Bilangan 8 - Eipomek

Allah el si eren aik pum tam delilamik lampu weisa deiyok ning ati, nyabuk yupu

¹ Allah el si Yahweh arye, Musa biti nyabuk.

² “Ance, Harun biti binuka nyapnalyame, ‘Upna lalamle ning ara, tekbarye, memebuka kintinip deibikcopura, aupna el deiyok deice uk binuka deipnulule. Atalak ara, ance moubuka deipminba, alampu upna urasin dam nirya ara, dirina uk unamlule,’ nyapnamlyame,” Allah arye nyabuk.

³ Allah arye, Musa biti, “Upna ara winibuka deipnamlume,” nyabukopura, Musa birye Harun binyak laka nyapdeibukba, Harun birye Allah nyabuk touk winibukce, dobuka deibuk. Ara, upna deiyok ning deice arye, upna tekbarye lalamle ning ara, binuka dobuka deibukba, upna deiyok urasin tam nirya ara, dirina uk ubuk.

⁴ Alampu upna, deice tam ara weisa tekbarye uamuk bukni, alampu amu tam, deiyok dam arye dipdongobuka, eitam nirya ara, el nong deice bunga urasin atonun teleb ulamle touk ubuka, puturubuka deibikce, urasin teleb kat ning emas arye, taplakuka memebik. Ataplakuka memebik ning dobuka, aweisa deiyok dam deibukba, urasin teleb ubuk. Aning nirya ara, Allah arye Musa biti, “An bimince, Harun binyak nyapminba, aweisa el urasin winibuka-winibuka dopnamlule,” nyapmok ning ara, anyapmok touk ubuka, Harun birye memebuka deibuk.

Lewi yala nang wipdeibuk talak yupu

⁵ Allah Yahweh arye, Musa biti nyabuk.

⁶ Musao, Israel yala ninye noutam bukni, akan-kan arye, sik Lewi yala nang tonok ara, wipnudurume. Aning deiyok ara, ‘Sik Lewi yala nang ara, Allah el mapu uk unamake. El ninguk unamakʼ tenen, sik Lewi yala nang nirya wiprumnyopura, sik malye ning nirya kilina ati, teleb ulin pil dobikirye, teleb kipdeipnamdurume.

⁷ Ura, sik Lewi yala nang, teleb kilina ati, winipnamrurume. Sik bol deice ara winipnamrurume. Ara, an taruk arye, pia teleb mek burubuka, sik anang bol deice likuka dikdonokminba, amek arye anang sik bol piplirye teleb upnamlule. Apil winibuka dobikcopura, sik anang nong bol deice nirya potong aupmalyopura, ‘Sik potong nirya ara, silet arye kopnamlume,’ nyapminba, sik nong bol deice nirya adiparyuk silet arye kopnamake. Tonda, sik ongonyak baju nirya ara, “Mek liknamlume,’ nyapminba, mek liknamyake. Adeice arye, sik nong nirya ara, teleb updeipnamnyake.

⁸ Aning nirya akunum winibicopura, ‘Sapi basam yim tonok, winiryuk nepmalye ning ap, roti din ning dana ati, el si tepung ap, minyak mek ap tabakuka kintinipmakce ning ara, aning boyanuka arelyanamlume,’ nyapminba, boyanamnyake. Tonda, ‘Sapi basam yim winiryuk nepmalye ning tonok ton tabakuka arelyanamlume,’ nyapminba, boyacopura, sik imam nang arye, asapi basam bobinuka obikirye, sik anang malye wamice ning nirya, kum kilina ati, asapi basam boyanuka uku dongonamnyake.

⁹ Winibicopura, ance sik Israel yala ninye nirya bulupdeipnulyame. Bulubuka wekikcopura, ance Lewi yala nang ati, ‘Anggunda, Allah ap, ninye ap eldana ati, dolamik aik urasin dam yanuka tiknamlume,’ nyapminba, sik Lewi yala nang ara, ayanuka tiknamnyake.

¹⁰ Anyaik urasin dam bukni, na Allah Yahweh dam tikikcopura, atalak aryuk, sik Israel yala ninye nirya ara, Lewi yala nang, sik kisok deice taruk deipnamnyake.

