Bilangan 9 - Eipomek

Kaplibuka binamik kwalina like bitinye ning ati, “Winibuka kwalinamlume,” nyabuk yupu

¹ Israel ninye nirya, Sinai mutuku ulamik noutam ara, Allah el si Yahweh arye, Musa biti yanuka nyabuk. Ara, Mesir mutuku ulamika ani, amutuku akunum batakuka, pata mutuku biyikce, dabalimika ani, keting tamun bitinye akunum ubikopura, wala tonok kibuk talak ara, anoutam arye, Allah Yahweh arye ayupu nyabuk.

² “Narye Mesir mutuku noutam ulamlum talak ara, ‘Israel ninye nirya adiparyuk Kaplin kwalina Kaplinamlum talak ara, ani,’ nyapdeipsise touk, Israel ninye nirya adiparyuk Kaplin yuna tuba kwalinamlume.

³ Wala tonok, tanggal 14 sum akunum kiplyopura, keting akunum kumupnulye talak arye deiyok koubukapmunce, kwalinamlume. Ara narye, ‘Kaplibuka binamik kwalina pil ara, wininamlyame, aning ara pia kum wininamlume,’ nyapdeipsiba, ayupu noutam ubukba winilum touk, tupa-tupa wininamlume.” Allah arye nyabuk.

⁴ Nyabukba, Musa birye, Israel ninye ati, “Winibuka Kaplibuka binamlum yuna kwalipnamlume,” nyabuk.

⁵ Israel ninye Sinai pata mutuku noutam ulamik talak arye, ayupu kekebikopura, wala tonok, tanggal 14 sum deice arye, keting akunum kumupnamok talak ara, Allah Yahweh arye, “Aning ara, wininamlyame,” nyapdeiamuk touk, asum arye deiyok koubik.

⁶ Winibik bukni, atalak ara anggun Israel ninye kan-kan noutam arye, yate wiribuka nang ton, dipmangu nang sik bol akunum pimek. Abol pipmek nang ara, malye akunum updeipdanmeka ati, Allah el dam kum yangalamik. Tonda, Allah el si erena ati, yuna kum kwalipmek. Ati, adiparyuk asum Kaplibuka binamlum yuna kwalipnamek ning ara, Se, nun ton kum melipmapyeura, kum dipnamabe,’ tenebik. Ati sik anang arye, Se yate wiriptibye do?’ tenen, adiparyuk Musa ap, Harun ap, sik damuk binuka asipdeyik.

⁷ Biyikopura, “Nunda malye upmabe. Ara, dipmoknye ton bol pipmaba ati, Allah el kanye ara, ‘Sikda akunum malye updeipdanmake,’ tenesulule. Ati el si erena ati, yuna kum kwaliptibye. Bukni, aning ara nun like. Yata deiyok ati, dipmoknye el nong bol pipmapya babye, Allah arye, ‘Atalak ara Kaplibuka binamlum yuna kwalinamlume,’ nyapdeiamsuk touk, yata ati nunda domba mi obuka, nun kayapu nang ap, neika Allah ati, kum arepnamtinye do?” nyabuka asipdeyik.

⁸ Nyabuka asipdeyikba, Musa birye tamubuka, sik anang ati nyabuk. “Kume, sikda talye luba kibuka Kaplibuka binamlum Yuna ara kum kwalinamlume. Talye urdem daunmamunce, kekemamunyeba, Allah el dam binuka asipdeniba, Allah Yahweh arye, ‘Winipnamakeʼ nyapdeipnilye yupu kekepnyopura, tamubuka laka nyalyanamsine,” nyabuk.

⁹ Nyabuk touk, Allah dam binuka asipdeyukura, Allah Yahweh arye tamubuka Musa binyak, nyabuk.

¹⁰ Ance Israel ninye ati, nyapnulyame. Winipmanto ara, anggun damnye do, anggun ap neika ulalum nang arye do, anggunce deipmunyeba dadeipdanin banamak nang arye do, anoutam arye akunum dipmalinye, el nong bol pipmunyopura, anggunda akunum malye updeipdanmalume. Bukni, Kaplibuka biluma ati Yuna ara, mambul weik sum ati, akwalina ara, dipkoprob kwalinamlume, kum bataknamlume. Aning atonun, pera mutuku binuka, daunmamunye bukni, yuk mutuku aunmamunya babye, Allah el si erena ati, adiparyuk Kaplibuka binamlum sum yuna akunum uplyopura, Israel ninye yunamaka ara, melibuka kwalinamlume. Aning ara mambul weik sum ati, dib koprop kwalinamlume, kum bataknamlume,” nyabuk.

