nyapminya kekebikirye, moubuka kel bikmanto nang ap, aning-aning nirya winilamikce, akunum kel bikamik nang ap, tonda ninye deiyoknye, el ulul aik pum tam pil dopmanto nang ap, wibuka boyanulyame. Winipminyopura, Aspenas ance Babel mutuku yupu nyana ap, sekna ning ap, sekupu yupu nukna ning ap, kel kipnamaka ati, moubuka laka peterepnamlyame,” nyabuk.

⁵ Aning akunum nyabukopura, ninye deiyoknye Raja arye, “Sik anang asum-asum nirya, dinamaka ati ara, anggur mek ap, dina ap ara, na din dilamap atonun dinuk, sik babye kintinipnulyame. Tonda, keting tamun winilye deice arye, akunum peterepminba, kel kibikcopura, na aik pil dona ati, bobuka yaminba, na weik aik noutamak pil danamake.” Babel mutuku deiyoknye birye, Aspenas biti nyabuk.

⁶ Tonda, Yehuda yala wel nang ulamika noutamak ara, Daniel ap, el kwit capu Hananya ap, Misael ap, Asarya ap, ulamik.

⁷ Atalak ara, ninye deiyoknye, el amu tam ulamuknye, Aspenas birye, anang sik si nirya punubuka sisibuk. Asi ara, ani. Daniel bira, Beltsasar nyabuk. Hanania bira, Sadrak nyabuk. Misael bira, Mesak nyabuk. Asarya bira, Abednego nyabuk.

⁸ Daniel birye, pia moubuka tenebukce, ‘Ninye deiyoknye Raja ap, el melin nang ap, sik dinyak din ara, nara kum dinamne. Ara, adin dipnya deice arye, na nong malye bol bopniba, Allah arye kanye kum deipnilyake,’ tenebuk. ‘Na malye kum winipdeipdanune’ tenen, Aspenas biti, ‘Yuk din ton boyanutume,’ nyabukce, binuka morobuk.

⁹ Allah melibuka deice arye, Aspenas birye Daniel ati, bico tenebukce, Daniel moropmok ning, ‘Telebe,’ nyabuk bukni, “Minopce na deiyoknye ati nyapniba, ‘Telebe,’ nyaplyopura, melipnamakine,” nyabuk.

¹⁰ Nyabukce, Raja Nebukadnesar, el amu tam pil donanye, Aspenas birye, Daniel ati nyabuk. “Na deiyoknye Raja ati, ilil unulule. Ara, elce sik dina ati ara, ‘Adin anyuk dinamake. Yuk din ning ara, kum dinamake,’ nyapdeibuk. Ance moropmanilam ning ara, melipkitinye bukni, yuk ning dipminyopura, an urasin malye upkilirye, an kwit capu, sik nong teleb uplyopura, ninye deiyoknye Raja elce nati, yu upliba, ‘Na opnilyak’ tenen, nyapkine,” nyabuk.

¹¹ Nyabukopura, Daniel birye, Aspenas el melina ati ereibuknye biti, nyabuk. Anye bira Daniel ap, Misael ap, Asarya ap, kalikna ati, wipdeibuknye atia.

¹² Daniel birye, sik kaliknanye ati, nyabuk. “Nun nong urasin ara, ‘Teleb do, malye do?’ tenen, dipdenamsilam talak ara, like tonok arye dipdongobuka, mapra balamipya ani, like tagu barye (10) sum akunum kiplyopura, ila tuba tonap dipdenamsilame. Bukni, atalak noutamak ara, mula ap, mek ap, diamuk arenamsilyame.

¹³ Like tagu barye (10) sum akunum uplyopura, Raja arye kintineibuk din ning, wel nang ap, nun ap, urasin dipdenamsilyame. Adeice arye, ‘Dan nang urasin teleb do? Dan nang urasin malye do?’ tenen, dipdebuka, lak nyapnamsilyame. Adipdesiminbuk, ‘Aning ara. teleb ati ara, anyuk wininamlulume,’ nyapnamsilyame. Nun nirya ara, Raja el amu tam melin nanguk ubirye, el teneplye ninguk kekebuka wininamabe.” Daniel birye nyabuk.

¹⁴ Nyabuk buk, sik kaliknanye birye, “Anyapmanilam ning ara, telebe,” nyabukabukce, Daniel birye moropmok touk, tagu barye (10) sum deice arye, lo arebukce dilamuk.

¹⁵ Lo areamuk bukni, like taku sum (10) akunum kibukopura, sik nong kalimna teleb ubukce, pia mikip weik ulamuk. Bukni, Raja el din dilamik wel nang ara, sik nong kalimna ara, mitik tonun kibuk.

¹⁶ Winibuka ati, sik kaliknanye birye, aning eibuka kel kibukopura, sik Daniel ap, el kwit capu nang winilye ap ati, ninye deiyoknye Raja arye nyalamukba, el mapu silip arye kintinyamik din ning ara, kum arelamukce, mula ap, mek apuk, arelamukba, aninguk dilamik.

¹⁷ Tonda, adumbarye wel nang ati, Allah arye kanye deibukce, weik kel bikna deiyok ning ap, Babel mutuku yupu deice sekamik ning yinin ning ap, arebukba kel kilamik. Daniel biti ara, lengdar mana deiyok ning arebukba, lengdar deice arye, winipman ning, lak nyananye ulamuk.

¹⁸ Ura, Babel mutuku ninye deiyoknye, Nebukadnesar birye, “Keting tamun winilye deice arye, kel biknamake,” nyapdeiamuk touk, akunum ubikopura, atalak ara, Aspenas birye, sik akam nang nirya duknubuka, Raja el un dam boyayuk.

¹⁹ Winibukopura, weik deiyoknye birye, anang nirya ap, yupu talibikce, asipdeyukbuk, tamubuka nyabikopura, utenebuk. ‘Sik anang noutamak ara, Daniel ap Hananya ap, Misael ap, Asarya ap, weika arye kel bikamik bukni, sik yuk wel nang ara, mitik tonunuk kel bikamik,’ tenebuk. Utenebuka ati, Daniel ap, el kwit capu nang winilye ap, wipdeibukba, ninye deiyoknye, el aik pil deiyok koubik.

²⁰ Atalak noutamak nirya ara, ninye deiyoknye Raja arye, ikin ning dopropne talak ara, aning ara, sik anang ati asipdenabuk, sikce aning nirya lak lelamik. Aning deice eibuka, kel kiamuk ning ara, el mutuku noutamak ulamik nang ara, asing keten nang ap, talye nang kum winipmanto ning, winilamik nang ap arye, mitik teleb kibuka, laka lelamik bukni, Daniel ap, el kwit capu winilye nang ap, sikda weik kel bikamikce, dipkoprob ninguk, laka lelamik. Like tagu barye deice tamubuka, kel kin nang ulamik. Awinilamik ning ara, Allah arye, sik weik kel kin ning, arelamuka atia. Bukni, Babel mutuku kel nang ara, mitik tonun diamuk kel, bikamik.

²¹ Daniel bira, pia tuba, ninye deiyoknye Nebukadnesar, el aik pil dolamuk bukni, Persia mutuku taleamuk ninye deiyoknye, Raja Kores yayukce, Babel mutuku taleamuknye ap, el mutuku ninye nirya ap, obuka sirya dakukce, talibuk.