¹¹ Anggun Israel nang arye, sik Lewi yala nang, sik nong deice taruk deipmunyopura, Harun, ance sik Israel ninye ara, na Allah dam lak kilinamnelyame. Sik awekmacak ara, ‘Lewi yala nang ara, Allah el aik talibuka pil donamak nang unamakʼ tenen, an taruk erepmince, ‘Sik anang ara, Allah el ninguk unamaka ati, wipdeipne,’ nyapminba, sik adiparyuk kekepnamnyake. Winibikca deice arye, Lewi yala nang sikda, na si eren aik talibuka pil dona deiyok nang unamake. Sik anang ara, na Allah Yahweh ati, na si eren aik pum tam pil donamake. Sikda, na kanye delin nang unamake.

¹² Tonda, atalak aryuk, sik Lewi yala nang, sik taruk dobuka, sapi basam yim bitinye boyanuka deipmakce ning deice, sik taruk dibikcopura, sik anang malye un ning kilina ati, imamnye birye, tonok sapi basam boyanuka oplirye, uku dongonamle. Tonok sapi basam boyanuka oplirye, na Allah si erena ati, uku dongopnamle. Adeice arye, sik Lewi yala nang malye uamikce ning ara, na Allah arye kum daneipnirye, sikti, teleb updeipnyopura, anang arye, na pil talibuka donamake.

¹³ Apil-apil nirya akunum winibikcopura, sik Lewi yala nang ara, na pil dona ati, yuk kintinip deipnulyame. Anang akunum kintinip deipminyopura, an taruk erepmince, nyapnulyame. ‘Anggunda, Harun ap, el mapu ap, neika pil donamlume. Allah el tibuk pil donamlume,’ nyapmince, anang ara, nati wipdeipnulyame.

¹⁴ Ayupu ara, sik kekenak laka nyapmince, kintinip deipminyopura, sik Lewi yala nang ara, Israel ninye kan-kan arye wibuka dopmince, sik ayala nang ara, ance, ‘Allah el ninguk unamakʼ tenen, teleb kipdeipnulyame. Winipminya deice arye, sik anang ara dipkoprop, na pil dona deiyok nang ati, na kanye delin nang unamnyake.

¹⁵ Musa, ance sik Lewi yala nang ati, taruk erepmince, ‘Anggunda, Allah el pil don nang unamlume,’ nyapmince, na Allah ati akunum wipdeipminyopura, tonda ‘Lewi yala nang sik malye un ning kilina ati, laka nyapmakin pil nirya akunum pil dopminyopura, sik anang nirya ara, na si eren aik pum tam talibuka, pil donamniyake.

¹⁶ Aning ara, talye kum nyapkine. Deiyok ara, na Allah arye, anggun Lewi yala nang ati, sik Israel ninye unyak noutam arye, akunum wipdeipne. Tonok Lewi yala nang babye, kum batakmane. Sik nirya, na kanye delin nang unamnyake. Sikda, Israel ninye, sik min yuma delilamak mapu punun nang atonun akunum kipdeipne. Ati, sik Lewi yala nang nirya ara, na mapu koproba kibikirye, natibuk pil donamniyake.

¹⁷ Aning babye, talye ati kum nyapsine. Deiyok ara, na Allah arye sik Mesir mutuku ninye min yuma deiamik mapu nirya ap, sikce weilamik kam ning ara winiryuk deiamik ning ap, obuka batakse. Aopse talak ara, sik Israel ninye arye, min yuma deiamik mapu nirya ap, sik weilamik kam ning yala-yala nirya ap, min yuma delilamik kam ning yala nirya ara, kum omsirye, aning nirya ara, ‘Na mapu unamakʼ tenen, bokukapsirye, wipdeipse. Na ning koproba kiamse.

¹⁸ Aning atonun, atalak ara, Israel ninye arye, sik min yuma delinamak mapu nirya ara, sik pununa ati, narye sik Lewi yala ninye akunum wipdeipne. Israel ninye arye winiryuk delinamak mapu bataknirye, sik pununa ara, narye Lewi yala nang ati, min yuma mapu delilamak touk winipnirye, sik yuk wipdeipne. Winipnirye, sik anang ara, na mapu koproba kipne.