¹¹ Bukni, sik malye updeipdanmakce nang babye, Kaplibuka binamlum yuna melipnamake. Winipnamak bukni, wala tonok ara kum melipnamake. Wala tonok bisiplirye, wala bitinye kiplirye, tanggal 14 asum akunum uplyopura, sik babye Allah si erena ati, Kaplibuka binamlum yuna melinamnyake. Akaplibuka binamlum yuna ati domba basam obuka, kwalipmak ning ap, tonda nena kum roti kwaning dapmakce ning ap, siklelamle kekena yupmakce ning ap, dobuka dinamnyake.

¹² Asum dinamak ning ara, yate ning do, ton kwal deipmakca ani, beren tam kum dinamnyake. Tonda, na arena ati, ‘Kaplibuka binamlum yuna kwalipnamapʼ tenen, kintinip deibikce kam ning ara, el yan ton pia kum celongonamake. Akaplibuka binamlum kwalina ati, ‘Aninguk winibuka-winibuka unamlume,’ nyapsise touk, wininamake.

¹³ Aning ara, nyapmasin bukni, winipmanto, malye ning kum upmalinye ap, tonda yuk mutuku binuka kum upmalinye ap, akaplibuka binamlum yuna kum melipmalirye batakmalyopura, el ‘Anye bira, na mi koproba kuma,’ tenenamne. Sikda, atonye biti, Israel ninye ulamikak arye, buru tam yakdonokmunyeba, yukak binuka unmali bukni, aminyan dipnamlarya. Ara, el anye birye asum ara narye, ‘Aninguk wininamlume,’ nyapdeipse sum ati, elce ‘Aning ara daupmalyeʼ tenen, kum melipmalya deice arye, na yupu yanipmanila atia. Aning kum winipmalya deice arye, malye upmalye ati wenena ap, dekna ap ara, ikin ning weik arepniba, el mining deice yanganamle.

¹⁴ Winipmanto ara, sik unyaka kan-kan arye ninye asik nang tonok ton, el Kaplibuka binamik yuna ton ‘Melipnun,’ teneplyopura, na Allah arye, “Aning winibuka-winibuka unamlume,” nyapsise touk ubuka melinamlule. Anyapdeipsise ara, anggun Israel ninye koproba babye, sik ninye asik nang babye, anyapsise touk wininamlume.

Israel ninye bisik balamik talak, weik uku menekuka balamuk ning ap, tonokak ulamik talak, weik dua tiklamuk ning ap ati, nyabuk yupu

¹⁵ Ura, Allah el si eren aik, baju bol aik, akunum dobik sum arye dipdongobuka, dotalak nirya ara, weik dua yayukce, anyaik ikdeiamik deice tam nirya, yanuka singnilongolamuk. Allah nyalin yupu ara, anyaik noutamak deiamike. Atalak arye, dipdongobuka dotalak nirya ara, keting wekelbalamle talak arye dipdongobuka, beren tam talak nirya ara, pia ati anyaik deice ara, adua dem bukni, el urasin ara, weik uku dilamle touk, tikna arye, anyaik deice dilamuk.

¹⁶ Anyaik deice tam winilamuk ning ara, aning uka. Ara, asum-asum nirya winilamuka bukni, keting noutam arye, weik dua yana arye anyaik siknipmana ani, lukunyan talak ara, weik uku buk lapna arye, anyaik deice tikna arye dilamuk.

¹⁷ Winilamna ani, Allah arye adua erepropna arye, yukak bobinopura, adiparyuk sik Israel ninye arye, anyaik dakukapna arye, sik babye adua dem melibuka dobolbalamik. Weik dua bum tobuka banmanabuk eipna arye, adua binuka tunim apne sukumuk, sik Israel ninye eipna arye, asukumuk yana arye, sik mana ati, baju bol aik ap, Allah ati si eren baju bol aik ap, adiparyuk yanuka dolamik. Winipnopura, adua ara, anyaik deice tam yanuka singnilongolamuk.

¹⁸ Ati ara, Allah arye, sik bisik bana ap, mutuku una ap ara, weik dua binuka teikmanak uk, sik aik binuka dopna arye ulamik. Ati ara, Allah arye, “Winira yuk mutuku binamlume,” nyalamuk talak ara, adua asukum arye ubuka, yukak binura, sik Israel ninye arye anyaik nirya, ulubuka bisik balamik. Atonun ton, Allah arye, “Winira amutuku unamlume,” nyalamuk talak ara, anyaik deice tam adua siknilongolamukba, sik Israel ninye arye, amutuku uk, anyaik binuka dobuka ulamik. Ara, sik ni koproba Allah arye, dua bobuka binuka deipnak ap, weik uku buk dilamukak ap deice arye, sik unamik mutuku ap, banamik mutuku ap nirya, laka nyalamukce, aning ara winilamuk.

¹⁹ Ati, adua bana ara kumce, asukumuk tunim abuka, Allah el si eren aik deice tam uk, apia tiknopura, sik yukak kum balamik. Nimalye arye, asukumuk ulamik. Atalak-atalak nirya ara, Allah el si Yahweh arye, “Adua weleplirye banmalye talak uk, banamlulume,” nyapdeiamuk touk moubuka winilamik.

²⁰ Aning atonun, adua ara tenepne talak uk, Allah el si eren aik deice tam tiklamuk. Ton talak ara, like bitinye sum, winilye ato asukumuk tiklamok bukni, ila tuba tonap tamubuka balamuk. Ton talak ara, like weik tonun arye, tonok mutuku atiklamuk. Atalak noutamak nirya ara, sik Israel ninye arye, amutuku uk ulamik. Ara, Allah el si Yahweh arye nyapdeiamuk touk, anyaik deice tam, dua yanuka teikamna ati, sikda amutuku uk ulamik. Allah arye, “Winira, anggun yuk mutuku binulume,” nyapne talak ara, sik dolamik aik nirya ulubuka balamik.

²¹ Adua ara, tenepne talak lukunyan atonun, pia awinipmana ani, bereknopura, Allah arye adua dobukapnarye, yukak bobuka binopura, sik Israel ninye babye, anyaik ulubuka, adiparyuk balamik. Ara, lukunyan babye, keting noutam babye, Allah arye adua dopropnarye ban talak ara, sik aik nirya dakuka bisik balamik. Ton talak ara, like tonok sum uk, asukumuk teiklamuk. Ara, keting wekelbalamle talak arye dipdongobuka, beren tam talak nirya anyaik deice ara, adua teiklamuk bukni, bereknopura, ila tuba ton banmanaba, sik Israel ninye babye, aik ulubuka balamik. Ton talak ara, like weikto arye, tonok mutuku ateiklamuk. Ati lukunyan babye, keting noutam babye, Allah arye adua dopdakuka, adua yuk mutuku binuka teiknarye upnopura, sik babye adiparyuk, asukumuk binuka malamik.

²² Aning atonun, adua ara yata talak karin do, pia tunim abuka anyaik deice tam uk tiklamuk talak ara, like bitinye do, tonok wala do, keting tamun noutamak nirya do, adua kum kiprakukua binopura, sik asukumuk ulamik. Bukni, aulamna arye dilamne bukni, adua kipna arye, banopura, sik babye abisikuk melibuka dobolbalamik.

²³ Ara, Allah arye nyapdeiamuk touk, sik tonokak ulamna ani, yukak balamik ning deiyok ara, Allah arye Musa biti, “Winira, amutuku uk unamlume,” nyapdeiamuk touk winilamik. Tonda Allah arye, “Winira amutuku batakuka yukak binamlume,” nyapdeiamuk touk, Allah yupu kekebuka winipre balamik. Ara, Allah arye el mikip Musa deice deiamuka ati, Musa birye Allah nyapdeiamuk yupu nyalamukba, kekelamukce, Israel ninye ati nyalamuk touk, sik Israel ninye arye kekebuka dobolbalamik.