¹⁹ Aninguk kum bukni, tonda sik Lewi yala nang ara, na Allah arye dobuka, sik imam nang, ara Harun ap, el mapu ap, sikti, arepne. Ara, sik Lewi yala nang ara, Israel ninye kan-kan unyak bukni, sikak wipdeipne. Ara, na ap, ninye ap, el dan aik pum tamuk talibuka, pil donamniyake. Tonda, sikcuk Israel ninye malye ubikce nang ati, ‘Allah arye wenebuka oplyak ati, namin kibuka meliplirye, aning nirya kum kipdeiptue,’ tenebuka, na dam yakirye, moronamniyake. Winipnikcopura, Israel ninye mangkau arye, na si eren aik dam yatumopura, adiparyuk opnamsitinye bukni, aning kumce, luba kipnamne. Aning ara, sik Lewi yala nang arye, pil donamaka deice arye, Israel ninye arye malye unamak ning ara, namin kibuka melipnamnarya. Sik wenena ati, mambul weikuk boyanuka, sik dam kum deipnamne. Sikda wenebuka kum opnamne.

²⁰ Aning ara, Musa ap, Harun ap, sik Israel yala ninye anyapce, sik Lewi yala nang ara, ‘Allah el ninguk unamakʼ tenen, Allah ati arebik. Awinibik ara, Allah Yahweh arye Musa biti, “Winipnamlyame,” nyapdeiamuk touk, pil dobukabice, anang Allah ati arebik.

²¹ Aning atonun, sik Lewi yala nang ara, Allah arye, “Winipnamake,” nyapdeiamuk touk, sik malye wamice ning ati, kilibuka teleb kilina ati, apiluk dobik. Ara, sik ongolamik baju nirya babye mek likik. Aning nirya akunum winipkopura, Harun birye, ‘Allah el ninguk unamake. Sikda el si eren aik pum tam piluk donamakʼ tenen, el taruk erebukce, sik anang ara, Allah arena ati, arelbalamak ning atonun ubuka, sik anang kintinibuka Allah el damuk arebuk. Tonda, sik Lewi yala nang arye, malye ulamikce ning pununa ati, ‘Allah arye, sik malye ning nirya kilibuka, kum daneiplirye, sikti, pia teleb kipdeipnamleʼ tenen, kam ning obukabukce, Allah ati arebuk.

²² Aning ara, atalak arye dipdongobuka doupnin balamuk talak nirya ara, Allah Yahweh arye Musa biti, ‘Sik Israel ninye arye, Lewi yala nang wibuka dibikiba, na si eren aik pum tam ap, anyaik dam ap ara, winibuka pil dopnamnyake,’ nyapdeiamuk ning ara, anyapdeiamuk touk winibuka pil dopnin balamik. Winibuka, pil dobika deice arye, Lewi yala nang nirya ara, Allah ap, ninye ap, eldana aik pil dona deiyok nang kipdeibike. Anyaik noutam ap, anyaik dam ap pil dona ati, “Sikda winipnulyame,” nyana deiyok nang ara, Harun ap, el mapu ap, sikuk ulamik.

²³ Allah Yahweh arye Musa biti nyabuk.

²⁴ “Sik Lewi yala nang nirya kum bukni, sik pil dopmanto nang ara, sik keting tamun dua puluh lima (25) tahun eitam uplye nang ara, na pil dona ati wipdeipmunyeba, na ap, ninye ap, eldana aik pum tamuk, pil donamake.

²⁵ Bukni, sik anyaik pum tam ulamikirye, pil dolamikiba, keting tamun lima puluh (50) tahun akunum uplyopura, tonap apil kum donamake, adiparyuk apil batakikirye, urdem daunamake.

²⁶ Na Allah ap, ninye ap, eldana ati tenda aik pum tam, na si eren pil akunum batakikcopura, abatakikce nang sikce anyaik pia mambul weik pil tonap binuka kum pil donamake. Bukni, sik Lewi yala nanguk sik kayapu yuk nang ton anyaik binuka pil dokcopura, sikce ananguk melibuka unamnyake. Aning wininamaka ati, sik Lewi yala nang pil dona ara, aninguk pil donamake, nyapne.” Allah arye, Musa biti nyabuk.